الجمعة، 3 فبراير، 2012

حداد يا كل حاجه وعكسها


اتخنقت مش فاهم حاجه  كل حاجه وعكسها اصبحوا صح  مما لاشك فيه ان احداث ماتش الاهلى والمصرى كانت فيها تقصير امنى كبير  والحريق اللى حصل فى الاستاد فى نفس الوقت بيقول انها  لعبه فاشله  ومشبوهه وجريمه وقحه  لكن ومليون خط  تحت كلمه لكن  زى ما دم الواحد اتحرق  على المذبحه اللى حصلت وزعل  على الضحايا  اندهشت من بعض الناس اللى كأنهم عمرهم ماشافوا جمهور بيقتل فى بعض  عشان كوره بالرغم من فوزهم والشرطه بتتفرج  بصراحه مش قادر اقول ان الشرطه كانت بتتفرج و افضل الشباب بيقتل  والكلام الكبير دا لان بالرغم من  ان  دمى محروق من الشرطه  وتقصيرها  المشبوه   لكن فى نفس الوقت انا من زمان محروق دمى من  المشجعين او الالتراس يعنى لانى لسه فاكر  مره وانا  راكب المترو  والاهلى كسبان مش فاكر بالظبط كان بيلعب مع المصرى ولا الاسماعيلى  لكن اللى فاكره انه كان كسبان  وكان فى القاهره  والمشجعيين من فرحتهم بيخبطوا على عربات المترو وبيهتفوا ضد الفريق الاخر  ويسبون  الاسماعيليه ويقولون باللفظ  بعد شتيمه  بالام الاسماعيليه بلدكم   وكأن الاسماعيليه  ديه اسرائيل  هقول  ان دا كله بعد الثوره فى اطار انها ثوره مضاده طيب  والاحداث اللى  فى السنوات اللى كانت قبل الثوره  يعنى لو نرجع بالتاريخ قبل الثوره  بكام سنه هنلاقى ان فى مشجع زملكاوى اتحرق  وهنلاقى احداث زى احداث بورسعيد كتير اوى  ويمكن الاحداث المشابهه لاحداث المذبحه ديه ايام المخلوع  كافيه باننا نطالب باعدامه لوحدها لان لما كان بيموت فيها واحد او اكثر بتكون النتيجه ان مافيش عقاب يعمل نفسه طيب ونظامه يعملوا طيبين ويقولوا شقاوه شباب وتكرر تانى وتالت  ومافيش حل ولاعقاب والشرطه دايما بتتفرج  لحد مابقى الواحد مش عارف  دمه محروق من الشرطه والمشجعون ايضا  وممش عارف يغضب على اللى ماتوا ولا على اللى عايشيين ولاعلى  تقصير الشرطه ولا من مين ولا يتعلم البرود ويتعود على المذابح وخلاص  اللى يحرق الدم كمان تحويل الالتراس الى ابطال  لما اتظاهروا فى ماتش الكوره  اللى عملوا  ازمه بعدها  والواد اللى ظهر وبكل عبط يقول احنا كنا بنشتم فى مبارك والعدلى  طب هو كان رايح يشجع ولا رايح يتظاهر ماهو صاحب باليين كذاب ولا رايح تهيس وخلاص  وطبعا لازم نربط الحدث القديم بالمذبحه اللى حصلت فاصبح المشجعون مناضلين سلمتها ام حسن من العين ومن الحسد مسخره وادينا هنشوف اللى هيحصل وهنتفرج
الواحد حزين على الضحايا كما ايضا حزين على مصر اللى انقلب فيها كل شئ  بلد كل حاجه وعكسها بلد ماتعرف بلد عقول فيها امخاخ ولا جزم   بلد تعيش فيها ماتفهمش فيها حاجه  بلدعقد
اتخنقت

ربنا برحم الضحايا 
ويهدينا ويريحنا ونحصلهم  ونخلص
ربنا يرحمك يامصر  
يسقط يسقط حكم العسكر
ويسقط غوغاء  مشجعون الكوره
ويسقط الشعب
واخيرا فليسقط انا

هناك تعليقان (2):

richardCatheart يقول...

ربنا يصبر اهاليهم اعتقد ان الموقف شدسد الوضوح يا عمرو مش محتاج انت محتار علشان كدا شايف كل حاجه وعكسها صح ودا مش حقيقى بس كتير الخوف من الموضع الخطير اللى احنا فية بيخلينا نتوه ونتخبط ربنا يسطر ويصلح الحال

ويسقط يسقط حكم العسكر الف مرررررررررره

الموجى يقول...

richardCatheart
انا مش محتار انا مخنوق من الاثنين حكومه وشعب
لان اللى حصل يدين الداخليه 100% لكن بردوا الناس مش ابرياء 100% لان اللى حصل حصل قبل كده كتير مش بالكم دا طبعا لكن نفس الموضوع الكم سببه موامره الدخليه لكن الحدث بسبب الناس

Follow by Email

Tetris