السبت، 30 يونيو، 2012

نافذه حلم

نافذه حلم  تُفتح بالامل    تُصلح  كل ما فى داخلك من خلل
تفصل مابين ماضى وحاضر    وتجعل التفائل حاضر
تغير عطر المشاعر  من عطر لعطر    وتجعل الانسان شاعر
اه يازمن بقيت اهواك من بعد انا والعذاب وهواك
من نافذه حلم نرى  رؤى البراءه  
نرى المستقبل  اخر  حلاوه
نطير منها كطير رماد
لا يحرقه الشمس ولو حولت حرارتها المياه رماد
نطير وكاننا طيور فى المدينه الفاضله
سارحين  فى ملك الله
وبكلمه ونص نحكى قصص قصيره
ونفتح اى باب مقفول ونبنى مدينه ونص
وكله من نافذه حلم لسه ما استسلمش

الجمعة، 29 يونيو، 2012

سواح فى ملكوت الله


سواح فى ملكوت الله   اصحى  الصبح بدرى مع نور الصباح انتظر تجلى شمس النهار و احلم انى اكون طير الرماد  احلق جنب الشمس ماتلسعنى  واسرح مع  اسراب الطيور  المهاجره   يمين وشمال   و اسرح فى السماء افتكر البوم الذكريات وايام زمان  واعيش مع الذكريات ايام رؤى البراءه  لما كنت فاكر اننا فى المدينه الفاضله  وفجاه اصحى امام  باب مقفول ومع كلمه ونص مع نفسى اسئل ليه وليه حياتى مش حره فيها ومع ليه وليه اصيب بوجع الفلسفه  ويدخل عليا الليل وانا عاشق القمر  اسرح معاه وتنتهى الحدوته المصريه   وكوكوكوكوكو

الخميس، 28 يونيو، 2012

نفسى افهم


على الفيس بوك وبلوجر ناس  كتير غاضبين من الناس اللى بتتريق او بتسخر من مرات محمد مرسى  ونحن معهم  ونؤيد فنحن ضد اى سخريه من زوجه احد ولكن المشكله عندى انا  انه بيقابلنى الناس ديه على الفيس وبلوجر لكن عمر ما حد من اللى بيسخروا من مرات محمد مرسى  قابلونى لا فى الفيس ولا فى البلوجر   و اول مره  اشوف صورتها اصلا كانت فى احدى المدونات اللى غاضبه من اللى بيسخروا منها   انا عايز اعرف فيه فعلا ناس بتسخر من مراته ولا دا اسلوب دعايه رخيص من الاساليب الرخيصه بتاعه   جماعه الاخوان
على الجانب الاخر انتشرت فى الفتره الماضيه صور لزوجات الفريق عنان والمشير طنطاوى بدون لازمه  واحاديث  عن مرتباتهم وتهم بدون ادله وبدون قضيه   ومافيش حد اعترض ولا قال عيب اختشوا  ياترى ليه هل سنبداء عهدا جديد بالكيل بمكيالين  ولا ايه الموضوع مش فاهم  بس ممكن مادام فيه ناس كتير مضايقه وغاضبه من التريقه او السخريه او التحدث باسلوب غير لائق عن مرات مرسى  وماحدش شايف حد جاب فى سيرتها  اصلا  وفى نفس الوقت نشر صور لزوجات الفريق عنان والمشير طنطاوى  والتحدث عنهم  بطريقه مش كويسه يبقى ممكن نستنتج ان المشير طنطاوى او عنان هما محمد مرسى واحنا مش واخدين بالنا او ان الاخوان ماشين على مبداء جرحنى وبكى وسابقنى واشتكى  ولا ايه  ماقصدش من كلامى ان الاخوان هما اللى بينشروا صور زوجات عنان  وطنطاوى لكن انا عايز افهم موقف مش فاهمه ازاى الناس مخنوقه من اللى بيسخروا من مرات مرسى وانا مش لاقى حد بيسخر من مراته  وماحدش زعلان من اللى بيسئ لزوجته عنان وطنطاوى بالرغم ان الكلام عنهم زاد  اليس الاثنين نساء ولهم ابناء يغضبون مما يقال عنهم ام ماذا
انا  مش فاهم حاجه ويارت لو حد شاف صفحه او موقع او اى حاجه  بتسخر او بتسئ لزوجه مرسى او ابنائه ياريت يتركلى لينكها عشان اشوفها عشان مش معقول اشوف الناس اللى مضايقه منهم ومشفهمش هما نفسهم 
انتهى

الأربعاء، 27 يونيو، 2012

شله مقالب

اشتكيت كثيرا من الغدر والخيانه وفراق الاصدقاء والوشوش المتغيره و التى تحمل اكثر من شكل
 وفى يوم جلست حزين متالم  من اكثر من جرح 
كعادتى اشكى لنفسى من افعال اصدقائى 
وفجاه بصيت لنفسى فى مرايتى  
وبدات ارجع بذكرياتى  واتذكر افعالى  مع اصدقائى 
لقيتنى بشكى لنفسى من نفسى  
وبسئلها ازاى كانوا  مستحملنك يانفسى 
صدق اللى قال الطيور على اشكالها تقع احنا  كده مع بعض 
مانقدرش نبعد عن بعض
اما صحيح شله مقالب 
لافيها  غدر ولا خيانه ولا وش فيها قالب
لكن الطبع فيها غالب

الثلاثاء، 26 يونيو، 2012

الربع جنيه


انا  انا الذى يقلل  من شانى من يطمع فيا لنفسه  ويريد ان يمتلكنى وانا لست من حقه  فيحاول ان يُخجل من يمتلكنى والذى انا من حقه فى الاساس لكى يتركنى له  فكيف ييدقق فى ربع جنيه بالرغم انى انا من حقه فى الاساس  اتذكر  جيدا عامل امن مترو الانفاق حين تكلم عنى مع احد الركاب الذى فسدت  تذكرت اشتراكه  ويريد ان يمر ويقول له ماتغير تذكرتك يا اخى دا هو ربع جنيه  عندما كان تغير تذكره الاشتراك  بربع جنيه  غضبت انا من التقليل منى بهذا الشكل وكدت افقد اعصابى  ولكنى ضحكت كثيرا الى ان دمعت عيناى من الضحك  حين رايت وجه رجل الامن الذى  يوبخ صاحب التذكره ويطالبه بتغيرها مقللا من شانى باننى  ربع جنيه    فهو نفس الرجل الذى تركنى كرهنا للفكهانى  امس  بعد فصال طال لساعتين من اجلى انا الربع جنيه  حتى استخدم الفكهانى نفس الاسلوب الذى استخدمه بعده هوايضا    وهو التقليل من شأنى انا متسائلا  هتكلم معايا فى ربع جنيه  وقد تعلم الفكهانى هذا الاسلوب من سواق التاكسى  فنفس الحوار دار بينه وبين سواق التاكسى الذى لم يكن يريد اعطائه باقى حسابه  ليسئله سواق التاكسى متعجبا انت هتكلمنى فى ربع جنيه فخجل منى وتركنى له وكنت اتسائل وقتها ان كان يخجل منى لماذا يحملنى ياليته يفرغ جيبه منى ومن زملائى اربعات الجنيهات  مهما كان عددنا قد يعلم وقتها باننا نحن الذين نكون له الجنيهات  وقد يحتاجنا فى شئ ثمنه فقط ربع جنيه ولا يستهان بائعه بهذا الربع   يعجبنى هذا الرجل الذى كان يمتلكنى  منذ لحظات كان  لاينهزم فى هذه الحوارات  فكل طماع يحاول ان يقلل منى لياخذنى  بغير وجه حق كان هو لا يخجل منى ويعلى من شانئ  فكان يرد دائما على من يقلل من قيمتى ويقول ان كنت تعتبر الربع جنيه بلا قيمه فلماذا تتصارع من اجله  ولماذا  ترى انه معى بلا قيمه ومعك هيكون له قيمه كما تطالبنى بالتنازل عنه تنازل انت عنه  لا يهمه ماذا يقول الناس عنه مادام هو على حق  كان يعجبنى ردوده دائما لكنى  فى وقت  خوفت ان يكون بخيلا ويفعل مثل الرجل  الذى كان يمتلكنى زمان ويكنزنى  فيقيدنى لا اتحرك براحتى  بين الناس فقط  اجلس بين اخواتى من العملات المختلفه حتى مات  وانزلونى الورثه  اتداول بين الناس فى مرح وسعاده لا يقلل فرحتى غير الاسلوب الذى يتداولونى بيه الناس  الذى كان يجعلنى  اشعر باننى اتداول فقط بين الطماعين مما كان يشعرنى بالضيق بالرغم من سعادتى بترك من يستعر منى انا الربع جنيه  ولكنى اشعر بالضيق لوضاعه من اخذنى  حتى  وصلت الى هذا الرجل  ذهبت  اليه بقيه حساب له  فكنت من حقه لم يقلل من شانى ليحصل عليا  ولاول مره اشعر بانى موجود عند شخص بطريقه حلال  وسط امواله الحلال فكل من اخذنى كان ياخذنى بطريقه حرام لانه كما يقال ان  من اُخذ بسيف الحياء فهو حرام   فكلهم تدواولنى وكنت عندهم جزء من مالهم  الحرام الا هذا الرجل   ولذلك  كنت احترمه ومازلت احترمه وساظل احترمه وافارقه الان والدمعه يملاء عينايا  ولكن عزائى بانه يعطينى الان لرجل ايضا اشعر بانه محترم فلم يقلل من شانى لكى يحصل عليا  ولاول مره لا اشعر بالضيق وانا اتداول بين الناس لان من ياخذنى الان  ياخذنى بحق ومن تركنى تركنى بحق ولكن اشعر بلحظات الوداع الحبيب لحبيبه فقد احببت الرجل الذى كان يمتلكنى لانه اخذنى بحق ولم يخجل منى واحترمنى  رغم قله قيمتى وعندما تركنى تركنى بالحق وليس لاحد ممن يقللون من شانى لكى يستولوا عليا   اودعه واحترمه لانى احترمنى واعتذر له لشكى فى يوم انه بخيل فليس البخيل من يحافظ على املاكه ولو كانت قشه                               امضاء الربع جنيه     


الاثنين، 25 يونيو، 2012

مش فاهم حاجه

الواحد ماكنش فارق معاه مين يكسب مرسى ولا شفيق   لان ما اسخم من سيدى الا ستى  فلما مرسى كسب مافرحتش زى الناس بس اهو مبروك لمرسى وبالتوفيق نحترم النتيجه وخلاص ولكن انتابنى شويه اسئله كده  بعد النتيجه اولا دا مرسى  اللى كسب يعنى التاخير ماكنش عشان يزوروا النتيجه لشفيق  ؟    لا كمان بيقولوا الانتخابات كانت نزيهه  ياسلام  ياترى لو كان خسر كانوا هيقولوا عليها نزيهه ؟ 
ايه دا الانتخابات قالوا عليها نزيهه ولم تزور وشويه كمان  المجلس العسكرى هيسلم السلطه  ايه دا دا المجلس طلع ابن ناس ومش طامع فى السلطه ولا حاجه  ايه دا كمان المشير بيهنئ مرسى بوصوله للكرسى  ايه دا ايه اللى بيحصل  على كده المجلس كان اخلاق ومحترم وصادق ولا ايه  على كده بقى احنا عملنا زى حديث الرسول كذبنا الصادق  وصدقنا الكاذب ولا ايه اللى بيحصل طيب مادام الانتخابات نزيهه والحياه جميله على كده المجلس مش هيتحاسب على ادائه فى الفتره الانتقاليه وكل الاحداث اللى حدثت من وقت ما مبارك تنحى والمجلس العسكرى تولى  ولو اتحاسب هبطلع ادائه عالمى مافيش منه  واللى قتل الطرف الثالث    ودا طبعا بعد حل مشكله الاعلان الدستورى المكمل  وخلاص ويتلاقى الحبايب  والحياه حلوه  طب دم الشهداء والثوره مالهم يا ابنى الراجل محمد مرسى شكرهم وكان ناقص يضربلهم تعظيم سلام زى ماعمل العسكرى فى الاول قبل ماتهتف الناس  ضده  انا  اعتقد اننا  نقول  لام الشهيد واسرهم يا يستشهدوا مع ابنائهم يا اما عوضهم على الله بقى  ايه الموضوع يا جماعه انا مش فاهم حاجه اللى فاهم يفهمنى كمان الراجل شكر القضاه عموما  وقال فيهم كلام حلو امال ايه حكايه تطهير القضاء اللى الناس عايزاها ديه ما القضاء حلو ونزيه اهو وغالبا الاحكام بتاعت مبارك ونظامه هتطلع عادله اللى فاهم حاجه يفهمنى  بس بردوا نقول مبروك لمرسى والى اللقاء فى ثورات اخرى 

الأحد، 24 يونيو، 2012

الله يرحمها كانت ثوره طيبه


واحنا خلاص قربنا نعرف نتيجه الانتخابات الرئاسيه  ونعرف مين الرئيس  يجب ان نقراء الفاتحه على الثوره اصل سواء  نجح مرسى او شفيق فواجب علينا نعزى فى الثوره كانت ثوره طيبه والله  لان العزى واجب ومتاخرللاسف  لان المفروض كنا نعزى من وقت مارجعت اللعبه على ماهو عليه قبل الثوره  النظام  كان حزب الوطنى  واحزاب هشه وجماعه محظوره بيقسموا الكراسى مابينهم وخلاص  والبلد فى داهيه  لحد ماطلعت دعوات للنزول يوم 25 يناير 2011  والكل اتريق عليهم  على ما اعتقد ان اللى دعا ليها كان صفحه كلنا خالد سعيد  ومن اجل التغير وقبلها كان بينادى حركه 9 مارس  و6 ابريل وغيرهم لكن عمر ما الاخوان  دعوا  الا لمصلحتهم  بل بالعكس كان بينسقوا معاهم الكراسى لحد اخر لحظه   وبعد ما الناس نزلت وكلهم نزلوا  اللى عمل صفحه كلنا خالد سعيد اتشوه والمنظمات  والحركات مبقاش حد يسمعهم  و6 ابريل اتشوهت واتقسمت  واللى كانوا شغالين وقت ماكنا غافلين بخ  وبقى اللى بيكلم عن الشهداء ودمهم واهدافهم  والثوره العظيمه بقايا النظام القديم والاخوان ايه المسخره ديه  رجعت اللعبه  وطنى واخوانى واحزاب معارضه هشه بس الاحزاب بقيت ائتلافات ثوره   واللى كانوا شغالين ودعوا لثوره بخ ومادام اللعبه رجعت لقوانينها يبقى ماعملناش حاجه بل بالعكس رجعنا للاسوء لان اللى دعا للتحرك  بخ  ودلوقتى اللى بقى يدعى للتحرك قطع اللعبه القديمه ورجعنا لاسوء مما بدانا ومادام وصلنا اننا نعتقد  ان  محمد مرسى مرشح الثوره  وشفيق يقول ان هيحقق اهداف الثوره  
يبقى احنا نقول  الله يرحمها  كانت ثوره طيبه
الفاتحه على روح  الثوره واهدافها      

السبت، 23 يونيو، 2012

رحلتنا هتكون من اليقين الى الشك وربنا يستر

الدكتور مصطفى محمود  الله يرحمه  كان عمل كتاب اكثر من رائع اسمه رحلتى من الشك الى اليقين  بيحكى فيه ازاى وصل الى اليقين بوجود الله  وايه المراحل اللى عدى عليها والنظريات اللى مر عليها الى اخره معرفش ليه حاسس ان احنا هنعمل جزء تانى من كتابه بس بالعكس رحلتنا من اليقين للشك بفضل الاخوان او التيار اللى بيقول على نفسه اسلامى
بعيدا عن التيار الاسلامى والاخوان  فلاش باك
 المشهد الاول    لما زمان كان واحد بيشحت  كنا شايفين  انه يستحق وبنعطيله حسنه لما الموضوع كتر والبلد كلها نزلت تشحت سواء محتاجه او واخدها وظيفه    بقينا  مابنطعتيش الشحات الا القليل مننا
   مشهد الثانى ايام ماكان النظام القديم بيستغل الدين فى بعض الاشياء مثل حرب العراق 90 مثلا  او قبلها ايام السادات لما كان عايز يعمل توازن الناس شكت فى علماء الازهر والدين  اللى بيشتغلوا فى الحكومه  ولذلك لما اختلف ايام شهر رمضان عن السعوديه فى ناس صامت مع السعوديه وافطرت معاها  ولا كانها قاعده فى مصر عشان شكه فى الشيوخ عندنا    
الان ربنا يسهل  الاخوان يمسكوا البلد واهى هتكون الدوله مبنيه على استغلال الدين فى كل شئ من بدايه الاستفتاء لما نزلوا بالشيخ يعقوب  لحد الانتخابات الرئاسيه والشيخ صفوت حجازى وابقى قابلنى لو صدقنا شيخ  بعد كده  سواء شيخ فلول او شيخ اخوان   ولما بتوع الاسلام فى الانتخابات يدفعوا رشاوى  زيت وسكر  وشنطه رمضان لما تتوزع من شهر رجب دا معناه ايه  نفسى اعرف الرشوه كانت على اى مذهب ولما بيكدبوا بيكدبوا على اى مذهب  لما كانوا بيعملوا مخالفه فى الانتخابات  كانوا بيقولوا الكل بيخالف طب يعنى كان مذهبهم المخالفين   دا تبع ايه مله   ولما يلعبوا بالدين ويفهمونا الايات القرانيه على مزاجهم  لمصالحهم  بعد كده  مين ياترى هيؤمن بيه لما يستغلموا لمصالحهم   واحده واحده هنوصل للشك بدل ماكان عندنا يقين بالله ودينه  وربنا يستر على الدين   طبعا مهما حصل مش هيبقى الكل  لكن هيكون اغلبيه

الجمعة، 22 يونيو، 2012

سبحه وسيجاره


 طبعا دا عنوان احد قصص الكاتبه شرين سامى فى كتابها بنكهه مصر 
 سبحه وسيجاره  نعكس الحاله اللى عند الشعب كله  حاله التناقض الداخليه للانسان اللى عايز يحاول يجمع بين الاثنين  عايز يعصى الله فيما لا يخالف شرع الله تيجى ازاى معرفش يمكن هو دا الصراع الدائم الداخلى  للانسان من اول سيدنا ادم الذى  اراد ان ياخذ من الشجره المحرمه وفى نفس الوقت يظل فى الجنه ولكن ماينفعش  .
وهذا الصراع الداخلى للانسان مابين شهواته  ورغبته فى دخول الجنه  هو الذى نزل بسببه الاديان للتنسيق مابينها وترويض الشهوات   ولكننا فى هذا العصر ظهر شيوخ مزاجهم عالى فنراى مثلا الشيخ الذى قال ان السيجاره لاتفطر فى رمضان فتوى لا تنسى من  فتاوى المزاج العالى مما يجعلنا نرى فى يوم الايام فى رمضان واحد فى الجامع فى ايده سبحه وفى التانيه سيجاره واذا كان ظهر هذا فيما نطلق عليهم شيوخ هذا الفكر فنتوقع بعدها اى شئ يحدث بين الناس 
بالامس قابلت واحد مدخن يريد ان يمتنع عن التدخين ولكنه منتظر الاخوان يمسكوا  ليمنعوا التدخين ولذلك انتخبهم   ان سمعت كلامه تذكرت عنوان القصه سبحه وسيجاره ماشيه عليه اوى   وتسائلت هل نحن لازم حد يمنعنا او يقف لينا بالجرباج  وهو بردوا زى من يدخل افلام فى السينما للمراهقين ويخرج يقولك البلد محتاجه دين  فيذهب يرشح الاخوان هل الدين بالاكراه او ان لازم حد يجيلنا عشان يزرع فينا الدين ولا يجب علينا نحن ان  نزرعه  فى داخلنا نحن شعب اصبحنا نعشق السيجاره ولكننا نتمنى من ياتى لنا ليجعلنا نستبدل السيجاره بالسبحه فنلجاء الى اى حد ليعطينا السبحه  حتى وان لم يكن بتاع سبح لعلنا نبطل تدخين 
انتهى      

الخميس، 21 يونيو، 2012

كل يوم فى جديد


دخلنا فى اليوم التانى من الدعوه  وبما انى كنت مشغول النهارده ومالحتقش ارد على التعليقات  فهيكون البوست دا تعليقا على المعلقين عندى بالبوست بتاع امس
نبدائهم بالترتيب 
 بكلام فيلسوفنا الكبير  احمد احمد صالح  صاحب مدونه وجع الفلسفه وبالمناسبه  هو اخو  المدونه رحاب صالح  صاحبه مدونه حياتى مش حره فيها   وليهم  اخت تانيه شرين واللى عايزين ننشطها شويه لانها مابتكتبش بقالها كتير وهى   صاحبه مدونه  مذكرات مدرسه مطحونه http://shahd-diariesofateacher.blogspot.com/   يعنى اسره تدوينيه متكامله   المهم  خلاصنا  التشريد  ندخل فى  تعليقه الجميل   استوقفنى جمله  ان مافيش يوم من غير جديد   وبالتفحص فها رايت ان فعلا لايوجد يوم بدون جديد  حتى ولو انك نزلت من بيتك ومشيت فى نفس الشارع وركبت نفس الميكروباص  ولقيت نفس الناس اللى بتركب معاك الميكروباص كل يوم ان لم تتغير انت فاحد منهم سيتغير ويؤثر فيك فتتغير او ان تشعر بان يومك جديد بنكته جديده  او خوار جديد حتى ولو تكلم فى نفس حوار امس هتلاقى فىموقف كان ناسيه فبالنسبالك هيكون جديد   فكل يوم جديد بيه شئ جديد تصنعه انت او تتاثر بيه  عن طريق حالتك او الموقف اما  ان تحبط او انك تحصل على شعاع امل ام من صنعك ام من صنع غير وتتاثر بيه  وهذا  الامل هو ما عبرت  عنه  
 الاستاذه اسماء على فى تعليقها  الجميل هى محاوله ممكن نقدر   تعليق جميل يشع بالامل فى النجاح  والاجمل انك تلاقى اللى بيفكر زيك لعل نجد نتيجه مع بعضا  ودا كان دور
 قلب القطه فى تعليقها  لما كشفت انها كانت بتفكر فى نفس كلامى  امبارح وانا بفكر فيه واعطتنى فكره جميله اننا ختى لو هندخل السرور ولو للحظه فهو شئ مفيد وهذا ما اكدته 
  الاستاذه كارمن فى تعليقها الرائع   ان مش مهم مانكتب المهم اننا نتواصل   ودا بالبطع  حقيقى  لان التواصل فى حد ذاته قيمه  لانه يجعلنا نتعلم من بعض عندما نتواصل وننقل لبعض تجاربنا السابقه  لبعض وهذا ما فعلته بالفعل 
استاذتنا  شمس النهار  عندما اعطتنى روشته رائعه فى تعليقها   نقلا عن دكتور كان بيدرسلها فى الجامعه  وهى ان  الابداع يحتاج الي استمرار ومداومة حتي لو مالكش مزاج مجرد ماهتمسك القلم هتنط في راسك فكرة تصميم  وهذه  مقوله رائعه  اشكرها عليها واشكر استاذها  ايضا  واخير الشكر كل من شرفنى بزيارده  وارد عليكم ان نسائلتم انا ليه رديت على التعليقات فى بوست اقولكم لانى رايت ان التعليقات  جميله ورائعه ويمكن ان تكون التعليقات فى محل بوست  مضاف اليه   عفوا  ايه الاعراب دا واحنا فى حصه نحو  تضيف الى قراء المدونه  وصاحب المدونه ايضا
وسبب خبيث بينى وبينكم  انى مكسل اكتب بوست جديد  نيههاهها   ضحكات شريره متقطعه 

الأربعاء، 20 يونيو، 2012

دعوه التدوين اليومى




اليوم اول الايام  فى دعوه التدوين اليومى  جلست احاول  اكتب  اول بوست فى الحمله روادتنى اسئله عديده  اولها هل يمكن الانسان  ان يدون  يوميا  بلا انقطاع   قد يكون هذا سهل بالنسبه للمدون الكاتب او المدون الصحفى ولكن المدون الذى ياخذ التدوين هوايه لا اكثر هل يقدر ان يدون يوميا وهل يمكن ان  تتحول الهوايه الى عاده يوميه وهل لو تحولت الى عاده روتينيه  هل سيشعر بالملل اثناء الكتابه  وتتحول الفكره  التى تحاول كسر الخمول التدوينى  الى اداء تزيد من حالت الخمول التدوينى بعدها   بل لا اعتقد ان حتى المدون الكاتب يقدر ان يدون يوميا  فلا اعتقد ان الكاتب يقدر ان يكتب كل يوم قصه وايضا الشاعر لا يقدر  يكتب كل يوم  قصيده فوارد جدا ان يكون باله غير رايق فى يوما ما  والمدون الصحفى اعتقد انه يستكفى من كتابه مقالاته فى جريده  باعتبار انها وظيفه  اذا اراد يكتب يوميا  ولكن ان يكتب فى مدونه يوميا فهى ليست وظيفه فما الذى يقيده بميعاد للتدوين  وان كان المدون مدون مفضفضاتى يكتب فضفضه فليس كل يوم تمر بيه احداث او يتذكر احداث يريد ان يفضفضها مع اغلى الناس  تدور فى راسى اسئله كثير ثم اتذكر جمله قاله الاستاذ ابراهيم رزق  ان اجمل ما فى التدوين عشوائيته  ثم يتبادر لذهنى هاتف يقول ولكن حتى لو كان اجمل مافى التدوين عشوائيته فيجب ان تكون التدوينه لها قيمه  او فكره  الموضوع مش انك تدون كلمتين وخلاص  بمعنى  ان على كل مدون مشارك فى الدعوه  ان يعطى فى الشهر 30 قيمه او فكره  للقارى سؤاء فى القصه او الشعر او الفضفضه او ايه حاجه  فى اى حاجه بمعنى ان لا تكون  التدوينه  سلام وتحيه  وخلاص  وتكون التعليقات مجاملات وخلاص ليعود النقاش التى اختفى فى البلوجر  وتبداء المناقشات والحورات   فيتم القضاء على الخمول التدوينى  الذى انتشر والتى تم عمل الدعوه  للخلاص منه  واخير  اجاوب على سؤالكم  ان سألتم  انا كتبت البوست دا ليه  او هدفه ايه  ؟  ارد اقولكم  كنت عايز اكتب موضوع  وفشلت فقولت احاول اكتب الكواليس   فكواليس الموضوع فى حد ذاتها موضوع  نيههاههها

الأحد، 17 يونيو، 2012

ثوره الورق


بعد الافتكاسات اللى ظهرت والخوف من الاقلام و دعاوى ان كل واحد يجيب قلمه وخوف اللجان من حكايه الاقلام ديه  وخناقات وكل واحد عايز يستخدم قلمه والحاجات الجميله ديه اعتقد ان الورق هيجيله اكتئاب او هيعمل ثوره  كل  الكلام والاشاعات والافتكاسات ديه على الاقلام ومافيش ولا واحده  على الورق حد عارف الورق اللى انتم بتصوتوا عليه دا مصنوع من ايه ولا خامته ايه مش ممكن يكون مصنوع من ورق بياخد العلامه من مرشح لمرشح اخر  او ورق  معمول بطريقه مع  تطبيقه يحذف ما بداخله  احنا بعد كده كل واحد يجيب قلمه معاه ويجيب كمان ورقته  لضمان تسليم الصوت على اكمل وجه  او نطالب ان يبقى التصويت صوتى   على  شرايط  كاسيت او سى دى وياسلام بقى لو كان بالصوت والصوره  يامزاجك  ايه الموضوع مش واثقيين فى القلم وواثقين فى الورق   فلتسقط الاقلام ويحيا الورق   ورق ورقنا  ورق  الانتخابات   فى الناخبين بتصوت وبعد النتيجه ما تظهر  تيجى تلطم   وتسيب ورقنا .
ياورقى  كنت فين  ياورقى 
يالا كله ينزل بورقته ويقول    ياورقنا يا احسن ورق  معقوله نسيبك ونصوت فى ورق غيرك  اخص عليك اخص
حاجه غريبه واثقين فى ورقهم  ومش واثقين فى قلمهم   بلد بتاعت اقلام صحيح 
عيبنا اننا بنصدق اى حاجه  اى حد يفتكس اى حاجه بنصدقه
 شعب يخلى الواحد يهيس والواحد مهيس جاهزاصلا

الجمعة، 15 يونيو، 2012

من اين ناخذ اخبارنا ؟

من قبل الثوره واحنا كلنا عارفيين ان التلفزيون المصرى موجه لخدم النظام  وتقريبا ماحدش كان بيتفرج عليه الا قليل وكنا بنشاهد  القنوات الخاصه  وبعد الثوره  اتهمت بعض القنوات الخاصه كمان  بانها ذات مصالح  وموجه ضد بعض التيارات وكل قناه موجه لتيار معين  المؤسف  اننا وصلنا الى  اننا  اصبحنا نردد على لسان كل بعض القنوات  اخبار عن قنوات الاجانب   طبعا ماهو احنا اصبحنا مش واثقيين بالاعلام المحلى سواء حكومى  او خاص  الغريب والذى يطرح سؤال من اين اتينا بكل هذه الثقه فى اعلام الغرب هل هما ملائكه  ليست لهم مصالح عندنا مثلا  ولا ايه  وهل من يستخدم الثوره  ويستغلها   لمصلحته هما فقط اصحاب التيارات المختلفه فى بلدنا   اخبار  كتتير تداول بين الناس مصدرها من الخارج او من الداخل  الله اعلم لكن الشعب بيصدق وخلاص  وديه المشكله   من الاخبار التى صدقها البعض طبعا اخبار ثروت  الرئيس السابق  وبصراحه  تصديقها مضحك  صحيح النظام كان فاسد  لكن عندما ينتشر خبر مثل  بريطنيا تتعهد بارجاع 40 مليون استرلينى من فلوس مبارك فاكرينه
الخبر فى حد ذاته قد يصدقه الناس العاديه البسيطه  بحسن نيه  .
و الخبر غالبا فبركت  صحفى واطى  عايش فى الدور لكن لو الصحفى محترم مثلا والخبر صحيح فالسؤال  التى يتبادر للذهن  هل الحدايه هتحدف كتاكيت   هل يعقل  ان دوله زى بريطانيا هتخرج منها 40 مليون  استرلينى لله والوطن  محبه لمصر حد عارف يعنى ايه بلد يخرج من بنوكها  المبلغ دا  واضرار ذلك   يعنى لو الخبر اصلا صحيح هل تعتقد ان بريطانيا هتنفذ وتدفع  و لا تشك  فى سؤ نيه  ناشر الخبر او مصدره  وطبعا زيه الخبر بتاع  دوله معرفش ايه  مستنين حكم قضائى على مبارك عشان يرجعوا الفلوس  ياسلام.  مسخره   وطبعا بالنسبه للقوى السياسيه مايهماش صحه الخبر اصلا اللى يهمها كيفيه اللعب بيه وتحقيق مكسب من ورائه   فالكل مشغول وراء مكاسب سياسيه مافيش حد عمل مشروع يفيد البلد بجد بجوار  معاركه السياسيه  المعتمد على فساد النظام السابق  ودماء الشهداء  والشعب ماشى وراهم  امريكا قالت  اسرائيل بتفتخر  بريطانيا منتظره سويسرا جاهزه   خلاص بقى اعلامنا اللى بنعرف منه مايجرى فى بلدنا هو الاعلام الخارجى بيستفذنى اوى لما الاقى واحد بيتكلم ويقول اسرائيل بتؤيد فلان  وفرحانه من علان خلاص بناخد اخبارنا اللى بنصدقها من اعلام العدو  ومن اين اصبحنا ناخذ اخبارنا ؟ حسبى الله ونعم الوكيل فى كل من افسد اعلامنا و شوهه واساء ليه وساعد فى فقد المصداقيه فى اعلامنا وحسبى الله ونعم الوكيل فى من جعل شعبنا يثق فى اعلام العدو اكثر ما يثق فى اعلامه  حتى يبث له ما يريده العدو  وفى كل سياسى لعب على هذا

الأحد، 10 يونيو، 2012

مدارس مهجوره


شارك فى الموضوع الزميله مى عبد الرؤوف

كثير ما يطالعنا بعض الاعلاميين والنخبه ورجال وزاره التعليم  والمعلميين  بضروره بناء مدارس جديده  لاستيعاب الطلاب وحل مشكله التكدس داخل الفصول ولكنى اتسائل المدارس الجديده اين ستبنى فى المدن الجديده  التى لم تشكى من مشكله التكدس فى الاساس وتشكى من مشكله المواصلات الغير متوفره ولا هتبنى فين
الغريب اننى عندما  انظر نظره  على المدارس اللى فى القاهره اجد بعض الدارس مغلقه اعليها تنازع بين صاحب المدرسه والاداره التعليميه التابعه لها وبقالها سنين عديده  مغلقه  لا مستفيد منها صاحبها ولا الاداره التعليميه التابعه لها التى تؤجرها  ولا اى جهه فى الاساس  طب من مصلحه من ان يكون عندنا مدارس غير مستغله  من احد غير التراب والعنكبوت واقمام  الزباله التى مع مرور الزمن تصبح غير صالحه لاى شئ مثل مدرسه النيل التى فى الصور











قد اتفهم ان المسئوليه قد تكون من قبل اصحاب المدارس وليس من الاداره التعليميه  فلندعى مثلا ان اصحابها يثيرون الشغب مثلا لعوده المدرسه  اليهم مما يجعل الاداره التعليميه تغلقها خوفا على الطلاب  كما قال حارس مدرسه النيل  الذى يقضى عدد ساعات معينه فى حراستها ثم يغلقها ويذهب يسترزق من المدرسه المجاوره لاجل يطلعه بقرشين
 لكن مايلغى هذا الافتراض ويبرء اصحاب المدارس ان بعض المدارس المغلقه و المتنازع عليها   تؤجرفى بعض الاحوال  لوزاره التضامن  ليخلص المواطن اجراءات بطاقه التموين فيها  مثل مدرسه التيموريه  الابتدائيه









 واحدى المدارس بعد ما تم نزع ملكيتها  من صاحبها تحولت الى جراج سيارات  
والحجج الظاهره ان الوزاره ليس لديها ميزانيه لاعادها كمدرسه  مما يجعلنى اتسائل ان كانت الوزراه ليس لديها الميزانيه لاعادها كمدرسه لماذا دخلت فى قضايا لنزع ملكيتها من صاحبها  بلطجه وخلاص ولا الاداره عندها الميزانيه للقضيه وفقط   وان كان  صاحبها يثير المشاكل فلماذا لم يثير مشاكل عندما تستخدم فى اجراءات بطاقه التموين   والى متى سنظل نشتكى من تكدس الطلاب فى الفصول  واحتياجنا لمدارس جديده  وعندنا مدارس مغلقه لا تستغل بسبب التنازع عليها او بسبب انها ايله للسقوط مثلا  مثل بعض المدارس  ومبانيها تظل كما هى مبانى تشغل اماكن لا يستغلها احد الا العنكبوت واقمام الزباله  الى متى 
وسؤال اخير المدارس المهجوره مثل مدرسه التيموريه  التى يتم بها اوراق بطاقه التموين  هل هذا المكان بهذا الشكل صالح ان يدخل بيه احد يخلص فى اوراق او يشتغل فيه اين احترام اداميه الناس

الجمعة، 8 يونيو، 2012

28 حرف

أ‌- ابدا  الكلام  بالسلام  والتحيه  النهارده  قررت اجرب   فكره عجبتنى من كتاب 28 حرف  للفنان احمد حلمى  وهى انى  اكتب على  ترتيب الابجديه   تدوينه  
ب‌-     بدايه من  الاف الى الياء   بالترتيب الابجدى للحروف 
ت‌-    تفتكروا الموضوع دا هيكون سهل وبسيط  ؟
ث‌-    ثلاث حاجات او اكثر  فكرت فيها لما قررت اجرب الفكره ديه  اهمها هى  هل لو ركزت  على  الترتيب دا هيكون التدوينه  لها معنى وممكن الناس تستفيد منها ولا لا ؟
ج‌-     جميل ان الواحد يفكر فى تجربه يجربها  تجعله يفكر  والتفكير يدخله فى حيره تشغل عقله
ح‌-     حيره  فى كيفيه التنسيق بين ترتيب الابجديه فى تدوينه  وبين قيمه التدوينه  والرساله اللى ممكن توصيلها من خلالها  وتناسقها
خ‌-     خلال  الحيره ديه قد اتشتد و تفقد  التدوينه  معناه  اذا حاولت الحفاظ على الترتيب الابجدى للحروف  وادينى  مش عارف ادخل على حرف الدال ودا
د‌-       دليل ان الموضوع مش سهل انك تحافظ على الاثنين معا  لانك محتاج ان يكون ذهنك حاضر  لكن ياترى  حتى لو كان ذهنى حاضر
ذ‌-       ذهن القارى هيقدر يستوعب ما اكتبه اثناء التجربه  ديه  وخصوصا لو تشتد  فكرى  وانا  بكتبها  دا سؤال  ايه دا انا عديت من الدال والذال طب ديه حاجه جميله اوى ومبشره  
ر‌-      ربما اقدر اكمل  باقى الحروف  على نفس النهج لكن واضح ان ذهنى زاهد فى الافكار
ز‌-      زهد يجعله عاجز عن الاستمرار  
س‌-   ساحاول  الاستمرار حتى انتهى  و اجيب ذهنى يمين شمال
ش‌-   شمال يمين  لعله يسعفنى  بالكلمات  حتى اعدى الحروف الصعبه     
ص‌-  صابر  عليه  ومعطيه وقته للبحث عن الكلمات
ض‌-  ضارب كل الارقام القياسيه فى الصبر
ط‌-     طبعا لازم  احمد ربنا انى عديت من حروف الزين  والصاد والضاد   وانا مش واخد بالى كانت بصراحه  حروف صعبه  مثل الحرف اللى جاى دا  اللى واضعنى فى ظرف لا احسد عليه   
ظ‌-     ظرف  بيفكرنى بالظرف اللى كان بيخلينى اقلب الطرابيزه وانا صغير وانا بلعب
ع‌-     عموما اهو عدى الظرف على خير وربنا ستر وعديت من الحرف دا وماقلبتش الطرابيزه زى زمان
غ‌-     غالبا عارفين  ايه هو الظرف اللى  كنت بقلب الطرابيزه فيه اثناء اللعب زمان طبعا ومن غير ما اقول
ف‌-   فاكرين  لما كنا بنخسر  فى اللعب واحنا صغيرين كنا بنعمل ايه
ق‌-      قرار بقلب الطرابيزه على طول
ك‌-     كانت ايام جميله  بالرغم بساطتها  لكن تركت جوانا حاجات كتير
ل‌-      لما نرجع نفتكرها بنقول كانت ايام ياريتها دامت دنيا
م‌-       مين ياترى كان بيعمل كدا  ؟ ومين لسه فاكر ؟ ومين بيفتكر  
ن‌-      نادر جدا لما حد  يكون ماعملش كدا وممكن يكون دا سبب اننا لا نقبل الراى الاخر
ه‌-       هو احنا لما لانقبل الهزيمه فى اللعب واحنا اطفال هنقبل الهزيمه فى الفكر كبار اكيد لا 
و‌-      وربما  لو كنا تعلمنا ان اللعب مكسب وخساره  لكنا تعلمنا لغه الحوار واحنا كبار  
ي‌-     ياسلام اخير   وصلت للحرف الاخير فعلتها  التجربه خلصت وناسف للازعاج

الثلاثاء، 5 يونيو، 2012

النكسه


النكسه 5 يونيو 1967
لم اكن قد  اتولد وقتها ولم اعيشها ولم اتذوق مرارها ولكن تعلمنا فى المدارس كيف فقدنا الارض وقتها  واحتلال  اسرائيل لسيناء وقطاع غزه والضفه الغربيه  والجولان   والموسوعه بتقول ان النكسه ادت لمقتل 15000 الى 25000  انسان فى الدول العربيه  مقابل 800  فى اسرائيل وتدمير 70او80 %  من العتاد الحربى لدول العربيه  مقابل 2 او 5% فى اسرائيل   وكمان تهجير معظم سكان مدن قناه السويس ومحافظه القنيطره فى سوريا  وتهجير عشرات الاف من الفلسطينين  ولم تنته تبعاتها الى اليوم اذا لاتزال اسرائيل تحتل الضفه الغربيه وقامت بضم القدس والجولان  لحدودها
كل الكلام اللى فوق انا جايبه من الموسوعه لانى معرفش على النكسه غير انها كانت نكسه  اصل تعليمى تعليم حكومى يخلص الامتحان يسيح
المهم اى حد لما بيتكلم عن النكسه ويبحث عن اسبابها بيقولك احنا مكناش جاهزين  وعبد الناصر كان واجع الجيش فى حروب مالناش دعوه بيها عشان الزعامه ودوره كزعيم للدول العربيه  والله يرحمه كان زعيم  والبلد كانت لسه معمول فيها ثوره  ولسه بتبنى نفسها من جديد داخليا وهو شاغل دماغه بصراعات خارجيه وكلام كتير  انا ايه ىاللى خلانى اتكلم عن النكسه بتاعت 1967  يمكن عشان النهارده ذكرى النكسه  ولا ايه الحكايه  يمكن لان لما قامت الثوره ثوره 25 يناير  واللى كانت بتنادى بالحريه والعادله الاجتماعيه  وتحسين الاوضاع الداخليه  فجاه اصبحنا نبحث عن الزعامه العربيه خدنا  ما كان يحدث من  تصدير الغاز لاسرائل سكه للبحث عن الزعامه وتوالت بقى احداث السفاره والهتافات احنا نحارب اسرائيل من غير سلاح نحاربها بايدينا  والايام تمر ويصبح العب بالزعامه للحصول على كرسى الرئاسه  حتى راينا الراقصه عفوا الشيخ صفوت الحجازى معرفش هو شيخ ولا لا بس كتير بيقولوا عليه بيعرف ويفهم فى الدين اكتر مننا وبالتالى يقال عليه شيخ او الداعيه او اى هجس وخلاص  المهم الكابتن ابن حجازى اشوفله فديوه  فى دعايه للكابتن محمد مرسى يقول هنرجع الولايات العربيه المتحده  على ايدى الراجل دا وجماعته واخوانه  اللى هو محمد مرسى  وستكون عاصمه الخلافه  القدس و هتكون عاصمتنا ليس القاهره ولا مكه ولكن ستكون القدس   النبى حارسه وصاينه   لما اشوفله  الفديوه دا  يجعلنى اتسائل هل الزعامه بالجعجعه الفاضيه والرقص على سراب يراه البعض حلم  جميل اننا نحلم بالزعامه العربيه والاتحاد لكن لما تكون الاحلام لها  ترتيب  ينفع احلم بحلم رقم 2 قبل رقم واحد او انى اجعحع بالحلم التانى وانا لسه لم احقق الحلم الاول اجنا دلوقتى واحنا لسه خارجين من ثوره  ولسه لم تكتمل ولم نستقر تجعجون بالزعامه  الزعامه مش بالجعجعه الفارغه ياصفوت  ابنى بلدك الاول وبعد كده ببنائها ستصبح زعيمه  بدل ما نعيد زعامه عبد الناصر اللى كانت زعامه من ورق اول ما توفى  اتقطع الورق واصبحت الزعامه فراغ  ولا احنا محتاجين نكسه تانىه ودخول فى حروب تانيه واحنا مش قدها  عشان نفوق  ونفكر نبنى بلدنا اولا بدل الجعجعه واللعب  بالزعامه للحصول على الكراسى 

Follow by Email

Tetris