الخميس، 28 يونيو، 2012

نفسى افهم


على الفيس بوك وبلوجر ناس  كتير غاضبين من الناس اللى بتتريق او بتسخر من مرات محمد مرسى  ونحن معهم  ونؤيد فنحن ضد اى سخريه من زوجه احد ولكن المشكله عندى انا  انه بيقابلنى الناس ديه على الفيس وبلوجر لكن عمر ما حد من اللى بيسخروا من مرات محمد مرسى  قابلونى لا فى الفيس ولا فى البلوجر   و اول مره  اشوف صورتها اصلا كانت فى احدى المدونات اللى غاضبه من اللى بيسخروا منها   انا عايز اعرف فيه فعلا ناس بتسخر من مراته ولا دا اسلوب دعايه رخيص من الاساليب الرخيصه بتاعه   جماعه الاخوان
على الجانب الاخر انتشرت فى الفتره الماضيه صور لزوجات الفريق عنان والمشير طنطاوى بدون لازمه  واحاديث  عن مرتباتهم وتهم بدون ادله وبدون قضيه   ومافيش حد اعترض ولا قال عيب اختشوا  ياترى ليه هل سنبداء عهدا جديد بالكيل بمكيالين  ولا ايه الموضوع مش فاهم  بس ممكن مادام فيه ناس كتير مضايقه وغاضبه من التريقه او السخريه او التحدث باسلوب غير لائق عن مرات مرسى  وماحدش شايف حد جاب فى سيرتها  اصلا  وفى نفس الوقت نشر صور لزوجات الفريق عنان والمشير طنطاوى  والتحدث عنهم  بطريقه مش كويسه يبقى ممكن نستنتج ان المشير طنطاوى او عنان هما محمد مرسى واحنا مش واخدين بالنا او ان الاخوان ماشين على مبداء جرحنى وبكى وسابقنى واشتكى  ولا ايه  ماقصدش من كلامى ان الاخوان هما اللى بينشروا صور زوجات عنان  وطنطاوى لكن انا عايز افهم موقف مش فاهمه ازاى الناس مخنوقه من اللى بيسخروا من مرات مرسى وانا مش لاقى حد بيسخر من مراته  وماحدش زعلان من اللى بيسئ لزوجته عنان وطنطاوى بالرغم ان الكلام عنهم زاد  اليس الاثنين نساء ولهم ابناء يغضبون مما يقال عنهم ام ماذا
انا  مش فاهم حاجه ويارت لو حد شاف صفحه او موقع او اى حاجه  بتسخر او بتسئ لزوجه مرسى او ابنائه ياريت يتركلى لينكها عشان اشوفها عشان مش معقول اشوف الناس اللى مضايقه منهم ومشفهمش هما نفسهم 
انتهى

هناك 8 تعليقات:

ليلى الصباحى.. lolocat يقول...

http://www.youtube.com/watch?v=Q5P4chEnJo8&feature=my_liked_videos&list=LLf8OjmS-QXMzKwQ9a_wTJVQ

ده فيديو رد على الناس اللى بتتريق على الست ام احمد او زوجة مرسى بشكل سخيف ومستفز
انا لست من الاخوان ولا سلفية لكن مسلمة اغار على اى امرأة محجبة تهان وخاصة لو زوجة رئيس بلدى

للاسف تركوا كل شىء واشتغلوا بقلة ذوق على لبسها وهيئتها مع انها اول حاجة قالتها مش عايزة حد يقولى سيدة مصر الاولى انا خادمة مصر الاولى وترفض البقاء فى القصر وتريد ان تسكن فى بيت كبير يتناسب ووضعها الجديد

https://www.facebook.com/almdynt.alfadlt?ref=tn_tnmn

هذا رابط صفحتى على الفيسبوك وفيها كل ماتريد

تحياتى لك

عمرو يسرى يقول...

استاذه ليلى الصباحى
الفديو رد على اللى بيتريق انا عايز اشوف فديو او اى حاجه عن اللى بيتريقوا مش اللى بيردوا عليهم انا معا اللى بيردوا بس عايز اشوف اللى بيتريقوا

re7ab.sale7 يقول...

انا كمان مع الاخت ليلي في كل كلامها
انا مش اخوان ولا سلف بس انا مسلمة والاسم قال " لا يسخر قوم من قوم"
يعني حرام بجد اللي بيحصل ده
ده اهانة للدين مش للأشخاص
انا متفهمة كلامك يا عمرو

عمرو يسرى يقول...

رحاب صالح
ياستى وانا معاكوا ولا اريد ان اسخر من احد واحترم مرات مرسى وزوجات الناس كلها
بس بلاش ربط الدين بالاشخاص هو لا اهانه للدين ولاحاجه لكن بالطبع هو يهين المسلمين اللى دينهم بيقول لا تسخروا من احد ويسخرون من الناس وكلامى ان ماشفتش حد من اللى بيسخروا منها بشوف بس الناس اللى بيسئوا لزوجات عنان وطنطاوى وانا اصلا ضد من يسئ لزوجه مرسى او عنان او طنطاوى او اى حد تانى

الازهرى يقول...

نام يا عمرو وريح دماغك

عمرو يسرى يقول...

الازهرى
وتفتكر كده هفهم

مصطفى سيف الدين يقول...

اول حاجة انا شفت راي لسميرة أحمد قالت ان مرات مرسي متنفعش سيدة مصر الأولى
ثانيا سمعت - لكن ما شفتش الحقيقة - ان في حفلة في تويتر كانت عليها
ثالثا يا عم ريح دماغك دي مش اغرب حاجة هنسمعها و نشوفها
البلد دي لو حاولت تفهم كل الظواهر اللي فيها هتتعب كتير

ريـــمـــاس يقول...

صباح الغاردينيا عمرو
:)
انا كمان سمعت ناس بدافع عن مرات مرسي
بس ماشفتش الناس الي بتشمتها وبتتريق على حجابها
وياليت تبقى سيدة مصر الاولى بعملها وحرصها على البلد
مش بلبسها او اناقتها "
؛؛
؛
لروحك عبق الغاردينيا
كانت هنا
Reemaas

Follow by Email

Tetris