الخميس، 29 أبريل، 2010

مشجعون وقتله

كنت بتصفح الجرائد فقرأت عن شغب بين جمهور النادي الاهلي و جمهور نادى الزمالك وحرق اتوبيس مشجعي الزمالك وتذكرت عندما اتفقت مع صاحبي محمد ابراهيم اننا نذهب نشجع الاهلي فى ماتش كره سله بينه وبين نادى الاتحاد ولحسن حظى اعتذرت قبل الميعاد و ما حضرتش الماتش لانى فى اليوم التالي شاهد فى التلفزيون خبر ان حدث شغب فى هذا الماتش وعندما اتصلت بمحمد قالي انا مش عارف انا خرجت حي ازاى كانوا بيرموا علينا طوب وبيخلعوا الكراسي وماكنش عارف الامن ازاى دخل الطوب وكان عندي سؤال فى نفسي هو راح يشجع ماتش سله فى الاستاد ام حرب على الحدود وتذكرت ايضا عندما كنت اشاهد برنامج البيت بيتك وكان المذيع الاستاد تامر بيتكلم عن ان فى واحد زملكاوى اتحرق من مشجعين اهلاويه فى احدى الماتشات ايه الحكاية هي كوره ولا حرب ولا ايه والغريب انهم كلهم وقفوا ينددوا بما حدث من المشاغبين الجزائريين الذين كانوا يشجعون بالمطاوي فى ماتش مصر والجزائر ولم يدركوا ان مافعله بعض الجزائريين بالمصريين فى ماتش مصر والجزائر بتاع السودان يفعله كل مشجعي النوادي فى بعض والدليل هذه الاحداث من حرق وضرب والسؤل الذى يحيرني دائما هم مشجعون ولا محاربون ومن المستفيد من هذا الشغب وهل ماتش كوره يعمل الحوادث ديه كلها طب ايه الحل والى اين نحن متجهون


انا رايح اشجع وشوفوا التشجيع
هات المطوه والسنجه والكبريت والطوب ادوات التشجيع
جهز الدبابات والطائرات الحربية عشان نبدا التشجيع
ديه حرب ولا ماتش كوره مسخره لو ديه ادوات التشجيع

الجمعة، 23 أبريل، 2010

على من يريدون اطلاق الرصاص

وانا اتصفح الانترنت قرأت ان صرح ثلاثه من نواب الشعب وقالوا عن متظاهرين يوم سته ابريل اطلقوا عليهم الرصاص ولا اعلم هل لم يدركوا ان المتظاهرين دول قد يكونوا هم الذين انتخبوهم ام انهم متاكدين ان الشعب لا ينتخب احد وهم يكسبون الانتخابات بطرق اخرى غير الانتخاب احتمال معلش اصل لا يوجد احتمال تاني فى وجهه نظري وانا لم افهم فى السياسة ولكن لا اعتقد ان واحد مثلى لايفهم فى السياسة قد يكون انتخب نائب ولا اعتقد ان الشباب الايجابي الذى حضر حفله الفنان محمد حماقى اللي فى الجامعة يوم سته ابريل الذى عملها رئيس الجامعة لمحاربة الاضراب قد انتخب احد نائب لانى اعرف ان حفلات الجامعة دائما يحضرها نوعين نوع بيحب الفنان وعايز يرقص ويغنى مع انغام الفنان ومافيش فى دماغه حاجه تانيه ونوع حاضر الحفله للزحمة وامكانية التحرش بالطالبات ولا اعتقد ان احد منهم راح انتخب حد ولذلك اعتقد ان الذين تظاهروا يوم سته ابريل هم من ينتخبون نائب عنهم لانهم هما اللي شاغلين دماغهم بالسياسة والقوانين والكلام ده فاذا لم يكونوا هم من انتخبهم طب مين سؤال يطرح نفسه ولذلك توقعت ان المتظاهرين هم الذين انتخبوهم ولكن اعتقد ان النواب الثالثة لم يفهموا هذا او يفهمون انهم نجحوا فى الانتخابات بطرق اخرى لا اعلمها احتمال او يعتقدون ان المتظاهرون انتخبوا المنافسين لهم ولكن قدر الله ان يكسبوا هم الانتخابات احتمال ولذلك لم يقولوا نتناقش معهم لا على طول قالوا اطلقوا النار عليهم فهم خطر على المجتمع اي مجتمع يقصدون لا افهم اليس هؤلاء من المجتمع نفسه هل خربوا شيء يوم المظاهرة هل كان فى المظاهرة شغب ان كان حدث شغب فيوجد قانون يحاكم المشاغبين ولكن هل النواب الثلاثة يريدون ان يتم تنفيذ الحكم قبل المحاكمة باطلاق النار عليهم وطبعا من يطلق النار هيطلق عشوائي وبالتاكيد هيصيب افراد اخرون ولا اعرف لماذا يطلقون التصريحات دون وعى ودون تفكير ولا اعلم لماذا شعرت ان النواب الثلاثة بعد تصريحاتهم انهم خطر على المجتمع ومن المفروض محاكمتهم


عجبي على النائب لم يريد قتل من انتخبه
طب يقول ايه الى رشحوا يا خبتي ولا يا خيبته

الخميس، 22 أبريل، 2010

احنا فى بلد متقدمه ولا بلد ناميه حد يعرفنى

دائما عندما يتحدث مسئول لا اعرف منه ان كنا دوله متقدمه ولا دوله ناميه فمثلا وزير المالية وهو يتحدث عن الضرائب العقارية فى برنامج البيت بيتك اتصل احد المشاهدين من المانيا فسئله الوزير مش فى المانيا ضرائب عقاريه وفرح الوزير جدا عندما رد المتصل وقال فعلا فى ضرائب عقاريه وبدا وزير المالية يتكلم ان كل الدول المتقدمة بها ضرائب عقاريه وعندما سئله المذيع الاستاذ محمود سعد عن اين تذهب هذه الضرائب بعد تحصيلها وقال له احنا مش زي غيرنا وقارن بين ما يحدث عندنا وما تفعله الدول المتقدمة على طول بدا الوزير يتكلم اننا فى دوله ناميه الغريب من كلمتين كنا بنعمل زي الدول المتقدمة حاجه جميلة جدا عندما تصبح الدولة تفكر بجمع ايرادات مثل الدول المتقدمة وتصرفها بطريقه الدول النامية ولا اعرف لماذا تذكرت مسرحيه تخاريف للفنان محمد صبحى فى المشهد الذى يقول فيه للفنانة هناء الشوربجى بانه سينفذ نظام الاشتراكية بان المجتمع يشتغل عند الحكومة والحكومة هي اللي تلم الايرادات فردت الفنانة هناء الشوربجى وماذا بعد كده فرد عليها الفنان محمد صبحى انا ناوى اطبق لحد هنا وبس مش مهم الباقي . والغريب ان الحكومة تكرر المشهد نفسه تجمع ايرادات مثل الدول المتقدمة لتكون الحجة ان هذا بيحصل فى كل الدول المتقدمة وعندما نطالبها بنتائج مثل نتائج الدول المتقدمة تقول احنا فى دوله ناميه وهو كله تخاريف على اسم المسرحية و ياريت لو حد فهم من كلام مسئول احنا فى دوله متقدمه ولا دوله ناميه يبقى يفهمني

ممكن استلف منك كل الناس بتستلف
اوعى تفتكر انى هرجعلك حاجه عندي كله تلف
ماقدرش على الرد
انا مش زي اللي بيرد

صنعنا غطاء ديني واخلاقي للتحرش

دائما عندما تسئل احد لماذا تعاكس البنات فى الشارع او لماذا تتحرش بهم يكون الرد انت مش شايف هما لبسين ايه هي نظريه مادام الذى امامي فاسد اذا اكون انا كمان فاسد واذا سالني احد عن فسادى اتعلل بفساد الاخرين فى زمن احب اهله الفساد ولكن ما يجعلنى اضحك عندما ارى انه بدا يجعل الموضوع ديني واخلاقي ويقول يعنى اللبس اللى البنات بتلبسه ده حلال ويبدا يحلل لنفسه المعاكسة والتحرش وكأن دينه لا يقول له اهدى بالموعظة الحسنه بل يقول له اهدى بالتحرش والمعاكسة ولا اعلم لماذا بعض الشباب عندما اقعد معهم اعتقد ان الدين الذين يدينون به دين للنساء فقط وكأن الدين ليس للرجال فالدين قال للست احتشمى وتحجبي ولن يقول للرجل ان يغض بصره حاجه جميله جدا ياخذون من الدين ما ينفع شهواتهم وامزجتهم ويستخدمون الدين والاخلاق ليكون غطاء لما يفعلون ويتكلمون عن الاخلاق التي يجب ان تتحلى بها النساء ولا يتكلمون عن الاخلاق التي يجب ان يتحلى بها انفسهم وكانهم يريدون ان يكونوا اخر من ينصلح اخلاقهم ولا اعرف لماذا يريد كل شخص ان يصلح حال غيره اولا ولا اعلم لماذا فكرت بهذا الموضوع واريد اصلاح الشباب قبل اصلاح نفسى قبل ماتقولها اقولها انا يعنى انا ملاك بالطبع لا المهم تذكرت و انا اشاهد احد البرامج وكان يتحدث عن تحرشات وسط البلد التي حدثت فى العيد وكالعاده لان المسئولين لا يعرفون شيئا ولا يريدون ان يعرفوا كانوا مندهشين ومتاكدين ان هذا الكلام لم يحدث فكيف تجمع هذا العدد من المتحرشين بدون سابق معرفة او تنسيق وتوقعت انا كيف حدث هذا لانى رايت موقف زي الموقف ده قبل كده عندما كنت ماشى ان واحد اصدقائي فى شارع شبرا وكانت البداية من منطقه مسره فراينا ثلاثه فتيات لا انكر ان ملابسهم تشد الانتباه و مستفزه ولا انكر ان لبسهم غلط ولكن مايحدث من الشباب ايضا غلط المهم بدا مجموعه من الشباب فى معاكستهم والمشي وراهم وعند منطقه روض الفرج انضم اليهم مجموعه من الشباب لا يعرفونهم ولكن كيف بدات مشاركه الشباب الجدد للشباب المعاكس الاول بابتسام كلا منهم للاخر وفى كل منطقه ينضم شباب جديد بابتسامه ايضا حتى دخلوا البنات فى شارع منيه السيرج بالخلفاوى ولان الشارع لا يسمح لكل هذا العدد فتفرق جموع الشباب وربنا ستر وطبعا جموع الشباب حجتهم ما يلبس البنات قال يعنى لو كانوا البنات لبسين عدل ماكنش هتحدث هذه المظاهرة مما جعلني تذكرت احد الاشخاص الذى شاهده فى القهوه يعاكس اللى رايحه واللي جايه واندهشت انا واصحابي عندما سمعنا يقول معاكسا واحده لبسه اسدال يا اسدلاتك طب ده حجته ايه انها خرجت من بيتها


الاصلاح الجديد بالتحرشات
عندك اخلاق ومقضيها معاكسات
يا سلام بتضحك عليا ولاعلى نفسك
اعرف نفسك واضحك عليا بس ياريت ماتضحكش على نفسك

اين ذهبت هذه الاموال

اكتشف احد الاشخاص بعد ما عمل تجارب على نفسه اولا ثم على بعض من الذين يعرفهم ان الانسان كائن قذر لانه عندما يضيء النور يقوم باعمال تزيد من القمامة من وجهه نظره ولذلك قرر ان يقوم بتحصيل فلوس الزبالة نسبه من فاتوره الكهرباء ليه طبقا لتجاربه على نفسه وجاء احد الاشخاص المحترمين ورفع قضيه على الحكومة لاثبات عدم قانونيه هذا التصرف وهو بصراحه هو تصرف مش بس غير قانوني وغير عقلاني خارج من كائن غير عاقل وبالرغم ان الذى رفع القضية كسبها الا ان الحكومة الغير ناضجه اصرت ان فلوس الزبالة تحصل على وصل الكهرباء ولكن ليس نسبه من الفاتورة ولكن قيمه محدده لكل منطقه ولا افهم ما علاقه الكهرباء بالزبالة بالرغم من ان بعض مناطق يصلها الكهرباء و لا يمر عليها احد ليجمع الزبالة بس الحكومة شايفة ان بين الكهرباء والزبالة علاقه ايه هي الله اعلم ولكن السؤال عندما قررت الحكومة اخذ نسبه من فاتوره الكهرباء مقابل جمع الزبالة اكيد جمعت مبالغ كثير من وراء هذا الموضوع راحت فين ؟؟؟ ياترى راحت لتطوير الكهرباء اشك طب لتطوير الزبالة ازاى طب رجعت اللي جمعته من الشعب بالطريقة الغير قانونيه ديه مين ده هنضحك على بعض طب عملوا بيها ايه اللي عارف يعرفني

اول مره اعرف ان فى علاقه بين الكهرباء والزبالة يا حكومة
نظريه ما تطلعش الا من عندك يا حكومة

الأربعاء، 21 أبريل، 2010

منطقه الرسوم

كنت مسافر انا واخويا الى الاسكندرية وكان اخويا واخد الطريق الصحراوي وكان نفسي اعرف اخويا كان شايف الطريق ازاى حيث ان اغلب الطريق ضلمه ولكن مشكورين المسئولين فلا يمكن ان تسير اكثر من 10 او 20 كيلو الا وتظهر لمبة او اثنين ولكن فجاه ظهرت حته منوره حلو فاستغربت ولكن سرعان ما عرفت لماذا هذه المنطقة منوره لانها منطقه دفع الرسوم ولذلك يجب ان تكون منوره وتشعرك انك دخلت محافظه من المحافظات اما باقي الطريق ما الفائدة ان يكون منور ولكن السؤال لماذا ندفع هذه الرسوم هل هي لتنوير منطقه دفعها وفقط ام ماذا وباقي الطريق ليس فى الحسبان ده كلام ناس عاقله هل ندفع الرسوم لاصلاح منطقه الرسوم ام لاصلاح الطريق واحنا راجعين رجعنا من الطريق الزراعي الذى كان ايضا ضلمه ولكن لان كل ما تدخل بلد بتكون منوره مدخلها فيعتبر افضل شويه بس بردوه واين باقي الطريق والغريب ان دائما الحكومة تندهش من حوادث الطرق وخاصه الطريق الصحراوي ممكن حد يقولى وانت بتسافر بالليل ليه متسافر الصبح نظريه بردوه المهم نرجع للسؤال لماذا ندفع الرسوم هل لتطوير الطريق ام لتطوير منطقه الرسوم واللي فاهم يفهمني

وانت مسافر خد معاك شمعه
زمان قالوا بدل ان تلعن الحكومة اشعل شمعه
الحكمة مش تلعن الحكومة تلعن الظلام
بس ده التجديد بعد لما جعلوا حياتنا ظلام

الثلاثاء، 20 أبريل، 2010

من اشتغاله الكمسرى الى اشتغاله الهيئة و الوزارة كلها

كنت راكب احد الاتوبيسات وبعد لما اصبح لا يوجد مكان للتنفس ولا للخروج منه حيث ان الناس واقفه على السلالم ومن الناس لم يتمكن من الوقوف على السلالم ولكن تمكن من الامساك باحد الاشخاص الواقفين على السلالم ولا اعرف كيف تعلم الماسك والممسوك هذه المهارات وفجاه اسمع الكمسرى يقول يا جماعه ادخلوا فى مكان لسه جوه فاندهشت وقلت ممكن يكون شاف كتف واحد فاضى مثلا او كان فى واحد قصير القامه فشاف فراغ فى احدى الاماكن احتمال ولا اعرف على اي اساس بيقول ان فى لسه مكان فاضى بس افتكرت وانا بضحك على اشتغاله الكمسرى احد التصريحات التى تقول ان الهيئة المسئولة بتخسر وقلت ازاى يمكن الله اعلم و توقعت كالعاده ان يتم تحليل الموقف من الذين يشتغلوننا ويشتغلون انفسهم شوف التذكرة اللي بتدفعها كام ويجعلونني اشعر انى راكب تاكسي بثمن التذكرة وليس راكب اتوبيس ماركه ركب اربعه على كتفك و استحمل والاتوبيسات عايزه اصلاحات اصلا حاجه تفرس طب فلوس التذاكر بتروح فين مرتبات الموظفين اللي فى الهيئة لابردوه هيتبقى مبالغ كتير اصلاحات فى الاتوبيسات مابنشوفش حاجه اللي شايفينه اتوبيسات عايزه تتصلح حد ممكن يقولى الزحمة الى كنت فيها مش فى كل الخطوط ديه خطوط وخطوط لا بردوه الخطوط المزدحمة اللي انا بركبها تخطى خطوط العالم كله ونرجع نقول الهيئة بتخسر ازاى حد يفهمني بس يكون بيركب اتوبيسات ماركه ركب اربعه على كتفك واستحمل نفسي افهم اللي فاهم يفهمني


ادخلوا لسه فى مكان جوه
فى كتف واحد فاضى جوه
والهيئة بتخسر ازاى يا عالم حد يفهمني
نفسي اللي فاهم يفهمني

الاثنين، 19 أبريل، 2010

سؤال فى المترو ادهشني

كنت راكب المترو اتجاه المرج وعندما وقف المترو فى احدى المحطات سالني احد الاشخاص هو المترو رايح المرج ولا المرج الجديدة فاندهشت من السؤال لان الخط واحد فرد احد الافراد وقال المرج بس فاندهشت اكثر وافتكرت ان الاول قد يكون يمزح وان الثاني قال مزحه بمزحه ورد اي كلام ولكنى اكتشفت انى انا الذى اجهل الذى يحدث فى المترو فبالرغم ان الخط واحد وان محطه المرج الجديدة هي المحطة التالية لمحطه المرج انما بعض قطارات المترو تجرج بعد محطه المرج فى الجراج القديم والباقي يكمل ويصل الى المحطة المنسية محطه المرج الجديدة ويجرج فى الجراج الجديد طب ايه ده يعنى لو ان محطه المرج الجديدة غير مهمه طب لماذا عملوها من الاساس وان كانت مهمه طب لماذا بعض القطارات فى اتجاه المرج لا تصل اليها هل بعض القطارات بتتعب بدري بتيجى عند هذه المحطة وتهنج ولا ايه نفسي افهم و ايه الاستفادة من جراج قديم وجراج جديد اللي انا اعرفه ان لما يكون الخط نهايته المرج ونضيف محطه المرج الجديدة ونعمل جراج جديد تلقائي الجراج القديم يتم الغاءه وجميع القطارات تكمل الى اخر الخط انما اللي حاصل ده لا يفهم ونفسي اعرف السبب هل القطارات التي تنهى الخط عند المرج تنكه مثلا على راسها ريشه ولا بتنسي ان لسه فى محطه ولا المحطة الزائدة قسمت الخط الى خطين خط المرج وخط المرج الجديدة والسبب محطه ولا ايه حد فاهم حاجه اللي فاهم يفهمني


احنا القطارات التنكه
ما نروحش المرج الجديدة تناكه
اللي يترك قديمه يضل
واحنا على قديمنا وعايشين فى الظل

انا مش فاهم ايه الحكاية
اللي فاهم ياريت يفهمنى و يقولى ايه الحكاية

الأحد، 18 أبريل، 2010

هيبة المدرس مش بالضرب ولا بمنع الدروس الخصوصية

قالى احد الناس انني متحامل على المدرسين وان ليهم عذرهم لان الطلاب غير محترمين ومن بيئات واطيه وحاجه زباله خالص فقلت له يعنى نقتلهم ونخلص ولا ايه ولو كان الطلاب محترمين وملتزمين ومتعلمين فما الداعي لوجود المدرسين اصلا فقالى يعنى انت عجبك ان الطلاب تضرب المدرسين والحاجات اللي بتحصل ديه فسالته وما سبب ذلك فى وجهه نظرك فقال الدروس الخصوصية التي تجعل الطالب يشعر بانه هو اللي بيرزق المدرس لانه هو الذى بيدفعله عشان يعيش وشعرت من الرد ان الذى اتكلم معه حافظ مش فاهم لان الكلام ده اللي اخترعه المدرسين اصلا لزيادة مرتباتهم وليكون حجه لانعدام ضمائرهم لانه لو كانت الطلاب تحترم العلم والمدرس محترم لكانوا احترموا المدرس الذى ياتى ليعطيهم درس خصوصي ورجعت الى ذكرياتي وقلت له انا لما كنت طالب اتذكر مدرس الكيمياء بتاع الفصل كان اشهر من يعطون دروس خصوصيه ومن المدرسين الذين يتم حجزهم عشان تلاقى مكان ومع ذلك عندما يدخل الفصل اذا رمى ربع ابره كانت ترن وعمره ما دخل بعصايه ولا قال لفظ قليل الادب كان فى غايه الاحترام وبعد ان تنتهى حصته وبالرغم من ان الطلاب لم يتغيروا عندما يدخل المدرس اللي بعده كان اذا رمى بمب وصواريخ لم يسمعها احد وكان هذا المدرس يدخل كل مره بعصايه شكل ولا يوجد فائده تفتكر ايه الفرق بين مدرس الكيمياء المحترم والمدرس الذى يليه اللي مش فاكر كان بيدرسلنا ايه فقالي انتم طلاب بحالات فضحكت وقلت المدرس المحترم يعرف كيف يجعل الطلاب تحترمه بالرغم انه يعطيهم دروس خصوصيه والمدرس غير المحترم لا يحترمه الطلاب مهما اتى بعصيان وهيبه المدرس هو الوحيد القادر على ارجاعها

الاحترام مش بالضرب ولا بالعصا
مين اللي احترم البلطجى حتى لو بمليون عصا
ومين اللي قال ان الطالب لا يحترم المدرس اللي بياخد عنده درس
لانه بيدفعله فلوس ثمن الدرس
هو بيدفعها صدقه
ولا معدومي الضمير واخدها حجه

الجمعة، 16 أبريل، 2010

هل القتل والعنف اصبح وسيله للتربية والتعليم ؟

كنت اشاهد برنامج تلفزيوني وكان يتحدث عن مجرم ولن اقول مدرس قتل طالب لماذا طبعا الرد كان من بعض المساطيل بيعلمه ياسلام ونعمه التربية ولا اعلم لماذا لم يتم تربيه هذا المدرس على نفس الطريقة وكنا خلصنا منه من قبل ما يبقى مجرما ولن اقول مدرسا لانها ليست هذه طريقه مدرسين بل طريقه مختلون نفسيا وعقليا وبعد فتره من الزمن ليست كثيره شاهد نفس البرنامج يتحدث عن مختل عقليا ولن اقول مدرس ضرب طالب ووضع راس الطالب تحت قدميه وتذكرت حينما كنت طالبا فى الثانوية عندما اراد احد المدرسين ان يجرح وجه زميلنا محمد رفعت بالمفتاح لولا ان فصل زمايلنا المدرس عن الطالب وتذكرت السبب الذى جعل هذا المدرس المختل يقوم بهذا الفعل الموضوع يرجع الى ان زميلنا محمد رفعت كان زعلان من صديقه وزميلنا فى الفصل هيثم فقرر ان يضايق هيثم فاخبر مدرس الدور بان هيثم معه علبة سجاير وعلم هيثم بما حدث فاعطى علبه السجاير الى مدرس الفصل حتى لا ياخذها منه مدرس الدور وبعد كده ياخذها تانى ولكن اخبر محمد مدرس الدور ان العلبة مع مدرس الفصل واخذ مدرس الدور العلبة من مدرس الفصل وبعد ما خرج مدرس الدور طلع مدرس الفصل سلسله مفاتيحه واتجه ناحيه زميلنا محمد ليتشاجر معه بالمفتاح لولا ان ابعد زمايلنا المدرس لكان حدثت جريمة ولكن تخيلوا معى كيف تحول الفصل الى شارع بل غرزه ولا اعلم كيف اصبح هذا المدرس حاليا احتمال يكون بقى بياخد مطوه معاه وهو رايح يدرس عشان لو غضب من طالب يفتح بطنه خايف فى يوم اتصفح الجرائد اشوف خبر مصرع مجموعه من الطلاب على ايدي المدرسين حاجه مسخره


خايف يتغير اسم وزاره التربية والتعليم
الى وزاره المجانين والجرائم
طلاب ذهبوا الى المدرسة
وصلوا الى المقبرة
قالوا عنهم مشاغبين بايظين
بس من امتي كان القتل عقاب للمشاغبين البايظين

الخميس، 15 أبريل، 2010

اشتغاله صاحب الشغل

اشتغلت فى انترنت كافيه وفى اول يوم شغل كان على صاحب العمل ان يبدا باشتغالي حتى يوفر فى النفقات وكنت اعلم انه سيفعل هذا فمعظم اصحابي واقاربي الذين اشتغلوا سمعت منهم اشتغالة صاحب العمل الخسيس الذى يوفر بها النفقات وهى لا تختلف عن الاشتغالات التي كانت ايام الدراسة التي كان يقوم بها المدرسين لاقناعنا بتزين الفصل وتبيضوه احيانا المهم دخل صاحب العمل وبداء يقول انت عارف ان طبعا مكان العمل ده زي بيتك وطبعا انت لايمكن تسيب بيتك غير نظيف بمعنى انك تنظف الاجهزة وممكن تكنس المكان والحاجات البسيطة ديه ولا اعلم لماذا سكت وخده على قد عقله ولماذا لم اقل له انا لو عايز انظف بيتي بجيب واحد ينظفه او اسئله لو ليا نسبه من الارباح مثلا ولا اعرف لماذا اصحاب العمل يحبون توفير تشغيل عامل نظافه هل لانهم تعودوا على عدم النظافة ام يعتقدون ان المفروض من يشتغل عندهم يعمل كل حاجه يعنى يشتغل وظيفته وبجوارها عامل نظافه هل ده كلام عاقلين ولا كلام مساطيل وياريت المرتب كبير بلاش نتكلم بلاوكسه


لا يا باشا بلاش اشتغاله
انا مش شغال عندك عامل نظافه
انا انسان مش بروحين
عايزنى بروحين ادينى مرتبين

الأربعاء، 14 أبريل، 2010

اشتغاله اعلانات الوظائف

كنت انا و اصحابي واحنا بنتمشى فى الشارع وزع احد الاشخاص علينا ورقه بها اعلان عن شركه مضمونه انهم يطلبون جميع التخصصات حديثي التخرج وانهم عايزين محاسبين حديثي التخرج فقررت انا وكريم ان نذهب الى هذه الشركة الموجودة فى شارع مصر والسودان نجرب حظنا وذهبنا الى الشركة وظهرت بوادر الاستهبال عندما اعطونا ورقه الابلكيشن وطلبوا مننا ان ندفع ثلاثه جنيهات ثمنها فنظر كريم ليا ونظرت اليه وضحكنا وكاننا نقول لبعض ندفع على اساس ايه ياما عملنا مقابلات ولم ندفع شيء ايه الاشتغاله ديه فقالت السكرتيرة اننا ممكن ما ندفعش دلوقتى وندفع بعدين فقلت لها ايوه كده نشوف منكم وبعدين ندفعلكم وملائنا الابلكيشن لتدخلنا السكرتيرة لواحده تانيه لتوضح لنا الاشتغاله الكبرى فتقول انهم هيقوموا بتدريبنا ومن الكلام نفهم انهم لا يريدون الا ان نشتغل عندهم مندوبين مبيعات طب ما تقولوا فى الاعلان مطلوب مندوبين مبيعات لازم الاشتغاله ديه واللي عايز يشتغل مندوب مبيعات يتقدم واللي مش عايز خلاص انما بتضحكوا علينا تقولوا عايزين جميع التخصصات ايه هو اي تدبيسه وخلاص بتسترزقوا على حسابنا وثلاثه جنيه ابلكيشن عشان مندوب مبيعات اللي هو اكتر واحد بيشتغل ومايكسبش على اد ما اشتغل والناس تعاملوا على انه شحات كمان وبطريقه بايخة ايه الاشتغالات ديه وتصدق لما نظرنا للاعلان مره تانيه وجدنا فيه اشياء متناقضه كثيره كمان يعنى حاجه زى الفل يعنى زي يشترط التفرغ وبعد كده يقول جمله بمعنى ان فى مكان للطلاب حاجه اخر تهييس طب ازاى

حتى فى اعلانات الوظائف اشتغالات
طالبين مندوبين ويقولك محاسبين وكله اشتغالات
هو كل يوم اشتغالات
اشتغالات اشتغالات كرهت الاشتغالات

الثلاثاء، 13 أبريل، 2010

فيش ثلاثي بالطعمية و كتر السلطة

كنت انا وكريم وابو بكر ومحمد بنتكلم على اجراءات التجنيد التي نقوم بيها وتحدثت انا على شيخ الحارة الذى كتبت عنه سابقا واندهش كريم وقال ان اللي مضى على الفيش الثلاثي هو العسكري نفسه واضاف انه لا يعرف شيء عن شخاخ الحارة عفوا قصدي شيخ الحارة فقلت له شكل قسم الدقي فايق عن قسم الساحل وقادر يستوعب ان ما فيش حاليا شيخ حاره فرد عليا وقال بس اللي فرسني ان العسكري ابن التييت (شتيمه) قالي هات جنيه افتكرتها رسوم ولكن لقيته بعد ما دفعتله اعطى الجنيه لزميله وقاله هاتلى بجنيه طعميه طب مش يستنى لما امشى ابن التييت (شتيمه ) فضحكنا على مهزلة الفيش الثلاثي اللي بالطعمية وبصراحه انا كنت فاكر ان ممكن اي حاجه فى الدولة يبقى عليها رسوم او طابع دمغه بس اول مره اعرف ان الدمغة بقيت طعميه يالا ما الحكاية بقيت سلطه

هي الدمغة فول ولا طعميه
اي حاجه عادى بس كتر السلطة
اهو ده التجديد من غير كوسه كله سلطه
والدمغة طعميه وكتر السلطة
فيش ثلاثي بالطعمية اكيد ده تهييس
اجراءات عقيمه وحركات مساطيل و ياهو ده كله تهييس

الأحد، 11 أبريل، 2010

وعرفت مين شيخ الحارة

كنت بخلص اوراق الجيش وكان من الاجراءات عمل فيش ثلاثي وكان عليا ان ابصم واروح لشيخ الحارة يمضى وبعد كده اختم وهذه هي الخطوات التي قالها ليا المجند الموجود فى مكتب التجنيد ورحت اعمل الفيش وعرفت هناك من هو شيخ الحارة حيث انني لم اتعرف عليه قبل ذلك وقد استغربت عندما قال لي المجند ان لازم شيخ الحارة يمضى بالرغم انني لم اسكن فى حاره ولكن اخيرا تعرفت عليه فهو شخص صايع كل وظيفته انه يمضى فقط والله بيتعب والامضاء مش مجانا لازم تدفعله اي مبلغ لانه انسان صايع ومتسول ولكن مترخص من الحكومة معه ترخيص الاستهبال على الشعب من الحكومة وكان معى هذا الموقف ذهبت الى القسم وبصمت وانتظرت حتى ياتى المحروس واتى المحروس ولانه لم يراني قد طلعت له مالا سالني معاك وصل النور فادخلت يدى فى جيبي وطلعت جنيه ونصف وسالته هو لازم وصل النور قالي وهو يمضى مش عارف لازم نرجعكوا يعنى ومضى وكنت اضحك من داخلي على الاستهبال الذى اشاهده وكنت ممكن احرق دمه وارجع الفلوس فى جيبي بعد ما مضى ولكنى كنت لسه حارق دم من كان يبصمني عندما قال لي مساء الخير بعد ان بصمني وعملت عبيط و ساذج وقلت له مساء النور وكانى لم افهم انى بيشحت باسلوب شيك وحكومي فقلت كفاية حرق دم واحد بس او بمعنى اصح خوفت ليحرق دمى باي طريقه اخرى الله يحرق دمهم كلهم قولوا يارب والسؤال العيب فى من الاجراءات التي تقول ان يمضى شخاخين الحارة عفوا قصدي شيوخ الحارة معلش ضعيف فى العربي ونحن لا نعلم على اي اساس بيمضوا اصلا ومين دول العاطلين المرتزقة وكنت اعرف ان شيخ الحارة ده كان زمان واحد عارف مين اللي فى الحارة او اللي فى المنطقة واحد واحد وممكن كان له معنى انما الان وقد انتهى الكلام ده نهائيا فى اغلب البلاد من زمان فلماذا تبقى هذه الاجراءات العقيمة ومن الذى يختار شخاخ الحارة عفوا قصدي شيخ الحارة الحالي وعلى اي اساس ولا فى هذا الصايع الذى عينوه شيخ حاره اعرف ان اي حد لو قال له اى حد تعالى اشتغل وكل اللي عليك تمضى وتنح على الشعب بمعنى اصح اتلكك على اي حاجه حتى تصنع مشكله لكي يرشوك وخد منهم اللي فى النصيب هيوافق حد يكره بلطجة وسفالة رسمي

مش عارف اقول ايه مين ده
المحروس بيتعب كل شويه يمضى ايه ده
بلطجي فى زي واحد محترم وكله رسمي
يا حكومة دوري فى الفلكلور ليا على مهنه انط بيها على البيوت ويبقى حاجه رسمي

السينما ولا المجتمع من يفسد من


سؤال فرض نفسه عليا عندما كنت اشاهد التلفزيون ورايت متحدثا يتكلم عن ان السينما كانت سبب فى الانحلال واهدار القيم وكلام كبير كده وراجعت تاريخ السينما مع الناس على حد معرفتي بيه فبدات السينما صامته وكان الناس يتكلمون وفى مشاجراتهم يشتمون باسماء الحيوانات وعندما بدات السينما الناطقة كانت فى المشاجرات الفنانون يشتمون باسماء الحيوانات بالرغم ان الامر كان قد تطور فى المجتمع وبداء وضع كلمه ابن قبل الشتيمة بالحيوان ومع الوقت بداء الفنان يسبق كلمه ابن قبل الشتيمة بالرغم من ان المجتمع قد عدى هذه المرحلة بكثير و كلما كانت السينما تحاول ان تحاكى المجتمع كان هو دائما يسبقها نرجع للموضوع يعنى فساد المجتمع افسد السينما ام السينما افسدت المجتمع سؤال صعب لان كلاهما افسد الاخر لانها دائره لا تنتهى لان السينما حاولت مناقشه الحالات الفاسدة الموجودة فى المجتمع بطرحها فى الافلام فاحب بعض الشباب الذين يفقدون القدوة الحسنة ابطال قصص هذه الافلام وارادوا ان يقلدوهم فابدع الجيل الجديد فسادا جديدا فناقشته السينما فعجب الجيل الصاعد بابطال هذه الافلام فقلدوهم فابدعوا والخ فاصبحنا فى دائره لا نهاية لها طب ايه الحل هل تتوقف السينما عن طرح الحالات الفاسدة لا اعتقد ان هذا حل لان الحالات الفاسدة الموجودة لن تتوقف بوقوف السينما طب نوقف الفساد فى المجتمع لا اعتقد ان هذا حل لانه امر مستحيل طب ماذا هل نحاول الاصلاح فى انفسنا لنكون القدوة التي توقف الاجيال القادمة عن ان تكون قدوتهم هذه الاشكال المعروضة فى السينما لانه لو وجد قدوه حسنه لن يجرى وراء هذه القدوة السيئة اكيد صح اذا علينا ان نبداء بانفسنا اولا وربنا يهدينا ويهدى الجميع

مين افسد مين
والسينما جابت من مين
والمجتمع ليه حب المفسدين
ومين ضيع الاخلاق مين
مين اثر فيا فيلم اخره ساعتين
ولا مجتمع عشت معه سنين
من افسد مين
مين غيرني تأثري بالسينما ولا المجتمع ولا مين

الثلاثاء، 6 أبريل، 2010

وطني ولكن لا احب كرة القدم

كان هناك مناقشه بين اصحابي حول احدى ماتشات منتخب مصر وادخلني احدهم بسؤال ايه رايك فى الماتش وقلت له انني لم اتفرج على الماتش فاستغرب وسالني ايه هو انت مش وطني ولا ايه فقلت مازحا تعيش كره القدم حره مستقله يا سيدى وطني بس ماليش فى الكورة فقال لي ديه مصر اللي بتلعب فقلت طيب يا سيدى و سالت صاحبى هو احنا كام مره اخدنا يطوله الامم فى كره السلة فقال لي لا اعرف فسالته طب المصارعة طب الاسكواش طب اليد طب التنس طب السباحة فقال لا اعرف فسالت هي فى الالعاب ديه مصر ماكنتش بتلعب قالي انا مش متابع فقلت له انت مش وطني ولا ايه فرد عليا بسؤال انت تعرف فقلت له لا فقال لي طب بتكلم ليه فقلت له اصلى مش وطني العاب رياضيه بس كويس انك وطني كره قدم بس على فكره الوطنية مش بس تشجيع كوره قدم الوطنية حاجات تانيه كتير وقلت لنفسي احنا فى جمهوريه مصر العربية ولا جمهوريه كره قدم العربية وصحيح اننا حلو اننا نفرح ببلادنا ومنتخبنا ولكن مش جميل اننا نختصر مصر فى كره قدم

بحبك يا بلدى وما بحبش كره القدم
مش بشجعك فى ماتش وبعده اديكى بالقدم
حبك مش مجرد ماتش ويعدى
حبك فى دمى لحد ما عمري ما يعدى

الاثنين، 5 أبريل، 2010

استرجل واقرا الموضوع

قد يعتقد من يقرا العنوان ان الموضوع تافه او موضوع اباحي حيث ان العنوان يلعب على المراهقين او معدومي الثقة بانفسهم ولكنى كنت اقلد بعض الاعلانات التي نشاهدها كل يوم فى التلفزيون وعبر الفضائيات اعلانات استرجل واشرب واسترجل وقرمش وعشان تكون راجل مش مان يا سلام ظاهره غريبه كانت زمان الاعلانات تتكلم على مميزات السلعة وتضحك على المشاهد فى المبالغة فى مميزات السلعة يعنى تقولك بزهره معرفش ايه بطعم معرفش ايه حجم اكبر بنفس السعر وتلاقى طبعا سعر اكتر بنفس الحجم مش مشكله الاشكال ديه انما حاليا استرجل واشرب او قرمش او عشان تكون راجل مش مان او انا كده استيل ايه اللي حصل هل هذه السلع بدون مميزات ولذلك بداء الاستهبال والاعتماد على هذه الاشكال من الاعلانات المستفزه اكيد لو كانت السلع بها مميزات كانوا اعلنوا عنها والسؤال هل اصحاب هذه السلع عندما فكروا باعلانات من هذه النوعية كان باعتقادهم انهم سيكتفون بالربح من المراهقين ومعدومي الثقة ام انهم كانوا يعتقدون ان الناس كلها من هذه النوعيات بمعنى اصح لا يحترمون الناس طب هل الحل مقاطعه السلع التي يتم الاعلان عنها بهذا الشكل حتى يحترمون الناس ويصنعون اعلانات محترمه تحترم الناس اتمنى ان الناس تقوم بمقاطعه هذه السلع لحد ما يصنعوا اعلانات محترمه تحترم الناس مش اي تهييس و خلاص وقد اكون وقعت فى نفس الخطاء الذى فعلوه عندما وضعت العنوان استرجل واقرا الموضوع واعتذر عن هذا الخطاء

انا مش محتاج اشرب وقرمش عشان استرجل
انا راجل واعلاناتك ادوس عليها بالرجل

طريقتك فى الاعلان طريقه ناس مساطيل
واعلانك اعلان فاشل




الأحد، 4 أبريل، 2010

نظريه نصف الكوب الفارغ

دائما عندما ينتقد احد عيوب شيء من الاشياء يتهم بانه ينظر الى نصف الكوب الفارغ ولذلك فعلى الانسان ان يقول دائما المزايا حتى يكون ينظر الى نصف الكوب المليان واتهمني البعض عندما انتقد بعض الاشياء انني انظر الى نصف الكوب الفارغ ولكنى قلت لهم انني انظر الى نصف الكوب المليان وليس نصف الكوب الفارغ ونقدى نتيجة لصدمتي عندما نظرت فى نصف الكوب المليان لانني رايت به شوائب كثيره فاذا تحدثت عن اي مجال ارى شوائب الجزء المليان كثيره اتمنى ان تنخفض نسبه الشوائب بنسبه كبيره فمثلا نسبه المتعلمين كثيره جدا شي جميل ولكن تنقسم بين معقدين نفسيا وجهلاء ومتعلمين واخيرا بعد الجرائم التي يقوم بها المدرسين اموات ايضا وكنت اتمنى ان يكون كلهم متعلمون احياء وعقلاء وايضا فى الاقتصاد وكما درسنا فى الجامعة وانا لم افهما ان من اهم نتائج الاصلاح الاقتصادي فى السنوات الاخيرة زيادة البطالة ازاى ده اللي درسناه والله اعلم بالحقيقة ومن الامثلة كثيره فى جميع المجالات و احب اوضح لاصحاب نظريه نصف الكوب الفارغ ان من ينظر الى نصف الكوب الفارغ يريد خدمات لم توجد ولكن عندما نتحدث عن كوارث فى خدمات موجوده فهو ينظر الى نصف الكوب المليان ولكن للاسف مليان شوائب

انا بنظر الى نصف الكوب المليان
بس اعمل ايه لو بالشوائب مليان
انت مش شايف فى الكوب شوائب
احتمال يكون فى عينيك انت شوائب
انت شايف منظر جميل فى خيالك
انظر للحقيقة وسيبك من خيالك
عارف ان ما فيش حاجه كامله
بس خايف تكون حجه لخطه فساد كامله

الجمعة، 2 أبريل، 2010

مدعى الالوهية وعبده الشياطين والملحدين العرب والخ وماذا بعد

كنت اتصفح اليوتيوب فشاهد فيديو لواحد يدعى الالوهية فى الاول قلت عليه مجنون ولكنى بعد وقت سالت نفسي اذا كان مجنون لماذا اتجنن فى هذا الجزء بالذات فدائما نرى المجنون حين ينطق ينطق بالموضوع الذى اجنه فماذا اجنه ورجعت وسالت اذا كان هذا مجنون فماذا عن عابدي الشياطين الذين تكلمت عنهم الجرائد والتلفزيون من كام سنه اعتبرهم ايضا مجانين او مرضى طب ماذا عن الذين مشتركون فى موقع للملحدين اعتبرهم ايضا مجانين او مرضى طب السؤال لماذا كثر المجانين او المرضى من هذا النوع وفجاه رجعت بالذكريات ومرت لقطات سريعه من شريط حياتي امامي كان اولها عندما كنت طالب وطلب احد المدرسين من فصلنا الوقوف وقال فى كلامه ان نقف وكاننا نصلى ولا اعرف لماذا هذه الفرعنه وهل كان يقصد بهذه الجملة التطاول على الخالق ام اخطاء فى التعبير ام نيتي سيئة مع انى لا افهم هذه الجملة الا انه يعتبر نفسه مثل لا اريد ان اكمل المهم اللقطة الثانية حينما خرجت من المدرسة ورايت احد الاشخاص اعرف انه مسلم كما يوجد فى خانه الديانة فى البطاقة يسب الدين و اللقطة الثالثة عندما ذهبت البيت وشغلت التلفزيون فرايت احد الفيديوهات لا اقدر التعليق عليه و اللقطة الرابعة عندما كنت مع احد الاصحاب وقال لي مازحا على هيئه الاحاديث الشريفة من شرب الحشيش فهو يعيش ومن شرب البانجو فلن ينجو وبعد هذه اللقطات قولت لنفسي اهذا الجو يخرج مسلمين ام يخرج هذه الاشكال ان الجو السائد فى البلاد لا يساعد الا على هذا بالرغم ان مازال ناس عاقله ومسلمه اخبرني كريم احد اصدقائي ان احد الاشخاص رفع قضيه لضم حفيده لان ابنه اصبح بهائي فكيف لبهائي تربيه مسلم وكان السؤال ان الاب ربى هذا الابن فطلع بهائي بالرغم من ان الاب مسلم فهل يريد ضم حفيده خوفا من ابنه الذى اصبح بهائي ليكون حفيده بهائي ايضا ما هو المربى هيكون واحد وكان ليا سؤال لماذا فى الخارج الذين لم يتربون على الاسلام يسلمون وليس ابائهم مسلمون وهنا بالرغم من انهم يتربون على ايدي مسلمون كما فى البطاقة يلحدون ويبعدون عن الاسلام اكيد فى مشكله فى التربية او المجتمع عندنا او الاثنين مما جعل هؤلاء يظهرون

قال زمان واحد اننا هنا فى بلدنا يوجد اسلام ولا يوجد مسلمين
وهناك فى الخارج لا يوجد اسلام ويوجد مسلمين
يمكن ده اللي جعلنا نشوفهم فى الخارج بيدخلوا فى الاسلام
فى ظل ما بنشوف اولادنا بيبعدوا عن الاسلام

Follow by Email

Tetris