الاثنين، 25 يونيو، 2012

مش فاهم حاجه

الواحد ماكنش فارق معاه مين يكسب مرسى ولا شفيق   لان ما اسخم من سيدى الا ستى  فلما مرسى كسب مافرحتش زى الناس بس اهو مبروك لمرسى وبالتوفيق نحترم النتيجه وخلاص ولكن انتابنى شويه اسئله كده  بعد النتيجه اولا دا مرسى  اللى كسب يعنى التاخير ماكنش عشان يزوروا النتيجه لشفيق  ؟    لا كمان بيقولوا الانتخابات كانت نزيهه  ياسلام  ياترى لو كان خسر كانوا هيقولوا عليها نزيهه ؟ 
ايه دا الانتخابات قالوا عليها نزيهه ولم تزور وشويه كمان  المجلس العسكرى هيسلم السلطه  ايه دا دا المجلس طلع ابن ناس ومش طامع فى السلطه ولا حاجه  ايه دا كمان المشير بيهنئ مرسى بوصوله للكرسى  ايه دا ايه اللى بيحصل  على كده المجلس كان اخلاق ومحترم وصادق ولا ايه  على كده بقى احنا عملنا زى حديث الرسول كذبنا الصادق  وصدقنا الكاذب ولا ايه اللى بيحصل طيب مادام الانتخابات نزيهه والحياه جميله على كده المجلس مش هيتحاسب على ادائه فى الفتره الانتقاليه وكل الاحداث اللى حدثت من وقت ما مبارك تنحى والمجلس العسكرى تولى  ولو اتحاسب هبطلع ادائه عالمى مافيش منه  واللى قتل الطرف الثالث    ودا طبعا بعد حل مشكله الاعلان الدستورى المكمل  وخلاص ويتلاقى الحبايب  والحياه حلوه  طب دم الشهداء والثوره مالهم يا ابنى الراجل محمد مرسى شكرهم وكان ناقص يضربلهم تعظيم سلام زى ماعمل العسكرى فى الاول قبل ماتهتف الناس  ضده  انا  اعتقد اننا  نقول  لام الشهيد واسرهم يا يستشهدوا مع ابنائهم يا اما عوضهم على الله بقى  ايه الموضوع يا جماعه انا مش فاهم حاجه اللى فاهم يفهمنى كمان الراجل شكر القضاه عموما  وقال فيهم كلام حلو امال ايه حكايه تطهير القضاء اللى الناس عايزاها ديه ما القضاء حلو ونزيه اهو وغالبا الاحكام بتاعت مبارك ونظامه هتطلع عادله اللى فاهم حاجه يفهمنى  بس بردوا نقول مبروك لمرسى والى اللقاء فى ثورات اخرى 

هناك 3 تعليقات:

مصطفى سيف الدين يقول...

يا سيدي متدقش
انا مش عارف ليه يا عمرو محبكها
هو من امتى يعني كان في مشاكل بين العسكر و الاخوان؟
دي كلها تمثليات يا صاحبي
و المشير نجح يوصل اتنين من صبيانه للاعادة لذا هو الرابح الاكبر

Menna يقول...

مممممممممممممم
مش تستعجل الاحداث الفيلم لسة مش خلص ده يدوب بيبدا
الايام الجاية بتحمل اكثر مما تتخيل

الازهرى يقول...

سؤال حيوي

من امتى أى حد فاهم اى حاجة ؟؟؟؟؟؟؟؟

Follow by Email

Tetris