الخميس، 12 يوليو، 2012

رمضان وربنا يستر


ماحدش يستغرب المفروض انى انا مسلم واقول اللهم بلغنا رمضان واكتب بوست اقول فيه ذكريات رمضان الجميله وازاى انى بحب رمضان وفرحان انه خلاص على الابواب  عشان الروحانيات اللى فيه والعبادات والاشياء الجميله ديه كلها لكن رمضان بقاله فتره مختلف معايا  رمضان لم يعد رمضان الذى عشقناه من صغرنا فلم يعد شهر الروحانيات والعبادات اصبح شهر الخناقات وقله الدم والذوق والاخلاق فننزل الشارع فى رمضان الناس بتكون زى اللى منتظرين غلطه من الناس عشان يتخانقه معاهم بدعوى انهم صايمين ومش مستحملين والحر الى اخره تركب المترو تلاقى واحد مشغل قران بصوت الشيخ معرفش ايه لو مش عاجبك الشيخ مش هينفع تقول الشيخ مش عاجبنى على طول هتتهم انك مش عاجبك القران او الدين ولو اللى مشغل القران محترم وتفهمك هيتطلع واحد شيطان هو اللى هيعترض غير كل دا بقى الشيخ فتحى  بتاع الجامع اللى جانبى ربنا يهدىه  او ينتقم منه وياخده   مش عارف اتجمعت فيه كل صفات التخلف العقلى وعدم الاحساس  وكل شئ ردئ  اه اصل اللى يشغل الميكرفون عالى جدا فى صلاه اقامه الليل الساعه الثانيه او الثالثه صباحا   معلش يعنى انسان لايفهم شيئا ولايعقل شيئا يعنى لما يكون بينك وبين الجامع اكتر من ثلاثين او اربعين  متر  و الجامع عاملك ازعاج امال لو كان لاصق فيك هيكون  عاملك فيك ايه لا وكمان لما  تشتكيه هيطلعك تانى يوم يرقص على المنبر ويقولك طبعا حرب على الاسلام ماهو لو كنا بنشغل اغانى  ماحدش هيشتكى فكر متخلف واحمق وياريت ماحدش يقولى هو فى حد بينام فى رمضان  عشان حتى لو سهرانين فى رمضان مش لازم الكائن بتاع الجامع  يكرهنا فى القران  بالشكل دا دا انت لو مشغل تسجيل صوتك ببصوت عالى هتصدع منه وجايز تكره الكلام اصلا والغريب ان بعد رمضان يطلع يقولك نشكرالاخوه  المسيحيين على انهم استحملونا طول الشهر  ياشيخ يا ابو الغباء مين قالك ان الاخوه المسيحيين استحملو اهلك ان كان المسلميين خلتهم طول الشهر بيسبوا فى اهلك   غير كده الظاهره التى بدائت تظهر فى الاعوام الاخير فى الجامعات وفى الشوارع الناس اللى بقيت بتتلكك عشان تفطر  بتنتظر اى حد يعمل اى حاجه عشان تشتمه وتقول انا كده فطرت ومش محسوبلى صيام نفطر بقى حتى كثيرا ما تنسى اننا فى رمضان من كتر الفاطريين علنا   وغيرها وغيرها الى ان فقد رمضان بريقه السنوى  وفى الاخر بردوا نقول اللهم بلغنا رمضان بس رمضان من بتاع زمان مش بتاع دلوقتى   

هناك 11 تعليقًا:

Hebatullah يقول...

والله يا عمرو اهو البوست دا اللي بهرب منه ومش عايزة اكتئب بسبب نفس المشاعر دي

Alzhraa_Mustafa يقول...

والله هوا الأخلاق بايظه وباقت حاجه أستغفر الله العظيم مش بس فى رمضان ... بقى الواحد بيكره ينزل من بيته ... وعلى رأى حضرتك حتى وهوا فى بيتو دلوقتى مبيسلمش ....... هيا عقول الناس كل مدى بتصغر ولا انا متهيقلى ؟؟؟
ربنا يرحمنا برحمتو

Bent Men ElZman Da !! يقول...

حكايه ان رمضان فارق كتير بين زمان ودلوقتى دى بقت حاجه محسوسه وواضحه من كان سنه مش من السنادى
الناس اختلفوا واختلف احساسهم بالشهر الكريم
بيستفزنى بردو حكايه الجامع اللى بيقول صوته عالى
لان من الادب ودينا علمنا اننا نحترم غيرنا
حتى لو فى عزاء مثلا المفروض الصوت مايبقاش عالى
بالنسبه بقى لحكايه الناس اللى بتفطر
انا اتفاجئت بيها بجد فى رمضان اللى فات
بقوا بيتعاملوا مع الموضوع ده عاااااااادى واللى يقولك اصلى بشتغل وبلف وبتعب طول اليوم وماعرفش اشتغل من غير السجاير وكبايه الشاى !!!!

بعيداً عن كل ده بقى
اللهم بلغنا رمضان
وكل سنه وانت طيب :)

هبة فاروق يقول...

ربنا يستر ان شاء الله حيستر
كلنا بنحمل هم رمضان لكن بيمر الشهر ببساطه عكس ما نتوقع
بالنسبه للميكروفون انا كمان بيزعجنى ان مش فاهمه هو لو اتكلم بصوت اوطى من كده مش حنسمعه وليه بقى الميكروفون عالى دى ظاهره بجد بتستفز ناس كثير والا بقى لو بياذن وصوته زى الغراب بجد استغفر الله الواحد بيبقى عايز ينزل يخنقه ويقوله اسكت
وظاهره الافطار دى بقى فى كل وقت وزمان ربنا يهدى الجميع
ورمضان كريم

الازهرى يقول...

ربنايهديك يا عمرو

يا ابنى أعصابك
اهدى على نفسك شوية

مصطفى سيف الدين يقول...

يا عمرو لو لقيت المجتمع بايظ
نصيحة متتعصبش
بس ابدأ انت بنفسك

;كارولين فاروق يقول...

اولا رمضان كريم
وكل سنه وانت طيب
للأسف يا عمرو احنا عايشين
في مجتمع يحب تعليق المشانق وانا سميته
مجتمع الفضائح
نحب نمسك لبعضنا اي حاجه علشان نقول للناس احنا فل ويقولوا يا سلام ايه التقوي دي
لكن اللي قولته النهارده في منتهي التحضر وانا احيانا بأعاني منه
لكن للأسف لا نملك الحريه الكافيه
وبيت ابي بالمناسبه جنبه جامع نفس المشكله في الفجر يقيم الصلاه في الميكروفون وعايزه اقول له يا سيدنا الحج افرض في عيان او تعبان
تفتكر حايفهم؟
تحياتي

شمس النهار يقول...

اهو البوست ده
صوح الصوح
ده غير انه بيفسد عليك خلوتك في بيتك وصلاتك في بيتك
مابعرفش اركز منهم
وده مش من الدين في شئ هو بيصلي بناس جنبه مش في الحي التاني
انا بقا جنبي اربع مساجد ومكريفوناتهم موجهه علي ودني بالظبط

richardCatheart يقول...

ههههههههههههههههههههههههههه صحححححححححححححححححححححححححححححححححح

ربنااااااااااااا يستر

MEROOooOOoo يقول...

ربنا يهدينا كلنا
ونقدر نغير من أنفسنا رمضان ده
تحياتى

beautiful mind يقول...

اولا كل سنه وحضرتك طيب بقدوم شهر الطاعات شهر رمضان الكريم
ثانيا
فعلا سلوكيات الناس اتغيرت وبقت غريبة ومستفزه لكن والله بردو دول قلة من الناس واغلب الناس الحمد لله متدينين ومحافظين علي صيامهم
وبالنسبة لشيخ الجامع اكيد محتاج حد عاقل يكلمه وينصحه بالحسني ان فيه ناس تعبانه وناس عايزه تريح واكيد ان شاء الله هيستجيب
ربنا يبلفنا رمضان

Follow by Email

Tetris