الأربعاء، 4 يوليو، 2012

مع نفسى البوست الموحد فى حمله التدوين اليومى



1/ عرف نفسك  ؟
قد يكون دا اصعب سؤال من انت من انت بيانات ولا شخصيه ولا فاعليتك فى الوجود ام ماذا سؤال شامل يصنع حيره وتوهان  فى الاجابه  حتى ولو هتجاوب عليه لنفسك  محتاج محاسبه لذاتك اولا قبل الاجابه عليه
من انت  يا نهاااااااااااااااار
على العموم نكتفى بالهروب مؤقتا الى اجل غير مسمى ونقول
 عمرو يسرى  مواطن يسكن فى شبرا الخلفاوى الدور السابع  
 ساعات بيكون شاب عجوز وساعات عجوز متصابى وساعات وساعات من الاخر بحالات
2/ مااكثر مايميز شخصيتك ؟
للاسف معرفش يمكن يميزها ايجابيات وممكن يميزها سلبيات لكن اللى ممكن او يمكن اكيد ان يكون بيميزها انها لانسان خلقه الله سبحانه وتعالى يمكن يكون  له ايجابيات لا يعلمها  واكيد له سلبيات  لايعلمها
3 /  ماهى اهم نقطه تحول فى حياتك ؟
جميع النقاط التى مررت بها وان لم تؤثر بسلوك واعى فقد اثرت  بفكرنفسى داخلى  وطبيعه قد تتحول لسلوك فيما بعد وتؤثر وان لم اكن اعيها الان فقد اعيها عندما  احلل بعضا من سلوكياتى الحاليه او المستقبليه
4/كيف دخلت عالم التدوين ؟
عن طريق صديق جامعه كان عامل مدونه ومابيكتبش فيها  اساسا
5/ ما اسم مدونتك ولماذا اخترته ؟
فضفضه  واخترته لان بفضفض
6/ صف مدونتك ؟
 مدونه بها مجموعه من الفضفضات حتى البوستات الخيبه اللى ممكن حد يسميها سياسيه فهى ايضا فضفضه يعنى من الاخر عيادتى اللى بتعالجنى من امراضى النفسيه والفكريه والعصبيه
7/ من هم اكثر ثلاث شخصيات اثروا فيك داخل عالم  التدوين؟ ومن خارجه ؟
كل من عرفتهم سواء عرفونى او لم يعرفونى فقد تركوا بصمات داخلى فكل مدونه لها فى قلبى علامه  اما من خارجه فممكن اقول والدى الله يرحمه  والدكتور مصطفى محمود الله يرحمه  والكاتب نجيب محفوظ  الله يرحمه   وكل من عرفتهم وكل من حولى
8/ ماهى طقوسك الخاصه عند الكتابه ؟
مااليش طقوس وقت ماربنا يريد بيكون
 9/ ماهو الاسلوب المفضل لديك فى التدوين ؟
اسلوبى الذى لم اقيمه ولا اعرفه ولكن من قراء لى ممكن يجاوب افضل منى
10/ فى رايك ماهم مايميز تدويناتك ؟
يارب تكون لها ميزه لو حد عرف يقولى عشان لما اتسئل تانى اعرف اجواب
11/ ماهو تقيمك لعالم التدوين فى الفتره الاخيره ؟
من ناحيه القيمه فهو مجال متجدد يوميا فكل يوم يظهر مدون رائع يثرى عالم التدوين
ولكن عاطفيا فيؤلمنى كل مدون غادر او ابتعدعن عالم التدوين وخصوصا بعد ماتعودنا على جمال ما يكتبه
12/ اختر اقرب تدوينه الى نفسك وضع رابطها وحدثنا عنها ؟
كل التدوينات على مسافات واحده الى نفسى فالتدوينه الاقرب لم تكتب بعد
13/ استعرض اهم المواقف الغريبه او الطريف التى صادفتك مع التدوين ؟
قد تكون المواقف الغريبه او الطريفه فى التعليقات عندما يدخل احد ويكون كل تعليقه تقبل مرورى وفقط اللى هو ماتفهمش منه طب هو عايز ايه واقبله ازاى  غير صاحابنا بتاع ثقافه الهزيمه اللى يدخل يعلق ببوست لوحده مالوش علاقه باللى انت كتبه
14/ هل احدث التدوين تاثيرا عليك ؟ وكيف؟
بالطبع فمع كل تدوينه اكتبها علاج لنفسى وروحى  وعقلى واعصابى من شيئا ما  وكثير مااقراء تدوينات لاخرين ارى فيها نفسى ونداء لنفسى  لاصلاح اعطال بها
15/ اختر مدون ووجه له سؤال ؟
عمرو يسرى صاحب مدونه فضفضه  انت مين ياض ؟

   


هناك 13 تعليقًا:

ليلى الصباحى.. lolocat يقول...

السلام عليكم
مع نسائم الفجر ارسلت لنا ابتسامة طيبة مصحوبة بخفة روح وبساطة وعفوية استطعنا التعرف عليك عن قرب اكثر
اسلوبك مرح وكله شباب وحيوية :)

سعيدة بمتابعتك دائما ياعمرو ومدونتك جميلة
بالتوفيق ان شاء الله

Aya Mohamed يقول...

فالتدوينه الاقرب لم تكتب بعد
الجملة دى وقفت عندها شوية كتير
اوحتلى بفكرة حلوة اوى
مبسوطة انى اتعرفت عليك
وعجبتنى اجاباتك جدا
بالتوفيق دايما ان شاء الله

مصطفى سيف الدين يقول...

اجاباتك هادية و رايقة جدا يا عمرو
زي شخصيتك كده
من غير صخب بتعرف توصل للقلوب و العقول و دي من اكبر مميزاتك اللي بتسألنا عليها
تسلم الايادي يا كبير

ريـــمـــاس يقول...

صباح الغاردينيا عمرو
:)
بجد أبتسمت ويارب كل أيامك إبتسامة إجاباتك جميلة لأنها عفوية وصادقة وأقدر أقولك عمرو أنسان بسيط وفضفضته عفوية وروحه مرحه "
؛؛
؛
لروحك عبق الغاردينيا
كانت هنا
reemaas

شيرين سامي يقول...

هههههههههه
طب إنت مين بقى :)

عارف أهم ما يميز تدويناتك إنها صادقه إنت كل كتاباتك مش مفتعله و ده بيخلينا حاسين إننا قاعدين معاك و إنت بتكلمنا..

إجاباتك 10/10 يا فاندم :)

تحياتي لك

الازهرى يقول...

يا لذيذ يا رايق

صباح الفل يا كبير

أحمد أحمد صالح يقول...

هههههههه..!!
الضحكة دي على السؤال الأخراني..اللي هي اجابة برضة للسؤال الأخراني !!
..
جميل اللي كتبته..و ان كنت برضة لسة ما عرفتكش كويس..هأعرفك أما أسمع اجابتك عن السؤال الأخير !!
..
لا بجد سعيد باللي عرفته عنك..و يارب دايما بالتوفيق..و سعادة ونجاح دائمين بإذن الله..و تقبل مروري !!..مش عاوزه ابعته ليا على عنواني تاني..أوعك ترميه !!
..تحياتي

كريمة سندي يقول...

من الشيق التعرف عليك ععن كثب .. جميل ما قرأته هنا تحية ود وتقدير

فاتيما يقول...

بلاش يا عمرو والنبى حكاية كل التدوينات على مسافات واحده الى نفسى عشان بتفكرنى بالمجلس العسكرى الله يكرمك وانا بحاول أنسى

:)


عجبتنى حكاية الخلفاوى شبر الدور السابع دى
:)


و الجدع بتاع ثقافة الهزيمة دا مورينا الويل كلنا ومش انتا بس يا طول باله الصراحة ...


حكاية نقطة التحول دى
فعلا سؤال صعب واجابتك اكتر حاجة قريبة لنفسى شوفتها
الواحد طول ما هو ماشى حاجات تحصله وتغير فيه من غير ما يحس ..
ودا الاهم والأخف وقعا ع النفس من حكاية نقاط التحول الكبيرة اللى بتخض دى وغالبا بتكون مرتبطة بصدمة او ازمة .. او حاجة الواحد مش عاوز يفتكرها



كل تاج وانتا بتفضفض معانا

:))

re7ab.sale7 يقول...

ههههههههه
اه والله انا نسيت بتاع ثقافة الهزيمة ده
بس عجبني اكتر " انت مين ياض "
هههههههه
انت عسل والله يا عمرو

eng_semsem يقول...

طيب بالنسبه للسؤال الاخير بتاع انت مين ياض انت مستني يجاوب ههههههههههه
تسلم ايدك يا عمرو ويارب نتجمع قريب في تجمع جميل زي بتاع اسكندريه ويضم كل مدونين مصر
تحياتي

Deyaa Ezzat يقول...

إجاباتك أخدت فعلا شكل الفضفضة .. الظاهر إن ده أسلوبك دايما .. كنت مرتاج أوي وانا بقراها

مبسوط جدا سا أستاذ عمرو بمعرفتك وبزيارة مدونتك

إيمي يقول...

انا بدور عليك من زمان و النهار دة شفت اسمك و مش فاكرة ان كنت دخلت مدونتك و لالا قبل كدة
بس فاكرة اني دورت عليك فترة كويسة يعني و دلوقت لما دخلت على اسمك لقيت مدونتك بسهول فانا كنت بدور عليك ليه ؟ المهم حبيت اقول و خلاص ، مش بتفضفض انت برضه ؟

غير كدة ، سعيدة أوي إني اتعرفت على شخصيتك المرحة البسيطة
عجبتني حكاية اللي عامل مدونة و مبيكتبش فيها اساسا دي برضه وجهة نظر يعني
و التدوينة اللي لسة متكتبتش لما تبقى تكتبها ابقى حط جنب العنوان اعلان عشان هي اخدت اهمية يعني :D
اما انت مين ياض ؟ فدة سؤال أتحدى إن فيه حد مر من هنا أو في العالم كله يعرف الرد عليه . عشان كدة عملت مدونة أنا و في لحظة كنت بفكر مع نفسي و لقيت اجابة السؤال ان انت مين سؤال ممكن تجاوب عليه و انت على فراش الموت يعني ممكن تعد انجازاتك كام و قد ايه عملت قيمة مضافة في الدنيا و دة الدليل الوحيد إنك كنت و عديت من الدنيا دي ممكن ناس كتير تقول إن ممكن تثبت وجودك بالناس اللي بتحبك سلوك معاملات بس هييجي يوم و ينقرض كل اللي عرفتهم و ييجي جيل جديد مع الوقت ينساك اكيد انا مثلا معرفش حتى اسم جد جد أمي كدة يعني بس الكل يعرف أديسون مثلا .
هو أنا بكتب تعليق و لا بوست .. سلامو عليكم ( سوري على الإطالة ) و أخر حاجة عجبتني مدونتك

Follow by Email

Tetris