الاثنين، 30 يناير، 2012

انت اتغيرت ليه


بكلم صديقى كريم  لقيته بيقولى انت تنغيرت ماكنتش كده انت بتخاف من المجلس العسكرى انت ماكنتش كده ايام مبارك  ايه اللى حصلك   دا التلفزيون نفسه بقى معارض  
لا انا لم اتغير انا زى ماانا   والتلفزيون برضوا زى ماهو
لكن
ايام مبارك الواحد كان لما تيجى عليه ساعات  يحب ينقد كان بينقد زى ماهو عايز  كان اخرها ايه يعنى  لو اتمسك واتحبس اهو هتيجى على دماغه هو  مش دماغ حد تانى
لكن بعد الثوره دايما الكلمه لازم تكون بحساب لانها بتكون مؤثره جدا  ويمكن يموت بسببها  روح  
فعادى انى اكون مره مع العسكر  ومره مع الثوره مش نفاق ولا تلون لكن العسكر  مش شياطيين والثوار ليسوا ملائكه فكثيرا عندما تذهب للتحرير بعد مشاهده تصرف مجموعه من المتواجدين تقلب فلول ومن  كلام الفلول  تقلب ثورجى  مش توهان لكن مافيش حاجه صح علطول وحاجه غلط علطول ايوه حكم العسكر سيئ لكن برده فى بعض تصرفات الثوار سيئه  وفى وقت الاشتباكات لازم اى كلمه تكون موزونه  لان  اى كلمه ساعتها   بتاثر وممكن تتسبب فى موت واحد   فلازم تكون الكلمه بحرص  دا اللى بيحترم  نفسه  انما اللى مابيحترمش  كلامه فسهل جدا ان يقف مع الثوره علطول فى الغلط والصح  ويقعد يهيج الناس وخلاص ولو اتمسك او اتحبس بقى بطل شعبى   ويمكن اساسا مايكونش بينزل اصلا ايوه ماهو حزب الكنبه مش كله فلول حزب الكنبه منقسم ثوار على فلول زى مافى فلول كنبه وفلول عباسيه  بردوا موجود ثوار كنبه وثوار تحرير  وثوار الكنبه دول كارثه زى الفلول بالظبط يقعد يثير الناس وهو تحت البطانيه زى واحد صاحبى كل  مليونيه يقولى انا نازل ويقعد يحمس فيا  ويجى يوم المليونيه  يقولى الدنيا برد  معاكم بقلبى مسخره  انت عارفه  طبعا ياكريم صح  ديه كارثه لو اهيج الناس تنزل وتشتبك  وتتصاب وتموت وانا اقعد اثور  على الكنبه  
اما بقى التلفزيون المصرى  فهو لم يتغير ابدا  فهو لما مبارك يكون موجود فهو مع مبارك   المجلس العسكرى معاه  ولما الثوار  يهتفوا ويكونوا صوتهم عالى يبقى مع الثوار ويقعدوا يذيعوا فى افلام انا اسمى ميدان التحرير   ويقعدوا يتكلموا على المتحولون وهم اساسا متحولون  او بمعنى اصح يعيش ويموت تلفزيون نظام  اصل لما ينتقد الرئيس الساببق بعد مابقى سابق يبقى مااتغيرش  واتحول معارض لان المعارض الصحيح هو اللى يعارض النظام اثناء وجوده  يعنى يعارض مبارك ويكشف كوارثه وهو رئيس  ويكشف اخطاء بعض الثوار اثناء الثوره وينتقد المجلس العسكرى اثناء وجوده انما انه ينتظر الى ان يسقط ثم يتكلم عن اخطائه وكوارثه  فهو دا الاستهبال

الاثنين، 16 يناير، 2012

انسحاب البرادعى

لم اكن من مؤيديين د/ محمد  البرادعى  ولكن احترمته  كثرا عندما قرر الانسحاب من الترشح للرئاسه  مهما حاولوا تشويه هذا التصرف وقول انه انسحب لانه ادرك بعدم  قدرته  على النجاح فى الانتخابات  حتى ولو كان هذا هو السبب  ساحترمه ايضا لان اكتر من مرشح متاكد انه مش هيفوز ولم يفعلوها مثله  فالانسحاب من الترشح للرئاسه فى الوقت الحالى   مهما كان السبب يجعلنا نحترم صاحبه

الخميس، 12 يناير، 2012

من غير عنوان

ساعات تيجى تاخد قرار  تقرر الفرار 
وساعات تلاقى الفرار اصعب قرار 
عجبى 
بنقول مافيش حاجه اسمها  مستحيل
نقابل مشكله يصعب علينا حلها  نقول حلها مستحيل 
لكن المصيبه اننا نكتشف ان الفراركمان  منها مستحيل 
عجبى 
الاصدقاء نوعين  صديق يعلمك يعنى ايه  اصدقاء 
وصديق يعلمك حسن الاختيار لان من سوء اختيارك اخترته يكون لك  احد الاصدقاء 
عجبى 
بنتعلم من حكايات الناس 
وحكاياتنا بتعلم الناس 
عجبى 
دنيا مدرسه كلها دروس 
بنعيش فيها طلاب وبندى دروس 
عجبى 
بكتب كلام مش لقى له عنوان 
عنونته باسم من غير عنوان 
وكان دا هو العنوان 
عجبى

الثلاثاء، 10 يناير، 2012

الشعب يريد اسقاط النظام الثوره كلاكيت _ _ مره


عندما قامت ثوره 25 يناير 2011   كان الهتاف الشعب يريد اسقاط النظام   ولكن  السؤال اى نظام يريد الشعب اسقاطه  هل نظام الحكم فقط  ام نظام البلد كامل  وتغييره تماما يعنى  نظام الحاكم ومازرعه من نظام فى الشعب ايضا   النظام  ليس  نظام حكم فقط بل نظام محكوم ايضا   عندما  تخلى الرئيس السابق رغما عنه عن السلطه بداء الناس تفكر تكمل الثوره على نفسها وبداءت خطوات ايجابيه من بعض الناس الحالمه التى تريد بلد افضل وكانت توزع منشورات بعنوان  كلنا ايد واحده مكتوب فيها  من النهارده دى بلدك انت  ماترميش زباله ماتكسرش اشارة ماتسوقشى بسرعه روشنة وتعرض ارواح للخطر  ماتدفعش رشوه  ماتزورش ورقه  اشتكى اى جهه تقصر فى شغلها ماتدخلش من باب الخروج فى المترو  او العكس  ماتقولش وانا مالى  راعى ربنا فى شغلك  اوعى تصنع  مبارك تانى  استمتع بحياتك  اقرأ وثقف نفسك حافظ على نظافه بلدك  حب الناس اللى حواليك  اوعى تهين حد اوعى تسخر من حد اوعى تنسى حريتك ابدأ خلى بلدك أجمل بيك مبقاش عندنا حجه بقى 
ومنشورات اخرى   بعنوان  من اجل مصر افضل بتقول  من النهارده دى بلدك انت  تاريخك انت وطنك انت وبيتك انت  ماترميش زباله وماتكسرش على حد  وماتلفش بعربيتك من رابع حاره فى الشارع عشان ماتوقفش الشارع  بلاش تزمر من غير داعى  ماتدفعش رشوه ماتزورش ورقه اخلص فى شغلك ابتسم للناس  ماتزاحمش فى الطوابير  ماتعاكسش بنات زى مامتحبش حد يعاكس اختك او مراتك ثقف نفسك فى شتى المجالات  حافظ على القانون  سيب الستات والمسنين هما اللي يقعدوا فى المواصلات شجع صناعه بلدك   ومنشورات ومنشورات اخرى 
وفى شباب نزلت تنظم فى المترو دخول الناس وخروجهم من الابواب المخصصه لها   كل دا اتحقق منه ايه
طبعا ولا حاجه  كله بخ  اختفى   انشغلنا  بان نظام  الحكم  اللى ماتغيرش وان مبارك هو المشير هو الفلول هو اى واحد مصرى شم شويه هواء فى عهده   ونزلنا جمعه وراء جمعه   واحداث  وراء احداث اللى كان بيوزع المنشورات  ديه اختفى واللى  نزل ينظم الدخول والخروج من ابواب المترو المخصصه لها  اختفى  ورجعنا  زى ماكنا  تانى ورجعت ريمه لعادتها القديمه  ومش عايزين  المشير يكون هوهو مبارك ليه واحنا  اتغيرنا   بالعكس دا احنا قذارتنا  بقيت زياده  اوى لما  المخلوع وقع اغلب   الكبار من الصحفيين والاعلاميين اتحولوا  لجزاريين  وهما مالهومش فيها   وفجاه الكل بان وسخته زياده اوى اللى اكتشفنا انه يعرفهم واحد واحد  لدرجه انه عمل برنامج كل رجال الرئيس  على اساس انه كان حبيبهم وكل اسرارهم عنده واللى ماشاء الله عليه  اكتشفنا انه يملك اجهزه تجسس  بيسمع بيها كل مايدور بينهم من مكالمات سريه  واللى واللى   بقيت حاجه تقرف بصراحه انا  عن نفسى عايز اعمل دعوه اننا كلنا  ننزل  25  يناير اللى جاى  بس مش ضد العسكر ومطالب تسليم السلطه  عشان  النظام الحاكم هو هو   بتفكيره  وبسلطاته  ببابا غنوجه  والكلام اللذيذ دا    لا  ننزل نوزع منشورات من تانى  لتغيير النظام الشعبى اللى لسه متغيرش وزى ماهو  من ايام المخلوع  نفكر الناس ان ديه بلدهم   مش بلد حد تانى  وان زى مابيطلبوا العسكر بتسليم السلطه عشان النظام  الحكم يتغير    هما كمان يتغيروا  عشان يتم التغير بجد اللى قامت عشانه الثوره   لان تغير سلوك الحاكم ونظامه حكمه مش هيعمل  حاجه لو نظام شعبه فضل زى ماهو     يعنى يانتغير كلنا  مع بعض حاكم ومحكوم   يا نتوكس كلنا    ولا هو سهل نغير نظام الحكم وصعب نغير نفسنا  

الخميس، 5 يناير، 2012

من سيكتب التاريخ



فى الفتره الاخيره قبل الثوره والى الان ظهرت ناس كتير بتترحم على ايام الملك فاروق وتقول الاقتصاد ايامه كان قوى   واتفرج على افلام اسماعيل يس  القديمه  تعرف ان الدولار كان بريال   والتاريخ كمان بيقولك ان بريطانيا كانت مديونه  لمصر رغم احتلالها    ولا  انسى الفنان حسين فهمى لما تحدث  فى برنامج  هاله سرحان وقال ان حلون كانت بتاعته والملك كان بيقوله يامولانا  معرفش ليه انتابنى سؤال  ماذا سيقال عن مبارك فيما بعد هل مانتحدث بيه عنه من فساد وظلم هل سيقال عنه  فاسد ام سيقال عنه كانت ايامه  ايام عز مارينا وساحل شمالى  وحفلات التليفزيون  اللى كان بيروحها الشباب  البسيط الغلبان   فى مارينا والساحل الشمالى ولا الانترنت  والقنوات الكتير المفتوحه وحريه التعبير التى  قضت عليه فى الاخر وانه كان سايب الناس تتكلم بحريه  ولا هيتقال  ايه
ابناء الملك  تكلموا بعد اكثر من خمسين سنه وجعلوا الكثير يتكلمون مثلهم   فماذا سيفعل ابناء مبارك  الذين  ظهروا من اول لحظه سقوط مبارك ماذا سيقولون بعد خمسين سنه
ابناء الملك او بتوع احنا اسفين ياملك بداءو يفهموا الناس من فتره بان  ماحدث فى يوليو 52  انقلاب  وليس ثوره  انقلاب عمله الجيش بعض الناس قالت انقلاب تحول الى ثوره عندما ايده الشعب  وهذا صحيح   والبعض الاخر قال لا مازال انقلاب لان لم يؤيده الشعب لان اللى كان يعارض نظام عبد الناصر كان بيبقى مصيره السجن او المعتقل وكثير من الافلام تكلموا عن زوار الفجر فى المرحله الناصريه وقد يدهش الكثير من  المرحله الناصريه  ويتسائل  لماذا كانوا  يحبون  عبد الناصر  ومن يحبه الى الان بالرغم من  زوار الفجر اين كانت الحريه فى هذا العصر بالطبع كل واحد احب حاكم   كانت له وجهه نظر وجهه نظر من احب الملك قال  الاقتصاد على ايامه والحياه والعيشه بالرغم انه ماكنش عايش ايام الملك واللى كان عايش ايام الملك وبيحبه غالبا كان من الاقطاعيين   ومن احب عبد الناصر  اكيد كان من الغلابه   اللى يهمهم  اكل العيش وبس  ولا يهمهم سياسه ولا اى حاجه  وبالتالى  لم يحتك بزوار الفجر  وكمان لم ينضر بقوانينه لان عبد الناصر كان قرارته مع  طبقه الناس الغلابه اللى هو منهم   لكى يصعدوا  الى  اعلى  على حساب   طبقه الاقطاعيين   والناس اللى معاها فلوس   اللى جعلهم غلابه فيما بعد  وظلم الكثير منهم   ولن اتكلم على السادات  لان من احب السادات او كرهه  كان عن اختلاف فى وجهه نظر سياسيه اما عن السلام مع اسرائيل او عن  ترك الاخوان يلعبون  لان فترته كانت فتره استرداد ارض  يعنى ملحقش يعمل حاجه   فى الشعب  الا قليل   
ولكن يظل السؤال من سيكتب التاريخ  الناس الغلابه  ولا الطبقه الراسماليه   و لا القوى السياسيه   اللى ليهم مصالح خاصه  ولا مين  كل قرار بيتخذ فى اى عصر من العصور  له مؤيدون ومعارضون ومستفدين ومتضررين  فمن يحكم على القرار ومن  يؤكد ان هذا القرار فى مصلحه البلد او  ضد مصلحه البلد
وماهى مصلحه البلد  هل هى مع القرارات التى تخدم الغلابه ولا التى تخدم الراسماليين  الذين يعملون المشاريع الاقتصاديه  التى  تنعش اقتصاد البلد   هل كانت مصلحه البلد مع الاقطاعيين  ايام الملك والمحتكريين ايام مبارك  ام الغلابه فى العصريين  ومتى  ياتى الحاكم  التى يستشعر بان مصلحه البلد فى القرار اللى يخدم الاثنين  وهل يوجد  قرار  يمكن يخدم الاثنين معا بدون التجنى على احد  منهم  ولو وجد هل سيقتنع الاثنين  بان القرار فى صالحهم

Follow by Email

Tetris