الأربعاء، 30 نوفمبر، 2011

طرائف الانتخابات ياعلاء بلاش غباوه

video
دا مرشح رئاسه ولا مرشح مجلس شعب ولا مرشح  ايه بالظبط  لا تعليق 
للمشاهده على الواقع نفق العباسيه بجوار جامعه عين شمس

الأحد، 27 نوفمبر، 2011

عفوا ايها الميدان بطلت ثوره



فى بدايه الثوره  لما قامت  قامت فى  اغلب محافظات مصر وفى الاخر اصبحب ميدان التحرير البؤره الاساسيه او كان المصب النهائى  التى انصب فيه الثوره  وكان رمز للثوره  لان كان من فيه  زيهم زى اللى فى باقى  المحافظات  هدفهم  واحد وهو اسقاط النظام   الا قله قليه  كانت  مع النظام  السابق وتعتقد ان الشعب على خطاء  فبداء  مجموعه  من الثوار لايتفهون ان المجتمع  فى الفتره الاخير كان على اخره  وبيخانق بعضه   والنغمه اللى كانت سائده  على السن الناس  بلد بنت تيت  او ناس بنت تيت  وكثير من كان يقول احنا شعب نستحق ما يحدث فينا  وان بعد الثوره  انقسم الناس الى  نوعين 1- نوع من تاكد ان النظام هو السبب  2- من كان مازال  شايل فى قلبه من تصرفات الناس
فبعض الثوار بدل مايتفهموا  الكلام دا قسموها ثوار وفلول  وقوائم بيضه وقوائم سوداء   وبداء التخوين  وهذه القوائم  كانت عار عليهم فى الاساس   لانى انا لما الاقى واحد وضع تامر حسنى مثلا فى القائمه السوداء لانه كان ضد الثوره   اتسائل سؤال   لو كان مع الثوره من الاول كان هيبقبى من القوائم البيضه رغم انه كان هربان من  اداء الخدمه الوطنيه    وكثير من الشخصيات التى اندهش من وضعها فى القوائم البيضه او السوداء لمجرد انها كانت ضد الثوره  او مع الثوره  بالرغم من اننا لو ركزنا على افعالهم وفنهم  فيوجود كثيرا ممن ايد الثوره يستحق القائمه السوداء ويوجد من عارض الثوره  يستحق القائمه البيضاء  ولكن بعض الثوار اللى استنصحوا   صنعوا مننا مجتمع منافق  يخاف ان يعارض فكره فى الميدان ليبقى فلول نظام   واستغل اصحاب المنصات  انهم بيعرفوا يجمعوا الناس لان مطالب الثوره لم تتحقق   محاوله منهم لتحقيق مصالحهم الشخصيه  ويتاجرون بدم الشهداء  فاصبحنا  نذهب الميدان ايمانا منا بالمطالب العامه ولكن فى نفس الوقت  لانرضى عن بعض الهتافات  وبعض المطال الخاصه  وعاجزين ان نوقف الهتافات  او المطالب التى لا نرضى عنها  واصبح كل مجموعه فى الميدان فى وادى   حتى جاءت جمعه السلفيين وطردت كل من فى الميدان لتشكيل الميدان بشكل الدقون  ثم توالت الاحداث  بعدما تحول الميدان الى مجموعه منصات تهدف السيطره عليه  او تصنع دعايه انتخابيه لبعض المرشحين للرئاسه و اشهر الدعايه اللى حدثت كانت الدعايه الانتخابيه اللى عملها  الباشا الكبير حازم صلاح ابو اسماعيل اللى بيقوله انه شيخ   وجاء الوقت لطر منصه السلفيين وطر اى منصه ورجوع  الميدان  ميدان بلا منصات  وهذا كان افضل شئ اتعمل  ولكن ظلت مشكله بان من في الميدان  مازالوا يطردون اللى على مزجهم  من لم  يصقف لهم  او من يعرفون ان طردهم له سيعمل لهم منظر جيد   مثل طرد علياء صاحبت الصور العاريه اه يطردوها   عشان  الميدان طاهر وهيفضل طاهر بس هما بقى تاكدوا ان كل اللى فى الميدان بيوحد ربنا وكل اللى فى الميدان  ناس ولاد ناس وماكنش فاضل غير علياء  ماعتقدش  انا مع طرد علياء او طرد اى شخص  بشرط انه يكون هيعتلى منصه فى الميدان  ويريد الدعوه لشئ غلط او بذيئ  لكن طرد منظره  او  طرد لاحتلال الميدان اسف ديه قله ادب  اللى مش عاجبك فى الميدان تجاهله  مش تتطرده  لان الميدان بتاعه زى وماهو بتاعك  طلع  على المنصه يدعو الى شئ غلط ساعتها  اهتف بطرده واطرده  معاك فى ديه كمان فى حاله طرد علياء لما بشوف الفديدو بتسائل سؤال ممكن عشان اخلاقى مش كويسه هو مافيش ستات تطرد البنت ديه  لازم الرجاله هى اللى تطرده  هى حاله طرد  ولا حاله تحرش  المنظر  منظر تحرش جماعى مش طرد  خالص 


واخيرا  المجلس اللى عايزين يشكلوه  من د/ البردعى  وحسام عيسى  او الفتوح وبيقوله  ان دا راى الشعب وراى الميدان    راى الميدان ممكن  لكن ليس راى الشعب  فالميدان لم يصبح يتكلم باسم الشعب كما كان زمان   وايضا الميدان نفسه  لم يصبح رايه راى واحد فالمليونيات تصنع لهدف ان الثوره  لم تنتهى   والكل ينزل لهدف  غير الاخر متفقين فقط فى  هدف الثوره ولكن مختلفيين فى هدف كل واحد   الميدان لم يبقى كما هو  فالكثير ضد البردعى وابو الفتوح والكثير لم يعرف من هو حسام عيسى  اصلا  واخرون يؤيدون الجنزورى   وان كان من يدعى ان المجلس اللى بيفكروا فيه دا راى الشعب  فلنلجاء الى الاستفتاء على رئيس الوزراء   
وفى الاخر اعتذر للميدان كنت زمان مع الثوره  الان انا من الفلول او حزب الكنبه        عفوا ايها الميدان  بطلت ثوره  

الجمعة، 25 نوفمبر، 2011

حول الاختلاف على د/ كمال الجنزورى


من ساعه ما انتشر  تفكير المشير  ان  د/  كمال الجنزورى  يكلف برئاسه الوزراء   واندلعت النكات  وانقسمت الناس مؤيدين ومعارضين
 المؤيدين  بيقوولوا ان الراجل كويس وسمعته نظيفه  ومنهم من اشاد بالمرحله التى كان مكلف فيها د / كمال الجنزورى  رئيس وزراء
اما المعارضين فاختلفت الاراء  منهم من اعترض لمجرد ان  د / كمال الجنزورى  من الفلول او من عهد مبارك   وكان دا مجرد اعتراضهم  ومنهم من اعترض على اساس ان معترض على اى واحد يكلفه المشير لان المشير سقطت شرعيته ومنهم من اعترض لكبر سن الرجل   ومنهم من اعترض لان الدكتور جمال ماكنش من الاختيارات التى  اقترحوها
و احزنى كم النكات والسخافات التى اساءت للدكتور كمال الجنزورى فقد نختلف مع القرار وقد نتفق ولكن لايجب علينا ان نسخر من د / الجنزورى  لانه الى الان لم يفعل  شئ يستحق السخريه  قد يكون فعل وانا لم اعرف 
لكن فى نفس الوقت تسائلت  من  هو الرجل  المطلوب حاليا ليكون رئيس وزراء او حتى رئيس  جمهوريه
لقيت اللى اعترض لسن الرجل وقال ديه ثوره شباب  دا كلام منطقى  ولكن لو جاء رئيس وزراء  صغير  سنرى من يقول هتجبولنا  عيل يكون رئيس وزراء  ولكن  بس اختلفنا او اتفقنا  بنلاقى الخلاصه فى الاخر اننا  عايزين واحد عنده حكمه الكبار  ويتفهم الشباب  وتطورات الجيل   يتفهم الشباب الحالى بتطورات الجيل  مش يتفهم الشباب الحالى بوجهه نظر شباب زمان  عايزين واحد  بفكر شباب  مش لازم يكون صغير  
نعم طبعا نريد شخصا محترما وطيب وذات مكانه علميه عاليه مثل د/ كمال الجنزورى   لكن ليست كافى ان يكون الشخصيه محترمه وطيبه  وذات مكانه علميه عاليه ولكن يجب ان يكون  ذات معرفه بالوضع الحالى وتطورات العصر وفكر شباب اليوم  فلن تكن النتيجه صالحه لو كان شخصا محترما وذات مكانه عاليه ولكن يعرف ما فات  ولا يعرف ماهو كائن  لاننا نريده فى هذا العصر ولا نريده  فى عصر  سابق فيجب ان يكون ريس الوزاره بفكر عصرى
لا اعرف د/ كمال الجنزورى   جيدا  فقد يكون يمتلك هذه المواصفات بمعنى انه يفكر بفكر الشباب وقد لايكون  ولذلك  لم اكن  من المؤيدين او المعارضين  للاسف 
ولذلك يجب اللى عارف شخصيته يقولنا هل هو به الصفات ديه ولا  لا 

ولكن فلنفترض ان المعارضين له كثير جدا  او انه لم يمتلك هذه المواصفات   ولم يجدوا احد  بهذه المواصفات  لكى يكلف بالوزاره   وزاره الانقاذ الوطنى  بافكار شبابيه  وبداء القوى السياسيه تتصارع على كرسى الوزاره   فماذا الحل
عجبنى اقتراح  ان يشكل الوزاره   احد المرشحين  المحتمليين لرئاسه  الجمهوريه   او تشكل الوزاره  كلها من  المرشحين المحتملين لرئاسه  الجمهوريه   ونضرب عصفورين بحجر   منها نجعل البلد تستقر  ومنها نختبر هؤلاء قبل ان نخطاء وننتخب احد منهم لا يصلح   فنختبرهم برئاسه الوزاره   ونشوف هينجحوا فى وزاره انقاذ وطنى  ولا لا  لكى نتعرف على اسلوبهم  قبل ان نختبرهم فى رئاسه  بلد ونشوفهم ينجحوا ولا لا  انا عن نفسى ارشح لرئاسه الوزاره كل المرشحين الرئاسه اللى انا مقرر انى مش هنتخبهم  لعل وعسى اغير رايى فيهم  وربنا يستر  

الاثنين، 21 نوفمبر، 2011

هل هى مذبحه مماليك جديده ؟؟

مش عارف ابداء منين بس الحكايه غريبه اوى  قبل الثوره وانا برده ماليش فى السياسه كنا بنسمع عن حركه  6  ابريل وحركه كفايه  وحركه التغير وحركه 9 مارس  واسماء كتير بعد الثوره  بقينا بنسمع ان 6 ابريل  خونه وعملاء وذات تمويل اجنبى لا وكمان ملحدين والدليل كريم عامر وعلياء بالرغم ان 6 ابريل اكدت ان  كريم وعلياء مش من 6 ابريل  وكريم وعلياء اكدوا انهم مش من 6 ابريل بس مازال تشويه حركه 6 ابريل قائم وبصراحه كده نجح  النتشوبه بايدى الناس وبعض تصرفات  6 ابريل   والناس بداءت توزع وتلصق على الحائط  منشورات ضد 6 ابريل مين اللى بيوزعه مش عارف 



ماعنديش مشكله ان اقول 6 ابريل حركه مشبوه اوكى  طظ فى 6 ابريل ولكن اتسائل اين نشاط حركه كفايه وحركه الوطنيه للتغيير وحركه 9 مارس  الى اخر الحركات  اين هم لا اعرف قد اكون بعد الثوره سمعى ضعف او انهم يشتغلون فى الخفاء لا اعرف قد وقد وكل الاشياء ممكنه  طيب المعارضه راحت فين  لم يبقى غير الاحزاب التى لم تكن لها قيمه فى عهد النظام الماضى و اصبحت كتل وائتلافات عشان مجموعه من الكراسى فى  مجلس الشعب يعنى الناس اللى شغاله على مصلحتهم وفقط  طظ فيهم  هما كمان يبقى مش فاضل غير الناشطين على الفيس وتويتر وبعض المواقع  الاخرى  اللى بيحاولوا  يفهموا ويفهموا الناس البلد ماشيه ازاى   وطبعا دول بعد اللى بيحصل فى المظاهرات اللى بينادوا بيها الناس كرهتهم  والحكومه القت القبض على بعض منهم والشعب  البسيط مؤيد ماشى اوكى طظ فى الناشطيين يبقى فاضل السلفيين والاخوان  اللى خرجوا من السجون و عملوا احزاب وهما بردوا بيكلموا باسم الدين  وعامليين نفسهم بيفهموا  وبعد هلهله افكار السلفيين وعدم رغبه الناس فى ترشيح الاخوان  الناس لابقى عاجبها السلفيين ولا الاخوان ماشى طظفى الاخوان وطظين فى السلفيين  يبقى فاضل مين  بح خلص عفوا لقد نفذ رصيدكم وتمت المذبحه بنجاح طيب ايه الحل  تصرفات المجلس العسكرى مش داخله دماغنا  اوكى نسقط المجلس العسكرى بالمشير بالحكومه يالا  طظ فيهم  يالا بالسلامه بس طيب مين اللى هيدير المرحله الانتقاليه مجلس مدنى ماشى اى اسم لكن مين الاشخاص اللى هنحطهم كبديل مؤقت حتى التسليم  ويكون متفق عليهم من جميع  الجهات  سؤال صعب وخصوصا اننا  اصبحنا لانتفق على شئ من يدير علينا ان نسقط المجلس العسكرى ولكن علينا ان نختار البديل جمله البلد فيها كتير مش محتاجينها محتاجيين نتفق على واحد من الكتير دول ماذا سنفعل بعد ان نجحوا فى فى مذبحه المماليك الجديده ولم يبقى غير ان ياتى محمد على لكى يحكمنا بمزاجه  ولكن هل نقبل  بحكم محمد على  اذا كان دا فى مصلحه البلد هل نرضى بحكم بدون معارضه  لو دا فى مصلحه للبلد  وهل ممكن تكون مصلحه البلد ان الحكم يكون بلا معارضه  ماذا سنفعل واين الحل الله اعلم 
  واخيرا تاتى وثيقه السلمى  التى اثارت الناس  والناس نزلت الميدان تانى ونرجع الى يوم بدايه الثوره من جديد  لنتسائل هل سنعيش فى الثوره كتير كل شويه هنعمل كلاكيت  الثوره تانى  مره اكشن ومظاهرات وقنابل مسيله لدموع ورصاص مطاطى  تانى  الى متى  ومتى سيحل الازمه الحاليه اللى موجوده فى ميدان التحرير  ياترى النهايه امتى وازاى   ربنا يستر عليكى يامصر

الأحد، 20 نوفمبر، 2011

من مدونه مذكرات ثائره

ناس كتير اتكلمت فى موضوع  علياء المهدى وناس كتير اللى شتم فيها واللى شتم فى الثوره  واخذها فرصه للتسائل بقى هيه ديه الحريه اللى هما عايزينها  واخذوها فرصه للسخريه من الثوره والثوار بالرغم من ان الموضوع فى الغالب مالوش دعوه بالثوره ولكن له موضوع باسم المدونه مذكرات ثائره  وهى ثائره فعلا ولكن ليست ثائره  بمعنى ثوار ثوره 25 يناير  لا ثائره اجتماعيا ثائره على المجتمع  فمن يدخل على مدونتها الاخرى التى تحمل نفس الاسم مذكرات ثائره  معموله بنفس الحساب ويقلب فيها ويقراء بوست  اسمه من مذكرات بنات مفروسه http://diaryofarebel.blogspot.com/2009/06/blog-post_25.html قد يشعر بان مافعلته  هو الجزء الثانى من فيلم انا حره بتاع لبنى عبد العزيز  او الفيلم بتاع ماجده ورشدى اباظه  اللى كان بيتكلم على مساواه المراه بالراجل وكده  وان الموضوع كله ومافعلته هو رد فعل على مجتمع يتهم المراه  بالخلاعه عندما يتم التحرش بها ولا يتهم المتحرش بها  باى شى  وعلى نظام تربيه مغلق على نفسه  نظام تربيه بدون توعيه  نظام صح وغلط فقط  بالرغم من اننا فى زمن يجب ان يكون نظام التربيه فيه صح وغلط لان  ويجب ان تكون لان لاسباب مقنعه  وليسه لاسباب تافه او ظالمه   انا مش بدافع عنها لكن مش مقتنع بان كل اللى دخل على مدونتها الابيحه وعلق بشتيمه انه كان داخل المدونه يصلى  وماكنش داخل يتفرج وديه اصلا مشكله انك تدخل تتفرج وتخرج تعمل انك رجل دين واخلاق وقيم  وايضا مشكله كبيره اننا لم نشوف كارثه نقعد نشتم فى صاحبها ومانحاولش نعرف هو وصل لها ازاى وليه ايوه معاك نحاسبه  لكن لازم نعرف هو عمل كده ليه عشان مايطلع غيره ويعملها تانى

الجمعة، 18 نوفمبر، 2011

ليست مشكله علياء المهدى ولكن مشكله مجتمع باكمله


يمكن يكون جاء الوقت لكى نبحث عن اجابه لسؤال كان من المفروض ان يسئل من سينين 
الموضوع يبان تافه ولا قيمه له اساسا واحده  ليس لديها حياء تضع صورها العاريه على صفحاتها  خلص الموضوع بكام شتيمه فيها وفى اهلها  وفى بيئتها وخلاص  وخصوصا ان صديقها كريم عامر ايضا كان مقبوض عليه فى قضيه ازدراء اديان  قبل ذلك  وبالتالى الخلاصه شله منحله وخلاص
ولكن المشكله قد تكون اكبر من ذلك بكثير عندما  نرجع ونلقى نظره على المجتمع ونتسائل كم قضيه ازدارء اديان فى المحاكم وكل قضيه مقبوض على ذمتها كام واحد  وكم ملحد من غير قضيه وكام واحد بيخرج من الصلاه بيسب الدين للشيخ  وكام واحد بيسب الدين عمال على بطال  وكام وكام وكام واحده خرج علينا وقال انه المهدى المنتظر  فاكرين قضيه عبده الشيطان فاكريين البهائيين   حد بيلاحظ  ان اللى بيفطروا رمضان  اصبحوا  كتير  حد  بيلاحظ ان الشباب بقوا بيعاكسوا البنات باسم الدين  يعنى بدل مايفتكروا غض البصر بيفتكروا ان البنات متبرجات وكأن الدين بيقولهم انهى عن المنكر بالتحرش وكأن التحرش  مش منكر ولا حاجه  حد واخد باله ان المجتمع كله اصبح هزاره  هزار جنسى ونكته  نكت جنسيه والفاظه الفاظ جنسيه  
اكثر من جرس يدق  لكى يجعلنا ننتبه ولكننا لم ننتبه  ونغلق الاجراس ونسد الاذن ونطلق اللسان ليسب من ادق الجرس  نعم الاجراس تجن ولكننا متى نبحث عن اسباب دقها 
ياترى ليه دا بيحصل وازى وصلنا له   وليه وامتى
سؤال مهم
ياترى لماذا ونحن بلد المفروض انها متدينه  سواء مسلميين او مسيحيين  بيكثر الالحاد  فيها  او البعد عن الدين او بنصل الى حاله الشك بالرغم  ان الدول  التى لاتعترف بالدين  اهلها  بيتدينوا  وبيتجهوا للاديان السماويه
 لانقدر ان نقول بان المشكله فى الاديان السماويه  لان الدول التى تعترف بالاديان اهلها بيعترفوا  على سبيل المثال  كثير من الناس فى الدول الاجنبيه التى لاتعرف ولا تعترف  بالاسلام  بيدخلوا  فى الاسلام  
واحد من بتوع الاسلاميين واللى عايزيين مصر اسلاميه  يقولك لاننا بعدنا عن الاسلام
بس ياترى عشان الناس هى اللى بعدت ولا الشيوخ ورجال الدين اللى بعدت  ولا الاثنين
لما واحد يخرج من المسجد يسب الدين للشيخ  طبعا ممكن نقول ان الواحد دا بعيد عن الدين بس لوكان الشيخ قريب من الدين كان ممكن يقدر يخليه مايخرجش من المسجد يسب الدين   لو كان عرف يعلمه الدين صح  على الاقل لوكان خرج مره يسب الدين فى المره الجايه ربنا يهديه بكلام الشيخ  انما للاسف مافيش اصلا شيخ
ولكن اكيد الموضوع كمان مش دين  بس   اكيد كمان ثقافه  وسلوك مجتمع  وطريقه حياه  بتعلم الاجيال الجديده التخلى عن اى قيم او اخلاق او حتى دين  حتى ولو كنا حاولنا ان نربى اولادنا  على الاخلاق والقيم  فكثير من انواع التربيه تاتى ثمارها  بنتائج  عكسيه
ولذلك بالرغم ان الموضوع قد يكون تافها ولكن علينا ان ندرسه  لكى نعرف من الذى عرى علياء  اسوء اخلاقها  وشلتها الفاسده  ام  ان المجتمع كله عارى ولكنه لايرى نفسه      

الثلاثاء، 15 نوفمبر، 2011

هل سينجح مجلس الغايه تبرر الوسيله فى تحقيق اهداف الثوره ؟


وانا بتجول فى شارع شبرا  وقد امتلاء باللافتات الانتخابيه وانا ماليش فى السياسه اصلا والكل عارف كده ادهشنى بعض اللافتات لما رميت بعينى كده اشوف قائمه الاخوان او الشكل الجديد بتاعها حزب العداله والحريه  الاقى على القائمه الاستاذ امين اسكندر على  قائمه الاخوان هو فيه ايه انا على حد معرفتى ان اسم اسكندر دا اسم مسيحى  يمكن علشان ماليش فى السياسه ممكن يكون اسم اسكندر يكون مسلم عادى بس لما رجعت ابحث عنه على النت الاقيه مسيحى طب هو اسلم ولا الاخوان اللى  تنصروا   لا ديه وحده وطنيه  قولت عادى مصر كلها ايد واحده  عادى بس ارجع اشوف اللافتات الاقى ان الاستاذ امين اسكندر مكتوب فى بعض اللافتات رئيس حزب الكرامه ولافتات  موسس له  طيب موجود على قائمه الاخوان ليه  افوت الموضوع دا  و اكمل ماشى فى الشارع  اتذكر ندوه  فى مصر القديمه حضرتها من فتره  اسمها اعرف حزبك كان مستضيف  الحزب المصرى  الديمقراطى للصدفه البحته كل الناس اللى كانت هتيجى الندوه وعلى رئسهم رئيس الحزب اعتذروا لظروف خاصه بهم افيه جامد كلهم تعبوا فجاه يعنى عادى ان واحد يحصله ظروف او اثنين لكن دا كلهم ياريس حصلتلهم ظروف اصل العدد كان قليل مش كتير فحصلتلهم ظروف ماشى   هنعديها  خرج علينا واحد من الحزب قطع طبعا فى النظام السابق كعاده اى واحد ولما بداء يتكلم عن الحزب بتاعه كل سؤال حد يسئله يرد عليه منتظريين راى الكتله حتى ماكنش عارف هو يدخل الانتخابات ولا هيقاطع عشان منتظرين راى الكتله  ويقول الكتله عشان الانتخابات  بس طب اقول كلمه ابيحه ولا ايه لا و دايما فى الفتره ديه فى كلام اننا المفروض ننتخب احزاب   احزاب مين بلاوكسه هو فيه احزاب اصلا  كده هننتخب كتلهلان مافيش احزاب
اللى غريب كمان  ان حزب الوفد كان بردوه  كان هيبقى مع الاخوان بس لما الناس اندهشت قام دخل لواحده  يعنى بردوا حزب كان خايف  فراح يشارك الناس اللى بتلعب بالدين ولما قالوله عيب اختشى سابهم   
حزب النور بقى دا كان حكايه سلفى هبلى عبطى اى حاجه مرشحين انثى وباين عليها شكلها كويس وجميله جمال صارخ  فتقريبا خافوا لا الشعب يعاكسها ولا حاجه  وطبعا  هو كحزب سلفى خايفين من الفتنه فبدل صورتها واضعوا  صوره ورده  ولما خدوا كلمتين حطوا صوره جوزها وكتبوا حرم السيد فلان  غالبا هتروح المجلس مع محرم  ولما سمعوا كلمتين حطوا صورتها بالنقاب وشالوا العينين  لو يسمعوا كلمتين  كمان هيحطوا مكانها صور خليعه حاجه غريبه لو انتم مش مقتنعين ترشحوا ست بترشحوها ليه  مسخره  عشان كراسى فى مجلس شعب هى الثوره ثوره شعب ولا ثوره كراسى هى الثوره قامت عشان نمشى الطقم القديم ونحشى الاماكن بطقم جديد  وخلاص ولا عشان نحط الاصلح  انما كله بيلعب على كله وكل مرشح او حزب على الاستعداد ان يتحالف مع الشيطان عشان يحصل على كرسى بلا قرف
ينفع يحقق مطالب ثوره مبادئ  مجلس شعب  الغايه تبرر الوسيله  وعلى كل لون ياكابتن  عجبنى كلام المدون استاذ ابراهيم رزق لما قال انك هتختار بين حرامى وفلول ومستغل  فعلا مافيش حد عدل او بمعنى اصح مش ظاهر حد عدل  وكلهم ولاد تييت  ديه مش انتخابات مجلس شعب ديه انتخابات مجلس هلس

الأحد، 13 نوفمبر، 2011

موقع بيت المدونين




بعد مناقشات عديده مع بعض المدونين حول عمل موقع خاص بالمدونين
اكد البعض انها فكره جيده ولكن يجب ان يتم عمل دراسه لها من جميع الجوانب
واكد البعض الاخر على ضروره عمل تجمع خاص لمناقشه هذا الامر
وفى النهايه استقرينا على عمل مدونه الكترونيه مميزه بقالب موقع يشبه  المواقع الاخباريه
واستقرينا على الاسم (موقع بدايه) اى بدايه الانطلاق نحو مستقبل افضل لمصر
يتضمن الموقع العديد من الاقسام مثل اخر الاخبار واخبار الفن والسياسه والرياضه
بالاضافه الى الاقسام الخاص بنا كمدونين مثل الخواطر والقصص القصيره والمقالات والاراء الشخصيه
تم عمل ايضا صفحه على الفيس لهذا الموقع 



ايضا سيتم مشاركه بعض الصحفين الزملاء فى هذا الموقع حيث يتميز اغلبهم بالنشاط والقدره على البحث عن المصادر  بشكل فعال
هذا هو لينك الموقع
وهو عباره عن مدونه كما ذكرت وذلك تحسبا للتكاليف خاصه اننا فى بدايه الامر  ونريد ان نعرف مدى قدرتنا على اداره عذه الموقع ام لا
رجو عمل متابعه لهذه المدونه
من يريد نشر موضوع او خاطره باسمه على الموقع
هناك طريقتان
ان يرسل لينك الموضوع فى تعليقات مدونه الحياه
(http://sheref2010.blogspot.com/)
او فى ملف ورد على الميل التالى
sheref_a1@yahoo.com
او على
egypt.taxi@gmail.com

ثانيا  ارجو منكم عمل زر او وضع لينك الموقع فى مدونتكم الشخصيه
اخيرا ارجو نشر هذا البوست كما هو فى مدوناتكم الشخصيه

معا نبدا سويا وسنظل سويا معا

منقووووووووووووول من
منقوووووووووووووووووول عن 

السبت، 12 نوفمبر، 2011

مجرد نفس



معقول هكون فى يوم كدا  
 بعد الحركه والعيشه سنين اخرنا نصبح كدا
اين صوتك يا  اللى كان صوتك  بيرن زمان
معقول انت اللى دلوقتى موجود فى المكان
معقول بعد مانعيش حياتنا بالطول وبالعرض
تكون اخرتنا خشبه مالهاش لطول ولا عرض
بعد ماكنا بنقود الناس يمين وشمال
هما اللى فى الاخر يقلبونا يمين وشمال
رحله اولها ترحاب  واخرها وداع
عجبى
 عجبى عليك يانسان  اقوى ما فيك نفس
بنقول الطبيخ نفس
اتارى الانسان كله مجرد نفس
عجبى

الأربعاء، 9 نوفمبر، 2011

التصويت من الخارج


طبعا من البديهى اذا توفر لك فرصه ان تصوت فى الانتخابات وانت خارج مصر  فوجب عليك عليك ان تصوت وتكون ايجابى
لكن بصراحه انا مش مع القانون اللى بيسمح للتصويت من الخارج  طبعا هتسئل  ليه هو مش من حقه مدام انه مصرى ان يصوت فى انتخابات بلده من اى مكان فى العالم   معلش مش من حقه ليه هو مش مصرى 
ماهو مش حكايه مصرى ولا امريكى ولا اسرائيلى ولا اى جنسيه
سؤال صغير   ينفع انتخب واحد فى مجلس الشعب فى دايره فى مدينه الاسكندريه وانا فى القاهره  او ينفع انتخب رئيس امريكا وانا فى مصر  الطبيعى ان انزل المدينه واشوف مين مترشح وكلام كل واحد واكون عارف احتياج البلد  ايه فى الفتره الراهنه عشان حتى اعرف اكشف الاعيب كل واحد
واحد يقولى  ياعم الحج دا المعلومات اللى بره عننا  اصح من اللى جوه   اقوله دا كلام فارغ ما فيش كلام صح 100%  عننا بيوصل للخارج او حتى فى الداخل  وماينفعش واحد ينتخب حد عن طريق السمع من الناس او من الاخبار ماينفعش لازم ينزل المكان ويسمع الراجل بنفسه ويشوف الجو العام ايه  مش مهم  كتر اصوات وخلاص  المهم ان كل صوت يكون دارس بوعى مين اصلح للبلد عشان يصوتله 
طبعا فى ناس الظروف اجبرتها تكون خارج البلد وقت الانتخاب 
 ماشى يبقى الانتخاب من الخارج بحدود  او بشرط ان اللى ينتخب يكون اقرب زياره له لمصر لاتتعدى سنه 

Follow by Email

Tetris