الاثنين، 2 يوليو، 2012

الكيل بمكياليين


عندما يسئ احد للاسلام  الدنيا عندنا بتقف على رجل ولا تقعد  وعندما يحدث ويسئ  احد مننا احنا للبهائييين اواى ديانه اخرى  بنقول احسن وبيكون السبب ديه مش ديانه سماويه  ونحن كمسلميين لا نعترف الا بالديانات السماويه  اسلام مسيحيه  يهوديه  الخ  طب انا نفسى اعر ف بقى مادام الموضوع كده  بنغضب من البوذيين لما مايعترفوش بينا ليه  وبنقول اضهاد الاقليه  لفت نظرى كلام واحد زميلننا لما بيقول الناس اللى زعلانه من اللى بيحدث فى بورما  مازعلتش ليه لما اتحرق  بيوت للبهائيين فى سوهاج هما دول بردوا مش اقليه  بس احنا عندنا الميزان باكثر من ذمه شويه
بردوا فى موضوع تانى  الاخلاق الجميله اللى ظهرت بعد الثوره ديه وماحدش يغلط فى الرئيس محمد مرسى ومراته  كانت فين قبل الثوره فى الرئيس السابق مبارك وعائلته  هيتقال انت هتساوى اللى سرق وقتل وظلم باللى لسه ماعملش حاجه   بس بردوا اللى سرق وقتل وظلم  ممكن نقول حرامى قاتل سارق مش لازمه نتكلم فى عرضه يعنى ونعمل نكت جنسيه على اسرته  ماينفعش. هيقال ماهو دا قبل الثوره ودا بعدها بس بردوا الرئيس السابق بعد الثوره لم يسلم فى عرضه من كلام الناس هيتقال انت هتساوى حافظ القران بمبارك  هيتطلع الف حجه لشتم دا واحترام دا حاجه  مسخره
اخر موضوع  الافراج عن عمر عبد الرحمن  
مش هكلم فيه لانى معرفش الشيخ   لكن هعرض   سؤال  زميلتنا على الفيس Mona El-Gharbawy  واتمنى الاقى اجابه تانيه  غير اجابتها الذى اؤيدها فيها
"ليس عندى أدنى شك بأن حسنى مبارك مدان فى العديد من الأمور كما ليس عندى أدنى شك أيضا بأن عمر عبد الرحمن مسئول عن العديد من المجازر البشرية التى حدثت بسبب أنحراف جماعاته والسؤال إن كنا نريد الرأفة بشيخ ضرير وعجوز فلما لا نريد الرأفة برجل أيضا عجوز ومريض وكلاهما مداااااااااان - سؤال فقط خطر فى بالى بمناسبة الكيل بمكيالين"

والاجابة ببساطة لان الضمير فى وطنى " أعــور "  "
Top of Form

انتهى 

هناك 5 تعليقات:

مصطفى سيف الدين يقول...

الضمير اعور فعلا
بصراحة يا عمرو احترمتك جدا في البوست ده انت بتتكلم بوجهة نظر مختلفة في اخطاء كلنا بنقع فيها
بس احنا مش في يوتوبيا يا صديقي و البهائيين لو ليهم ضهر جامد يتسندوا عليه ولوبي قوي في باقي دول العالم مكنش حد عرف يحرقلهم بيوتهم , فهو ده المنظور اللي بص منه الناس لبورما اننا كمسلمين مالناش ضهر قوي , شوف الهولوكوست مثلا حصلت او محصلتش الله اعلم من سبعين سنة و مع ذلك لحد دلوقت في تعويضات بتروح لاسرائيل من وراها علشان ليها لوبي قوي هو ده الاساس يا صديقي
النكت على مبارك بقى و عيلته كانت بتتقال عادي جدا علشان عمرها ما كانت هتأثر في ألوهية فرعون هو نفسه اصبح إله و لو تفتكر فيلم فجر الاسلام اظن لما كان بائع الاصنام بيحكي قصة زنا إله و إلهه و الناس فضلت تعبدهم و القصة مخلتش الناس تقول ايه الاشكال اللي بنعبدها دي
اما محمد مرسي فلم يصير فرعون بعد علشان كده اللي بيدافعوا عنه بيطلبوا بعض الوقت حتى يصير فرعونا بعدين تتفضل تقول نكتك و تريقتك زي ما تحب

أحمد أحمد صالح يقول...

واضح كدة انك ناوي تودينا في داهية بتدوينتك دي !! هههه
..نبدأ بليه نحاسب مبارك و عمر لأ..يمكن لأن مبارك كان مسئول و عمر لأ !! رغم انهم الاتنين مجرمين !!..و يمكن عمر أكتر لأنه كان بيعمل ده بأسم الدين !!
..
طبعا أنا ضد الاهانة و الشتاءم..وان كنت بأعزر شوية الناس اللي بتشتم..شتيمة محترمة !!
بس دايما بأحط قدامي أيتين من القرآن، الاولى التي قال فيها الله عز وجل : ولا تنابزوا بالالقاب،و التانية التي يقول فيها،و لا تسبوا الذين يدعون غير الله فيسبوا الله عدوا بغير علم...
..
التسامح هو جوهر أي دين ، و هو تقريبا أول شئ ينساه منه معتنقوه، فيعتقدوا أن التعصب له بحق و بدون حق هو قوة ايمان و نصرة للدين..و كفاية كدة !!

eng_semsem يقول...

انا ما اظنش ان في حد من الشيوخ فرح لما حرقوا بيوتهم ومحدش بيعترض على ان ده غلط واكيد ده مش من اداب الاسلام او من الدين والشيخ عمر عبدالرحمن لم يثبت عنه انه قتل احد وتهمته التآمر في تفجيرات نيويورك والله اعلم ان كانت تهمه حقيقيه او لا واكيد انت عارف الفتره ده كانت امريكا بتعامل الاسلاميين ازاي وكانت الطلبات قبل كده انه يكمل سجنه في مصر مش اكتر
وانا مؤيد ليك بشده لازم يكون العدل عنوان واحد مع الجميع بغض النظر عن الدين او الانتماء السياسي والحزبي
تحياتي

ليلى الصباحى.. lolocat يقول...

الضمير اعور لان المفروض يكون جداره وحصنه الحصين دستور ربانى هو شرع الله
لكن لما نكون بنحكم فى كل امورنا بأهواء بشر و قوانين بشر اكيد هيحصل زلل ولخبطة كتير وظلم اكتر

طبعا انا من اشد الناس اللى بتكره مبارك لكن اكره اكتر اللى يشوه تاريخ بلادى بكل مافيه من مر وحلو

ومش بحب ابدا ( التريقة ) والسخرية اللى بتحصل على الفيسبوك والنكت السخيفة لا على مبارك ولاغيره

لكن بالنهاية المخطىء مخطىء وماينفع نقلل من خطأه ابدا والعفو عن اى انسان يقاس بحجمه وقدر ما فعل

صدقنى اخى الكريم والله الذى رفع السماء بغير عمد لو طبق شرع الله على كل صغير وكبير سنرتاح جميعا وسيختفى الكيل بمكيالين

الله المستعان
تحياتى لك

Bent Men ElZman Da !! يقول...

افضل تعليق
فعلا اعور واحتمال كبير يكون اعمى كمان
يمكن مشكله البهائيين لان احنا فى مصر مش متعودين يكون موجود غير الاسلام والمسيحيه
يعنى حتى اليهوديه هتلاقى فى تخوف منها فى مصر بالرغم من انها دين سماوى
المشكله فى الاعتياد والمفهوم اللى اتربينا واتعودنا عليه دايماً
نحن نحترم ما احترمه ابائنا والعكس صحيح

وبالنسبه للنكت على محمد مرسى
العيب فينا بردو
ماتعودناش اننا نختلف مع حد باحترام

أحيك على موضوع

Follow by Email

Tetris