الأحد، 29 ديسمبر، 2013

كل سنه وانت طيبين

عام جديد جايين ناخد التهانى
ونحلم باحلام جديده  ونزرع  امانى 
ونعاتب العام اللى قبله على اللى حمله لينا من مقاسى
نفاق دا ولا تسلق ولا خوف  ماكل عام  فيه افراح ومقاسى
ولا دا طبع الانسان دائما ساعه الفراق للحلو ناسى 
ويصبر نفسه بشويه امانى
يمكن اصاب العطل ذاكره الافراح
ولم يبق غير الجراح
 كدا يبقى شقى العام القديم راح
لكن ماهما راح لسه فى ذاكرته شويه افراح 
لما بدانا معاه وفرحنا بيه واستقبلناه بالافراح والتهانى
ذكريات مع احلام وامانى
عدت   الايام  فى سوانى 
اتحقق منها  حاجات  وحاجات فضلت امانى 
 زاد عليها حبه احلام وامانى
تتحقق بعد فاصل  التهانى

عام جديد  عام سعيد 
هنبدا معاه من اول وجديد

كل سنه وانتم طيبين

الأحد، 22 ديسمبر، 2013

حريه العقيده

من اول ما جالى دعوه للكتابه عنال حق فى  حريه العقيده     وانا بسئل نفسى  هى الشكله فى القانون  ولا الناس فى اعتقادى ان  اغلب دساتير  العالم تنص على  حريه العقيده لكن هل الناس بتلتزم  بدا  فى الغالب لا  الا نادرا   لما بنتكلم  عن الوحده الوطنيه فى مصر بعد كل فتنه بين المسيحيين والمسلمين  دائما نتحدث عن  موقف بديع خيرى ونجيب الريحانى  وازاى  كل واحد عرف ديانه التانى بالصدفه وان مين كان بيسئل التانى ديانتك ايه ومن هنا يطرح سؤال هو هل  يب علينا ان نجهل ديانه الاخر لنعيش فى وحده وطنيه  هل ديه وحده وطنيه فعليه   اموحده وطنيه مبنيه على الجمر  دائما  عندما اسمع قصه بديع ونجيب ياتينى  سؤال ماذا فعلوا عندما عرف كل واحد ديانه الاخر  المشكله ليست  مشكله  حريه عقيده  على اد ما هى  مشكله  تقبل الاختلاف  لتنشاء وحده وطنيه  حقيقيه قويه  اكون انا عارف انك مسلم وانت عارف  انى مسيحى وانا وانت عارفين ان صديقنا يهودى   او ملحد  او غيره  ونتقبل بعض كبشر على حسب سلوكياتنا واحنا عارفين كل واحد معتقده ايه انما الوحده الوطنيه اللى مبنيه على طريقه  مانعرفش  ديه وحده هشه  لاننا مش هنفضل مانعرفش على طول  اكيد مره هقولك  تعالى معايا نصلى الجمعه العيد اى فرض  واكيد هتقولى مرهتعالى نروح الكنيسه  ولو ماعندناش تقبل الاخر النتيجه  صفر 
لكن نقطه  ومن اول السطر 
الدعوه  معموله  مش عشان الحق  فى حريه العقيده  مسلم ومسيحى ولاحتى يهودى   لكن  ستار  لاظهار  معاناه الملحد فى بلد اسلامى  او بلد لا تعترف غير بالاديان السماويه  اسلام مسيحيه يهوديه  فهى دعوه فى باطنها  محاوله  للاعتراف بالملحديين  ولذلك اقول انها دعوه لتقبل الاخر ايا كان  تجمعات  الملحديين او الا دينين  اللى بتحصل فى مصر فى الفتره الحاليه هدفها تاكيد لانفسهم بانهم ليسوا وحدهم  فى المجتمع  من كتر ما بيشعوروا  بانهم منبوذيين فهم يحاولون ان يتحدوا ليكونوا قوه ولذلك علينا ان نتقبل الجميع  حتى يتقبلونا ونستطيع ان نقيم معهم حوار عقلانى لعلهم يهتدون  او نتثقف فى دينا اكثر
  وفى النهايه
من حق اى حد  يعتنق ما شاء وان يدين بما يشاء والاهم ان يعلن عن ما يعتقده  دون التعرض له  بضرر او اساءه 

السبت، 1 يونيو، 2013

العمله ياما حملت ذكريات

ادهشنى زميلى فى العمل عندما ذهب لايداع ورقه بمائه  يورو فى حساب الشركه وعاد واخبرنا بان البنك كان معترض على هذه الورقه لانها كانت متنيه  وراح واستبدلها  وعمل الايداع  قد يكون كلامه غير صحيح او كان الموظف يمزح معه وهو صدقه مثلا انما بالرغم كل شئ سرحت فيما نفعله فى عملتنا الوطنيه  وسالت نفسى ان كانت الورقه اللى 100 يورو كانت مشكلتها مع البنك انها مطبقه  فماذا يفعلون مع عملتنا الوطنيه  اللى دائما بتكون ضاربها السلك ومعدومه ومكتوب عليها للذكرى الهباب وايام الكباب الى اخر الاهداءات  من فلان الى فلان  وخطر على بالى سؤال  مين اول واحد كتب على العمله  ومين اول واحد اقبل الورقه  وازاى الموضوع انتشر و اصبح عادى   وهل ديه ممكن نعتبرها اهانه للعمله  وللبلد  ولا مجرد نشر  لذكرى حلوه بيتركها صاحبها على العمله  طب ليه صاحب الذكرى تركها   وبقيت ذكريات للبيع  قبل ما اكتب البوست دا بحثت  فى جوجل على  ورقه مكتوب عليها  للاسف لقيت كل الورق ثورجى وضاربهم السلك  يمكن يكون دا حال الثورجيه بس يلا حصل  خير اهى جت فى الورق  بس بقى  معقول  بدل ما كنا بنكتب ذكريات على الورق بقينا بنكتب شعارات  العمله عامله ثوره يا جدعان 


الثلاثاء، 21 مايو، 2013

سنه الحياه

 سنه الحياه  ان الناس بتسلم بعضها حاجاتها القديمه تكمل معاهم  مشوار حياتهم  انت مثلا ممكن ابوك يعطيك  عربيته  القديمه تكمل معاك مشوارك  ممكن انت تعطى واحد صاحبك فكره  تنفعه  تكمل معاه مشواره   اى حاجه مش هتستفيد  منها غيرك ممكن يستفيد منها  وزى ما بتعطى لغيرك  هيجى غيرك  هيعطيك ومفيش حد مش محتاج 
ومفيش حد ماعندوش اللى يستغنى عنه    انت ممكن تعطى هدوم  غيرك ممكن يعطيك فكره  او معلومه  وكله بينفع 

تجمع البؤجه الجمعه  24/5/2013   
المكان  20  شارع احمد خيرى بجوار محطة مترو الانفاق الزهراء فوق كافتيريا السرايا - الزهراء القديمة
الساعه 11 صباحا.
جمعيه صحبه 
اى حاجه انت مش محتاجها هاتها تكمل مشوارها مع حد غيرك محتاجها 

ملحوظه  للناس اللى اول مره تيجى
لو عايز تيجى التجمع  ومكسوف انك مش معاك بؤجه ماتنكسفش  و تعالى   شارك بوجودك  معانا   اتعرف على  نشاط  الجمعيه 
ادعم بوجودك  اتعرف  على المدونين  المشاركين   
التجمع للتبرع  والتعارف  ايضا ولا يوجد مجال للمزايده  على احد   ولو  هتيجى ببؤجه  خجلا   وفرها  وتعالى  من غيرها    واذا اقتنعت بالجمعيه المره ديه تعالى ببؤجه المره الجايه
دا لينك الايفينت
بوجه الخير

الاثنين، 6 مايو، 2013

شئ من خوف وجهل وفساد

مجتمعنا الجميل بيعلم وانت صغير انك تصلى بيحفظك القران ومابيفهمكش القران ولا الدين  وكتير من الذين يطلقون على انفسهم  رجال الدين بيكسبوا من الموضوع دا يخوفوا المجتمع من التنصير ومن التشيع ومن الالحاد وغيرها وغيرها وعشان انت بتكون جاهل وخايف فضخضع لافكارهم  بسهوله وترفعهم  الى الاعلى وتحترمهم وتطلق عليهم علماء وهم فى الاساس عوام وليس علماء قد يكون الكلام دا كان واضح الشخصيه الغريبه التى ظهرت علينا تحرم بيع البيض والفسيخ فى  يوم شم النسيم  وخصوصا انه قالها بدون ان يدرى عندما قال فيما معنى اننا نتبعه امثالهم ممن يطلقون على انفسهم علماء لانهم هم المرشدون لنا طريق الجنه وطريق النار بالرغم من ان كلام مرشدنا لطريق الافيون  مستغلون خوفنا وجهلنا ايضا بالدين  بالرغم انهم ايضاء جهلاء ويظهر ذلك فكثير من تصرفاتهم فمثلا الشيخ شعبان الشهير بهاتولى راجل  الذى  لم يقدر على تكمله مناقشه بالعقل فقرر ان يقلبها اكشن رافعا حذائه على من يناقشه فى حلقه مع المذيع طونى خليفه  وعندما نشاهد عوام الفضائيات الذين يطلقون على انفسهم علماء فنرى  الرائع الذي احب ان يتحدى مقدم برنامج البرنامج باسم يوسف  واتهامه بانه لايعرف دينه فترك كل شئ فى الدين ومسك فى كيفيه الاستنجاء واتهمه بانه لايعرف كيف يستنجى  لا اعرف   ايه جو الحمامات الذى يعيش فيه هذا الشيخ هل لايعلم هذا الشيخ شيئا فى دينه الا  الاستنجى هل هذا الشيخ تخصصه فى الدين قسم الحمامات ولا ليس غريبا فالتيار الذى اطلق على نفسه التيار الاسلامى عندما هاجم البرادعى بحث له عن شئ يشكك الناس فى دينه صور بنته  شخصا فجاه  يظهر يقول ان  البرادعى  كان زميلى وكان لايصلى  فيخاف الناس على دينهم من البرادعى وعندما فشلوا اخترعوا موضوع دوره فى حرب العراق مستغلين ان الناس بتنسى لو الناس تذكرت ايام حرب العراق هتفتكر ان امريكا دخلت الحرب مفتقده  الشرعيه لان مجلس الامن اعترض ولان بردوا اللجنه قالت ان العراق معندهاش اسلحه  محظوره بس الناس بتنسى وبتخاف بتخاف لانها عارفه انها جاهله وبدل ماتثقف نفسها بتخاف فترفع العوام لدرجه العلماء والعوام مستغين الخوف والجهل والفساد ويظهرون فةى صوره العلماء بالرغم ان طريقهم فى الحديث فى كثير من القضايا بتقول انهم يحفظون الافلام الابيحه  كما يحفظون القران فنرى من يتكلم عن مشاهد افلام الهام شاهين بدقه اكثر من الهام شاهين نفسها ومن يتحدث عن تايتنك وغيره من الافلام العربيه والاجنبيه  التى تحتوى على مشاهد غير لائقه اكثر من تحدث المراهقين انفسهم  لدرجه اننا لانعلم هؤلاء الذين يطلقون على انفسهم رجال دين  اى دين هم رجاله اى دين يتبعون وتظل جمله الفنان عادل امام فى فيلم طيور الظلام حين قال للفنان رياض الخولى   الممثل لدور التيار الدينى بالفيلم  انتم عايزين ايه غير رجل فاسد  انتم اصلا موجودين بالفساد  هذه الجمله فعلا تنطبق عليهم بالمسطره    ولذلك تعالت قيمتهم من خوفنا من جهلنا وفسادنا وفساد ما حولنا   

الخميس، 4 أبريل، 2013

الوطن العربى والصراع العربى العربى



الوطن العربى اغنيه غناها عبد الحليم حافظ ورفاقه   وبعد سنين     هلت علينا اغنيه الحلم العربى  ودائما عندما ندقق نرى انه الوهم او السراب العربى طول ما احنا عايشين فى الصراع العربى العربى     فى الفتره الاخيره  بالرغم انى معارض للاخوان والنظام الحكام لكن اوقفتنى نقطه  اوالتهم اللى  الناس  رددها   واتهمت  النظام الحالى بيها وهى العماله لقطر بصرف النظر عن سبب الاتهامات   لكن نحن لا نتكلم عن اسرائيل  ولا امريكا  نحن نتكلم على دوله عربيه  اللى احنا ظاهريا  بنقعد نلت ونعجن فى موضوع الوطن العربى و الحلم العربى ومصدعين انفسنا بيه ونقول امتى  واللى هيفضل السراب العربى  طول ما احنا بداخلنا كدول عربيه  حب السيطره على بعض بدعوى الوحده لا حب الوحده لتقويه العرب ولذلك فلن ينتهى الصراع العربى العربى   لان المصرى يتكلم باستعلاء  احيانا عن الدول العربيه ويقول عن بعض الدوله الصغيره مساحاتها  مثلا  هل يعقل واحد من دوله صغير يحكم دوله مثل مصر وبعض الدول العربيه الغنيه  قد ستنكر  ان واحد مصرى يحكمها  بدعوى انهم اغنى مثلا  من وجهه نظره  ومن المصريين من يستنكروا انهم عرب ويقولوا انهم فراعنه بالرغم ان الفرعون دا لقب حاكم وماتعرفش اشمعنا اختاره الفراعنه عشان الاثار مثلا ليه ماقالوش اننا سلاطين   وقديما ايام الوحده بين مصر وسوريا   كانت المشكله مين يحكم المصرى ام السورى  لم يكن الاختيار من الافضل  قد يكون هذه النزعه الوطنيه  نحو بلده جميله ولكن النزعه الاجمل والافيد النزعه  العربيه واننا نعتقد اننا كلنا كعرب واحد دوله واحده  (بس طبعا نبعد عن موضع الخلافه والكلامن الافيونى دا)  لان شروط الوحده الحقيقيه اننا نبقى واحد نتداخل مع بعض  يمكن دا راجع لاختلافنا رغم ائتلافنا    يمكن
لكن اغانى الوطن العربى  والحلم العربى  ستظل اغانى فقط طالما بنا هذه الاستكبار على بعض  حتى اغنيه القدس هترجعلنا بتاعت زمان هتفضل اغنيه  وفقط لانها عمرها ماهترجعلنا  واحنا بالشكل دا وعمرنا  ما هننتصر فى الصراع العربى الاسرائيلى قبل ان نضع نهايه للصراع العربى العربى   ونعرف اننا اذا ارادنا الوحده فيجب ان لانردها لكى نكون حكماء عليها نوحد العرب ونبقى احنا الحاكمين  لكن نردها لنكون جزء من كيان قوى ناجح

الأربعاء، 27 مارس، 2013

بدون عنوان 1

اثار سؤالى على الفيس بوك عن وجود ايه قرانيه بتاكد ما نسمعه من احاديث عن نجاسه الكلب وعدم دخول الملائكه بيتا فيه كلب تحفظ البعض من اصدقاء واخواتى  يمكن تحفظ اختى ماكنش على السؤال نفسه على قد ماكان انا بسئل مين فسؤال مثل هذا لا يسئل على الفيس للاصدقاء اللى مثلى ليس عندهم علم كافى بالاشياء فيجب عليا اسئل المختصين وابلغتنى عن قلها اتجاهى فهى ترى من الفيس بوك  رسائل جانبيه لجروبات الحاد  وتلاقينى انا اللى عامل عليها ليك غير ان سؤالى كان باين عليه انى معترض على الحديث والسنه ولكن انا بالفعل لم اعترض على السنه ولا انكرها ولكن ان كان الحديث لا يوجد له اصل فى القران يشير اليه او تستنبض منه صحه الحديث فكيف افرق بين الحديث وحكاوى سندباد. الله فى القران توعد انه هيحفظ القران بقوله تعالى  انا انزلنا الذكر واننا له لاحافظون  صدق الله العظيم ولكن لم يتوعد ان يحفظ السنه. قد اكون تطاولت عندما  تحفظ احد الاصدقاء عن سؤالى بقولى له اثبتلى كذب الحديث دا  عن عبد الله ابن عمر رضى الله عن ان رسول الله صلى الله عليه وسلم قال ان ثلاثه يدخلون الجنه بدون حساب شابا اسمه عمرو يسكن فى شبرا واخر يسكن فى العراق واخر يسكن فى دبى فسئله  ابو بكر وما السر فى هذا الاسم فاجاب انه اسما فيه البركه صدق رسول الله صلى الله عليه وسلم  وان كان انه لم يكن فى كتب السنه المطبوعه ننزله يا سيدى فى اخر طبعه  طبعا الحديث منطقيا تخاريف لكن اثبتلى ذلك هتقولى هو كان فى شبرا ايام الرسول  هقولك مصر ذكرت فى القران  هتيجى على شبرا والدنيا هتقف  وسئلته انت عارف ان فى العصر الاموى حكموا الناس بحديث واحد ضحك ومعرفش يرد لكن الموضوع مش انه معرفش يرد هو معرفش غيره هيعرف لكن كيف نعرف صحه الحديث ان لم يكن له اصل فى القران سئلنى احد اقاربى وهل عرفت ان صلاه الظهر اربع ركعات من القران بالفعل لم اعرف ان صلاه الظهر اربع ركعات من القران ولكن من القران عرفت ان فى صلاه اساسا  الطبيعى ان فى القران الاصل وفى السنه التفصيل فى القران فى صلاه وفى السنه كيفيتها فى القران صوم فى السنه كيفيته  انما مايكنش فى السنه الاصل ومافيش فى القران دليله  فلى القران  حرم اكل الخنزير  ووصف صوت الحمار بانه انكر الاصوات  فعندما اجد فى السنه مايوكد دا او يزيد ممكن اتقبله انما الاقى فى السنه نجاسه الكلب وعدم دخول الملائكه بيتنا فيه كلب   وفى القران مافيش حاجه  توكده   او قريبه من المعنى اصلا  طب ازاى اصدقه  مش انكار للسنه ولكن مش كل واحد يقولى على مزاجه ان دا سنه اصدق ان دا سنه  الرسول عليه الصلاه والسلام لم ينطق عن الهوى  لكن احنا انطقنا عن الهوى على لسانه   وكتب السنه مش الرسول اللى كتبها  ومهما كان اللى تداولها وكتبوها  ناسى محترمه ونقدرهم ولكن ليسوا رسل  ولا ملائكه

الثلاثاء، 5 مارس، 2013

بدون عنوان



وسط ما يحدث الان فى مصر  من احداث وما حدث من اول الثوره الى الان وتشابه قليلا مع مايحدث فى الدول المجاوره  لقيتنى بقول لنفسى كله تخليص حق او ان احنا حسدنا نفسنا  عندما سقطت نظام العراق وراينا فى التلفزيونات بلطجيه  يسرقون  غضبنا وقلنا اخص عليهم وبعد كده قلنا عليهم انهم ماينفعهمش غير صدام حسين وعندما قامت الثوره وبداء البلطجيه يسرقون ويروعون الناس  قلنا احنا دول بلطجيه النظام القديم وظهرت الحجج واتهمنا من قال اننا شعب ماينفعش معاه غير مبارك  بالفلول استوعبنا احداث البلطجه عندنا واخرجنا لها حجه وعندما كنا نراها فى العراق لم نعطى لهم حجه وعممناها وخلاص بالرغم اننا اتفقنا فى الحل وقتها وصنعنا مثلهم لجان شعبيه  ثم توقفت فجاه وضحكت عندما تذكرت احد شيوخ الجوامع الذى كان يسكرنا ويقول لنا قديما قبل الثوره اننا فى نعمه لاننا مسلمون فى نيويورك انقطع النور خمس وعشرون دقيقه حدثت جرائم بالكوم لانهم يخافون القانون وفقط انما نحن نخاف الله يامزاجه العالى اهو احنا  دلوقتى جرائم صبح وليل ياشيخنا واللى بيحكمنا شيخ مش فرقا معانا نور ينقطع ولا لا  كله واحد  صحيح انا عارف اننا حالنا احسن من غيرنا  لان مصر بالرغم مايحدث فيها على راى واحد صاحبى  مصر تقلق منها فى اى وقت ومع ذلك امان  فعلا احنا هنا احسن من غيرنا بالرغم اننى بقيت بخاف من هذه الجمله ديه  لاننا من الواضح اننا بنحسد بيها نفسنا  فقلنا قبل الثوره مصر المكان الهادى وكل من حولها مشتعل نار عندما بدات الاحداث فى الدول المجاوره  والان مصر لم تصبح هادئه قليلا  حسدناها  ياخوفى من جمله احنا ا حسن من غيرنا ديه  اللى ماتعرفش هتودينا لفين واحنا مجتمع اصبحنا نعشق التفاخر بالاشياء التى لم نفعلها نتفاخر بحضارات اجدادنا ولم نصنع فى عصرنا حضاره واستكفينا بما فعله اجدادنا  نتفاخر باننا احسن من  غيرنا فى  الامن ليس  لاننا فرضنا الامن لكن لاننا اغلبنا طيبين نتفاخر بما لن نفعله ويخوفى ليزول ما نتفاخر بيه وعلى راى جلال عامر الله يرحمه لما قال احنا بنتفاخر بانتصاراتنا فى عين جالوت وحطين والقادسيه حد لاحظ  انهم كلهم الان تحت الاحتلال     

السبت، 23 فبراير، 2013

اللعب بالدين فى دمنا من واحنا صغيريين


رجعتنى الشه على الفيس بوك بتقول" فاكر العيال اللى كانت تضربك ولما تيجى تضربها وتاخد شنطها تقولك حرام ديه فيها كتاب دين  دول لما كبروا طلعوا اخوان "  الى ايام زمان لقتنى بسترجع كل الالعب اللى الدين كان اساسى فيها وكل نكته واستهزاء كان بيكون الدين فيها من اول لما كنت تحب ترخم على واحد تبعتله رساله تقوله امنتك امانه ليوم الدين انك تبعت لا اله الا الله الى عشره اشخاص فاكريين الرساله كنا نبعتها لبعض ليس لغرض دينى بس اهى رخامه وتناحه وخلاص  افتكرت لما شيخ الجامع اللى جنبنا لما اشتكوا علشان ماعندوش ذوق وبيشغل ميكروفونات عاليه ويطول بشكل غبى  فبردوا طلع على المنبر بكل تناحه وقالك  طبعا عشان بنكلم فى الدين ماهو لو كنا بنشغل اغانى  نفس الشيخ دا لما بيكون مستعجل بيصلى بينا فى خمس دقائق واضح انه كشيخ فى نظر نفسه هو بس اللى بيكون عنده مشاغل مهمه  ربنا يحرقه يارب فضلت استرجع كم من الاستعلال للدين كنا بنعمله وبيعمله الناس حولنا لاهدافهم الشخصيه وامزجتهم  وفجاه لقيتنى بقول لنفسى وانت راجع بالزكريات كده ليه ماعندك الناس على الفيس بوك اكثر اسهزاء ولعب بالدين كل جروب عايز يتشهر او يجمع عدد ليكات كتير يقول اتراهنت انى اجمع مليون موحد كم ليك للفاتحه كم ليك لله هتكسل تنشرها يبقى الشيطان منعك الدين اصبح مسخره للاعبون  واللاهون  وبعد كده يقولك احنا شعب متدين بطبع   بلاوكسه احنا شعب بيلعب بالدين  بطبعه

الأربعاء، 20 فبراير، 2013

البلاك بلوك شويه بلطجيه



مجموعه ظهرت فجاه  ماحدش عارف هى تبع مين ولا ظهرت ليه  فى ناس معتبراهم ابطال وناس زيى كده بتقول عليهم شويه كلاب مخربين  الحقيقه مندسيين   يمكن انا من النوع التانى اللى بيقول عليهم شويه بلطجيه يمكن عشان توقيت ظهورهم  يوم 25 يناير او وقت ما انا سمعت عنهم يمكن لان تسلسل الاحداث معايا كان مختلف لانى فى الاول قبل احداث يوم 25 قراءت على جروب اسمه مطلوب زعيم   كانوا نشرين بيقولو ان هنتحرك فى مجموعات وهيكون هدفنا حرق معرفش ايه واقتاحم معرفش ايه وغيره  ويوم 25 الصبح نفس الجروب لقيته ناشر يقول فى مخطط من الحكومه لحرق معرفش ايه واقتحام معرفش ايه وتلبيسها للثوار  علقت على الجروب وقلتله دا انتم اللى اعلنتم انكم هتعملوا دا  رد عليا واحد يقول ماهو العادى جهه تعلن وجهه تنفذ  منتهى السفاله يعنى وبعد احداث 25 يناير  وحكم يوم 26 يناير الاقى نفس الجروب بيتباكى على اهالى بورسعيد ثم يعلن عن الصفحه الرسميه للبلاك بلوك طيب ايه هما عايزين ايه كلنا ضد النظام الحكام بس دا بردوا مايجعلناش نخرب البلد   الثوره زمان كانوا بيقولو عليها سلميه  وهناك بعض المندسين هما اللى بيخربوا لكن الصوره الحاليه اصبحت مجموعه من المخربيين بيندس وسطهم مجموعه  من السلميين  الهدف الان اصبح تخريب مش اسقاط نظام اسقاط النظام بالفوضى غلط حتى لما اسقطنا مبارك بالفوضى كان غلط  وان كان اى ثور محتاجه مايسمونه فوضى خلاقه فلابد ان يكون هناك شخصا يدير الفوضى لان الفوضى الخلاقه  ان لم نتحكم فى حجمها لن تكون خلاقه بالمره ومجموعه البلاك بلوك  مجرمين وليسوا بثوار ويدور حولهم الشك  نعم انا ضد الاخوان والسلفيين وكل تيار يريد ان يصل للحكم عبر الدين لكن ايضا ضد الفوضى وضد الاجرام فالثوره اصبحت فوضى  لا يمكن السيطره عليها  ودخلنا فى مرحله قاتل ومقتول  قصدى ثائر وشهيد  وهو اصلا مبقاش فيه ثائر بقى فيه مجرم وعشان فى مقتول هنقول عليه شهيد ومادام فى مقتول بيكون على مزاجنا ان القاتل شرطه او جيش وربنا اعلم بالحقيقه ان كان المقتول شهيد والقاتل نظام اما او القاتل مننا مجرم وسطنا واحنا مش داريين    ولسه زى ماحصل يوم 25 يناير ويوم 26 يناير اشعر بانه هيحصل تانى يوم 8 مارس و9 مارس بنفس القصيده القضيه  قضيه بورسعيد بالرغم من ان فيه اكثر من قضيه قبلها انتهت من غير وجع دماغ يادوب بس كان وجع قلب وخلاص 
نفس اعرف لما الناس قامت بثوره كانت كاشفه عن وجوهها مش خايفين من حد دلوقتى مغطيين وجوهم ويقولو ثوار بلاوكسه  خلاص خلينا البلطجيه والرعاع ثوار  

السبت، 16 فبراير، 2013

انهم يهدمون الاسلام



من فتره لقيت فديو لطفله صغيره بيقال على لسانها انها كانت ميسيحيه واسلمت وبعض الناس والجروبات الظريفه  بتتناقله فى بغبغائيه على انه حدث عظيم وجايبين البنت الصغير وهى بتقول سالت مدرسه الدين عن معرفش ايه فقالتلى ماتسئليش فى الموضوع دا اكيد اللى سئلك مسلمين عايزين يضلوكى وكملت البنت كلامها انها عارفه انها لو رجعت للكنيسه هيضربها ويعذبوها وكلام هجص من دا كتير والفديو تلاقى ناس كتير فرحانين بيه  طب الناس اللى فرحانه اوى كده بالفديوه دا نجبلكم فديوهات لناس كانت مسلمه وذهبت للالحاد ونشوف شويه الارجوزات اللى قعدوا يقولوا نطبق حد الرده ونقتلهم نجبلهم بيوت البهائيين اللى اتحرقت زمان  طيب  يعنى انتوا عايزين ايه لا دخول احد فى دين اى دين يزيد الدين فى شئ  ولا خروج احد من دين  هينقص الدين فى شئ ولكن ما يهدم الاديان فساد رجال الدين وبغبغائيه اتباعهم  زمان وانا صغير كان بيدهشنى شئ غريب الاقى واحد قاعد يقولى المسيحين دينهم بيقول اذا صفعق احد على خد الايمن فاعطيه الايسر ويقعد يسخر ويضحك كنت عايز اقوله يا ابن الهابله ماهو دينك الاسلامى بيقول نفس المعنى فى اجزاء كتير مثل  وادفع بالتى هى احسن ولا كان لازم يجبلك نفس الكلام بالحرف عشان تتلم.
ولا موضوع فلسطين والمسجد الاقصى اللى اصبح يستغل على الاهواء مش عايز الناس تحتفل بعيد الحب مثلا تقولهم اتحتفلون والمسجد الاقصى اسير على اساس انه اسير اول امبارح  عايز تنجح فى الانتخابات على القدس رايحين شهداء بالملايين
انهم يهدمون  الاسلام  بتخلفهم واهوائهم عندما يدخلون الانتخابات ياستخدمون الايه التى تقول وَلَتَجِدَنَّ أَقْرَبَهُمْ مَوَدَّةً لِلَّذِينَ آمَنُوا الَّذِينَ قَالُوا إِنَّا نَصَارَى ذَلِكَ بِأَنَّ مِنْهُمْ قِسِّيسِينَ وَرُهْبَانًا
وعندما يكسبون الانتخابات يبرورن معارضهم بالايه التى تقول (وَلَنْ تَرْضَى عَنْكَ الْيَهُودُ وَلَا النَّصَارَى حَتَّى تَتَّبِعَ مِلَّتَهُمْ)
طيب انا كمسلم المفروض اشوفك ازاى ما هو يا انت متخلف يا دينك متناقض  بالرغم ان فى اعتقادى ان مافيش تناقض ولاحاجه  لان اى اختلاف بينك وبين صاحبك ممكن مترضاش عنه عن الاختلاف لكن فى نفس الوقت رغم الاختلاف فى كتير بيكون بينهم ائتلاف فلن يرضوا عنك الرضاء مائه فى المائه لانك مختلف عنهم لكن فى نفس الوقت هما اقرب ليك لانهم مشتركين معاك فى حاجات كتير جدا  لكن مين يفهم ومين يعقل .
عندما يكون  الدين على الاهواء  يسقط  قال ازاى تفصل الدين عن السياسه  فالدين كله سياسه  بداءت الشجارات  فى الجوامع  والتطاول على شيوخها وغدا ستحرق بعد تقسيمها جوامعنا وجوامعهم  فهم يسيرون بالدين الى السقوط

الخميس، 14 فبراير، 2013

عيد الحب





دائما فى عيد الحب يكثر النقاش والجدال فى ناس تقول للمسلم عيدان فطر واضحى  وبالسلامه يا خويا  وناس تقولك واحنا محتاجين العيد دا فى ايه وناس تقول دا بدعه وكل بدعه ضلال وكل ضلاله فى النار وناس تقول دا تقليد للغرب مالوش لازمه  وبصرف النظر عن كل دا يظل عيد الحب منبوذا من بعض مايطلقون على انفسهم  رجال دين وبعض من الناس  لارتباطه فى اذهانهم بالمراهقين وشغل الدباديب وهدايه الاحبه يمكن ديه المشكله اننا وضعنا الحب فى صندوق ضيق اسمه حب الحبيب للحبيه ايام المراهقه بالرغم ان الحب المفروض انه يكون اشمل من كده وبصرف النظر عن القصه التاريخيه القديمه المسببه لعيد الحب نحن الان اصبحنا نحتاج الى عيد حب ولو ليوم يوم نحس اننا بنحب بعض ننحى فيه صراعاتنا اللى بينا وبين بعض نغير بيها شكل مجتمعنا فى نظرنا نصحح مفهوم الحب الذى هو اشمل من حب المراهقين فقط  فى الفتره الماضيه عندما ظهرت اغنيه عشان لازم نكون مع بعض  عندما حرفها بعض الشباب وجعلها بنعض فى بعض صدقنا الثانيه اكتر لاننا فعلا بنعض فى بعض وخصوصا واحنا فى ظل الصرعات الاجتماعيه والسياسيه الحاليه ولذلك اصبحنا مجتمع يحتاج لمناسبه يفتعلها هو لكى يحب يحب بلده يحب مجتمعه يحب اهله يحب صحابه يحب  زوجته فى زمن اصبحنا فيه  لدينا اسباب كثيره نكره بيها بعض ومافيش سبب واحد عشان نحب بعض ولذلك اصبحنا نحتاج لعيد الحبعشان نرجع نحب بعض ولو ليوم واحد
كل سنه وانتم طيبين
وعيد سعيد عليكم   

الأحد، 10 فبراير، 2013

الذكرى الاولى للدكتور ابراهيم الفقى

مره عام على رحيله ومازالت كلماته التى كان يختم بيها كل حلقه  وكل جزء فى كتبه  مازلت اسمعها ترن فى اذنى   عيش كله لحظه كانها اخر لحظه فى حياتك عيش بالانتماء  عيش بالكفاح عيش بالفعل  عيش بالصبر عيش بالمرونه  عيش بالاستمراريه عيش بالحب  وقدر قيمه الحياه
انه د/ ابراهيم الفقى
الله يرحمه

السبت، 26 يناير، 2013

ثقافه العفاريت



واحد زملينا فى الشغل كان بيحكلنا حادثه  واحد قتل  واحد وحب ياكل لحمه فلما بداء ياكل لحمه  معجبوش  قال يمكن عشان هو اللى قتله ففرمه وعمله لحمه مفرومه واعطائه الى واحد زميله فمراته عملت بيه الاكل وعادى  تناقشنا فى حكايبه ازاى حد ياكل حد فجبلنا صور لدول بتاكل البشر وتقطع وتشفى زى ما بنعمل فى الجاموس بالظبط  كده
 


 كان تعليق احد زمايلنا هو اللى شد انتباهى قال لو كانوا اتربوا على ثقافه العفاريت ماكانوش اكله لحم البشر وقعدوا يشفوا كده عادى احنا هنا عندنا ثقافه العفاريت عفريت الميت او القتيل  ورغم اننا كنا بنتكلم عادى لكن توقفت عند هذه الجمله ثقافه العفاريت ديه ياترى فعلا ثقافه العفاريت هى اللى منعانا من اكل لحم بعض بعض كتب التاريخ بتقول اننا مر علينا وقت اكلنا لحم بعض فى مصر  ساعات  مشوى وساعات عادى  لكن السؤال اللى مر على بالى للحظه  هل ثقافه العفاريت هى بس اللى هتحمينا من اكل لحوم بعض ام دينا  لو حدث مجاعه الان مثلما حدثت فى الازمنه السابقه هل سناكل لحوم بعض ام ان دينا سيمنعنا ام ثقافه العفاريت هى التى ستمنعنا السؤال اللى محيرنى ان كنا فى مصر اكلنا لحوم البشر والميته فى زمن ما  حدث فيه مجاعه  فكيف دخل فى عقولنا وثقافتنا ثقاقه العفاريت  وكيف نمت فى عقولنا  

الثلاثاء، 22 يناير، 2013

انا جرجس




فى الشغل امبارح زميلنا جرجس  كان بيحكلنا ان يوم الاحد  لما حصل فى المترو مشكله قعدوا فى المترو اكثر من ساعه عشان المترو وقف بيهم بين المحطتين فسئله زملينا  طب ماممكن تفتحوا الابواب يدوى فرد وقال عارف بس مافيش حد عملها فسئلناه طب ماعملتهاش انت ليه هنا كانت اجابته مضحكه  لكن تتطرح سؤال مهم هل هنصل للموقف دا فعلا كانت اجابته انا جرجس  يعنى ممكن البس كل القضايا اللى فاتت  ضحكنا وهو اصلا كان قالها وهو بيضحك لكن  الموقف بيطرح سؤال هل بالفعل ممكن نصل الى هذه المرحله ان المسيحى يخاف يعمل اى تصرف ليحتسب عليه لانه مسيحى  فقط  طب ايه اللى جعله يقول هذا الافيه  عشان اتقال ان اللى انتخب شفيق مسيحين واللى قال  لا للدستور مسيحين واللى كانوا عند الاتحاديه مسيحين  واى معارض فى ظل حكومه الاخوان والتيار الاسلامى بيكون فى نظرهم مسيحى مين السبب فى خروج هذا الافيه انا جرجس يعنى البس كل القضايا  للدرجه ديه ممكن فى يوم نوصل لكده 
وهو دا كده ينفع 
 ربنا يستر

الخميس، 17 يناير، 2013

المشكله فين


المشكله  فى اللى ماتوا ولا فى  اللى عايشين
فى الحكومه ولا السياسيين
المشكله فى الرئيس ولا فى اللى قبله
ولا فى اللى بيصقفله  ولا مين
يمكن فى ناس عايزاه يسقط
بس ايه اخرتها ماهو بالشكل دا  هيسقط
المشكله انك ماعندكش رقيب
ولا انى ماعنديش بديل
دمى اللى كل يوم بيسيل
بيسئل  المشكله والحل فين
مش مهم دمى اللى سال ولا اللى بيسيل
بس امنيتى ماشفش المعارضه متصارعه فى مزايده مع حكومه فى زياره المتصابين
وبعدها بشويه دم غيرى يسيل
لا دول  حلوا  ولادول حلوا 
وفى النهايه  وسطنا احنا اللى بيتحلوا
القطر ماشى وبيعمل كوارث وماتعرفشى مين الجانى
 الضحيه ولا الجانى
 اللى هيعبر المزلقان ماشفشى القطر
وعامل المزلقان ماشفى اللى ماشفشى القطر
واللى اهمل فى ربط عربيات القطر
ليه مايخدوش  فى سكته القطر
والسواق مش عارف يتحكم فى القطر
والحكومه راكبه فى قطر تانى 
مش عارفه تسيطر على حركه القطر والشعب فيه بيقول اه يانى
والنهايه  زياره للمصابين  وبلدنا مافيها محاسبين
والدم اللى سال بيرجع تانى يسيل
ومحدش عارف المشكله والحل فين
ناس تقول ديه مشاكل العهد القديم
طب فين الجديد والى متى هنفضل نشرب من كاس اسطوانه العهد القديم
 ياناس حد يقولنا المشكله فين وفى مين

الثلاثاء، 1 يناير، 2013

كل سنه وانتم طيبين

 من كل الصور اللى طلعت عشان تهنى بالعام الجديد  عجبتنى اوى الصوره ديه لانها لها معنى تانى غير التهنئه معنى ترمز له الايادى اللى حامله الارقام اللى مكونه رقم العام  معنى بيقولنا لازم نتوحد عشان ننجز لازم كلنا نشارك مع بعض عشان نبنى  وكل واحد مننا يكون مسئول عن جزء عشان نصنع شئ  لان لو ايد واحده اختفت من الصوره هيختفى بها رقم يعمل خلل فى السنه   يارب نبداء مع السنه الجديده نحط ايدينا فى ايد بعض ونشارك بعض وننجز مع بعض كل سنه وانتم طيبين كل سنه واحنا كلنا بخير  مع بعض ولبعض

Follow by Email

Tetris