الخميس، 29 سبتمبر، 2011

قانون الطوارئ

من ساعه ما قالوا ان قانون الطوارئ مازال موجود الى يونيو القادم  او من ساعه ماقالوا انه هيعود العمل بالطؤارئ وكثر الجدل بين معارض ومؤيد
المؤيد ايد بعد احداث سفاره اسرائيل والفوضى الى بتحدث فى البلد يوم وراء يوم  ومع شويه رجوع الى الثوره هنلاقى ان الثوار استخدموا قانون الطوارئ  اثناء الثوره بعد ماتم الاعتداء عليهم فى موقعه الجمل اه ماهو لما اكون وانا داخل الميدان اتفتش ويطلبوا منى البطاقه ديه طؤارئ لانها مش طبيعى ان جاى اثور معاكم اتفتش واطلع بطاقتى بس كلها كانت طؤارئ لحمايه الثوار من الاعتداء  طب على نفس المنوال نقول ان فى حالات الفوضى الموجوده فى البلاد والاحداث اللى بتحصل سؤاء اللى كانت فى ماتشات الكوره او فى احداث السفاره او احداث العباسيه اذا احنا محتاجين حاله طؤارى لــــــــــكـــــــــــــــن  ومليون خط تحت لكن ديه هل الشرطه مؤهله ان تستخدم قانون الطؤارى فى هذه الاحوال او عموما هل الشرطه مؤهله لاستخدام الطؤارى بشكل مايظلمش حد الثوار لما استخدموا الطؤارئ ايام الثوره فى الجمع الاخيره  لما كان الميدان بيغلق بالمداريس مش بالاعداد ماكنش عاجبنا الامر وخصوصا بعد لما اختلفت الناس اللى بتفتش طب الحكومه هتقدر نستخدم الطؤارى صح ماعتقدش طب ليه   لان لسه نظامهم ما اتغيرش  لسه شغالين الاعيب وعدم وضوح مع الشعب  طب ليه  يمكن اكون خيالى واسع شويه بس فى بعض الحركات لا يمكن تتصدق انها صدفه  زى ايه  زى لما الحكومه بتعمل حمله  لتنظيف البلد من الاشغالات من  السيده زينب  الى وسط البلد  والصدفه بان ساعه ماتش الاهلى تكون بتنظف اشغالات وسط البلد من باعه جائلين وكراسى القهاوى وخصوصا ان اغلب قهاوى وسط البلد والعتبه  غير اى قهاوى بيقى معروف مين بيقعد عليها يعنى مثلا تقول قهوه بعره بفتح الباء  تلاقيها معروفه انها بتاعت الكومبارس  تقول قهاوى البورصه اللى بتبقى مزدحمه دايما ديه يقول بعض النشطاء او اللى عندهم افكار او اتجاهات معينه يعنى   او شعراء او عموما بعض المثقفين الا القليل طبعا  يعنى  فلما الصدفه تيجى بانهم يهجموا على قهاوى البورصه يوم ماتش ويشيلوا اشغالات القهوه ويقوموا الناس  من على القهوه فيروحوا على ميدان طلعت حرب ويتظهروا  فينزل الخبر رواد القهاوى  يتظاهرون  دفاعا على القهوه  ومنهم نشطاء اشك فى الموضوع   واحس انه امر مشبوه  مش دفاعا على القهوه لا لكن الصدفه صدفه مشبوهه بالرغم ان الغلطه  من النشطاء انهم يتظاهروا فى الوقت دا او يظهروا فى حاجه كده  بس اى واحد بيسمع ان فى مظاهرات فى ميدان طلعت حرب لازم هينزل يشوف فى ايه زى ماعملت الاستاذه نواره نجم  لما عرفت على تويتر  ان فيه مظاهرات فى وسط البلد نزلت تشوف فى ايه  ودا طبيعى  طب ايه اللعبه فى كده اللعبه ان لما الخبر يتنشر رواد القهاوى بيتظاهروا ومنهم نشطاء  يبداء الناس تكره المتظاهرين وتطالب بقانون الطؤارى ودا اللى حصل كل المعليقين على الخبر فى اليوم السابع  قالوا نعم للطؤارى وواحد قال انه يعمل جمعه لا للطوارئ  ونعم للشيشه  فطبعا اللعبه نجحت  وانا احب اللعبه الحلوه ملعوبه صح
يالهوى ياعمرو دا انت دماغك سم ياعم صدفه مش مقصوده  ماشى بس مقصوده ولا مش مقصوده   تدخل فى قلبك الريبه   لما تلاقى الناس بداءت بتكره المظاهرات  والمتظاهريين بعد احداث العباسيه اللى هي كل اللى حاضرها  قال انها كانت كمين  سؤاء زميلتا العزيزه فاتيما  او صديقى شريف  واحداث السفاره  اللىى بيقول عنها  شريف صاحبى   صاحب مدونه الحياه  انها كانت مترتبه  لانهم وهما واقفين يتظاهروا فجاه يجى ناس من خلفهم يحدفوهم بالطوب   و حمله تنظيف البلد من الاشغالات  والصدفه  اللى خليت رواد القهاوى يتظاهروا ومنهم نشطاء   وانك تلاقى الحكومه ماشيه على نفس النهج القديم فا ماتعلنش عن نسبه اضراب المعلمين الحقيقيه او ماتوصلهاش الحقيقه وماتعلنش نسبه الاضراب الحقيقيه للجراجات النقل العام  تقولك قانون الطؤارى للقبض على البلطجيه بعدين تحصل صدف تسئ للنشطاء  والمتظاهرين  والجرائد كمان تمشى على نفس النهج القديم ولما يحدث حدث يعرفونا انه موجود فى كل البلاد يحصل عندنا اضرا ب معلمين  بعدها يتنشر خبرمعلمو فرنسا يضربون عن العمل احتجاجا على تقليص عدد وظائف المعلمين يعنى الاضراب مش بس عندنا دا  فى كل العالم  وتحس ان حتى الحاجه الكويس بتتعمل لهدف مش كويس وتحس ان مافيش حاجه اتغيرت يبقى احنا كمان لا يمكن نتغير ونقيد الطؤارى ونقولها نعم اطلاقا 

الثلاثاء، 20 سبتمبر، 2011

كتاب الثوره



 اى كاتب بيعمل كتاب معروف او من البديهى انه لما بيفكر يعمل كتاب بياخد وقت فى تجميع الافكار وترتيبها  وتنسيقها  سواء بيكتب قصه من خياله  عقبال مايعمل الحبكه الدراميه بتاعتها  بياخد وقت او بيكتب احداث سياسيه بياخد وقت عقبال  مايرتب افكاره وينسقها  ويتاكد من الاحداث لكى يكون كتابه بيسجل تاريخ والقارئ يشعر باهميه الكتاب او يشعر ان  الكتاب هيضيف له معلومات  وهيفيده  انما  الان  وانت بتمشى فى الشارع تتفرج عند بياعين الكتب اللى على الرصيف  او لما تروح مكتبه تشوف الكتب الجديده مثلا  تلاحظ بعض الكتب التى لا تشجعك ان تقرائها  لانك تشعر ان الكتاب  لو فكرت انك تشتريه تحس انك هتشترى كتاب هتقراء فيه  بعض من الاشاعات  على شويه افلام مفركه  وتشعر بعدم مصداقيه الكتاب بالظبط كما كنت تشعر عندما تقراء فى الجرائد الساقطه  والمواقع الساقطه ايضا  اللى كانت بتنشر ايام الثوره  خناقه بين جمال مبارك وعلاء  علاء قاله معرفش ايه وجمال رد عليه قاله معرفش ايه وبعد كده جمال مبارك هيطلق مراته  مراته طالبه الطلاق  اللى شويه شويه كانوا هينشرو يا اخونا انقذوا عائله مبارك  الثوره فرقتها احفاد مبارك هيتشرده بعد طلاق نجليه يالهوتى ياخرابى  وكلام جلسات المزاج والحشاشين دا  ونفسى اعرف ايه الناس اللى كانت سايبه الثوره وقاعده فى القصر بتراقب العائله اللى كانت حاكمه ديه  نفس الكلام حصل فى الكتب  مجموعه من الكتب عن الثوره وعن مبارك والعائله اللى كانت حاكمه   ممكن اكون انا ظالم الكتب ديه واصحابها  يمكن لانهم كتاب سياسين من زمان سرعتهم اسرع مما انا متصور  وخصوصا انى  لسه يدوب بحاول افهم السياسه   لكنى كل ما بحاول افهم  بشعر بان كل  المجتمع بتعلم لسه سياسه زيى حتى السياسين المخضرمين اللى كانوا عاملين احزاب وكل فين وفين لما نسمع عنهم  لان اللى كانوا بيمارسوه فى عهد النظام السابق مش سياسه  يمكن انا عشان لسه بتعلم سياسه بشعر  بمشاعر مش مظبوطه بس يجى السؤال هل يصح اننا نتكلم عن الثوره دلوقتى او حتى نحكم عليها    سواء كنا مؤيدين للثوره او منافقين ليها  _ اسف انى بقول منافقين ليها  لان ساعه الثوره نادرا  ما تلاقى معارضين  كله بيبقى مع الثوره وكله  كان فى ميدان التحرير حتى هيجى يوم  شهداء الثوره اللى كانوا فى السويس واسكندريه وباقى المحافظات  هيتقال انهم استشهدوا فى التحرير مش عارف الثوره فجاه بقيت تحرير وبس  مع انها كانت مشتعله  فى السويس واسكندريه ومحافظات تانيه   _  ينفع احكم على الثوره والبلد كلها فى حاله تخبط  حتى اللى عاملين الثوره فى حاله تخبط  حتى اللى هيحكم  فيما بعد هيكون فى حاله تخبط وهو بيفكر  لحلول لمشاكل  لها جذور من 60  سنه  وحلول لمشاكل يمكن يكون حلها فى تغير فكر مجتمع  كامل ولا المفروض نتكلم عليها او نحكم عليها قدام بعد كام سنه  بعد ما الوضع مايستقر  ونشوف وصلنا الى ايه امور الحياه شغلت الناس ورجعوا  زى ماكانوا ونسيوا وتركوا النظام الجديد  هو كمان ينسى الثوره ويتحرك فى اتجاه الفساد ونعود زى ماكنا فى النظام السابق ولا زى ما غيروا النظام هما كمان اتغيروا  لما نكون فى نقطه فاصله بين مرحلتين  ينفع احكم عليها او اتكلم عنها وانا لسه واقف عندها  ولا لما امشى  واشوف المرحله اللى بعدها
الشئ المستفز بقى  بعض البرامج اللى  ظهرت اللى تقعد تكلم ويقولك كل رجال الرئيس  ويقعدوا يكلموا عنهم كانه واحد من اهليهم وعارف عنهم كل حاجه  ولا الممثله اللى دخلت الفن عشان بتعرف تتمرقع فجاء بقيت سياسيه وعامله برنامج نشره اخبار تتريق فيه على  كلام سوزان مبارك  لما كانت بتكلم ازاى اتجوزت مبارك  المشكله اننا بنعرف نشتم ونتريق ونستخف بالناس ونعمل حواديت واستنتاجات  ولا نعرف ننتقد وهذه كارثه
والكارثه الاكبر  باننى وانا قاعد بنتقد الكتاب اللى كتبوا عن الثوره  او عن مبارك واسرته سواء مؤيدين او معارضين او منافقين  ارتكب نفس خطائهم وقاعد بنتقد بعض الاحداث الجاريه فى الثوره والافعال واستنتج افعال ويمكن اكون صدرت احكام  كمان سواء دلوقتى او زمان ايام النظام  وبالتالى عايز اقول للى بيقراء  البوست وهو بيقراء نقدى للكتاب اللى كتبوا  عن الثوره وعائله مبارك ياخدنى مثال للى بنتقدهم  مع انى مش كاتب اوى  بس نعمل ايه غاوى فضفضه عن افكارى والفضفضه الكتير توقع فى اخطاء 
واخيرا عايز اقولك انى لازم اعتذر لك عن كارثه  غالبا حدثت لك  وانت بتقراء البوست  انك توهت منى

لان البوست اساسا عايز يتنسق اصلا   
وشكرا مع الاعتذار   واهى كانت فضفضه 
تصدق انا كمان توهت   ههههههههههههههه

السبت، 17 سبتمبر، 2011

الجيش والشعب ايد واحده

 شعار جميل ظهر ايام الثوره بعد اختفاء الشرطه ونزول الجيش  بالرغم بانى مكنتش فهمه اوى لما طلع ومكنتش مصدقه اوى  اصل ازاى الجيش والشعب ايد واحده  ان كان اغلب الشباب مافيش حد فيهم عايز يدخل الجيش واللى بيلبس فى الجيش بيزعل وبيقول ايه القرف دا  ماهى ناقصه سنه تضيع فى الجيش من غير لازمه  وواحد داخل قبلى بكام يوم يعيش عليا الدور وكلام من دا كتير ويمكن الغالبيه  بتتمنى تاخد اعفى او تاجيل وفى ناس بتهرب من الجيش كان اشهرهم اخيرا المغنى المعروف اللى لما  حاول  يدافع عن نفسه كان بيدافع انه مش مسئول عن التزوير لانه ليه هيزور وهو خلاص قرب على سن الثلاثين يعنى هيدفع البدل وخلاص يعنى دافع انه ماكنش هيزور مش انه ماكنش عايز يهرب من الجيش رغم انه قاعد يغنى اغانى وطنيه ولو كنا بنحبها وكلام كتير بتاع اغانى  يمكن لانه شايف ان الكل عايز يهرب من الجيش يعنى الهروب من الجيش شئ عادى   والافيه الجامد زميلنا احمد  صاحب مدونه اسير الجراح اللى عمل مدونته وسماها اسير الجراح   اول ما خرج من الجيش  واضح ان الجيش اثر فيه اوى   بس بداءت اصدق الشعار دا لما فى احدى المرات لقيت صاحبى كريم  ايام الثوره  ونزول الجيش بيقولى الواحد كان نفسه يكون فى الجيش فى الايام ديه  صحيح هو بعد احداث  السفاره لما حبيت اهزر معاه وقولتله  شكلها هتقوم حرب وهيستدعوك  قالى بعد الشر  وربنا يستر  مش عشان البلد مش جاهزه لحرب ولا حاجه لا خوفا من انهم يستدعوه  لكن تراجع بعدها  وقالى والله لو ليا فايده فى الجيش  معنديش مانع  ووقتها تاكدت من ان الجيش والشعب ايد وحده  بس وقت الازمات  لان المصرى ماعندوش مانع من انه يدخل الجيش لو له قيمه وفائده داخله انما فى الوقت السلم  او فى الوقت اللى يحس ان وجوده فى الجيش مالوش لازمه  او على راى الفنان اشرف عبد الباقى فى فيلم الارهاب والكباب  انه يكون فى خدمه سياده اللواء واسرته  مش فى خدمه الوطن او انه مش هيستفاد حتى من وجوده فى الجيش  بيكون الجيش والشعب  مايعرفوش بعض   انما  ساعه الازمات وساعه لما الفرد بيكون وجوده فى الجيش له فائده وضرورى بيكونوا ايد واحده

الأحد، 4 سبتمبر، 2011


بيقولوا البلد مافيهاش  شغل  
  وبيسافر اهلها علشان بيبحثوا فى بلد غيرها عن شغل
غريبه بنلاقى الصينيين  والهنود  بيلاقوا فيها شغل   وبيسافروا من بلادهم ليها عشان فيها بيلاقوا شغل
غريبه كل واحد بيلاقى   رزقه  فى  بلد غيره    سبحانه   يمكن الرزق  بيجى مع الغربه  ولا دا سر  اختلاف العمله 

قالولوا  اشتغل فى بلدك اى حاجه        زى ما انت بتسافر تشتغل فى اى حاجه
قال لهم   كفايه انى اتعلمت فى بلدى تعليم اى حاجه واتخرجت منها من كليه اى حاجه
كفايه مش عايز احس انى فى بلدى ولا حاجه   
 لانى لو هحس فى الغربه  بالغربه  ماينفعش احس فى بلدى بالغربه

Follow by Email

Tetris