الأربعاء، 22 فبراير، 2012

العام الثانى كل سنه وانتى طيبه

مرت سنتين على انشائها  عرفتنى على ناس رائعه  وعالم جميل
فكرت ابعد  شويه  واختفى غيرت اسمها وغيرت كمان اسمى
حتى القالب كمان  وكأنها مدونه تانيه لواحد تانى 
   لكن فى عيد ميلادها  كنت لازم ارجع تانى اسمها  فضفضه
كل سنه وانتى طيبه   يا مدونتى



الخميس، 9 فبراير، 2012

دردشه فى ميدان التحرير واعتصام ب id واعتصام تبع دكتور عمر


اندلفت لميدان التحرير   مع احد الاصدقاء وكان المنظر يظهر  الى اى زائر للميدان  ان الميدان اصبح سيئ جدا  وبدائنا نرى مجموع من الاحداث تشبه  الايفيهات  او بمعنى اصح عندما نسئل عن حدث تكون الايجابه ايفيه ابن لازينه  مسخره فى البدايه رائينا  مشاجره  مجموعه من الناس ملتفيين حوليين شخص وبيضربوه وهو معاه  سلاح ابيض  فسئلنا احد الماره  لكى نفهم ايه الموضوع  فكان الرد اول الايفيهات   مسكوا  حرامى والبلطجيه بيضربوه  مسخره حرامى واللى مسكوا بلطجيه مسخره   ضحكنا وقولنا نروح نصلى العصر  على باب  مسجد عمر مكرم لقينا واحد من اللى بيحرصوا الاحذيه من السرقه  بيقول اشوف واحد بس منهم  واطلع عينه فسئلناه  ايه الموضوع  فقال انهم مسكوا واحد كبير مع طفل صغير كانوا هيمارسوا الفاحشه فى الجامع  طب يعنى هو خلاص مافيش مكان تانى  و اثناء واحنا بنتكلم جاء الافيه الجامد  واحد من اللى بيحرصوا احذيه الناس من السرقه  اتسرق حذائه  يعنى باب النجار مخلع   دخلنا الجامع صلينا  واحنا خارجين  من المسجد لقينا  واحد معاه علم الزمالك فسئلته طب الخناقه بين الاهلى والمصرى علاقت الزمالك ايه  وقعدنا ندردش وبما انى عمرى ما اعتصمت ودايما كانت علاقتى بالميدان ان بروح وارجع تانى  مش مقيم حبيت اعرف  الخيم بيتم تنظيمها ازاى  فسئلته  عن الخيم كيف تنظم وانا لو عايز اجيب خيمه اعمل ايه واضعها فين  فى المثلت  ولا فى الدائره اللى هى الجنينه فبدا يحكلى عن الخيم  وتنظيمها وعرفت منه ان الالتراس لما بيعتصم  بيبقى معاه id  وحتى فنانين الثوره  بيبقوا معاهم id واى حد تبع حد بيبقى معاه id  وغير ذلك  بيبقوا  مع الدكتور عمر   و قالى ان انا لو هعتصم  مثلا اسبوع  ممكن يكلفنى  ثلاثون جنيها   وعرفت منه انه واخد اجازه  من شغله  شهر بدون مرتب     وبيقولى انتظر يوم 15 الشهر دا  هيحصل فيها ايه  وفى وسط كلامه قالى ان هو ممن احرق المجمع العلمى  قال بالنص ان الحكومه  حرقت جزء وبدال مهما بيقول ان احنا اللى بنحرق قمنا كملنا عليه  بقنابل الملتوف وقعد يورينى ايده  ازاى الملتوف بهدلها  المهم نرجع للاعتصام  والخيم بيقول يا اما بتكون ليك id    او بتبقى مع الدكتور عمر   مع العلم ان فيه خمتين  بالقرب من   جامع عمر مكرم  مشبوهيين  بيجبوا فيهم بنات   مش تبع حد  والخمتين دول هما اللى اتسمك فيهم اثنين عرايا  قبل احدث مجلس الوزراء      وبناكد ان الخمتين دول مش تبع حد 
طيب نرجع  الخيم اللى ب id  او الخيم اللى تبع الدكتور عمر 
سئلت عن الدكتور عمر اشوف مين دا   اهو بردوا  يجيبلى خيمه  قانون جديد رحت فى الصينيه اسئل عن الدكتور عمر  لكن كان حظى سئ فلم اتمكن من مقابلته لانه كان متصاب من احد البلطجيه  لكن رايته من بعيد  وواضح عليه طبعا انه انسان محترم وراقى   والكل الناس اللى تعرفه بتقول عليه كلام كويس  فاحد الاشخاص اللى تبعه  وصفه بملاك  يمشى على الارض  وعندما سئلت الشخصاللى تبعه دا  الاعتصام  قال هات خيمتك وتعالا    وعندما تشاهد الدكتور عمر ورفاقه  من بعيد تشعر بانهم كالزهور اللى مرميه  فى الزباله   سئلت احد الناس طيب هو اللى مخليه يقعد وسط البلطجيه وليه ساكت عليهم كانت وجهه نظرهم انه هو يراى ان البلطجيه دول  ضحايا النظام ولو  عاملته  كويس هيتحولو ناس كويسه  بس واضح انها جت على دماغه لانه اتصاب منهم  واضرب  المشكله ان  الميدان  اصبح اللى فيه  واحد او اثنين  معتصمين محترمين والباقى  معتصمين ولاد  كلب  بيشوهوا  صوره المعتصميين المحترميين بوجودهم   والمحترمين مش هيعرفوا يتصرفوا معاهم  وزى ما قال واحد  من المحترميين  انهم مش عارفيين يتخلصوا من البلطجيه  حرقولهم الخيم وبردوا بيرجعوا  مش عارفين يتصرفوا معاهم  وفى الاخر الصوره اللى بتظهر ان الميدان اصبح سئ السمعه  بالرغم من ان فى ناس كتير محترمه  بس البلطجيه اكثر للاسف   وهما اللى على الوش

الجمعة، 3 فبراير، 2012

حداد يا كل حاجه وعكسها


اتخنقت مش فاهم حاجه  كل حاجه وعكسها اصبحوا صح  مما لاشك فيه ان احداث ماتش الاهلى والمصرى كانت فيها تقصير امنى كبير  والحريق اللى حصل فى الاستاد فى نفس الوقت بيقول انها  لعبه فاشله  ومشبوهه وجريمه وقحه  لكن ومليون خط  تحت كلمه لكن  زى ما دم الواحد اتحرق  على المذبحه اللى حصلت وزعل  على الضحايا  اندهشت من بعض الناس اللى كأنهم عمرهم ماشافوا جمهور بيقتل فى بعض  عشان كوره بالرغم من فوزهم والشرطه بتتفرج  بصراحه مش قادر اقول ان الشرطه كانت بتتفرج و افضل الشباب بيقتل  والكلام الكبير دا لان بالرغم من  ان  دمى محروق من الشرطه  وتقصيرها  المشبوه   لكن فى نفس الوقت انا من زمان محروق دمى من  المشجعين او الالتراس يعنى لانى لسه فاكر  مره وانا  راكب المترو  والاهلى كسبان مش فاكر بالظبط كان بيلعب مع المصرى ولا الاسماعيلى  لكن اللى فاكره انه كان كسبان  وكان فى القاهره  والمشجعيين من فرحتهم بيخبطوا على عربات المترو وبيهتفوا ضد الفريق الاخر  ويسبون  الاسماعيليه ويقولون باللفظ  بعد شتيمه  بالام الاسماعيليه بلدكم   وكأن الاسماعيليه  ديه اسرائيل  هقول  ان دا كله بعد الثوره فى اطار انها ثوره مضاده طيب  والاحداث اللى  فى السنوات اللى كانت قبل الثوره  يعنى لو نرجع بالتاريخ قبل الثوره  بكام سنه هنلاقى ان فى مشجع زملكاوى اتحرق  وهنلاقى احداث زى احداث بورسعيد كتير اوى  ويمكن الاحداث المشابهه لاحداث المذبحه ديه ايام المخلوع  كافيه باننا نطالب باعدامه لوحدها لان لما كان بيموت فيها واحد او اكثر بتكون النتيجه ان مافيش عقاب يعمل نفسه طيب ونظامه يعملوا طيبين ويقولوا شقاوه شباب وتكرر تانى وتالت  ومافيش حل ولاعقاب والشرطه دايما بتتفرج  لحد مابقى الواحد مش عارف  دمه محروق من الشرطه والمشجعون ايضا  وممش عارف يغضب على اللى ماتوا ولا على اللى عايشيين ولاعلى  تقصير الشرطه ولا من مين ولا يتعلم البرود ويتعود على المذابح وخلاص  اللى يحرق الدم كمان تحويل الالتراس الى ابطال  لما اتظاهروا فى ماتش الكوره  اللى عملوا  ازمه بعدها  والواد اللى ظهر وبكل عبط يقول احنا كنا بنشتم فى مبارك والعدلى  طب هو كان رايح يشجع ولا رايح يتظاهر ماهو صاحب باليين كذاب ولا رايح تهيس وخلاص  وطبعا لازم نربط الحدث القديم بالمذبحه اللى حصلت فاصبح المشجعون مناضلين سلمتها ام حسن من العين ومن الحسد مسخره وادينا هنشوف اللى هيحصل وهنتفرج
الواحد حزين على الضحايا كما ايضا حزين على مصر اللى انقلب فيها كل شئ  بلد كل حاجه وعكسها بلد ماتعرف بلد عقول فيها امخاخ ولا جزم   بلد تعيش فيها ماتفهمش فيها حاجه  بلدعقد
اتخنقت

ربنا برحم الضحايا 
ويهدينا ويريحنا ونحصلهم  ونخلص
ربنا يرحمك يامصر  
يسقط يسقط حكم العسكر
ويسقط غوغاء  مشجعون الكوره
ويسقط الشعب
واخيرا فليسقط انا

Follow by Email

Tetris