الجمعة، 8 يونيو، 2012

28 حرف

أ‌- ابدا  الكلام  بالسلام  والتحيه  النهارده  قررت اجرب   فكره عجبتنى من كتاب 28 حرف  للفنان احمد حلمى  وهى انى  اكتب على  ترتيب الابجديه   تدوينه  
ب‌-     بدايه من  الاف الى الياء   بالترتيب الابجدى للحروف 
ت‌-    تفتكروا الموضوع دا هيكون سهل وبسيط  ؟
ث‌-    ثلاث حاجات او اكثر  فكرت فيها لما قررت اجرب الفكره ديه  اهمها هى  هل لو ركزت  على  الترتيب دا هيكون التدوينه  لها معنى وممكن الناس تستفيد منها ولا لا ؟
ج‌-     جميل ان الواحد يفكر فى تجربه يجربها  تجعله يفكر  والتفكير يدخله فى حيره تشغل عقله
ح‌-     حيره  فى كيفيه التنسيق بين ترتيب الابجديه فى تدوينه  وبين قيمه التدوينه  والرساله اللى ممكن توصيلها من خلالها  وتناسقها
خ‌-     خلال  الحيره ديه قد اتشتد و تفقد  التدوينه  معناه  اذا حاولت الحفاظ على الترتيب الابجدى للحروف  وادينى  مش عارف ادخل على حرف الدال ودا
د‌-       دليل ان الموضوع مش سهل انك تحافظ على الاثنين معا  لانك محتاج ان يكون ذهنك حاضر  لكن ياترى  حتى لو كان ذهنى حاضر
ذ‌-       ذهن القارى هيقدر يستوعب ما اكتبه اثناء التجربه  ديه  وخصوصا لو تشتد  فكرى  وانا  بكتبها  دا سؤال  ايه دا انا عديت من الدال والذال طب ديه حاجه جميله اوى ومبشره  
ر‌-      ربما اقدر اكمل  باقى الحروف  على نفس النهج لكن واضح ان ذهنى زاهد فى الافكار
ز‌-      زهد يجعله عاجز عن الاستمرار  
س‌-   ساحاول  الاستمرار حتى انتهى  و اجيب ذهنى يمين شمال
ش‌-   شمال يمين  لعله يسعفنى  بالكلمات  حتى اعدى الحروف الصعبه     
ص‌-  صابر  عليه  ومعطيه وقته للبحث عن الكلمات
ض‌-  ضارب كل الارقام القياسيه فى الصبر
ط‌-     طبعا لازم  احمد ربنا انى عديت من حروف الزين  والصاد والضاد   وانا مش واخد بالى كانت بصراحه  حروف صعبه  مثل الحرف اللى جاى دا  اللى واضعنى فى ظرف لا احسد عليه   
ظ‌-     ظرف  بيفكرنى بالظرف اللى كان بيخلينى اقلب الطرابيزه وانا صغير وانا بلعب
ع‌-     عموما اهو عدى الظرف على خير وربنا ستر وعديت من الحرف دا وماقلبتش الطرابيزه زى زمان
غ‌-     غالبا عارفين  ايه هو الظرف اللى  كنت بقلب الطرابيزه فيه اثناء اللعب زمان طبعا ومن غير ما اقول
ف‌-   فاكرين  لما كنا بنخسر  فى اللعب واحنا صغيرين كنا بنعمل ايه
ق‌-      قرار بقلب الطرابيزه على طول
ك‌-     كانت ايام جميله  بالرغم بساطتها  لكن تركت جوانا حاجات كتير
ل‌-      لما نرجع نفتكرها بنقول كانت ايام ياريتها دامت دنيا
م‌-       مين ياترى كان بيعمل كدا  ؟ ومين لسه فاكر ؟ ومين بيفتكر  
ن‌-      نادر جدا لما حد  يكون ماعملش كدا وممكن يكون دا سبب اننا لا نقبل الراى الاخر
ه‌-       هو احنا لما لانقبل الهزيمه فى اللعب واحنا اطفال هنقبل الهزيمه فى الفكر كبار اكيد لا 
و‌-      وربما  لو كنا تعلمنا ان اللعب مكسب وخساره  لكنا تعلمنا لغه الحوار واحنا كبار  
ي‌-     ياسلام اخير   وصلت للحرف الاخير فعلتها  التجربه خلصت وناسف للازعاج

هناك 3 تعليقات:

مصطفى سيف الدين يقول...

المشكلة يا عزيزي لما بنقرر نلعب لعبة بيبقى قدامنا حل من اتنين يا نكسب يا نكسب
مش هنعترف باي نتيجة تانية و بنقلب التربيزة علطول
موضوع لذيذو اكيد كنت بتشرب بيبسي و انت بتكتبه علشان تبقى اد التحدي

شيرين سامي يقول...

مفيش إزعاج أبداً الفكره تُحفه :)

و بعدين أنا بقى ماكنتش بقلب الترابيزه زمان و كنت بكمل اللعب و خلاص و ممكن أتغلب كمان للي قدامي لو بحبه يعني :)
بس دلوقتي بقت أسهل حاجه عندي إني أقلب الترابيزه..إظاهر إن كل شئ وله حدووود

تحياتي ليك يا عمرو

رؤى عليوة يقول...

جميله الفكرة بجد
واهى نجحت والكلام جمع بين الاتنين :)

اكيد كنت مبسوط بعد ما وصلت لل ياء

دمت بخير

Follow by Email

Tetris