الثلاثاء، 25 مايو، 2010

عايز تركب اتوبيس لون ايه

فى احدى الايام فوجئت وانا ماشى ب الاتوبيسات الحمرا وبعد ما روحت البيت وعند تصفحي احد الجرائد كانت تتحدث عن الاتوبيسات الحمرا والمشاكل التي تواجه الكمسارية عند قطع التذاكر للركاب حيث يتفاجئ  الراكب ان ثمن التذكره زاد الى جنيه ويتفاجئ من يركبون بنصف تذكره ان الاتوبيس الاحمر ليس به نصف تذكره النظام اللي كان موجود فى الاتوبيسات السابقه بالوانها المختلفه اتلغى وتوقعت ان اكيد فى اختلاف جوهرى  فى الاتوبيس الاحمر عن الاتوبيسات السابقه وفى اليوم الثانى تعمد ان اركب الاتوبيس الاحمر لاعرف ما الاختلاف الجوهرى  الذى جعل سعر التذكره يزداد للضعف مره واحده وعندما ركبته اندهشت مما فوجئت به .   عندما كنا نركب الاتوبيس الازرق والاتوبيس الاحمر القديم كان سعرهم ربع جنيه كان الاتوبيس بالداخل على اليمين كنبه وعلى الشمال كرسى وعندما بدا  الاتوبيس الاخضر فى الظهور قالوا انهم صنعوه  من الداخل على كلا من اليمين و الشمال كنبه حتى لا يوجد مكان للوقوف لاننا لن نجعل احد يركب الاتوبيس واقفا وبالرغم من كده الناس كانت بتركب واقفه فيه لعدم كفايه الاتوبيسات وازداد سعر التذكره الى نصف جنيه وقالوا من يريد يركب الاخضر يركبه ومن يريد يركب الاتوبيسات القديمه يركبها ثم بدا  تقليل الاتوبيسات القديمه حتى ساد الاتوبيس الاخضر بالتدريج وتعدى الايام ويظهر الاتوبيس الاحمر ليرجعنا لايام زمان كنبه على اليمين وكرسى على الشمال حتى يكون فى مكان للوقوف مره اخرى حيث اكتشفوا ان فكره الاتوبيسات الخضره فاشله ويزداد سعر التذكره الى جنيه طب ما يقولوا عايزين نزود التذكره ويخلصوا لازم اللعب بالالوان ازرق واخضر واحمر والاشتغالات ديه   فعلا كان اختلاف اللون  اختلاف  جوهرى    طب انا مستنى الاتوبيس البمبي انت مستني اتوبيس لونه ايه طبعا فى واحد هيقولى انه عايز اتوبيس لونه  اسود على الهيئه اللى قعده تستهبل علينا وتشتغلنا  اقول له عيب ليه كده ده الهيئه دائما بتقول انها بتخسر شوف مصاريف دهان الاتوبيس من اخضر الى احمر الى اللون اللى هيختروه بعد كده قد ايه وتكلفه الرجوع لشكل الداخلى للاتوبيس القديم كام لا فعلا بيخسرو منهم لله وحسبى ربى ونعم الوكيل  وربنا  يهديهم  الى الشكل النهائى للاتوبيس  كنبه على اليمين وكرسى على الشمال  ولا  كنبتين وخلاص



هى الهيئه ليه بقيت عنصريه
رغم اختلاف الوان الاتوبيسات الخدمه هيه هيه
بكره هسرح بعربيه فول واعمل لكل قدره لون
وهعمل سعر لكل لون
وهقول فول عادى وفول بالقوطة
وكله واحد و هى لعبه من  فكره مجنونة
دروس اتعلمنها من الحكومة
نهايتها غير معلومة

عملوا اتوبيسات حمرا
زى ما تيييييت هم حمرا




الأربعاء، 12 مايو، 2010

العياط منطقه حوادث القطارات

عندما يحدث حادث تصادم قطار غالبا يكون فى منطقه العياط لا اعلم لماذا بالرغم من ان كل مره بيكون لها سبب مره السواق شارب ومره جاموسه معديه ومره يتصادم مع عربه نقل ايه اللي بيحصل ودائما المسئولين ليس عليهم مسئوليه ودائما او بعد اغلب الحوادث القطارات التي تكون فى العياط نقرا فى الجرائد عن حوادث مشابهه فى جميع دول العالم وللاسف لم اتذكر هل حوادث القطارات فى كل دول العالم التي نسمع عنها بعد حوادث العياط هل هي ايضا لها مكان مخصص مثل العياط هل بتكون فى نفس المكان فى اعتقادي الشخصي لا ولكن ممكن ان يكون فى اعتقاد المسئولين اه ولذلك يقتدى المسئولين بهم وتكون اغلب الحوادث بالعياط اكيد ده التفسير الوحيد لكثرت حوادث العياط او ان المسئولين لم يسمعوا بهذه الحوادث لانهم غير مسئولين عن مسئولياتهم فلا يشغلون دماغهم بهذه الحوادث فالمسئولية فى القطار الذى تصادم مع الجاموسة كان السواق والكمسرى كما نشر فى الجرائد انهم ضمن المتهمين لكنى لم اعرف من هذه القضية ماهي وظيفة الكمسرى الاخرى غير قطع التذاكر الذى بسببها ذهب للمحكمة والحمد لله ان الركاب ماكنوش السبب المره ديه مثلا يكونوا ركبوا القطار غلط مثلا ولذلك حدثت الحادثة ولا اعرف من سيكون الغلطان فى اخر حادث تصادم القطار وعربه النقل الذى حدث قريبا هل سواق النقل ولا سواق القطار ولا الكمسرى ولا الجاموسة بتاعت الحادثة السابقة ولا جواميس جديده ولا مين وهل هي اخر الحوادث ام سيبقى قطار العياط يصطدم

اكتب وصيتك يا راكب القطار
ده قطار العمر هينتهى مع ركوب القطار
فى كل دول العالم يحصل حوادث قطارات استثنائيه
واحنا حوادثنا دوريه فى اماكن محدده مش حوادث عشوائيه
حياتنا كلها عشوائية فكانت وفاتنا دوريه

ومسئولين من غير مسئوليه حكايه هيستيريه
فى مكان محدد هنقتلك واهلك والناس ينهمروا عليك عياط
عيني عليكى يا عياط قرروا مصيرك وسموكى العياط

السبت، 1 مايو، 2010

حاجه غريبه فى هذا المجتمع

عندما كنت بدرس فى جامعه اسيوط و لما كنا نيجى نهزر انا واصحابي اللي كل واحد فيهم من محافظه شكل لاننا كلنا مغتربين وكلنا من محافظات مختلفه اكتشفت شيء غريب وهو ان كل محافظه لم تسلم من المحافظات الاخرى ولم يسلم اهلها من الوصف بالسوء فمثلا المحافظات الساحلية ماء مالح ووش كالح و اسيوط بلد اليهود او فى جمله اخرى لكل بلد يهود ويهود مصر اسيوط و بالنسبة لدمنهور فيقال مائه نورى ولا الدمنهوري و بالنسبة للمنوفية فكل حرف بصفه سيئة للاسف مش فاكرها دلوقتى وكل المحافظات على نفس الطريقة ولكنى لم اتذكر باقي الماقولات الان اكيد انتم عارفين الباقي وكنت فاكر ان محافظة القاهرة خرجت سليمه من هذه الماقولات ولكنى اكتشفت وانا فى الاسكندرية مره عندما كنت اشاهد شجار ان القاهرة لم تسلم هي الاخرى من هذه الماقولات مما جعلني اطرح سؤال هو فى ايه واحنا ليه كده الحمد لله ان بالرغم من هذا فالمجتمع كله متماسك ومتداخل فى بعضه و لا يظهر هذا الا فى حاله الشجار لاي سبب وكاننا نبحث عند اي مشاجره عن ما نختلف به عن الاخر ونجعل انفسنا احسن منه لهذا الاختلاف سواء كان الاختلاف ديني او عرقى او لون او حتى نادى بنشجعه او راى والغريب عندنا ان الخلاف يظهر الاختلاف وليس الخلاف نتيجة الاختلاف والاختلاف يودى الى جريمة لها ضحايا وكاننا لم نكتشف الاختلاف الا بعد الخلاف وفى كل شي نقول الاختلاف فى الراي لا يفسد للود قضيه ولكن التنفيذ الاختلاف فى الراي لا يفسد للخلاف قضيه وسؤال الموضوع متى تنتهى هذه النزعه عندنا



رغم الاختلاف عندنا ائتلاف
بس ليه ساعة الخلاف نبحث عن الاختلاف
ونضيع بسبب خلاف تافه الائتلاف
و يتنسى الموضوع الاصلي للخلاف
ويبقى الخلاف بسبب الاختلاف
ومع السلامة يا ائتلاف

Follow by Email

Tetris