الأحد، 2 سبتمبر، 2012

زمن التحرش الجميل



دايما بتحصل مقارنه بين الازمان  فكنا بنسمع ابائنا واجدادنا  يتكلموا عن زمان  ويقولولك عن زمنهم الزمن  الجميل   وسمعنا عن زمن الفن الجميل والطرب من خلال المقارنات ديه  اللى بنسمعها كتير و لما وصلت المقارنات  عن  الفرق بين معاكسات  الفتيات زمان  التى كانت عباره عن مغازلات  عفيفيه  والتحرشات  بيهم دلوقتى  التى اصبحت بالالفاظ البذيئه  واللمس  ضرب  بخيالى اسم البوست دا زمن التحرش الجميل وتخيلت لما الواحد يكبركده ويكلم اولاده عن المعاكسات او التحرشات او الاسم الذى سيستحدش بعد ذلك واقوله فى نصح وارشاد  ايه اللى بتعملوا دا انتم مزودنها اوى فين ايام زمن التحرش الجميل كل شئ كان بقواعد حتى المنحرفين  كانوا منحرفين منضبطتين منحرفيين عندهم اخلاق وقيم مش زى منحرفيين اليومين دول لا قيم ولا اخلاق  دا احنا هنبقى اباء مسخره
متستغربوش الحكايه انى  كنت  بكلم مع  واحد وفى وسط كلامه قالى  مافيش واحده ماشيه محترمه هيحصلها حاجه  سرحت فى الجمله وتخليت المجتمع القادم اللى هيربيه مجتمع عنده فكر  ان المتحرش بيها  هى اللى غلطانه  ياترى هيكون ايه ولو الجيل اللى بيفكر كده طلع منه كتاب وشيوخ وعلماء هيكون شكلهم ايه  هل ممكن فى يوم نسمع عن كتاب اسمه مثلا  اخلاقيات متحرش  بيكلمنا ازاى ان المتحرش  الصح لا يتحرش بفتاه محترمه وما هى مواصفه المحترمه المقصوده  ولا مثلا يطلع كتاب مواصفات الفتاه اللى ممكن تتحرش بيها مثلا   ولا حتى  زمن التحرش الجميل  يكلمنا ازاى ان المتحرشون والمراهقين كانوا محترمين لا يتحرشوا  الا ببنات  معينه  ولا مثلا  حد يطلع علينا بكتاب  المتحرش المثالى  زى ما سمعت شيخ جامع عندنا بيقول ان البنات هما اللى بيتحرشوا بالولاد بلبسهم ومافيش ولا كلمه  قالها فى الخطبه بتاعته للشباب ان فعلهم غلط  شئ عجيب لما تقلب الموازين وتجعل صاحب الفعل البذئ  صاحب فضيله مسخره

اه يازمن العجب
كل شئ فيك اتقلب
يتهموا الصبيه
والمتحرش بقى صاحب فضيله وقضيه
مش ناقص  غير اننا نقول  على اللى سرق هو اللى اتسرق
واللى قتل هو اللى اتقتل
ماهو يعنى زى مافيش متحرش هيتحرش بدون سبب 
مافيش حد هيتقتل  حتى ولو عشان يتسرق من غير سبب
 المجنى عليه بقى هو المتهم
قتل  فى الجانى الانسانيه وحوله لمتهم
اه يازمن العجب
كل شئ فيك اتقلب
 المجرمين بقى هما الابرياء
واتهم بالاجرام الابرياء
اه يازمن العجب
كل شئ فيك اتقلب

هناك 10 تعليقات:

شمس النهار يقول...

انا مع كل كلمة قلتها في التدوينة دي

وعجبني الشعر كمان
وكمان مين هيحط قواعد لشكل البنت المحترمه ان شاء الله

شمس النهار يقول...

اسفة ياعمرو
ياريت تيجي تعلق تاني
علشان وانا بنشر تعليقك اتمسح
فاياريت تعيده
:)

أحمد أحمد صالح يقول...

اه يازمن العجب
كل شئ فيك اتقلب
..يمكن الجملتين دول لخصوا الموضوع،مصيبة فعلا إللي انت بتقوله دا يا عمرو و اللي هو واقع فعلا بنعيشه،يمكن اهم واخطر نقطة في تدوينتك و اللي بأحييك عليها،هي نقطة التطور،طالما في ناس أعتقادها كدة و ناس بتأمن وراها مش بعيد نتندر على التحرش في زماننا،و مش بعيد نشوف الكتب اللي انت سميتها دي منشورة !!
..
محتاجين لحملة نظافة لكل العقول الزبالة،اللي صنعت مبررات أقل ما تستحقه عليها هو الإعدام ذبحا بحذاء قديم !!..وأسف على الكلمتين الأخرنين دول!!

MEROOooOOoo يقول...


كلامك مظبوط جدا
بس المشكلة اننا مش بنحل حاجة
احنا عندنا مرض وليها أعراض .. منها عرض التحرش .. مشكلتنا بقى اننا بنحاول نعالج العرض وسايبين المرض
احنا عندنا أمراض كتير .. مشاكل اقتصادية ، بطالة ، عزوبية ، فراغ عاطفى ، حرمان ومشاعر حبيسة ،...
ده غير الأفلام القذرة اللى بتتعرض عندنا

المرض ليه جذور ومتشعب فى كل حاجة وكل مكان حوالينا ومهما حاولينا نحل العرض مش هنقدر غير لما نحاول نحل المرض

وأكيد مش معنى ان الانسان يكون مريض انه يتصرف تصرفات غلط وكمان يبرر لنفسه
ده كده هو بيساعد ان المرض يبقى عامل زى السرطان ,, بيساعده انه ينهش فيه قبل ما بينهش فى غيره

أسفة على الرغى كتير
مدونتك جميلة

MEROOooOOoo يقول...


كلامك مظبوط جدا
بس المشكلة اننا مش بنحل حاجة
احنا عندنا مرض وليها أعراض .. منها عرض التحرش .. مشكلتنا بقى اننا بنحاول نعالج العرض وسايبين المرض
احنا عندنا أمراض كتير .. مشاكل اقتصادية ، بطالة ، عزوبية ، فراغ عاطفى ، حرمان ومشاعر حبيسة ،...
ده غير الأفلام القذرة اللى بتتعرض عندنا

المرض ليه جذور ومتشعب فى كل حاجة وكل مكان حوالينا ومهما حاولينا نحل العرض مش هنقدر غير لما نحاول نحل المرض

وأكيد مش معنى ان الانسان يكون مريض انه يتصرف تصرفات غلط وكمان يبرر لنفسه
ده كده هو بيساعد ان المرض يبقى عامل زى السرطان ,, بيساعده انه ينهش فيه قبل ما بينهش فى غيره

أسفة على الرغى كتير
مدونتك جميلة

sony2000 يقول...

يبقي أحنا يبنات نعمل ايه

زي فلم 678

ونخلص
صح كدا؟؟
مهو مبقش غير كدا

وانا بصراحه شيفه انها هتعرف تتصرف
بس من غير العنف دا

بس هتيجي هتيجي وتاخد حقها

غير معرف يقول...

مش ناقص غير اننا نقول على اللى سرق هو اللى اتسرق
واللى قتل هو اللى اتقتل

اه يازمن العجب
كل شئ فيك اتقلب
المجرمين بقى هما الابرياء
واتهم بالاجرام الابرياء

L.G. يقول...

صحيح ربنا قال للمؤمنين يغضوا ابصارهم ياترى عن المنتقبة ولا الحلوة اللي متزوقة بغض النظر البنت كويسة ولا واخلاقها ولبسها غير مناسب المفروض الراجل يغض البصر مش ده مبرر انه يتطاول عليها
وياترى الشيخ اللي افتى ان البنات غلطانة مقالش انه برضه ذنب على الولد ويأثم به

عجيب والله بس المجتمع كله بيربى الولاد بطريقة غلط ان الاحترام والاحتشام ومراعاة الآداب ده للبنات فقط
اسمع للولاد كده وهم بيتكلموا بأحط الألفاظ وده عادي لا ويمكن يكون واد روش كمان ولو كان مؤدب يبقى واد خيخة واي كلام
سبحان الله

غير معرف يقول...

قيل لي اعرف نفسي
فأحتارت كيف استطيع ان اعرف نفسي أمممممممممم فأنا "الغير معرف "
فنحن تعلما من قبل ان هذان الحرفين "الـــ" هما اداة التعريف
فقلت نضع قبلي حرفي الالف واللام
وعلي رأي أستاذ معرف قال
لا يهمني شكلك ولا يهمني عنوانك فيكفيني انك انسان بمعاني الكلمة وليس فقط مخلوق عادي انت انسان
الان تعرفت الي واستطيع ان اقدم نفسي كما يجب ان تقدم ويمكن لا افيها الوصف أنا " الغير معرف انسان "

gogo!sf يقول...

بص يا عمرو انت صح جدا وجدا وانا بجد بضايق اوى من اللى يقولك ان البنت هى السبب فى ان الولد يتحرش بيها عشان بجد انا شوفت نماذج كتير اوى بعينى لاولاد سفله وبنات بصراحه زى الغفر عايزة اعرف ايه لفت نظرة فيها عشان يضايقها ويحاول يمد ايده عليها واحد ماشيه لابسه جيب طويل وواسع جدا وعليه بلوزة طويله وواسعه بردو وشكل اهلها يقطع الخميرة من البيت وملامحها ربنا يسامحنى كلها غلط ايه اللى يخلى واحد يوقف بنت وهى كده عشان يحاول معاها
اذاً العيب مش فى البنت العيب الاكبر على الشباب اللى مش قادرين يرتبطو ويلمو نفسهم
انا مش بحب بجد اعلق على موضوع التحرش عند حد عشان المناقشه فى الاخر بتوصل لمعركه بينى وبين صاحب الفكرة
هو فى بنات كتير اوى لبسها ملفلت جدا بس دول مش بيمشو فى الشارع على رجليهم معاهم عربيات يعنى محدش بيكلمهم نص كلمه والتحرش بيكون مع البنات المحترمين اللى لبسهم مش كاشف جسمهم وفى الاخر يجبلك عينه من البنات اللى لبسها ملفت ويقولك مهما السبب
على العموم ربنا يهدى ويستر ان شاء الله وحسبى الله ونعمه الوكيل
مش عارفه ده تعليق ولا بوست بصراحه

Follow by Email

Tetris