الأربعاء، 29 سبتمبر، 2010

تعلم الهيستيريا (من ارشيف مدونتى فضفضه + تحديث )

  مدحونا بالسباب واستغربوا لما تحياتنا بقيت بالسباب
سألونا عن الاسباب وهما كانوا اهم الاسباب
قالو علينا واحنا اطفال قرود  وده كان مدح
وقالو لينا ايه الجمال ده  طب ما انت حلو  جميل وعسل والله وده كان ذم
واستغربوا لما سمعونا بنقول لبعض
كلام بينا وبين بعض
ازيك يا ابن التييييت بين قوسين كلمه ابيحه
وديه كانت تحيه
ايه ايه ايه  كلمه ابيحه  تبقى تحيه
هاهاهاهاها  ايه ياعم ده  دا كلام هيستيريا
يعنى كلام زمان كان عقل  كله درجات من الهيستيريا   
عجبي لما الولد يعرف ذمه من مدحه
 عن طريق احساسه بالنيه
 كتر المعاني للكلمه
 ضيعت معنى الكلمه
 عجبي على زمن احب اهله الهيستيريا
 فهيسوا واصبحت حياتهم هيستيريا


من الارشيف الموضوع الذى وضعت  فيه الخاطره قبل التحديث فى مدونتى فضفضه
http://7akawy-amr.blogspot.com/2010/02/blog-post.html

الاثنين، 27 سبتمبر، 2010

قررت ان اعاقبك فرأيت ان عقابك انى اسامحك

قررت ان اعاقبك 
فرأيت ان عقابك انى اسامحك
وفتحت معاك صفحه جديده  بيضاء
ليس فيها جرح ولا الم
ولا موده ولا عشم
 عمر ما بداء من اول لحظه عشم
اعقلها بلاش غشم
اوعى تزعل  لما اهمس لغيرك
ماسرى بقى مش معاك بقى مع غيرك
ايه يعنى لما تبقى فى حياتى مش رقم واحد
بس موجد زى اى واحد
غريبه انك  بقيت تتمنى انى اعاتبك  او اخاصمك
ما انت معايا ومن غير ما تطلب بقيت بسامحك
يمكن تكون بقيت فى حياتى مش فارق
تقرب  او تبعد عنى  مش فارق
جرب بقى الغربه وسط الحضن
جرب وسط الحبايب تحس بعد 
 استنى بقى لما يتزرع  ما بينا
اللى زرعته  الايام زمان ما بينا  
مش انت اللى  اقتلعت  الزرع
مش انت اللى بنيت السد
مش انت اللى هدمت الود
 اصبر هيعود ما بينا العشم
بس مع الوقت بلاش غشم
 اصبر  هيعود سرى  لك
اكيد بالوقت هيرجعلك
ده كلام جاى تقولى خاصمنى
 وتترجانى  وتقولى بلاش تسامحنى
ما اقدرش على خصامك
ومهما تعمل مسامحك
دا  البعد فى الوصال
امر من البعد فى الخصام
قررت انى اعاقبك
 فرأيت ان عقابك انى اسامحك  

الأربعاء، 22 سبتمبر، 2010

فاصل اعلانى ونرجع ندون تانى

البوست ده مجرد اعلان 

الان و حصريا على شاشات كمبيوتراتكم
تم افتتاح مدونه صفحات من حياه شاب عاطل بحالات

http://pagesfromunemployed.blogspot.com/

وقد صرح مصدر مسئول رفيع المستوى(اللى هو انا يعنى ) يعنى مش رفيع اوى انها ستكون مناسبه لكل العاطلين ويمكن يشوف فيها بعض الشباب الغير عاطلين ذكرياتهم

ايضا يوجد مدونه خواطر
http://khwater-amr.blogspot.com/
بها احدث انواع الخواطر ومناسبه لجميع الاعمار

ولعشاق القصص

يوجد مدونه حكاياتى
http://amr-story.blogspot.com/

مناسبه لجميع الاعمار
ولمزيد من الاستفسارات اتصل ب صفرين ثلاث اصفار صفرين صفر نصلك لحد الشاشه

بدون مصاريف شحن


ومفاجئة  العرض


لهواء الطبخ احلى الفديوهات لاشهر الطباخين فى مكتبه الفديو
http://hawadettt3.blogspot.com/
رئيس مجلس اداره المدونات  ورئيس تحريرها
عمرو يسرى
رئيس مجلس اداره مكتبة  الفديو  ورئيسه تحريرها
مرمر
حواديت ( اسامه)


للاعلان  اتصل ب خمس اصفار صفرين  صفر
ومن خارج مصر +صفرين  خمس اصفار صفر ثلاثه اصفار صفرين صفر

السبت، 18 سبتمبر، 2010

جوايا نص حاله

جوايا  نص حاله  ما يقدريعبر عنها اللسان
ولا عارفه هى تعبر عن نفسها فى اى مكان
 جوايا نص حاله احيانا بتقتلنى
واحيانا  بتموت من نفسها وهى اصلا حاله بلا معنى
معرفش  انا شمسى امتى  هتشرق
 يمكن خايف  اغرب انا  قبل  ما تشرق
جوايا نص حاله
 رجلى بتخطى  الخطوه وبترجعها تانى
وبلاقى نفسى واقف فى مكانى
كل ما افكر فى  نفسى
  يجى عقلى  وينسانى
تتوه نفسى جوايا
ويضيع  عمرى جوايا
جوايا نص حاله
جوايا حاله ناقصه  مش عارف  اوصفها
بس اهى جوايا  مش عارف اخلص منها
حوايا نص حاله
 لو انا مش هعرفها
مين غيرى هيعرفها
يعنى هيجى حد بالنيابه عنى و يعرفها
جوابا حاله لازم اعرفها
جوايا نص حاله
يمكن اكون انا بحاله
يمكن يكون ناقصنى حاجه
جوايا نص حاله
جوايا نص  حاله بحاله
ساعات احس بيها
وساعات اعديها
جوايا نص حاله  بحاله


الأربعاء، 15 سبتمبر، 2010

انوار الشوارع منوره الصبح لتخفيض الكهرباء بالليل

انا مش بهييس اتفرجوا على الفديوه ده وانتم تعرفوا ان العنوان مش تهييس
التصوير يوم 4/9/2010 وعلى طريق المحور .
معلش البوست ده متاخر كان المفروض اضعه بدرى شويه  
  video
كنت على طريق المحور وكان اغلب انوار الطريق منوره ولكن للاسف كما فى الفيديو فى عز الظهر والدنيا اصلا منوره والحكومه تريد تخفيض الاعباء عن الكهرباء وتقطع النور بالليل وتضلم الشوارع وتعمل لمبه ولمبه شوفته المسخره ينورها الصبح ويضلموها بالليل والسوال هل الدكتور احمد نظيف رئيس الوزراء و احنا عارفين انه بيسكن فى محافظة 6 اكتوبر لم يشاهد ابدا هذا المنظر  هل الزجاج الفيميه بتاع العربيه بتاعته منعه من ان يرى الانوار منوره فى عز الظهر ولا لانه لا يغادر منزله ابدا ولا ايه  

الغريب اننى من فتره كنت راجع من السفر بالليل والطريق كله ضلمه النور مقطوع علشان الحكومه بتخف الاحمال لان الناس فى عز الحر بتشغل التكيفات وده بيزود الضغط على الاحمال وطبعا الناس اللى فى القرى اللى على الطريق الزراعى واللى ممكن يكونوا مايعرفوش يعنى ايه تكييف اساسا هما اللى ضغطوا على الاحمال ازاى ده شغل الحكومه اللى بتقطع الكهرباء ساعتين او اكثر فى بعض الاماكن يوميا وتترك البعض الاخر اصل قالت ليا اختى  وهى مستغربه ان شركه الكمبيوتر اللى بتشتغل فيها اللى فى مدينه نصر لاينقطع النور فيها صبح ولا ليل والكورسات شغاله فيها صبح وليل بدون مشاكل تذكر الشركه التى بها اكثر من تكييف واكثر من جهاز كمبيوتر بيشتغلوا صبح وليل على حد تعبيرها وقالت ليا كمان ان مره النور قطع عندهم الصبح نص ساعه اتقلبت الدنيا وزمايلهم اللى فى مدينه نصر كانوا مستغربين ازاى النور يقطع كل الوقت ده وكانوا اول مره يعرفوا ان النور بيقطع  اصلا فى الايام ديه  بالرغم من ان النور وقتها كان بيقطع فى بيتنا بالساعات وده طبعا لان الشركه وسكان مدينه نصر لايضغطوا على الاحمال ازاى ده شغل الحكومه ولكن احنا بتوع شبرا والناس التانيه بتوع القرى اللى على الطريق الزراعى تكيفتنا باظت من كتر الاستعمال وقاعدين بنتضغط على الاحمال دا احنا بقينا اوفر خالص ده طبعا كلام الحكومه
الحكومه التى لا اعرف هل بتاخذ حبوب هلوسه ام انهم مهلوسين خلقه ربنا ولا ده تكمله للضغط على المواطن البسيط لحساب الناس الكبيره هل وزير الكهرباء حسن يونس النور كان  بيقطع عنده بشكل يومى ولا ده مواطن غلبان استهلاكه استهلاك بسيط لايضغط على الاحمال
حسبنا الله ونعم الوكيل فيهم جميعا
انوار الشوارع تنور للناس فى عز الظهر
اصل الدنيا بتبقى ضلمه فى عز الظهر
وعشان نخفض الكهرباء نضلمها عليهم بالليل
اصل الليل كله نور معقول ننورلهم بالليل
ده اكيد كلام حكومى اسم الله عليهم
ربنا يضلمها عليهم
ومش هقول يارب اخرب بيتهم
ماهو لو اتخرب هيجى علينا مش عليهم
ما هما بيعوضوا الخسائر على حسابنا
حسبنا الله ونعم الوكيل
حسبنا الله ونعم الوكيل


الاثنين، 13 سبتمبر، 2010

واجب تدوينى منMR.PRESEDENT

انا عندى واجب من:
MR.PRESEDENT صاحب مدونة انا الريس



وعاوز اشكره كثيرا على الدعوه

ما هي كتب الطفولة التي بقيت عالقة في ذاكرتك؟

 ليه الاسئله المحرجه ديه
بصراحه وبكل وضوح
لا اتذكر اننى كنت بقراء حاجه وانا صغير حتى الكتب المدرسيه ماكنتش بقراها لانى ماكنتش بحب لا المدرسه ولا المدرسين ولا المواد اللى بندرسها بس ممكن اقول اننى قراءات قصص جحا اللى كان اغلبها رسومات والقصص اللى زيها على بابا مثلا

مَنْ أهم الكتاب الذين قرأتَ لهم ؟
د/ مصطفى محمود- انيس منصور- يحيى حقى -د/ ابراهيم الفقى -شكسبير- يوسف معاطى -عمر طاهر -نجيب محفوظ- اسامه غريب

من هم الكتاب الذين قررت ألا تقرأ لهم مجددا؟
 الى الان لا يوجد او لم اتذكر احد

في صحراء قاحلة ، أي الكتب تحمل معك؟
 أكيد القرآن الكريم وممكن كمان اخذ معى اى كتاب مسلى او ورقه وقلم اقعد اشخبط فيهم

ما هو الكاتب الذي لم تقرأ له أبدا ، وتتمنى قراءة كتبه ؟
 هما أكتر من واحد ( العقاد – جمال حمدان – عبد الوهاب الميسرى – يوسف السباعى – السعدنى- طه حسين - واخرون القائمه لاتنتهى )

ما هي قائمة كتبك المفضلة ؟
 كتاب مصر ليست امى ديه مرات ابويا لاسامه غريب – رحلتى من الشك لليقين د/مصطفى محمود - كابتن مصر لعمر طاهر - الملك لير وتاجر البندقيه لشكسبير
ما هي الكتب التي تقرؤها الآن ؟
 كتاب حوار بين طفل ساذج وقط مثقف لاحمد بهجت

اللي بعت الدعوه ؟
الدعوة جت لي منMR.PRESEDENT صاحب  مدونه انا الريس  

أرسل الدعوة لمدون واحد علي الأقل من أجل مشاركتنا باطلاعهم في القراءة ؟
 ارسلها
لمدونه طوبه فضه وطوبه دهب
الاستاذه موجه صاحبت  مدونه بين السماء والارض

الاستاذه شهرزاد صاحبت  مدونه سر الحياه
والاستاذه  رحاب صالح  صاحبت مدونه حياتى لكن مش حره فيها 
 ول جنون عبقرى  صاحب مدونه مملكة العـبقرية المجنونة
ولكل المدونين  ايضا



الثلاثاء، 7 سبتمبر، 2010

مدرس رياضيات يجمع ذكرياته

زمان كنا بنقول متى نبقى اثنين فى واحد
ونعيش مع بعض عمر واحد
قولنا زمان اننا معادلتين حلهم فى معادله واحده
وكنتى بالنسبالى اجمل واحده
كنت بعرف احل لوغارتماتيك
وكنتى عارفه تحلى لوغارتماتى
كنتى ضلعى الثانى فى زاويه قائمة على الحب
جتلك واعترفتلك انى غرقان فى الحب 
وحبك خلانى ماشى  مستقيم
قلت اقرب خط بين نقطين الخط المستقيم
 ورسمت فى احلامى دائره كنا احنا اقطارها
واتفقنا على الزواج والزواج قسمه
وكنتى قسمتى ونصيبى وكانت احلى قسمه
جا الهوى عكس ما قلبى هوى
ورحلتنى عنى ورسم بيان قلبى هوى
كان نفسى نعيش انا وانتى اس اتنين
كنت مستنى بعد ماحلينا المعدلتين
وكنا سين وصاد اننا نجيب عين
ولكن شكلها كده اصابتنا عين
رحلتى عنى واخذ قلبى جذرتربيعى
واصبحت بعدك صفر على الشمال
بدور عليكى يمين وشمال
اجمع ذكرياتى واضربها فى دماغى
ينطرح اغلى وقت فى حياتى
فاكره جدول الضرب اللى حسبناه
اثنين فى واحد بيساوى اثنين
الحب بيجمع بين قلبين
اثنين فى اثنين بيساوى اربعه
وانتى فى قلبى متربعه
اثنين فى ثلاثه بيساوى سته
فرحنا كان يوم سته
اثنين فى اربعه بيساوى ثمانيه
رقم بيتنا ثمانيه
اثنين فى خمسه بيساوى عشره
كانت احلى عشره
اثنين فى سته بيساوى دسته
كنا عايزين نخلف دسته
وداع يا برجل قلبى
وداع يا ضلع مثلث فرحى
تركتى مساحه فى حياتى
مش عارف احسبها ازاى يا قلبى
مش عارف المساحه هى مثلثه ولا دائره ولامربعه
مازلتى فى قلبى قاعده ومربعه







الأربعاء، 1 سبتمبر، 2010

مدرس عربي يعرب عن مشاعره

انا قلبى كان فاعل يوم ما حبك 
كان طاير فى السماء وعلامه طيرانه حبك
حولتنى الى مفعول بيه بجرحك
وعلامه جرحى غدرك
حبك علمنى ليت وكنت بتمنى فى يوم تحبنى
وانت علمتنى إن لشكي انك فى يوم ممكن تحبنى
 فى يوم قولتلى  انك بتحبنى بس مش عارف تعبر
وقولتلك اللى بيحب بيعرف يعبر
ولو مش عارف بيتصرف
بس كان واضح ان الحب اللى فى قلبك كان ممنوع من الصرف
الحب زى ما لامه قمريه

تكتب وتقراء احساسه كمان احساس قمرى
يقال و يحس يا عمرى
ماعرفش ليه لامك شمسيه
بتقلها ولا تتحس بتكتبها ولا تقراء شمسيه
كانت قصه حب وانتهت بجرحى
مازال جرحك جارح قلبى
خلاص بقى ما انفك عنك القناع
وعرفت انك بياع
انا خلاص هكلم و ابوح
انا خلاص منك مجروح
ايوه بقولها بصيغه مبالغه
بس بقولها من غير مبالغه
هقولك جمله من مبتداء وخبر
الحب انتهى وده كان قدر
عمرى ماحسيت انك ذو ولا اب ولا اخ ولا اى اسم من الاسماء الخمسه
خلاص مش عايز اسمع منك ولا همسه
يا حبذا لو تم الفراق

ما دام لم نشعر بالوفاق
عمرى ما هدعى عليك بالرغم من جرحى
مش هتمنى اشوف قلبك فى محل جرح قلبى
مش هنعتك باى حاجه
اكيد عارف اللى زيك هيكون منعوت بايه
هقول جمله بين علامات تنصيص
انا بعدك مش هحب حد خسيس
مش هستخدم اساليب تعجب
اللى يعرف قصتنا منك يتعجب
ومش هقول اساليب ذم
اللى يعرفك فيك هيذم
جمله اخيره مابين اقواس
سلام بقى عايز الحق الميكروباص






Follow by Email

Tetris