الاثنين، 30 يوليو، 2012

الحلم قصه قصيره


 تجربه لكتابه قصه قصيره 
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
الحلم 
استيقظ عبد الله  من نومه على رن هاتفه كان صديقه على رد عليه  الو ازيك عامل ايه
  -الحمد لله تمام
 –وانت اخبارك ايه
الحمد لله  
-ايه الاخبار جهزت ورقك ولا لسه  
- الورق خلص  لكن  و توقف عن الكلام
-  لكن ايه
-مش عارف  بقالى فتره بحلم بحلم غريب شويه مخلينى متردد فى السفر
- حلم ايه
 - بحلم انى ذهبت للمستقبل انبهرت بكل مافيه من تكنولوجيا ورحلات فضاء الى اخره  واتعرفت على واحد من الناس من  اللى فى المستقبل  بقيت ماشى معاه زى ظله لغيت  عقلى وبقى كل اللى بيقوله فى نظرى صح ما انا جاى من زمن لسه ماوصلش للعلم  اللى هما وصلوله  رحت معاه كنا بنسهر  ونشرب خمر ونعمل  كل ما يجى على بالنا من اى فعل  مهما كان يعنى من الاخر عملنا كل شئ غلط تنازلت عن اخلاقى ومبادئ وفجاه لقيت نفسى يائس محبط مش عارف اعمل ايه فاشل  وقررت اتخلص  من حياتى   وفجاه   ظهر لى واحد يمنعنى سئلته انت مين قالى انا اللى  جبتك فى الزمن دا قولته وعايز منى ايه  قالى  عايزك  تعيش انت ليه عايز تتخلص من حياتك   قولته  وايه الفايده فى حياتى وانا ماليش قيمه  انا فى زمن سابقنى بزمن ازاى هقدر اعيش واتعلم فيه من اخطائى  ازاى وهو سابقنى بكتير انت ليه جبتنى هنا رد عليا هو مش انت كنت رافض زمنك وبلدك غيرتلك زمنك وبلدك عايز ايه تانى قولتله واضح ان مافيش فايده قالى مافيش حاجه اسمها مستحيل  فى امل تحدى تعلم  قلتله بس دا مش زمنى وكمان اتعلم ايه تانى ما اتعلمنا كتير خلاص كبرنا  عن التعليم  رد ماكنت رافض زمنك وكمان مافيش حاجه اسمها اتعلمنا كتير الانسان لحد مايموت بيتعلم  قولت  بس مش فى بلدنا   قالى حتى بعد كل التطور دا بتقول مش فى بلدنا  طب  ايه رايك ارجعك  قبل زمنك وتجرب تانى  واديك هتكون انت اللى سابق الزمن مش هو اللى سابقك   وهتكون مع ناس انت متقدم عنهم  ورينا هتعمل ايه  بقى قلت ماشى اجرب مش هخسر حاجه  معرفش عمل ايه  وفجاه بقيت فى  زمن الملك احمس
- الملك احمس مره واحده اتغطى وانت نايم وانت هتوصل لعالمنا تانى وضحك على
- ماشى يا خفه
-طب كمل باقى الحلم
-  لا بقى خلاص هتغطى وانا نايم خلاص
على ضاحكا  كمل يا رغم واضح انه كان حلم خيال علمى على تاريخى 
عبد الله ضاحكا  ماشى  ياعم الظريف هكملك  اول ماظهرت ليهم تم القبض عليا كانوا فاكريينى من الهكسوس  و اثناء المحاكمه حاولت اقنعهم باننى من زمن اخر واحمل لهم علما كثير
 على ضاحكا طول عمرك شكلك سوابق  وطبعا قتلوك ماهما مش هيصدقوا ولا هيقتنعوا بالف ليله وليله ديه الموضوع دا اتعمل فى اكتر من فيلم عربى  قبل كده
- لا يا خويا    اقتنعوا بيا لما شافونى عارف معلومات عنهم  و علمتهم كيف يصنعون كمبيوتر  وانترنت و ربنا ستر  عرفت اعلمهم ازاى بردوا الله اعلم  المعرفه مفيده احيانا بردوا   فرحت بنفسى اوى بانى انجزت وعلمتهم تكنولوجيا
   -  طب ماانت  حلو  اهو وليك لازمه  امال ايه المشكله اه ماكنش فيه المواد اللى تصنعلهم بيها الكمبيوتر
-لا ما انا قولتلهم المعلومات و ازاى   الكمبيوتر والانترنت  اتعملوا وهما بعلمائهم اتصرفوا  وكان الملك احمس معجب بيا  جدا انى  علمته شيئا وخصوصا عندما بحث على الانترنت عن العجلات الحربيه واللى حارب بيها الهكسوس  اتعلم من خلال بعض المواقع صنعها  ونجح فى التغلب عليهم
- اخيرا عرفنا احمس عمل العجلات الحربيه ازاى  واخيرا انت عملت حاجه عدله  بس يا خساره فى الاحلام بس
ياريتها كملت كمان لكنى جائت عليا لحظه شعرت باننى يجب ان اكون انا الملك نفسه  حاولت عمل مؤامره عليه ولكنى فشلت  وتم القبض عليا  وحكم عليا وسجنت
- طول عمرك فاشل يابنى حتى فى الحلم كاسفنا   وطبعا صحيت قبل ما يذبحوك  

- لا ماهو زارنى الملك احمس فى السجن  كان عايز  يستفهم منى لماذا فعلت ذلك صارحته باننى كنت اريد ان اكون ملكا مكانه وتحدثت معه بصراحه باننى لم اجد فيه الشخصيه التى تصلح ان تكون ملك فهو ليس  اكثر منى علما اندهش عندما سمع كلامى وضحك وقال لى انا فعلا لا اصلح ان اكون ملك  فعلا فانت اكثر علما منى ولذلك هزمتك واوقعتك فى السجن
- اه دا كده بيهزك وش بس اول مره اعرف ان احمس بيسخر من الناس عادى المفروض ماكنتش تعديهاله ديه 
عبد الله ضاحكا لا ما انا قلت الطيب احسن   وعملت عبيط و قلت له لا اعلم لماذا الفشل يحاوطنى فى كل زمن وفى كل مكان  فقال لى وهذا هو عقابك الذى ساعاقبك بيه  فقلت له قولى انا فاشل ولا العيب فين بالظبط العيب فيا ولا فى مين  و اقتلنى بعدها فضحك وقال اتتمنى الموت  فقلت له  وما فائده الحياه وانا اسير الفشل فقال لى اخبرنى بقصتك لكى  اشرحلك سر فشلك فحكيت له القصه  وازاى روحت الى المستقبل  وفشلت لحد مارجعت للماضى عنده وسجنى  وسئلته هو انا فاشل ولا الناس ولا الزمن ولا ايه   قالى انت مش فاشل لكن مش عارف تنجح انت لما روحت للمستقبل وانبهرت
مفكرتش انك تتعلم قلت تقلد سلوكهم وخلاص  وعشان فكرت انك تقلد مش تتعلم قلدت اسواء نموذج فى تصرفاته  ففشلت لانك استكبرت انك تتعلم وتقول انك مش عارف وبعت كل اخلاقك ومبادئك  وعلى فكره انت لو كنت فكرت تتعلم كنت هتقلد بردوا بس هتكون فهمت اى نموذج تقلده عشان تنجح  ولما وجتلنا هنا  جيت متكبر على الناس  عايز تحكمهم عشان انت عارف معلومتين زياده لكن عشان تكبرت على الناس ماعرفتش تفهمهم هما اتعلموا العلم اللى عندك وغلبوك بيه ففشلت لان مافيش حد هينجح لو تكبر على العلم او على الناس   تفتكر ديه رؤيه ياعلى رساله ليها معنى معين لها علاقه بسفرنا وتركنا بلدنا واحنا مش عارفين رايحين هنعمل ايه ولا ايه
-                                                - مش عارف يمكن رساله تحذير من انبهارنا الزائد بالغرب اللى ممكن يخلينا نقلد الغرب فى اى شئ حتى ولو كان سئ زى بالظبط ما بنعمل واحنا على ارضنا هنا منبهريين بالغرب وبنقلد اسوء ما عنده لاننا متكبيرين على علمه بدعوه اننا اصحاب حضاره سبع  تلاف سنه مش واخدين بالنا ان حضاره الماضى لا تصنع حضاره لبكره لكن العلم هو من يصنع الحضارات  بس بص اتغطى كويس وانت تبطل تحلم
-                                                - كده اموت على راي محمد منير لو بطلنا نحلم نموت
-                                                  - ايوه بس حلم عن حلم يفرق  والمهم ان الحلم مايستسلمش قدام الصعاب ويا سيدى  ابقى اتغطى كويس وانت نايم عشان ماتحلمش احلام غريبه وركز فى حلمك حلم السفر 
                                             -  الحلم   لو مش لغايه  محدده  يكون كابوس ياخوفى ليكون حلمنا  كابوس   وعلت ضحكاتهم
    


السبت، 28 يوليو، 2012

عيد ميلادى

ومضى قطار العمر   ياولدى 


فضفضه تهنئ  صاحبها بعيد ميلاده السادس والعشرون  اطال الله عمره  وتدعو الله ان يديم  عليه الصحه  
وتحتفل مع   زوارها  بهذا العيد العظيم 
نيهههههههههههاهها 
 البوفيه


الاثنين، 23 يوليو، 2012

السحور بين الماضى والحاضر


من اول ما طلعوا علينا فى برامج الاكل يقولولنا ان وجبه الفطار اهم وجبه  ولها فوائد  و ان  وجبه العشاء مضره عشان بناكل و بنام علطول والواحد كان بيسئل نفسه  طب ازاى فرض علينا الصيام وازاى بيقال صوموا تصحوا  لنرجع و نعرف ان الرسول عليه الصلاه والسلام  كان بيقولنا اخروا السحور  وعجلوا بالفطور  ومع شويه مقارنه  بين الماضى واليوم بنشوف انهم زمان لما كانوا  يناموا بعد العشاء ويصحوا قبل الفجر   لما ياخروا السحور يعنى يصحوا قبل الفجر  يتسحروا   وبعدها ياذن الفجر ويصلوا   ويبداءوا يومهم فبيكون وجبه السحور فى محل وجبه  الفطار  اللى بيقول خبراء التغذيه انها اهم  الوجبات  انما نحن  الان بنتسحر وبعد كده بنام سواء اتسحرنا قبل الفجر ولا بعد العشاء   فبتكون وجبه السحور فى محل وجبه العشاء اللى هى عند خبراء التغذيه مكروهه لاننا بناكل وبنام    ودا طبعا لان نظامنا احنا  هو اللى غلط  
انتهى

الخميس، 19 يوليو، 2012

كل سنه وانتم طيبين

كل سنه وانتم طيبين 
فضفضه  تشكركم على متابعتكم خلال  حمله التدوين اليوم من 20 يونيو الى 20 يوليو  وتعتذر لكم لتقصيرها معكم  اسعدنى المشاركه  معكم والاستفاده منكم   والتعرف على مدوناتكم  شكرا لكم   جميعا واتمنى ان تكون بوستاتى نالت اعجابكم

  شكرا خاص  للدكتوره  شرين سامى  صاحبه الدعوه  
كنتم مع فضفضه   مع حمله التدوين اليومى
كتبها  عمرو يسرى
معليقين الحمله   مع حفظ الالقاب
1-      مصطفى سيف  الدين
2-      احمد احمد صالح
3-      رحاب صالح
4-      ريماس
5-      الازهرى
6-      نور القمر
7-       محمد الجرايحى
8-       قلب القطه
9-      شبكه الاصاله العربيه
10-  Haytham Kilany
11-   وجع البنفسج
12-  MEROOooOOoo
13-  beautiful mind
14-  شمس النهار
15-  كارولين فاروق
16-   هبه فاروق
17-   بنت من الزمن دا
18-   هبه الله
19-   ليلى الصباحى
20-   كريمه سندى
21-  جايده العزيزى
22-   زينه زيدان
23-   الاحلام
24-  Alzhraa_Mustafa
25-  MaNoOoSh
26-  eng_semsem
27-  wessam
28-   ايمى
29-   ضياء عزت
30-   فاتيما
31-   شرين سامى
32-   ايه محمد
33-   اميره
34-  Tasneem Adel
35-    اميره احمد
36-   رؤى عليوه
37-  سواح فى ملك الله
38-   بسمه الورد
39-   عاشقه القمر
40-   منه
41-   كارمن
42-  Dodo , the honey
43-  Haytham Alsayes
44-  nonaelsha3nona
45-   مها البناء
46-   اسماء على
47-  Casper
48-   ايمان حسين
 شكرا لكم
وشكر خاص   لحبيب قلبى الغير معرف  
وشكر خاص لجميع القراء  

اتمنى ان تكون  بوستات اللى اتنشرت  ان تكون  نالت اعجابكم  والى اللقاء فى حملات اخرى
 كل سنه وانتم طيببن  ورمضان كريم
 كان معكم عمرو يسرى من  مدونه فضفضه 
برعايه بلوجر  للتدوين 






رايحين لفين

استوقفنى منظر النوبيين وهما محتجزيين موظفين وزاره الزراعه   ومانعينهم من الخروج من الوزاره   ومطالبينهم بقتل الوزير واتهمامهم لهم بانهم انتخبوا شفيق    وما حدث بعد كده او قبله  منظر بيقول حاجات كتير عن مستقبل  بلدنا   وخصوصا ان قبلها كان حادث القطر اللى الناس وضعت امامه عوائق   عارف ان النوبيين  عندهم حق عشان ارضهم اللى هتتباع بس الموظفين ذنبهم ايه وان كان كل واحد عايز حق ليه  هيحتجز مجموعه او يعطل طريق يبقى بعد ما ياخد حقه يتحاكم  على افعاله عشان الناس اللى احتجزوهم  او الناس اللى اتعطلت بسبب قطع الطريق  تاخد هى كمان حقها  

video

الثلاثاء، 17 يوليو، 2012

الصدفه الغريبه


نفسى اعرف تفسير للصدفه   وتكررها  يعنى ايه واحد صاحبى  دائما يحكيلى ان كل ما يتعرف على حد فى غرف الشات بتاع الياهو  يطلع جاره   وكتير لما يتعرف على ناس يطلعوا يعرفوا حد يعرفه   صحيح الدنيا ضيقه  بس تكررها بيكون غريب   انا حصلت معايا   صدفه اتكررت كتير مش فاهم حصلت معايا ليه  فى يوم من ثلاثه سنين  خطر على بالى دكتور مصطفى محمود  بحثت عنه على الانترنت كان يومها يوم ما توفى   صدفه  عاديه بتحصل  تمر الايام واقلب فى النت عن ورده الجزائريه  اقراء خبر وفاتها ولم تكن توفيت  تانى يوم  يتنشر خبر وفاتها صباح اليوم   عادى صدفه   امبارح اكتب بوست عن   حاله واحد بيموت  اصحى الصبح على خبر وفاه واحد قريبنا    ايه  حكايه الصدفه ديه مش فاهمها الموضوع كده خرج من دائره الصدفه  الواحد ممكن يحصل معاه صدفه بالشكل دا مره  واحده مثلا زى زميلتى فى الشغل مثلا اللى خطر على بالها الفنان يوسف داود تانى يوم مات  صدفه مكررتش تانى  او حتى لو اتكررت تتكرر مره تانيه انما معايا كده اوفر يعنى  ليه كده تتكرر بالشكل دا وليه فى الموت بالذات  وماذا تعنى تكرار هذه الصدفه  يا ترى ايه التفسير وماذا تعنى هذه الصدف  ربنا يستر    ياريت كانت الصدف اللى بتحصلى كانت زى صاحبى اللى بيتعرف على جيرانه من خلال الياهو صدفه   مش الصدف بتاعتى ديه كفايه كده صدف من النوع دا كفايه 

الاثنين، 16 يوليو، 2012

اللحظات الاخيره


يجلس على  فراشه  فى المستشفى  وحوله الناس بداء فى رويتهم اشباح ينادوه ولم يسمعهم فهو فقط يسمع صوت صفير  تتقلب ذكرياته  وايامه امام عينه  يتذكر موقف فيضحك ويقول كنت مظلوما فيه ويتذكر اخر فيدمع قلبه ويقول كنت ظالما فيه ثم يحدث نفسه ويقول شئ غريب ماكان يسعدنى امس يحزننى الان اما على فراقه وانا على فراش المرض او خوفا من حسابه  وما كان يحزننى امس يفرحنى اليوم اما على فراقه او املا فى تعويضى عنه   غريبه انى لم ادرى ما هى اولوياتى  فى حياتى الا وانا فى اخرها  غرنى  طول العمر وانسانى  ان للعمر نهايه  اتمنى ان اعود لصحتى حتى  اعيش وانا اعلم اولوياتى الجديده الحقيقه  التى تناسيتها  طول عمرى ماهذا الصفير الذى اسمعه  ماذا حدث لكى يا اذنى  لماذا لا اسمع شيئا غير هذا الصفير  يا اذنى هل تسمعينى  كنتى بالامس تسمعى دبات  النمل على بعد امتار والان لا تسمعنى  لا تسمعى غير الصفير  ماهذا الذى اراءه الان ما هذه الاشباح يابصرى كنت ترى  الذباب من بعد اميال مالك اليوم لا توضح لى الرؤيا من على بعد امتار بسيطه  من هؤلاء  لا اعرفهم ياذاكرتى  ساعدينى لماذا لا تتذكريهم عجبا اتنسى من حولى وتتذكرى اعمالى  انت يااللى هنا انت مين  يا صوتى لماذا لا يسمعك احد اليوم بنادى عليهم  انا ولا بهمس  كنت بالامس تهز المكان  ماذا حدث  لك ماذا يحدث  وقال وهو يرتعش  ماهذا البرود الذى  غلف المكان مافى شتاء جاء بهذا البرود من قبل  عجبا اننا فى الصيف ماذا يحدث لى  لماذا ارتعش هكذا  هل هذا انسحاب  لروحى ماذا يحدث لى لماذا  اتنفس بهذه الصعوبه   مالك يانفسى لماذا  تخرج بكل هذه الصوبه  اعلم ان للموت سكرات ولكن لم اكن اعلم انها هكذا  وهما قوتى وبصرى وسمعى فجميعهم   اضرونى عندما  استهلكتهم  اهوائى  والان لم ينفعونى   فكلهم رحلوا عنى ولا املك غير اخر نفس صدق اللى قال ان  الانسان مهما كان مجرد نفس  واخذ اخر نفس وانتقل من الدنيا

الأحد، 15 يوليو، 2012

نظره ودمعه


طول الطريق بيفكر فيها وهو رايح لها  فى ابتسامتها وضحكتها وشقاوتها ورقتها وعندما وصل اليها بداء فى الحديث معها وحشتينى حبيبتى  كنتى ومازلتى حبيتى حبيبت  عمرى وايامى رد عليها وقال نعم مازلت وفى بعهدك  دا اجمل ما بيا قلبى اللى هوفى الاصل بيتك    وكانها سالته عن وفائه لعهدها  معه نظر فى عينها  وسرح وتذكر حوار الاعين  الذى كان دائما بينهما عندما تعجز السنتهم تتكلم اعينهم  بالعين كان بينهما الكلام  بنظره يضحكون وبنظره يغضبون  وبنظره يعاتبون و يعتذرون  ونظره ترسم على الوجوه  ابتسامه  تصبح بدايه لاحلى حكايه   واذا  اخطاء اللسان اعتزرت العين  سرح وتذكر ايامه معها  ومرت زكرياتهم فى خياله بكل دقيقه وكل همسه فاق من شروده  واخرج المصحف وقراء ايه  ثم  بداء فى مغادرتها   تحرك خطوتين  ثم ادار وجهه و القى على قبرها نظره ونزلت من عينه دمعه      

الجمعة، 13 يوليو، 2012

اللقاء الاخير

جلس ينظر للقمر ويتذكر لقائهما اليوم وكيف كانوا يودعون بعض فغدا كلا منهما سيغادر البلاد الى بلاد اخرى  ويصعب عليهم لقاء بعضهم  يوميا كما اعتادوا يسئل نفسه هل ستفى بوعدها ان تتذكرنى دائما وهل انا هقدر ان افى بعهدى لها وان تبقى دائما فى قلبى وهل سيمنحنا الوقت والحياه والمشاغل اليوميه  فرصه لكى نفى بوعدنا لبعض بان نبقى على اتصال وتواصل يومى ثم تعجب وقال وهل سيكفينا الاتصالات وتعوضنا عن اللقاء اليومى  الذى تعودنا عليه قام يحضر شنطه ليستعد  للرحيل  غدا فتح دولابه فنظر لهداياها  وتذكر ابتساماتها وهى تهديها له  وكيف كان الناس يحسدونهم على عشقهم لبعض وكيف تضطرهم الحياه الان للابتعاد عن بعض وابتسم ابتسامه مكتئبه وقال هذا من حسدكم وفى فجر اليوم التالى ذهب الى مكان اخر لقاء  لهم وكأنه اراد ان يودعه هو الاخر فكان دائما مكان لقائهم معا وفى الطريق كان يشم  رائحتها وكأنها معه وعندما وصل لم يقدر ان يمسك نفسه من الضحك وضحكت معه وقالوا فى نفس واحد  هكذا نحن دائم بدون ميعاد نتقابل وكأن اشواقنا لبعض قد وعدتنا باللقاء وحددت المكان والزمان وتناسوا انهم بعد ساعات سيفترقون عن بعض وسيذهب كل واحد الى بلاد مختلفه  وحكى لها مافعل امس بعد لقائها الاخير  وضحكت  لانها فعلت مافعلته وبعد مرور ساعات مر شخصا فى مكان لقائهم  الاخير فوجد جسدين ملقيان على الارض ممسكين ايادى بعض فقد فارقت ارواحهم اجسادهم قبل ان يفارقوا بعض
 

نتائج عبر التليفون


بيستفزنى الاعلان على معرفه نتائج الثانويه العامه  او اى نتائج عموما  بالتليفون وعشان تعرف نتيجتك اتصل بالرقم  الفلانى  والدقيقه بجنيه ونصف  بالرغم انها قد تكون مفيده انك بدل ماتنزل  وتروح تشوف  النتيجه  تتصل  بالرقم وتعرف  فهى خدمه اضافيه  تخدم الطلاب وتسهل عليهم  مش عارف مابيعجبنيش الاعلان ليه يمكن لانى عارف انها تجاره  وانهم مش عاملينها  لتسهيل على الطلبه معرفه نتائجهم   وخلاص   يعنى احترم اللى عاملين الخدمه ديه لو النتيجه ظهرت فى المدارس فى نفس وقت ظهورها على  التليفونات   اللى عايز يشوفها فى المدرسه  ينزل يشوفها  واللى عايز يعرفها بالتليفون يعرفها  تظهر فى الاثنين فى نفس الوقت   مش بعدها بيومين او اكثر  زى مكان بيحصل على ايامنا فى المدارس والجامعات   ايام ما النظام  القديم كان مخلينا اى نفس ناخده ندفع عليه   لدرجه انه جعل  احمد ذكى بدر وزير تعليم  بعد ما خلص على جامعه عين شمس وماعملش حاجه الا لما تدفع عليها فلوس  حتى النتيجه  عبر النت كان عاملها بفلوس  ماهو كان كلب فلوس بس نفد بعد الثوره وماحدش قاله  هتتحاسب على افعالك   وفلت   يمكن  الخلفيه السابقه عن التجاره بنتيجه الطلاب هى اللى بتضايقنى لما اشوف اعلانات الخدمه ديه بعد الثوره اتمنى انها بعد الثوره تكون خدمه اضافيه عملاها الوزاره وليس تجاره عملاها الوزاره كما كان يحدث  كفايه متاجره  بينا وباولادنا    يعنى  زمان كان يتجاروا بينا  وبنتائجنا   ويقولوا اللى مش عاجبه النتيجه  ينتظر لما النتيجه تنزل فى المدارس يعنى  هنستغلك ولو مش عاجبك تسلح بالبرود  حاجه كانت مسخره واعتقد انها مازالت مسخره  ياترى  بعد الثوره  الوضع اتغير ولا لسه و متى ستتحول من تجاره الى خدمه 
انتهى

الخميس، 12 يوليو، 2012

رمضان وربنا يستر


ماحدش يستغرب المفروض انى انا مسلم واقول اللهم بلغنا رمضان واكتب بوست اقول فيه ذكريات رمضان الجميله وازاى انى بحب رمضان وفرحان انه خلاص على الابواب  عشان الروحانيات اللى فيه والعبادات والاشياء الجميله ديه كلها لكن رمضان بقاله فتره مختلف معايا  رمضان لم يعد رمضان الذى عشقناه من صغرنا فلم يعد شهر الروحانيات والعبادات اصبح شهر الخناقات وقله الدم والذوق والاخلاق فننزل الشارع فى رمضان الناس بتكون زى اللى منتظرين غلطه من الناس عشان يتخانقه معاهم بدعوى انهم صايمين ومش مستحملين والحر الى اخره تركب المترو تلاقى واحد مشغل قران بصوت الشيخ معرفش ايه لو مش عاجبك الشيخ مش هينفع تقول الشيخ مش عاجبنى على طول هتتهم انك مش عاجبك القران او الدين ولو اللى مشغل القران محترم وتفهمك هيتطلع واحد شيطان هو اللى هيعترض غير كل دا بقى الشيخ فتحى  بتاع الجامع اللى جانبى ربنا يهدىه  او ينتقم منه وياخده   مش عارف اتجمعت فيه كل صفات التخلف العقلى وعدم الاحساس  وكل شئ ردئ  اه اصل اللى يشغل الميكرفون عالى جدا فى صلاه اقامه الليل الساعه الثانيه او الثالثه صباحا   معلش يعنى انسان لايفهم شيئا ولايعقل شيئا يعنى لما يكون بينك وبين الجامع اكتر من ثلاثين او اربعين  متر  و الجامع عاملك ازعاج امال لو كان لاصق فيك هيكون  عاملك فيك ايه لا وكمان لما  تشتكيه هيطلعك تانى يوم يرقص على المنبر ويقولك طبعا حرب على الاسلام ماهو لو كنا بنشغل اغانى  ماحدش هيشتكى فكر متخلف واحمق وياريت ماحدش يقولى هو فى حد بينام فى رمضان  عشان حتى لو سهرانين فى رمضان مش لازم الكائن بتاع الجامع  يكرهنا فى القران  بالشكل دا دا انت لو مشغل تسجيل صوتك ببصوت عالى هتصدع منه وجايز تكره الكلام اصلا والغريب ان بعد رمضان يطلع يقولك نشكرالاخوه  المسيحيين على انهم استحملونا طول الشهر  ياشيخ يا ابو الغباء مين قالك ان الاخوه المسيحيين استحملو اهلك ان كان المسلميين خلتهم طول الشهر بيسبوا فى اهلك   غير كده الظاهره التى بدائت تظهر فى الاعوام الاخير فى الجامعات وفى الشوارع الناس اللى بقيت بتتلكك عشان تفطر  بتنتظر اى حد يعمل اى حاجه عشان تشتمه وتقول انا كده فطرت ومش محسوبلى صيام نفطر بقى حتى كثيرا ما تنسى اننا فى رمضان من كتر الفاطريين علنا   وغيرها وغيرها الى ان فقد رمضان بريقه السنوى  وفى الاخر بردوا نقول اللهم بلغنا رمضان بس رمضان من بتاع زمان مش بتاع دلوقتى   

الأربعاء، 11 يوليو، 2012

الحريه والعداله الديمقراطى


بعد ما قرر محمد مرسى قراره المبارك بعوده مجلس الشعب الذى ادخل على الناس السرور كان كل خوفى ليعمل القرار النظيف ويمسك الوزاره لواحد منهم بما ان دا العصر اللى هيعيشوا فيه فى العز
لما اخذ القرار بعيد انه اتلغى بعد ذلك وماعملوش لكن كنت عايز اعرف هو ايه كان بيعمله الحزب الوطنى ومعملوش الاخوان رشاوى انتخابيه اتعمل مخالفات انتخابيه اتعمل  مجلس شعب ورئاسه  من عندهم اتعمل  وبالنسبه للبلطجيه بتاعت الوطنى  فكانت موجوده بردوا ايام الانتخابات بس بشكلها الجديد  فى الدعايه  الرخيصه اللى تكتف الواحد  وماتجعلوش يعمل اى قرار غير انه ينتخب مرسى لان حتى مقاطعته فى صالح المنافس   طب هما امتى هيعملو لجنه الاحزاب داخل حزب الحريه والعداله عشان مانتفاجش بعد ذلك عجبنى اللى كان بيقول هيطلع من المجلس من يعارض الرئيس فكرنى بالكلام اللى اتقال على مجلس 2010 وقلت فينك ياعم مبارك والله فيك الخير علمت اجيال وعلامك جاب نتيجه   كنت مستغرب من الناس اللى فرحت بالقرار وقالت قلم للمجلس عشان الاعلان الدستورى المكل واضح ان الاعلان دا هيخلى الاخوان يعملوا كل حاجه باسم صلاحيات الرئيس مش معاه والناس تسقف  ترجع بقى مجلس الشعب  تتبلطج فى اللجنه التاسيسيه فى الدستور عشان يضعوا الدستور اللى هما عايزينه باسم الاغلبيه  وان مانفعش يبقى العطله من المجلس والاعلان الدستورى المكمل  اللى ماحدش بيتكلم عليه الا لما يفشلوا فى عمل حاجه هما عايزنها فى الجماعه  بيفتكروه  وقتها  شويه شويه هنسمعهم  بيقولوا الحريه والعداله مصلحتك اولا   ومش عارف ايه الائتلافات الاسلاميه اللى بقيت بتظهر ديه  وبتايد اى قرار لمرسى  فكرتنى بائتلافات  تايد جمال مبارك ولسه ياما هنتفرج

الثلاثاء، 10 يوليو، 2012

الظروف


 تاخرت كثيرا فى كتابه بوست اليوم الحادى والعشرون   من حمله التدوين اليومى فكنت ساكتبه امس  مع بدايه اليوم من الساعه الثانيه عشر  بعد منتصف الليل  ولكن تغلب عليا النوم  وعندما صحيت   انشغلت وخرجت الى عملى   وعندما  رجعت انقطع النور فكانت ظروف اليوم لم تساعد على كتابه البوست ولكن اوقفتنى الظروف  عند كلمه الظروف  وجعلتنى اتسائل هل هى شماعه  ام انها ظروف حقيقيه تعوق عن فعل شئ   نحن كمجتمع من سنين  لا تحصى  و نحن نستخدم كلمه ظروف لتبرير كل شئ  الى ان تعودنا ان ناخذ  الظروف  المحيطه  كشماعه  ندارى بها تقصيرنا  ولكن بالرغم ذلك فمننا ناس تحاصرهم الظروف بالفعل ولكننا تعودنا ان تكون الظروف شماعه ولذلك اصبحنا رافضين هذه الكلمه ونقول لا يوجد شئ اسمه الظروف فكثير  مثلك  عندهم نفس الظروف  ولكن كان فعلهم غيرك  ونتهمه باخذ الظروف شماعه لتبرير وفقط  بالرغم ان تربيتك  التى تصنع سلوكك  ظروف  جيرانك مجتمعك ظروف  وان كان  غيرك يمر  بظروف مشابهه  فكل انسان  تختلف تصرفاته ورد فعلهم  فى مواجه  نفس الظروف وتكون نفسيه الانسان نفسه ظروف  والسؤال هل بالفعل الظروف ممكن تعوق احد عن شئ  ام ان الظروف هى الشماعه  التى نعلق عليها اخطائنا ونبرر بها تصرفاتنا وفقط   ولماذا ؟

الاثنين، 9 يوليو، 2012

طل الملوحى


المفروض التدوينه للتضامن مع سوريا وبورما وممكن نقول كمان فلسطين  وكل دولنا اللى فيها انكسرات  ولان الموضوع شكله  هيطول غير اننا عندنا موضوع فلسطين طول ولسه قابل  للتطويل قولت ان احنا نتضامن مع واحد واحد من مواطنين الشعوب كلها لعل وعسى الموضوع ينحل قبل ما نخلص تضامن مع افراد الشعب واحد واحد   قلت ابداء بمين فيهم الشخصيات كتير وكلها تستحق التضامن لقيت باننا مدونين نبداء بمدونه كنا تضامنا معها قبل كده ولسه معرفناش قصتها وصلت لفين وهى المدونه طل الملوحى
طل دوسر خالد الملوحى  ولدت فى حمص فى 4 نوفمبر 1991  مدونه سوريه اعتقلها جهاز امن الدوله السورى فى 27 ديسمبر 2009 على خلقيه نشرها بعض المواد ذات الخلقيه السياسيه على مدونتها وانقطع الاتصال بها  وحكم عليها فى 14 فبراير 2011 بالسجن خمس سنوات  بتهمه افشاء معلومات لدوله اجنبيه
ولا تعد حالة الملوحي هي الأولى من نوعها، إذ ألقي القبض على العديد من السوريين الذين اتجهوا للتدوين للتعبيرعن آرائهم وحكم على بعضهم بالسجن لمدد طويله مما دفع بعض المدونين السوريين إلى الكتابة تحت أسماء مستعارة، ولكن تظل معدلات قراءة هذه المواد السياسية قليلة، خوفًا من الرقابة المفروضة على الإنترنت
وأطلق نشطاء مصريون في 12 سبتمبر 2010 دعوة لتنظيم وقفة احتجاجية أقيمت أمام السفارة السورية بالقاهرة في 19 سبتمبر 2010 تضامنًا مع المدونة السورية المعتقلة، لمطالبة السلطات السورية بالكشف عن مصيرها وإطلاق سراحها كما نظمت أيضًا في 2أكتوبر مظاهرة أمام مقر نقابة الصحفيين المصرية للإفراج عن طل  واتهم ثائر الناشف (منسق حمله المطالبة بالإفراج عن طل الملوحي) النظام السوري بعمل دعاية لا أخلاقية لطل.
تزامنت هذه المظاهرة مع وقفة احتجاجية أخرى نظّمها أعضاء الاتحادات الطلابية في باكستان تنديدًا باعتقال طلّ الملوحي، معتبرين استمرار اعتقالها تقييدًا لحرية الرأي في سوريا. وفي نفس اليوم (2 أكتوبر  2010)، نظم ناشطون سوريون مظاهرة أمام السفارة السورية بباريس، حاملين صور طل وغيرها من معتقلي الرأي، ووزعوا بيانًا باللغتين الفرنسية والعربية مطالبين فيه بالحرية لطل وجميع المعتقلين. وفي اليوم ذاته، نظمت "مظاهرة إلكترونية" على صفحات الفيس بوك شارك فيها ناشطون سوريون
ودا كان اخر حاجه نعرفها عن طل  الحكم عليها بالسجن يوم 14 فبراير 2011 
فياترى فى حد عنده  معلومات جديده عن موضوعها  وماذا حدث فيه 
كنت عايز اخد كمان شخصيه من بورما وشخصيه من فلسطين   بس عشان ماطولش عليكم  نخليها التضامن القادم   لان واضح ان الموضوع مطول  يارب مايطولش يارب ينصرهم ووقتها يفتكروا الشخصيات اللى  كنا قربنا ننساهم
انتهى

الأحد، 8 يوليو، 2012

الفضيله العاهره



استوقفنى فى حادث مقتل الشاب على ايدى المتخلفون بتوع الامر بالمعروف والنهى عن المنكر  ليس الحادث نفسه ولا الشاب ولاالدم ولا اى حاجه  الا الحجج التى ظهرت بعد ذلك  اصل الشاب خارج مع خطبته فى وقت متاخر او كانوا فى وضع معرفش ايه   طب وايه يعنى هما مالهم كانوا قرايب  خطيبته مثلا ولا ايه  يعنى معلوماتى القليله فى الدين  ماهو انا معرفش فى الدين كتير بصراحه  بتقول ان عشان  تنفذ حد الزنا مثلا اهو مافيش اقذر من كده   لازم يكون فى اربع شهود  ومش الشهود  هما اللى بينفذوا اساسا ماينفعش  ماينفعش اكون شاهد وقاضى ومنفذ احكام  ولا هى العمليه سمك لبن تمرهندى  ولا ايه   يعنى مهما كانوا عملوا  خلوه بقى وقت متاخر  اتنيلوا مع بعض مافيش حجه لضربهم وقتل الشاب   يعنى المفروض البلطجيه اللى قتلوا الشاب  يعدموا  فى  ميدان عام  بالرغم انى اتمنى حرقهم بجاز وسخ اوى بس يعنى نمشيها اعدام فى ميدان عام
كنت اتمنى اننا بعد الثوره مانسمعش عن الحجج ديه تانى ونقعد نحلل للمجرم جريمته   بس  هو دا اللى بقى بينغرس فى الناس من اول ما الصيع بداءوا يعاكسوا ويتحرشوا  لابسين  عباءه الدفاع عن الاخلاق والاخلاق بقيت طين  تسئل اللى بيعاكسوا يقول لك ماهى مش لابسه ولا لابسه  لبس مش محترم  طيب وانت  تصرفك  محترم   هل بالعهر تطلب الفضيله من هو صاحب الفضيله من يغض البصر ام الاعمى   وان كنت ترى  بان مصدر الفساد تعرى النساء فاطلب من ربك العمى  حتى لا تراهه ولكنك لن تطلب لانك بنظرك الذى انعم الله بك بيه انت اعمى
من اول ما اصبح الصيع والبلطجيه  يريدون فرض الفضيله  بالتحرش او الضرب  على الناس وتبرير عهرهم  بعدم فضيله المتبلطج عليه   حتى وصلت انى اسمع شيخ جامع بيتحدث عن التحرش يتهم النساء وملابسهم ولا يتكلم بشئ للشباب   اصبحت الفضيله عاهره 
فالفضيله التى لم تاتى من صاحبها ليست فضيله  ولو  فرضت   الفضيله على ايدى  البلطجيه  فهى ليست فضيله 

السبت، 7 يوليو، 2012

اسمى بالكامل


زمان وانا صغير  كانوا لما يسئلونى  اسمك ايه  اقولا عمرو  يقولولى اسمك بالكامل اكون مطالب ان اقول اسمى واسم ابويا وجدى وجد  جدى يعنى حوالى سته او سبح اسماء اللى  هما حافظينهم من اسماء الاجداد ولكنى استوقفتنى حكايه اسمى بالكامل فى احد المرات  متسائلا هو احنا مش من بنى ادم  من اولاد  سيدنا ادم يعنى لما نقول اسمنا بالكامل لازم هنوصل الى  سيدنا ادم فى الاخر   وقبليه  هابيل او ققابيل او شيت  قعد يدور فى زهنى السؤال فسئلت واحد صاحبى هو ليه  ماحدش حافظ اسمه  بالكامل لحد سيدنا ادم  رد عليا  بالقران والايه اللى بتقول كنت ناسيا منسيا  مقدرتش اجادله بعدها ولكن كان بيدور فى دماغى سؤال احنا ليه بنكون حافظين قصص متدواله بين الناس من  الاف السنين  ومش حافظين اسمنا  بالكامل ولا فاكريينه  فافتكرت ان حل الفزوره بتاعت حاجه تمتلكها وغيرك اللى بيستخدمها  كان اسمى  فاسمى  انا مابستخدموش كتير زى غيرى   قلت ما علينا بس الواحد بردوا لازم يكون عارف اصله وفصله قالوا لى  روح ماعرفش فين هيقولولك انت اصلك ايه والغريب ان كل اللى بيروح يعرف اصله ايه بيرجع يقولك احنا من الاشراف  وعندنا قرابه من سيدنا الحسين   ومافيش حد كان يقرب لاخوه سيدنا الحسن معرفش ليه  غالبا ماخلفش هو كمان  مع انه خلف احدى عشر  ماعلينا  تمر الايام وواحد من العائله يروح يكشف عن اصول العائله يلاقى فتحى سرور بتاع مجلس الشعب السابق من العائله فطبعا قولناله ماتكملش يابنى كفايه كده   ليطلع ابو لهب من العيله كمان واحنا منعرفش  هو ايه اللى انا بكلم فيه دا   ايه الفراغ اللى الواحد فيه دا ناس فاضيه  صحيح عالم فاضيه

الجمعة، 6 يوليو، 2012

تفتكروا كان امن دوله


بعد ظهور جماعه الامر بالمعروف والنهى عن المنكر والجريمه التى حدثت  وتفكير البعض انها مؤامره من امن الدوله لبث كره الاخوان والسلفيين  فى قلوب الناس والمحاوله على تاكيد ذلك والكلام العبيط دا  افتكرت موقف حدث لى ايام مبارك يعنى ماكنش لسه فى مؤامرات لتشويه حد والافلام الحمضانه بتاعه الاخوان والسلفيين   كنت ماشى انا واحد صاحبى مشغلين اغانى بالسماعات  وبندندن معاها  فى الشارع وفجاه ظهرلنا واحد مش بدقن عشان محدش يقول عليه سلفى او اخوانى    بيسئلنا صليتوا العشاء ولا لا  وبعد كده سئلنا اليس كلام الله اولى  وقعد يدينا درس فى الدين على الواقف كده فى السريع  ياترى دا كان امن دوله ولا ايه  والراجل مش بذقن كمان اهو ماهو الاخوان ماكانوش بيربوا  ذقنهم اصلا طبعا مش كلهم  اكيد كان امن دوله بس هو كان عارف الليله كلها وان فى ثوره هتحصل  فكان بداء خطه التشويه اكيد صح ماهو  اى حاجه بيعملوها الاخوان او السلفيين  او اتباعهم بقيت بتلصق فى امن الدوله   يعنى حاجه فى منتهى الاستعباط  ومش معنى كلامى ان بقول ان جماعه الامر بالمعروف والنهى عن المكر انهم تبع الاخوان او السلفيين او بتنظيم منهم  بالعكس هى ممكن تكون حالات فرديه كمان بس هما مجموعه متاثريين بشيوخ الاجرام بتوعهم ولو رجعنا بالزمن هتلاقى ان الجرائم اللى حدثت  لبعض المشاهير مش لازم بيكون القاتل اخوانى او سلفى ممكن يكون يادوب سمع خطبه لاى حيوان من شيوخهم وقام منفذ على طول فكثير من شيوخهم لا يستحقوا ان يكونوا شيوخ من اول المجرم وجدى غنيم الى الراقصه صفوت حجازى  بس عجبانى دماغهم فعلا ايه حاجه بتحصل الناس تغضب منها دا ترتيب امن الدوله  يارتنى كنت رئيس المرحله ديه كنت هاكل عيش كتير على اقفا امن الدوله يابختك يامرسى انت وجماعتك   
انتهى

الخميس، 5 يوليو، 2012

الانسان واصله


على مر العصور بيطلع ناس كتير بتحاول معرفه ماهو الانسان  مره طلع علينا قرد متحول وقال ان الانسان اصله قرد ودا طبعا كان بيتكلم عن اصله هو 
وناس طلعت وقالت ان الانسان حيوان  ناطق وبعدها قالوا لا الانسان حيوان مفكر او متعقل الى اخر الحديث   بس كلهم  اتفقوا على انهم حيوانات مش بشر  لكن السؤال  الناس اللى فكرت كده مافكرتش ليه فى اصل الحيوان نفسه  يعنى ان كان الانسان حيوان ناطق او مفكر او اى حاجه فما هو الحيوان  خشب متحرك مثلا  والقرد اللى قال ان الانسان اصله قرد طب اصل القرد ايه ومع كل الخرافات ديه والفلسفات قررت اتفلسف انا كمان يعنى هى جت عليا يعنى  وبدايه الفلسفه  سابدها من المقوله الشعبيه الناس معادن  ايه رايكوا بقى  طب يعنى ايه ان الناس معادن  معرفش لكن كل شويه الناس بتوع برامج الاكل والتغذيه يقولك لازم تاكل معرفش ايه عشان فى حديد ومعرفش ايه عشان الفسفور هو احنا مخلقويين من ايه  ياترى   ماعلينا  ندخل على  فلسفتى ايام الثانويه العامه ودراسه الكيمياء  كانت ايام  الناس فلزات ولا فلزات واشباه فلزات وخوامل   ودا ترتيب الجدول بتاع العناصر الكيميائيه  وهى ديه خواص العناصر الكيميائه  التى تشبه خصائص البشر فهناك من يبداء  الكلام مع الناس وهناك من  ينتظر حد ينكشه وهناك من يجمع بين الاثنين وهناك خوامل لا يتم التعامل معها الا تحت ظروف خاصه  مثل العناصر الكيميائيه فلزات ولا فلزات واشباه فلزات وخوامل  وطبعا فى بعض الناس سريعه الاشتعال وهى اللى بتغضب بسرعه وناس بتساعد على الاشتعال  ودول اللى بيهدوا النفوس  وفى ناس اتجهاتها كيمياء عضويه وتفاعلاتها كتير ومعادلاتها منيله بطين  لما بنمسك معادله كيميائيه ودرسنا خصائص العناصر المشاركه فى المعادله و خصائص العناصر الخارجه من المعادله هنلاقيها  معادله بشريه فلو اتينا ببشر لهم نفس الخصائص لنتج عنهم نفس الخصائص بتاعت المواد الخارجه عن التفاعل الكيميائى حتى ولو كانت غازات او ترسيب  ونفسها هى هي  النظريه تمشى على الحيوان وعلى كل شئ خلقه الله فالاصل فى المخلوقات هى الخصائص التى خلقها الله فى العناصر الكيميائيه  سواء كانت فى ذرات او كروموسومات تحمل خصائص الانسان  او النبات او اى شئ   ثم خلق منها الباقى متشابهات وغير متشابهات  كما قال  فى كتابه الكريم متشابهات وغير متشابهات وطبعا كل  اللى انا قلته ده  كان هلوسه  لانى لست بعالم  ولا رجل دين  بس بجيب حبه من هنا على حبه من هنا وبعمل نظريه و اهى  نظريه  حد عنده اعتراض نيهاههها
انتهى    

الأربعاء، 4 يوليو، 2012

مع نفسى البوست الموحد فى حمله التدوين اليومى



1/ عرف نفسك  ؟
قد يكون دا اصعب سؤال من انت من انت بيانات ولا شخصيه ولا فاعليتك فى الوجود ام ماذا سؤال شامل يصنع حيره وتوهان  فى الاجابه  حتى ولو هتجاوب عليه لنفسك  محتاج محاسبه لذاتك اولا قبل الاجابه عليه
من انت  يا نهاااااااااااااااار
على العموم نكتفى بالهروب مؤقتا الى اجل غير مسمى ونقول
 عمرو يسرى  مواطن يسكن فى شبرا الخلفاوى الدور السابع  
 ساعات بيكون شاب عجوز وساعات عجوز متصابى وساعات وساعات من الاخر بحالات
2/ مااكثر مايميز شخصيتك ؟
للاسف معرفش يمكن يميزها ايجابيات وممكن يميزها سلبيات لكن اللى ممكن او يمكن اكيد ان يكون بيميزها انها لانسان خلقه الله سبحانه وتعالى يمكن يكون  له ايجابيات لا يعلمها  واكيد له سلبيات  لايعلمها
3 /  ماهى اهم نقطه تحول فى حياتك ؟
جميع النقاط التى مررت بها وان لم تؤثر بسلوك واعى فقد اثرت  بفكرنفسى داخلى  وطبيعه قد تتحول لسلوك فيما بعد وتؤثر وان لم اكن اعيها الان فقد اعيها عندما  احلل بعضا من سلوكياتى الحاليه او المستقبليه
4/كيف دخلت عالم التدوين ؟
عن طريق صديق جامعه كان عامل مدونه ومابيكتبش فيها  اساسا
5/ ما اسم مدونتك ولماذا اخترته ؟
فضفضه  واخترته لان بفضفض
6/ صف مدونتك ؟
 مدونه بها مجموعه من الفضفضات حتى البوستات الخيبه اللى ممكن حد يسميها سياسيه فهى ايضا فضفضه يعنى من الاخر عيادتى اللى بتعالجنى من امراضى النفسيه والفكريه والعصبيه
7/ من هم اكثر ثلاث شخصيات اثروا فيك داخل عالم  التدوين؟ ومن خارجه ؟
كل من عرفتهم سواء عرفونى او لم يعرفونى فقد تركوا بصمات داخلى فكل مدونه لها فى قلبى علامه  اما من خارجه فممكن اقول والدى الله يرحمه  والدكتور مصطفى محمود الله يرحمه  والكاتب نجيب محفوظ  الله يرحمه   وكل من عرفتهم وكل من حولى
8/ ماهى طقوسك الخاصه عند الكتابه ؟
مااليش طقوس وقت ماربنا يريد بيكون
 9/ ماهو الاسلوب المفضل لديك فى التدوين ؟
اسلوبى الذى لم اقيمه ولا اعرفه ولكن من قراء لى ممكن يجاوب افضل منى
10/ فى رايك ماهم مايميز تدويناتك ؟
يارب تكون لها ميزه لو حد عرف يقولى عشان لما اتسئل تانى اعرف اجواب
11/ ماهو تقيمك لعالم التدوين فى الفتره الاخيره ؟
من ناحيه القيمه فهو مجال متجدد يوميا فكل يوم يظهر مدون رائع يثرى عالم التدوين
ولكن عاطفيا فيؤلمنى كل مدون غادر او ابتعدعن عالم التدوين وخصوصا بعد ماتعودنا على جمال ما يكتبه
12/ اختر اقرب تدوينه الى نفسك وضع رابطها وحدثنا عنها ؟
كل التدوينات على مسافات واحده الى نفسى فالتدوينه الاقرب لم تكتب بعد
13/ استعرض اهم المواقف الغريبه او الطريف التى صادفتك مع التدوين ؟
قد تكون المواقف الغريبه او الطريفه فى التعليقات عندما يدخل احد ويكون كل تعليقه تقبل مرورى وفقط اللى هو ماتفهمش منه طب هو عايز ايه واقبله ازاى  غير صاحابنا بتاع ثقافه الهزيمه اللى يدخل يعلق ببوست لوحده مالوش علاقه باللى انت كتبه
14/ هل احدث التدوين تاثيرا عليك ؟ وكيف؟
بالطبع فمع كل تدوينه اكتبها علاج لنفسى وروحى  وعقلى واعصابى من شيئا ما  وكثير مااقراء تدوينات لاخرين ارى فيها نفسى ونداء لنفسى  لاصلاح اعطال بها
15/ اختر مدون ووجه له سؤال ؟
عمرو يسرى صاحب مدونه فضفضه  انت مين ياض ؟

   


الثلاثاء، 3 يوليو، 2012

العلاوه بين مبارك ومرسى


 لما مرسى قال على العلاوه فى ناس قالت واو  الرئيس بداء يشتغل ويدخلنا فى ايام العز  وناس قالت اخص كنا عايزنها 30% مش 15 % وكمان اخص  دا من الاساسى اللى بيكون اى كلام اصلا  سواء كده اوكده فلم اشعر بالجديد فمن ايام مبارك  كل سنه فى  شهر سبعه مع بدايه السنه الماليه الجديده  لازم كان الرئيس يتكلم فى العلاوه الجديده   وبالتالى حتى الان لم يحدث جديد فهل ياترى سيحدث جديد  عن عصر مبارك وكيف  دائما لما بيحصل ونتكلم فى علاوه بنتكلم فى  زياده فى الاسعار  حتى كنا قد وصلنا الى حاله من التشائم من العلاوات الجديده فهل  علاوه مرسى لن  يصاحبها زياده فى الاسعار  فى ناس هتقولك ماهو هيظبط البلد وهيراقب على التجار شئ جميل بس احنا ايام ماكنا بندرس اقتصاد كانوا   بيكلمونا عن السياسه الماليه والنقديه  والنظريه الكلاسيكيه قالت  و النظريه  الكنزيه اكدت  ومعرفش ايه فى ايه المهم كانت الخلاص ان لو هدخل نقديه سواء باصدار نقود جديد او اقتراض هيحصل تضخم  و الاسعار هتزيد  مادام ان دخول النقديه لم ياتى عن طريق الانتاج  تمام  طيب هل فى انتاج فى البلد ظهر جديد والعمليه الانتاجيه  بدات تتحرك وتنتج  لا اعتقد . فى واحد هيقولى  ايوه بس دلوقتى مش هيكون فى سرقه  والفلوس  هترجع للشعب احنا دوله غنيه مش فقيره   معاك  بس مهما كنا دوله غنيه ولها موارد كثيره قناه السويس وغيره  فى مثل بيقولك خد من التل  يختل  سواء اخذت منه بسرقه ولا من غير سرقه  مهما كان لازم ننتج ونحرك البلد شويه   يرد واحد يقولك مين قالك ان احنا مش بننتج اقولك ان فى انتاج اه لكن مافيش جوده ومعروف ان الانتاج المصرى مشكلته فى التقفيل  وبيكون لايقدر على المنافسه غير انه مش كتير لدرجه ان فى المعرض الذى اقيم بعد الثوره فى ارض المعارض بعنوان اشترى مصرى كان فى منتجات صنع فى مصر ودا الطبيعى  ولكن كان موجود فى المعرض اللى هو اسمه اشترى مصرى منتجات صنع فى الصين تيجى ازاى الله اعلم ممكن يكون الصين اصبحت  من مصر ولا حاجه يمكن  لكن النتيجه ان انتاجنا مش كتير وجودته مش بدرجه تنافسيه الا القليل منه  يعنى القليل من القليل اصلا طيب والنتيجه معرفش انا مش محلل اقتصادى  لكن تستوقفنى بعض علامات الاستفهام  تجعلنى اتسائل هل العلاوه هذه المره لن يصاحبها زياده فى الاسعار  كيف وازاى  هل سيصاحبها انتاج  ام  سيصاحبها شئ اخر يغطى التضخم وزياده الاسعار ويوجل المشكله مؤقتا  لا اعلم و انا لست خبير اقتصادى ولكنى اتسائل  يا ايتها العلاوه الجديد  هل ستاتى بشئ جديد ام ماذا سيحدث
انتهى 

الاثنين، 2 يوليو، 2012

الكيل بمكياليين


عندما يسئ احد للاسلام  الدنيا عندنا بتقف على رجل ولا تقعد  وعندما يحدث ويسئ  احد مننا احنا للبهائييين اواى ديانه اخرى  بنقول احسن وبيكون السبب ديه مش ديانه سماويه  ونحن كمسلميين لا نعترف الا بالديانات السماويه  اسلام مسيحيه  يهوديه  الخ  طب انا نفسى اعر ف بقى مادام الموضوع كده  بنغضب من البوذيين لما مايعترفوش بينا ليه  وبنقول اضهاد الاقليه  لفت نظرى كلام واحد زميلننا لما بيقول الناس اللى زعلانه من اللى بيحدث فى بورما  مازعلتش ليه لما اتحرق  بيوت للبهائيين فى سوهاج هما دول بردوا مش اقليه  بس احنا عندنا الميزان باكثر من ذمه شويه
بردوا فى موضوع تانى  الاخلاق الجميله اللى ظهرت بعد الثوره ديه وماحدش يغلط فى الرئيس محمد مرسى ومراته  كانت فين قبل الثوره فى الرئيس السابق مبارك وعائلته  هيتقال انت هتساوى اللى سرق وقتل وظلم باللى لسه ماعملش حاجه   بس بردوا اللى سرق وقتل وظلم  ممكن نقول حرامى قاتل سارق مش لازمه نتكلم فى عرضه يعنى ونعمل نكت جنسيه على اسرته  ماينفعش. هيقال ماهو دا قبل الثوره ودا بعدها بس بردوا الرئيس السابق بعد الثوره لم يسلم فى عرضه من كلام الناس هيتقال انت هتساوى حافظ القران بمبارك  هيتطلع الف حجه لشتم دا واحترام دا حاجه  مسخره
اخر موضوع  الافراج عن عمر عبد الرحمن  
مش هكلم فيه لانى معرفش الشيخ   لكن هعرض   سؤال  زميلتنا على الفيس Mona El-Gharbawy  واتمنى الاقى اجابه تانيه  غير اجابتها الذى اؤيدها فيها
"ليس عندى أدنى شك بأن حسنى مبارك مدان فى العديد من الأمور كما ليس عندى أدنى شك أيضا بأن عمر عبد الرحمن مسئول عن العديد من المجازر البشرية التى حدثت بسبب أنحراف جماعاته والسؤال إن كنا نريد الرأفة بشيخ ضرير وعجوز فلما لا نريد الرأفة برجل أيضا عجوز ومريض وكلاهما مداااااااااان - سؤال فقط خطر فى بالى بمناسبة الكيل بمكيالين"

والاجابة ببساطة لان الضمير فى وطنى " أعــور "  "
Top of Form

انتهى 

Follow by Email

Tetris