الاثنين، 21 مارس، 2011

الاستفتاء

بالرغم بان النتيجه على   عكس ما اخترت  ولكن فى النهايه  احترم الاغلبيه
نرجع فلاش باك
 اشياء اعجبتنى
كنت متفاءل وسعيد بحاله التخبط التى صاحبت الناس قبل الاستفتاء وتفكبرهم بماذا يصوتون نعم ولا لا  وشعورهم باهميه ذهابهم للتصويت ومحاوله اختيار الاصوب من وجهه نظرهم  وبما يقتنعون بيه  مما جعل ظهور بروفيلات  نعم واحترم من يقول لا  وبروفيلات  لا واحترم من يقول نعم   لان اصحابها كانوا على راى معين واقتنعوا براى اخر فيما بعد  مما جعلهم لايخونون احد  ولا يتهمون احد بالجهل او الكفر او اى شئ اخر  لانهم كانوا على الراى المخالف فيما سبق وكانت اولى الخطوات لممارسه الديمقراطيه  بعقلانيه واحترام الراى الاخر
واعجبنى عندما ذهبت للادلاء بصوتى  فى الثامنه صباحا ووجد طابورا  امامى ووجد ان كل الناس نزلت منذ الساعات الاولى من الاستفتاء للادلاء برايها  سواء  بنعم او بلا

اشياء احزنتنى
ماحدث  للدكتور البرادعى من منعه والقاءه بالطوب   بالرغم من اختلافى معاه واعتراضى عليه اساسا لكن ماحدث معه ليس من الديمقراطيه وليس اسلوب من اساليب التحضر والرقى  ماحدث معه اسلوب لا يليق بشعب مصر الرائع  ليست هذه الطريقه طريقه ناس متحضره 
وماحدث من البعض على الفيس بوك من تكفير امثالى اللى قالوا لا شئ سيئ

ولكن بالرغم من كل شئ  وبالرغم من النتيجه 
 الاستفتاء  كان بدايه جميله  نحو مما رسه الديموقراطيه لعلنا  يارب نحصد  فوائدها  ونتجنب ونتعلم من اخطائها
تحياتى

الخميس، 17 مارس، 2011

لا للتعديلات الدستوريه

مناقشات  فى كل حته عن التعديلات الدستوريه  وفى ناس عايزه تقول نعم وناس عايز تقول لا  وناس مش عارفه  نعم ولا لا اللى فى الصالح  وبروفيلات  على الفيس بوك بنعم وبروفيلات بلا  وكلام كتير يحير بصراحه انا بردوه كنت متحير نعم لا نعم لا  طيب وبعدين لازم نستقر على راى طيب نشوف اللى هيقول نعم هيقولها ليه وايه نتائجه  واحد يقول عشان الاستقرار  يرجع والحياه تمشى وكمان المواد اللى فى التعديلات جميله  من حيث مده الرئاسه  وباقى المواد كمان  زى الفل تشطيب على المفتاح  طيب انت ضامن انك لوقلت نعم  التعديلات اللى فى الدستور هتستمر ؟؟؟؟؟
يعنى ايه ياعمرو  
يعنى انت قلت نعم  ووافقت  والحياه تمشى واتعمل مجلس شعب وشورى وانتخب رئيس جمهوريه وكله تمام وبعد كده  المفروض ان الرئيس الجديد هيعمل دستور جديد ويعرضه على مجلس الشعب   طب لو رجع  المجلس لعادته القديمه  موافقون موافقه والرئيس الغى التعديلات او عمل اعاقات لها والمجلس وافق
نرجع لعادتنا القديمه تانى 
لا بس دا مش هيحصل ياعمرو  لان الناس هتنخب بعد كده بجد وهيبقى ليها صوت بجد 
لا معلش هيبقى لسه  موجودين ناس تبيع اصواتها بالفلوس  مع احترامى للناس
يعنى انت عايز ايه  ياعمرو
يتعمل دستور جديد   والاستفتاء يكون على ماده ماده   مش بالجمله ويبقى الاستفتاء الشعبى زيه زى المجلس  يكون الاستفتاء ماده ماده  والمواد كده كده  قبل يوم الاستفتاء بتتناقش فى الاعلام و النت وبين الناس  يعنى الاستفتاء يكون زيه زى المجلس وتبقى مره واحده وياخد وقته  احنا مش عايزين  تعديلات دستوريه  او دستور تيك اوى  احنا عايزين دستور  بجد  معمول صح 
بس الكلام دا ياعمرو هياخد وقت واحنا عايزين استقرار  فى اسرع وقت
الاستقرار مش بمجلس شعب ورئيس جمهوريه يكونوا موجودين
عدم الامان وعدم الاستقرار مش سببه ان مافيش مجلس شعب او رئيس
عدم الامان  والاستقرار  سببه عدم وجود  شرطه  يعنى الشرطه تنزل  تشوف شغلها بجد وتبنى مع الشعب ثقه متبادله  واحترام بين الاثنين  وتفتح معه صفحه جديده  وتحاسب الفاسدين بس   والدنيا هتمشى  والسياحه هترجع تانى  و الحياه هترجع  لطبيعتها 
طب  انت بقى  ياعمرو  ايه اللى يخليك تطمئن ان لما تقول لا للتعدبلات الدستوريه   ويتعمل دستور  جديد  ويتم الاستفتاء عليه ماده ماده  وتقول نعم على المواد للى تقتنع بيها ولا على الباقى  ان  ريمه لا تعود لعادتها القديمه 
لان مش هيكون مطلوب من الرئيس الجديد  عمل دستور على مزاجه  هو يجى على الدستور اللى الشعب قال عليه  نعم
ولذلك انا اقول لا لتعديلات الدستوريه   واقول نعم لعمل دستور جديد والاستفتاء عليه ماده ماده  وليس بالجمله
 يمكن اكون غلطان  بس اللى شايفنى غلطان يقولى يعنى ايه اعمل استفتاء على  تعديلات دستوريه  عشان اعمل مجلس شعب ورئيس جمهوريه   عشان  رئيس الجمهوريه يعمل دستور جديد يعرضه على المجلس  طب الاستفتاء الشعبى دا بقى يكون لزمته ايه ؟ اجراء روتينى  تخليص مصالح   مادم الشعب  هينزل وهنقوم بدور مجلس الشعب  وهيقول رايه  نعم او لا   يبقى ينزل نقول نعم على حاجه تستاهل  ننزل على دستور جديد مش ننزل على  شغل سمك لبن تمر هندى   شغل سمك لبن تمر هندى دا ننزل نقول عليه لا
دا شغل عك   ماينفعش
لا للعك ونعم لدستور  جديد

الثلاثاء، 15 مارس، 2011

دعوه لأنشاء مجله الكترونيه لكل المدونين

 

 

دعوه لأنشاء مجله الكترونيه لكل المدونين

بسم الله الرحمن الرحيم

ايمانا منا بأهميه التدوين لرواد الانترنت في مصر
وأهميته في نقل أحداث ثوره २५ يناير وأسهاماتها في الفتره الماضيه
بما في ذلك حملات المدونين الماضيه والمستمره دائما

وبعد نقاشات عديده بين المدونين
تقرر أنشاء مجله ألكترونيه للمدونين في مصر بأسهامات من المدونين أنفسهم
أنطلاقا من أهميه كلمات ورؤي وأسهامات للمدونين وتوحيدا لكلمتهم في الفتره المقبله

والله الموفق والمستعان

دي الكلمه اللي أختارناها علشان الكل يكتبها فالمدونه بتاعته
للي حابب ينضم لحملتنا
فرجاء اللي هينضم يحطها عنده

شكرا ليكم
============
منقول من مدونه  سونى

الأربعاء، 2 مارس، 2011

صفحات السفاله والاستعباط والاستهبال على الفيس بوك

دائما كنت اقول لنفسى ان شيئا عاديا ان يكون هناك الراى والراى الاخر يعنى ممكن ان يظهر حد ضد ثوره 25 يناير عادى او حد بيحب حسنى مبارك عادى قد تختلف الاراء بين محب و غير محب وكل واحد بيكون له راى حتى لو كان خاطئ ولكن نستغرب من اللذين يستعبطون ويستهبلون ويبدعون صفحات بجحه ومعتوه على الفيس بوك وانا بقلب على الفيس لقيت احد الاصدقاء مشير صفحه وكاتب تحذير عليها ممنوع الدخول لمرضى الضغط والقلب ...لان الصفحه مش جريئه لا..دى بجحه وغبيه ويارتنى سمعت تحذيره ومادخلت عليها ياترى الصفحه عن ايه امسكوا اعصابكم الحمله الجريئه لترشيح علاء مبارك رئيس جمهوريه مصر العربيه عااااااااااا    يانهار اسود على الاستهبال ايه العبط دا لا كمان الكبيره بيقولك قال ايه الصفحه مش عشان ترشيح علاء مبارك لا عشان الاعتذار لعم حسنى مبارك وقال ايه قال يعنى عايزين ابنه يمسك

هههههههههههه اشد فى شعرى يعنى اول مره اعرف ان الفبس بوك وصل لمستشفى الامراض العقليه والمتخلفين بقوا بيعملوا صفحات لا حول الله بقى الناس تخرج فى المظاهرات وتموت وتضرب وتشم فى قنابل وحال البلد يتلغبط عشان الحريه والمساواه وعدم التوربث وبعد ده كله يطلع متخلفين يعملوا صفحه زى ديه يعنى حتى اللى عايز يعمل نكته ويهزر بردوا لازم مايكنش نكته بايخه مش عارف انا الناس ديه عايزه ايه اللى كل شويه يتحفونا بصفحات تتعب مرارتنا صفحه لترشيح علاء مبارك  صفحه كلنا ضد ادمن صفحه خالد سعيد ايه و صفحه حملة ترشيح ماما سوزان مبارك لرئاسة الجمهورية  و مع صفحه المتخلفون  الكبيره  لا لحبس الشرفاء  وياترى  قصدهم مين بالشرفاء  حبيب العدلى والمغربى واحمد عز  عاااااااااااا  هى الناس ديه عايزه ايه عايزه تحرق دمنا ولا عايزه ايه ربنا يحرق دمهم ويفقع مرارتهم


حسبنا  الله  ونعم الوكيل


Follow by Email

Tetris