الأحد، 1 يوليو، 2012

بورما والتضامن الترانزيت مع القضايا

فى الايام الاخيره الناس سخنت وهووب الكل بيتكلم عن بورما او جمهوريه اتحاد ميانمار  وانا بصراحه معرفهاش اساسا بس  عرفت انها احدي دول جنوب شرق اسيا  اللى انا نفسى اعرفه الناس عرفتها منين مين وسط الزخم  اللى فى الاحداث دا فايق يشوف اخبار  دوله  محدش يعرفها ولا بيسمع عنها اساسا وليه الضجه ديه كلها   وكمان  هو احنا حررنا القدس مثلا  او عملنا حاجه للناس اللى كانت بتموت  فى سوريا ولا غيرهم  كل شويه  بنعدى على  قضيه  ترانزيت ننشغل بيها  ونمشى   من ايام محمد الدره اللى  فى جيل اول مره يعرف فلسطين كان بسببه   ننشغل ونحتج ونتضامن وبعدين نهدى وننسى يحصل حاجه فى فلسطين تانى نتعصب ونحتج ونتضامن  ثم نهدى وننشغل برسام رسم صور للنبى او اتريق عليه وننسى الاولانى ونحتج ونثور ونسب فى الرسام  وبعدين ننسى يحدث حدث تانى نحتج ونثور ونتضامن وبعد كده نرجع ننسى  وننشغل بالحجاب فى فرنسا والمسلمين هناك  ونثور ونحتج ونشجب وبعدين ننسى ونام الى ان وصلنا الى بورما اللى ماعرفش ظهرت ازاى وادينا تضامنا  يلا بقى ننسى وننتظر اللى بعدها  نفسى  نشوف مشاكلنا المصريه و العربيه   والمسلمين فى الداخل اللى هنا وبعدين اللى فى اى حته تانيه  بدل ما احنا بدائنا نتعامل مع مشاكلنا زى مشاكل الدول التانيه نمر عليها ترانزيت  لان مشاكل الدول التانيه مش هتخلص اصلا  وخصوصا ان فى بورما ديه الكل داخلها بيشتكى من الحكم العسكرى الللى فيها حتى البوذئيين نفسهم  ولو  شوفنا  تقارب الاحداث بنا وبينهم    مثل الحكومه الوطنيه اللى عندهم  وديه نبذه عنها
 الحكومة الوطنية. تسيطر على حكومة بورما مجلس عسكري يُسمَّى مجلس الدولة للسلام والتنمية؛ ويتولى رئيس المجلس مسؤوليات رئيس الوزراء ووزير الدفاع. ويعتقد كثير من الخبراء أن القائد العسكري ني ون الذي حكم البلاد بين عامي 1962م و1988م، لا يزال يسيطر على أعمال المجلس. وقد تسلم المجلس السلطة بانقلاب عسكري في سبتمبر 1962م، وكان يعرف حتى عام 1997م باسم مجلس الدولة لاستعادة القانون والنظام. وقد ألغى الانقلابيون السلطة التشريعية وغيرها من المؤسسات الوطنية الحكومية. وفي عام 1990م أجريت انتخابات متعددة الأحزاب، نال فيها الحزب الرئيسي المعارض وهو حزب الرابطة الوطنية للديمقراطية أغلبية المقاعد، غير أن الحكومة العسكرية أوضحت أنها لن تسمح بانتقال السلطة حتى يتم وضع دستور جديد. وبدأت جميع الفعاليات السياسية اجتماعات متواصلة منذ 1993م لوضع الدستور الجديد.  
فالتشابه دا بيقول ان اللى بيحصل هناك فى بورما من فتن بين اطرافها هو مايحدث عندنا من فتن  بين  المسلميين والمسحيين والبهائيين وغيرهم من الاطراف التى لم تظهر  يعنى  بس احنا هنا على خفيف وبتتلم بسرعه فكل دوله تخليها  فى نفسها لان على راى المثل اهل مكه ادرى  بشعابها   
عشان زهقنا من كتر التضامن اللى مالوش لازمه غير انه يشغلنا عن قضايانا  الاساسيه وبعدين ننسى  وبعدين نتضامن وبعدين ننسى  طب نبقى دوله تقدر تضامنها يكون له قيمه ويحل بدل التضامن التزيطى  والنسيان بعده عشان نبطل يكون تضامنا تضامن ترانزيت  وخلاص


هناك 4 تعليقات:

مصطفى سيف الدين يقول...

معاك حق يا عمرو
بس التضامن هو تضامن تعاطفي تضامن شعبي وقفات مسيرات حاجات من اللي مبتأكلش عيش
صح ان الحال من بعضه بس لما تحس انك متعاطف مع غيرك بتحس انك لسه عايش

أميرة يقول...

وليه نفتكر قضية وننسى التانية ليه بنتضامن ترانزيت ؟؟
ليه مانهتمش بكل قضايا المسلمين في نفس الوقت
مش معنى انهم بلد ماحدش بيسمع عنها يبقى العالم ينساها القضية مش قضية دين قضية انسانية ان ناس بتتقتل بالوحشية دي عشان معتقد ديني او فكر بيؤمنوا بيه ايا كانت الديانة دي ايه دة غير انهم مسلمين
والمفروض ان الاسلام بيقول انك تعمل اضعف الايمان بلسانك او بقلبك التضامن الترانزيت خلى ناس كتير تعرف القضية
وماخدش وقت من أوقات كتير بتضيع على النت بدون داعي لو نهتم بكل قضايا المسلمين بنفس الفكرة أضعف الايمان ونستمر اكيد هيحصل حجات كتير اوي بس المشكلة اننا نفسنا قصير وبننسى بسرعة

أحمد أحمد صالح يقول...

يمكن بأتفق معاك يا عمرو في معظم كلامك لكن بأختلف معاك في شوية حاجات..
الاهتمام بأمر المسلمين في كل العالم واجب ديني..
..يمكن فعلا تعاطفنا تعاطف ترانزيت و عجبني جدا تعبيرك ده و فعلا صح اننا بنزيط شوية و ننسى..الخ ، بس يمكن أي تعاطف يجيب أي نتيجة ايجابية ولو بسيطة ممكن بعدها تكبر..
يمكن كتير هيفهموا انك بتقول خلينا في حالنا،بس انا يمكن لامس في كلامك الحسرة و خيبة الأمل على طريقة تعاطفنا اللى تقريبا ما بتجيبش نتيجة و على وضعنا اللي ما يسرش..يمكن نحتاج بس يكون تضامننا أكثر فعالية،يمكن ده صعب بس مش مستحيل..و مين عالم..ممكن نعيش لحد اليوم دة !!
..تحياتي

شمس النهار يقول...

بوست جميل ياعمرة

وتلاقي الدنيا قامت وترجع تهبط تاني
ونغير البروفيل علي الفيس والافيتار علي تويتر
ونرجع مطرح ماكنا

Follow by Email

Tetris