الأحد، 16 ديسمبر، 2012

قولت لا


لحد يوم الجمعه وانا محتار مابين لا ونعم يمكن لانى لسه ماكملتش الدستور لاخره مش عايز  اعرف الناس اللى بتقول لا  هما بيقوله لا على ايه  عشان متاثرش واقول زيهم وخلاص ومش عايز اعرف هما عايزين نعم  اللى عايزين نعم ليه عشان متاثر واعمل زيهم  عايز اقراءه وافهمه واشوف بس المشكله اللى انا مافهمش فى القانون ولا الدستور يعنى ساعات اقراء ماده مافهمش دهليزها ايه  وصغراتها  اصل بردوا شعب  ما بنطبقش قانون ولا دستور على اد ما بنطبق صغراته  وفى وسط حيرتى  لقتنيى بقول لنفسى هو الاستفتاء اصلا على الدستور ولا على حاجه تانيه لما تلاقى شيوخ من بتوع الاعلام طالعين يقولولك انت الدستور فى كوارث بس هنقول نعم طب انت بتقول نعم ليه واحد زى وجدى غنيم واللى زيه لما يقوله ان الدستور مش راضين عنه بس هنقول نعم طب ليه شئ مش مفهوم رجعت بالذكريات للاستفتاء القديم  لقتنى بقول لو على مواد الدستور  طب ما التعديلات اللى استفتينا عليها قبل كده كانت جميله ومن مطالبنا لانهم اختاروا المواد اللى الناس كانت عايزه انها تتغير وبالتالى كنا نقول نعم ونمشى بالستور القديم بعد التعديلات وخلاص والحياه زى الفل بس احنا قولنا لا  لان كان تفكيرنا ان لازم يتعمل دستور جديد  ولما نتيجه الاستفتاء على التعديلات جات نعم سكتنا وخلاص  بس يظل فى الاخر ان الحكايه مش مواد دستور على قد انه نظام عمل الدستور  وعلى الناحيه التانيه الاخوان مش عايزين نعم للدستور عشان الاستقرار ولا موسسات الدوله تشتغل لا انما للسيطره بالشرعيه الصندوقيه الشكل الجميل المتذوق  فى انتخابات الرئاسه نجح مرسى لان الشعب قرر اسقاط شفيق  الاخوان والتيار الاسلامى  بعدها قالك مرسى الرئيس الشررعى وبالصندوق المنتخب يعمل اللى هو عايز ويقعدوا يبرارو له  تصرفاته واعلانه الدستور    وبعد الدستور المسلوق اللى مواده  ترضى الناس لو قراته وتقول نعم  والدستور يوضع يبقى هو كمان الدستور الشرعى بالصندوق  وتكمل السيطره ونبداء من اول السطر فى بدايه لبناء نظام مبارك الجديد بقياده الرئيس مرسى  واللى يعارض يبقى فلول او من المسيحيين او الرئيس يعمل وقتها انه  من بنها زى ماكان بيعمل لما الدنيا بتكون والعه  ويطلع يقول خطاب وكان مافيش حاجه بتحصل فى البلد  وكله يفضل يدور فى دماغى لحد ما فى الاخر لقتنى بقول لا لالالالالا   هروح اقول لا  وفعلتها  يمكن اكون غلط ويمكن اكون صح لكن  اللى راضينى انى عملت اللى مقتنع بيه  وبس
انتهى  

الأربعاء، 5 ديسمبر، 2012

اسرائيل - ישראל - Israel




اخدنى الحديث مع احد اصدقائى عن ذكرياتنا  فاكتشفنا اننا احنا الاثنين ايام ثانوى والجامعه كنا لما بنيجى نذاكر ونسرح واحنا بنشخبط  بنرسم نجمه داود  وساعات بنعمل الخطين يعنى كنا بنرسم علم اسرائيل ليه منعرفش  يمكن كان عاجبنا  شكل المثلثين وهما متداخلين فى بعض يمكن  او ممكن حبا فى اسرائيل مستحيل  اتذكر جيدا عندما رايت فى عداد زوار المدونه لاول مره زائر من دوله اسرائيل زعلت وشعرت بالضيق للوهله الاولى  ثم بعد مراجعه لنفسى واقناع نفسى ان المدونه مدونه على النت وعادى ان كل البلاد تدخل عليها خف الشعور بالضيق تدريجيا  تمر الايام وياتينى هاجس  بسؤال هو انا بكره اسرائيل ليه  عشان احتلالها  كل الدول احتلتنا فرنسا وانجلترا يعنى احنا احتلونا طوب الارض لماذا كل هذا الكره اللى بداخلى لاسرائيل  يمكن لاتتى من الجيل الذى لم يكن يعرف شيئا عن فلسطين قبل حادث الطفل محمد الدره  قلت الكلام دا لواحد صاحبى  قالى فى جيل مايعرفش اصلا محمد الدره ولا يعرف وعد بلفور ولا يعرف اى حاجه عن فلسطين ومشكلتها مع اسرائيل اصلا   يمكن بكرها عشان المذابح اللى بتعملها  فى اخوانا الفلسطيين طب ما كل الاحتلالات عملت مذابح  وكوارث مش اسرائيل بس يمكن عشان الاستمراريه انها مازالت بتقتل اخوانا فى فلسطين  يمكن ولكنى فجاه لقتنى بسئل نفسى هو انا المفروض احب مين واكره مين  اكره اسرائيل واحب العرب ولا اكره العرب واحب اسرائيل ساعات بحس اننا لازم نشكر اسرائيل على انها بتفكرنا باخواننا فى فلسطيين بمذابحها فلولا مذابح اسرائيل ماكنا عرفنا فلسطين   واعتب على دولنا العربيه اللى لولا المذابح الاسرائليه ماكنا عرفنا عن فلسطين  شئ  حتى وان كانوا بيعملوا اتفاقيات ومعاهدات لمحاوله حل مشكله الصراع العربى الاسرائيلى بل بالعكس فاوقات كانت تنتشر لهجه ان الفلسطينين هما اللى باعوا ارضهم يعنى افكر تودى فى داهيه تنسى العرب جزء منهم وهما راضيين ساعات بحس ان اسرائيل بتتقف  مع روؤساء الدول العربيه عن مواعيد المذبحه  لاشغال الراى العام بها عن احداث بلدهم فى وقت معين وبعدها صافى يالبن حليب ياقشطه  فكثير من التضامنات العربيه كانت تحدث فى اوقات تشغل شعوبنا العربيه عن احدث مهمه فى بلدنا  ثم تنتهى لحد مابقيت سلسله محفوظه  اسرائيل تضرب الشعب العربى ينشغل بمقاطعات وشعارات ومنافسات وخراب بيوت لشركات معين وتغير اسماء محلات معينه لاسم تانى او بيعها لشخص واحد مثل محلات سنسبرى اللى تحولت فيما بعد بدريم وبعد كده بيتك بيتك وفلسطين خلاص اتحررت يارجاله  والمذبحه خلص ونلتقى فى الحادثه الجايه حتى بعد الثوره كان ملف فلسطين الكارت الرابح فى الانتخابات الرئاسيه  لما قعد صفوت حجازى فى الدعايه لمرسى يقول على القدس رايحين شهداء بالملايين  اللى بعد كده ماكلموش لما ضربت غزه  فكانت  فلسطين وسيله للحصول على الكرسى ويظل السوال فى راسى هو اسرائيل بتشوف الوقت الصح بتضرب فيه ولا احنا اللى بنتفق معاها ولا ايه    ولا احنا اللى مابنفتكرش فلسطين الا فى المذابح وبس       لكن مهما حصل ومهما تسائلت فسيظل بداخلى كره لدوله اسرائيل
انتهى

الخميس، 29 نوفمبر، 2012

امتى هنهتم بواجباتنا زى اهتمامنا بحقوقنا

على مدار عامين من الثوره والكل بيقرا وبيتعلم وبيعرف حقوقه ومن قبلها وكله بيدور على حقوقه لكن كل انسان زى ما له حقوق عليه واجبات   يمكن فى فتره كانت حقوقنا مهدوره فيها فجعلتنا نترك واجباتنا ولكن من ترك واجبه فعليه ان ينسى حقه لانه لم يعد حقه لانه فى حاله ترك واجبه هو  تنازل منه عن  حقه لانه لايجوز شكر احد على عمل لم يفعله  كانت تدهشنى المطالب التى سموها  مطالب فئويه بعد الثوره  كل فئه بتطالب بحقوقها  وقبل الثوره كانت حجه كل فئه  فى بيع ضمائرهم  عدم الحصول على حقوقهم طب بعد الثوره  هما ازاى شايفين انهم من حقهم  ياخدوا حقوقهم قبل ما يؤدوا واجبهم قمتم بثوره عشان حقكم اللى تنازلتم عنه باهمالكم لواجباتكم  اعرف واجباتك ايه واعملها اولا وبعد كده طالب بحقك رجع ضميرك وبعدين قول حقى  لكن عايز حقك حقك ازاى وانت  ماعملتش واجبك  يا ترى احنا عارفين واجبنا ايه ياترى  بنأدى واجبنا قبل ما نطلب حقنا  ولا بس بنطلب حقنا وخلاص ماهو حقنا مايبقاش حقنا لو لم نؤدى واجبنا ياريت كلنا وانا اولكم  نبداء ندور على واجبتنا ونأديها  قبل ما ندور على حقنا  لان الوطن له حق علينا قبل مايكون لينا حق عليه من حق المواطن يعيش عيشه محترمه لكن من واجبه انه يكون محترم فعلا  زمان ضحكوا علينا وقلولنا ماتقلش ايه اخدنا من مصر قول هتدى ايه لمصر بلاش  نحولها بعد الثوره الى ما تقلش هتدى ايه لمصر قول هتاخد منها ايه  يعنى لو هنغيرها ممكن نخليها ما تقلش هتاخد ايه من مصر قول ياترى انا استحقك اللى هتدوهونى مصر دا يعنى لو اديتك حاجه بس انت قولها قبل ما تفكر تاخد 

            انتهى

السبت، 24 نوفمبر، 2012

امال بضيع وقتك وصحتك فى ايه ؟؟



سئلنى زميلى فى الشغل  انت مش بتشرب شاى  فجاوبت  ايوه  ما مش بشرب  شاى ما بحبوش 
  فعاد وسئلنى ولا نسكافيه  فقلتله ولا نسكافيه 
 فسئلنى ولا سجاير   فقلتله ولا سجاير  
 فسئلنى ولا شيشه فقلتله ولا شيشه 
 فقال لى يعنى انت ولا شاى ولا نسكافيه  ولا سجاير ولا شيشه وبتصلى الفروض فى الجامع امال انت بتضيع  فلوسك وقتك وصحتك  فى ايه  انت فاشل  
  استغربت شويه وبعدين قلتله اذا كان دا الفشل  انا بحب الفشل ولقيتنى بضحك  ليه مش عارف  بضحك على ايه على تفيكره يمكن  بس بعد شويه لما جيت استوعب الموقف  لقيتنى بسئل سؤال لنفسى  يعنى هو الواحد لازم يضيع وقته وصحته  ولقتنى بضحك تانى  وبقول على زميلى   الله يخرب بيت تفكيرك ياجدع

السبت، 17 نوفمبر، 2012

الثلاثاء، 13 نوفمبر، 2012

شطحات منيله



تردد كثيرا قبل كتابه هذا البوست   مش عارف ليه يمكن عشان ماينفعش يكتب  يمكن يمكن لان اللى هيقراءه هيتهمنى باننى جننت او الحد  يمكن الحكايه انى لما كنت بقلب فى منتندى الملحدين العرب كنت بشوف اللى يتكلم عن نظريه الصدفه او الطبيعه او اى نظريه من النظريات اللى كان بيثرها الماديين  واللى ياما علماء  ردوا عليها  فكان الامر عادى لكن بعد  متابعه بعد صفحات الملحدين على الفيس  بلاقى ان الفكر الالحادى اختلف مابقاش النظريات القديمه بقى كفايه انه ينتقد المساخر اللى بيقولها بعض من اطلقوا على انفسهم شيوخ وتابعهم بعض الناس  ولما بتظهر اساءات عن الرسول بتبقى اصلا جايه من كلام بعض من اللذين اطلقوا على نفسهم شيوخ  من كلام عن سن السيده عائشه الى احاديث بول الرسول  الى الى  حاجات كتير فى صلاه الجمعه الماضيه الشيخ  قعد يتكلم ساعه عن المجادله وقعد يقول لاتجادل وان كنت على حق ومش فاهم يعنى ايه ولو كنت على حق ديه  يعنى نسكت وهما يتكلموا ولا ايه  بس عديتها  وبعد ماصدع دماغنا بيجى اكتر من نصف ساعه  لا تجادل  وان كنت على حق دخل على موضوع تانى  ان معرفش مين اللى عاش فى بيت الرسول  كان بيقول ان الرسول مماكنش بيقول اف  ولا بيقول روحت فين ولا جيت منين  كلام جميل بس الغريب انه كان لسه قايل حديث معاذ اللى سئل الرسول فيه هل سنحاسب على ما نقوله  فالرسول رد وقال بدايه الكلام كده ثكلتك امك يا معاذ  معرفش لقيتنى بشطح وبسئل الرسول ماكنش بيقول اف لكن كان بيقول ثكلتك امك  ازاى وان كان بعض الناس بتقول ان كلمه ثكلتك امك كلمه عاديه ليست اساءه ولا دعاء ولكن كانت كلمه داركه فى عصره يقولها الكبار والصغار والاطفال لابائهم عادى بس معرفش ليه لقيتها ثقيله  والمتعارف عليه ان الرسول لا ينطق عن الهوى والحديث من غير ثكلتك امك  ماهو ماشى عادى والمعنى واصل بردوا وان كان الرسول قالها لانها كانت داركه فى عصره  على كده لو كان فى عصرنا كان قاله احا  ولا شخرله  بقى ماهو  عادى  بقى كل رسول بينطق بلسان عصره  واتذكر  ايضا حديث قاله لى احد اصدقائى  وقال انه سمعه من شيخ عن  الرسول فيما معنى ان الرسول دخل مسجد فرى رجلا نائم على بطنه  فقام اداله  برجله وقاله  ديه نومه اهل النار  ايه الرسول دا شويه شويه  هتقولى ان الرسول  دخل عليه فلانا  فقاله معرفش ايه  فقام مطلعله الموس او المطوه ما خلاص بقى ماهو الرسول بشر زينا  ومش بعيد يكون كان بيجامل فى الافراح بسجاير وحشيش  ما خلاص بقى ما هاصت  ودا اللى كان دارك فى عصره   وياحلاه يا اولاد وكله ماشى  عارف ان اللى بقوله دا قله ادب وتطاول  لكن بقوله عشان اخرجه من دماغى واخلص  وكتير من الملحدين  تلاقيهم فى نفس الوضع لما ينتقدوا اقوال الشيوخ بيسئوا الى الرسول او الدين بدون قصد  او بقصد  بل ان فى صفح اسمها ؟هل ترضاهه لاخوك"  بتحاول تنتقد افعال الناس وكلامهم فى احداث التحرش وفكرهم اللى بيتهم البنت انها السبب فياخذون الكلام يعكسونه على الرجال حتى الاحاديث التى يستغلونها اصحاب الفكر الاخر والنتيجه الصفحه صفحه تحريف قران واحاديث وهى اصلا بتسخر من فكر معين وليس من الدين وصفحات كتير الحاديه او غير الحاديه   لان تخاريف  بعض الشيوخ هى اللى بتسئ الى الرسول والدين وهى اللى بتجعل الناس سواء هنا او فى الغرب  تسئ الى الرسول والى الاسلام  الناس تاكدت من تحريف التوراء لما لقوا انها مطلعه الرسل  واحد زنى والتانى سرق والثالث سكران وغيرهم  طب لما الشيوخ تقول ماعرفش مين شرب بول الرسول  والرسول كان بيدى بالرجل ويقول ثكلتك امك وكان معرفش بيعمل ايه طب الناس هتقول ايه عن الدين اللى بشكل دا  وكل  دا عن الرسول اللى لما عبث  لما جائه الاعمى نزلت  سوره  عشان تنبه   للا سف  شيوخنا الكرام  اسهل وسيله  لتحويل الناس الى ملحدين   فالالحاد اليوم اصبح نسبه قليله من الالحاد السابق  اللى كان التفكير بالنظريات  سواء بقى الصدفه ولا التطور وغيرهم اللى بيترد عليها  الى الحاد بسبب اقوال الشيوخ واحاديثهم  والحل بالفعل هو القراءه  فى كتب السابقون واستفتاء القلب   لكن بيظهر بعض الشيوخ يتهمك انك  بتاخذ دينك من الاسرائليات  وكأنهم هما فقط اللى بيعرفوا يفرقوا بين الدين الصحيح والاسرائليات  والاحاديث الضعيه والقويه وكأنهم مولدين  رسل  ولذلك بعتبر اغلب الشيوخ  كهنه   واغلب القنوات الدينيه قنوات ضلال  وكثير من شيوخ المساجد لا يصلحوا  
  انتهى
 وطبعا بعد البوست المنيل دا لازم انهى كلامى بتجديد اسلامى  بنطق الشهاده  اشهد ان لا اله الا الله وان محمد رسول الله

الأربعاء، 31 أكتوبر، 2012

ذكرى د/ مصطفى محمود

فى مثل هذا اليوم 31 اكتوبر  عام 2009 فقدنا العالم  الطبيب الفيلسوف الكاتب الدكتور مصطفى محمود  وفقدنا معاه شئ  عظيم يمكن اكون مش لاقى كلام اكلمه عنه  لان اى كلام اقوله  عنه مش هيكون قد قيمته  ولكن يكفى اننا دائما كنا بنستمتع ببرنامجه العلم والايمان 
الله يرحمه
  

الخميس، 25 أكتوبر، 2012

العيديه من المليم والتعريفه الى ال200 جنيه

كل سنه وانتم طيبين  وعيد سعيد عليكم  

الواحد عايز يديكم عيديه بس مش عارف يديكو كام  ماهو اصل العيديات  بتختلف زمان لما  كان الواحد ياخد المليم 
كان بيشهيصوا  المليم دا بلغه العصر  كان يقدر يروح يجيب نابوت الغفير والنداغه  ويمكن يعزم اصحابه كمان  ولا اللى كان ياخد نكله او 2 مليم  كان يبقى سلطان زمانه
 

ولا اللى ياخد تعريفه او الخمسه مليم   ياسلام  دا كده يبقى امه داعيه له  دا كان  ممكن يعزم اصحابه على سينما كمان


 بس تمر الايام والاسعار تختلف  ونابوت الغفير والنداغه  يبقوا بقرش    لدرجه ان العشر مليمات نفسها ماكنتش بتعمل حاجه   ولا حتى  تدخل سينما  بالرغم ان الواحد كان بيدخلها بتعريفه  دنيا


ويبقى امه داعيه له اللى ياخد عديه شلن  او بريزه كان ممكن يتفشخر على اصحابه سنه 




وتمر الايام  ويبقى محتاج عشان تعيد مش الاقل من جنيه    صحيح  وخلاص بقى مبقاش فيه لا نابوت الغفير ولا النداغه     وبداء يطلع نظام البمب والصواريخ  لحد ما بقى العيد  عيد حرب مش عيد  عادى بمب وصاوريخ  والعاب ناريه  الى ان دخل المتوسكلات  وموضات العصر دا  اللى بقى عشان الواحد يعيد محتاج مش اقل من 200 جنيه 

مابقاش  نافع خالص لا الريال  اللى غنت له فيروز اللى كان بدولار  ولا حتى الربع جنيه 



الواحد مش عارف بعد كده هيدى اولاده كام لما دلوقتى بقينا نديهم 200 جنيه  الله يرحم زمان لما كان الموظف بيقبض 3 جنيه  ومش اى موظف اللى معاه البكالوريه  دنيا دلوقتى  الشاب مابيعيدش باقل 200 جنيه 
على العموم  كل واحد ياخد العيديه اللى تعجبه 
كل سنه وانتم طيبين 
عيد سعيد عليكم

الاثنين، 22 أكتوبر، 2012

ادله الاتهام هى ادله البراءه



 البوست دا  فلول او عكاشياتى 
لما حد من قتله الثوار بياخد براءه   الناس بتتكلم وتقعد تقول واللى ماتوا  ويسخروا ويقولوه  ماهو ماكنش فيه ثوار ولا ثوره ولا حد مات   المشكله ان القاضى مش هيحكم  على حد بدون ادله وكون ان فى حد مات  مش دليل على ان اللى فى القفص هو اللى اقتله  لما يلاقوا واحد مات فى شارعك  مش دليل انك انت اللى قتلته   ولو حكمنا على اللى له المصلحه   بردوه  مش هيكون النظام القديم  لان القتل اللى حصل  كان بيضر النظام القديم مش بينفعه   كل دا كلام انشاء طبعا  فى ظل وجود القناصه والفديوهات اللى الناس نشرتها   وواضح انهم كانوا حكومه بس الفديوهات نصفها عليها علامات استفهام  مش مفهومه وخصوصا فديوهات القناصات  لو انا نظام قديم ضعيف  وقامت عليا ثوره وانا مستهتر بيها وانا نظام مجرم  معقول هبعت لهم قناصات يصضادوا  بيها   واحد واحد ولا  هبعت لهم ناس برشاش يخلص  عليهم على طول  ولو فرضنا انى بعتلهم قناص   القناص هيصضاد  رؤس المظاهرات ولا ناس مالهاش فى حاجه  وديه نقطه غريبه فى الفديوهت اللى كانت بتظهر وقتها ان اثنين ماشيين فى حالهم واذا بالقناص يصضاد واحد منهم  الغريب ان المصور  كان سايب الزحمه والليله الكبير ومركز مع الاثنين دول وكأنه عارف ان القناص هيقتل حد منهم  دا احنا لو فى فيلم سينما المشهد دا هيتعاد اكثر من مره انك تكون مركز على اللى هيتقتل من قناص  طب حتى مش تحذره طيب  وبالنسبه للعربيات  اللى داست الناس  المشاهد الصغيره اللى بتظهر ممكن تثبت ان  سواقين العربيه كانوا بيجروا خوفا من الناس فداسوا الناس يعنى مافيش اوامر بكده  والامر عفوى يعنى براءه للكبار والصغيرين دفاع عن النفس  وبالنسبه للبيانات اللى كانت الناس بتشيرها لقناص العيون  وغيره حد فكر يتاكد منها حد فكره يتصل بالرقم  ويتاكد ان الراجل دا فعلا ضابط  سهل جدا انى اصور حد اعرف وسط المعمعه ديه وهو بيقتل وبعد كده انشر بياناته كمان   وسهل انشر فى الجرائد بعد كده  انه بيتحقق معاه وبعد كده اقول انههم هربوه  اصل بردوه غريبه ان ظباط وسط المعمعه ديه يقعدوا يركزوا جت فى عينه بالظبط والافلام ديه  حتى ولو واخدين اوامر بكده انت فى حاله فوضى بردوا مهما حاولت تسيطر عليها يعنى اعصابك مشدوده
اما فى موقعه الجمل  فضحكت لما سمعت محمود سعد وهو بيقراء الادله وبيقول ان المتهمين شافوهم مع القتلى فى التحرير  على اساس ان المتهم وهو بيوصى قاتل على الثوار لازم يشاور  له على الثوار لو قاله فى التليفون  مش هيعرفهم 
مابقاش عندى ثقه فى اى دليل   الدلائل لما تبقى مترتبه اوى بتثير الشك  يمكن دليل الاتهام الوحيد اللى سيظل دليل اتهام  هو دليل اتهام  النظام فى موقعه المولوتوف  اللى كان وقتها التلفزيون المصرى قاعد يذيع  ويعد ان فى ناس رايحه ميدان التحرير تحدف على الثوار  ملتوف  قبل المعركه يعنى كان عندهم معلومات عن الحادث قبل حدوثه  ولا يتحرك احد 
دلوقتى الناس هايجه على القضاء  طب هو المفروض القاضى يحكم بالادله القاطعه ولا بالويم  ولا بما يرضى الثوار وخلاص ولا مادام هناك قتيل لابد ان القاتل فلان الفلانى   لو هى حكايه تصفيه  النظام القديم يبقى مش ضرورى محاكمات واحكام قضائيه  وكفايه  اوى ان يحدث محاكمات ثوريه  ولو بنبحث عن العدل فالعدل محتاج ادله قاطعه  ومش ذنب القاضى انه ماعندوش الادله  وحكايه انهم بيدمروا الادله دا كلام مرسل من غير ادله لا ياخذ بيه  يمكن الجمله  الصحيحه الوحيده اللى قالها مرتضى منصور بعد خروجه من السجن ان اللى ضيع حق الشهداء من قدم ادله غير كافيه مش القضاه  
  

الأربعاء، 17 أكتوبر، 2012

تدليس واكاذيب وبنصدقها



فى هذا العصر  اختلط  الصدق مع الكذب الحقيقه مع التزيف  ساعات بنصدق الكذب وساعات ببنكذب الحقيقه اصبحنا تائهين  لو حاولت تفكر تبقى فلول من ابناء النظام او عبيد النظام القديم او غبى  انما لو تزيط بقيت ثورجى مثقف وبتفهم  الحكايه تبداء من حادثه كنيسه القديسين لما رجعت وافتكر   وقت الحادثه  كتير منا دخل على موقع شبكه المجاهدين  وقتها  وقلب فيها وشاف ازاى  كان منشور عليه  كيفيه صناعه القنبله اليدويه  ونشر عناوين  الكنائس  وكان واضح لكل اللى بيدخل عليه مين اللى عامله من الشيوخ الاجراميين  قصدى يعنى اللى عاملين نفسهم شيوخ دين وهما اصلا مجرمين   لكن بعد شويه طلع علينا العقيد عمر عفيفى اللى مش عارف كان بيجيب تخاريفه منين ( اعتذر انى قلت تخاريفه بس انا عمرى ما اقتنعت بما يقول قد يكون العيب منى ) طلع علينا وقال اللى خطط للجريمه ديه وزير الداخليه حبيب العادلى  ويمكن عشان فى هذا الوقت كان كرهنا للممارسات التى اتنشرت منها كتير على النت لبعض رجال الشرطه الفاسدين هو اللى جعل بعضنا يصدقه  بالرغم اننا دخلنا على الموقع و شوفنا بعنينا وتاريخهم بياكد ان اللى فى الموقع ماكنش تلفيق من الحكومه    المهم بعدها انتشر نغمه ان النظام السابق  هو اللى كان بيصنع الفتن ليشغلنا بيها عن مايفعل   وبعض سقوط النظام وفجاه وبدون سابق انذار  رجعت تداول بين الناس قصه اختنا كامليا القصه  اللى كانت اتفجرت ايام مبارك وبعدها الموضوع هدى  والناس نسيت القضيه لكن بعد الثوره رجعت وبداءت الفتنه ترجع  ووقتها قيل ان الفلول هم الذين وراءها فى ترتيب منظم للثوره المضاده    بالرغم من ان بعدها بداء يظهر التيار الذى سمى بالسلفى ثم مات الموضوع بهدوء  وكل فتره يظهر موضوع ولسه بنقول ان المشكله فى النظام السابق وفلوله اللى بيجهزوا لثوره مضاده لانهم منظمون بالرغم اننا دائما نقول انه لايوجد قوى سياسيه منظمه غير قوى التيار الاسلامى  وبالفعل فهم تيار منظم شديد التنظيم بيعرف يلعب فى عقول   الناس فيقنعهم بان النظام القديم كان يحبس المصليين على اساسا اننا كنا كفره ولم نصلى الا بعد الثوره  وهذا لانه كان يحبسهم وهم الذين كنى نشتكى من المفاهيم التى يقولونها فى خطبهم التى ليس لها اى علاقه باى دين وقد يكون بالفعل كان يقبض على بعض الذين يصلون فى جامع معين ولكن ليس لانهم يصلون ولكن لمعرفه امن الدول لمن يستمعون فى هذا الجامع وما الفكر الذى ينشرونه هؤلاء المخربون باسم الدين  انا لا ادافع  عن النظام القديم قد يكون كان يفعل ما يقولون ولكن كانوا هم الايدى الذى ينفذ بها النظام القديم افعاله  الشيطانيه اذا كانت هذه بالفعل افعال النظام القديم وقد يكون الان الخوف ليس من الافعى التى كانت  تلعب بادواتها ولكن الخوف من التحول الذى حدث وحول ادواتها الى افاعى متمرسه  تنهش فى الوطن بنفس الاساليب  لكن الان لمصالحها هى وفقط  ولسه  فالتيار الاسلامى بداء بالانقسام تيار اسلامى وصل الى السلطه وتيار اسلامى يريد ان يصل الى السلطه ومازلنا نتفرج ونشاهد الى ان راينا كهنه التيار الاسلامى ينهشون بعضهم  بعض و يكشفون بعضهم بعض من منهم كان ينسق مع الفلول  الى ان وصل ان احدهم كفر الريس محمد مرسى  ومش بعيد نرى من التيار الاسلامى الذى لم يصل الى السلطه من يتهم التيار الاسلامى اللى وصل للسلطه بانه يحارب الدين  ويحبس المصليين  عادى جدا  هو مش وجدى غنيم  كفر مرسى ولسه ومازال التدليس والاكاذيب تنتشر والناس تصدقها والافاعى يمرحون

السبت، 13 أكتوبر، 2012

ونجحوا الصهاينه المتأسلمين

نجح الصهاينه المتأسلمين فى تحويل جمعه كشف حساب ال 100 يوم  لمرسى والاخوان  الى جمعه تطهير  القضاء  والنائب العام  الكل دلوقتى بيتكلم اما معارض او مؤيد  للنائب العام والقضاء  او مؤيد او معارض لقرارات  خبيتها سياده الرئيس اللى مش عارف  ياخد قرار ويكمله للاخر  وتناسينا ان الى الان لم يرد احد من الصهاينه المتاسلمين والرئيس مرسى ماذا فعلوا فى ال100 يوم   غير طبعا الحركه الفكسانه  بتاعه الافراج عن معتقلى الثوره اللى عاملها مرسى لحفظ ماء وجهه بعد مرور ال 100 يوم   والخروج الامن للمجلس العسكرى اللى الاخوان عاملينه انجاز انه ازاحه المجلس جانبا مش عارف ايه هو الانجاز فى كده   ماذا فعل مرسى خلال ال 100 يوم  ولا اى حاجه البلد هى هى  نفس الاحوال لا بس ماشاء الله  جعل الناس تنسى  ان مافيش لحد دلوقتى  مجلس شعب  للدوله لا وكمان اقنعهم بان مش وقته انتخاب مجلس شعب  اساسا   عشان الازمات الماليه 

ولما حب يقلب الطرابيزه   على من يعارضه فى جمعه امس  نزل لهم البلطجيه  فى الميدان وخد بعضه وراح اسكندريه  ايه اهميه وجوده فى اسكندريه  يوم الجمعه دا ياترى بيصلى هناك  مافيش اماكن فى جوامع القاهره ولا حاجه   استعباط فى استعباط   والصهاينه المتاسلمين قاعدين هنا بيكدبوا مش عارف علينا ولا على انفسهم  اللى يطلع يقولك الاخوان ماكنوش فى التحرير واللى يطلع يقولك كان معادهم  هناك الساعه خمسه.
 وهما اصلا موجودين هناك من يوم يوم الخميس  يكمموا اى صوت يهتف ضد مرسى او الاخوان  وتحويل الهتافات الى هتافات تطهير القضاء  وهتافات ضد النائب العام    وللاسف بعد معركه  الخرفان اللى عاملها الاخوان الصهاينه  احفاد ابليس  نجحوا والكلام بقى كله على القضاء والنائب العام  بالرغم من ان لما المتهمين بقتل المتظاهرين  اخدوا براءه قبل كده كان الهتاف ضد المجلس العسكرى دلوقتى بعد لما بقيت السلطه فى ايد الاخوان لما المتهمين فى موقعه الجمل اخدوا البراءه  مش عايزنا نهتف ضد الاخوان ولا مرسى   مازالنا فى حاله الكيل بمكيالين  وسط الاعيب خسيسه 
بس بصراحه كان عاجبنى الاعلام بتاع الاخوان فكرنى بذكريات  اعلام الوطنى  

الاثنين، 1 أكتوبر، 2012

دين ابوهم اسمه ايه

دين ابونا احلى دين  
دين ابونا دين مكارم الاخلاق 
دين ادب اخلاق 
طب اللى باقذر الشتائم بيشتم 
ومتعرفش تفرق بينه وبين حشاش فى غرزه دين ابوه دا اسمه ايه


دين ابونا احسن دين 
دن ابونا حرم الخوض فى العرض 
طب اللى بيخوض فى العرض 
وضارب بالاخلاق والدين الطول والعرض 
دين ابوه دا اسمه ايه



دين ابونا احلى دين 
دين ابونا  فرض علينا العلم 
طب اللى يكفر العلماء ويقول عليهم انهم دود 
هيقول لما ينهشوا الدود 
دين ابوه  اسمه ايه 

نفسى اعرف دين ابوهم اسمه ايه

 قصيده دين ابوهم اسمه ايه  بس محرفه
قصيده دين ابوهم اسمه ايه الاصليه  للشاعر جمال بخيت 

الجمعة، 28 سبتمبر، 2012

احنا مجتمع متدين بطبعه

احنا  مجتمع متدين بطبعه 
 فينا المرتشى المثالى اللى بيرتشى عشان المرتب مش مكفى  لكنه بضمير عالى  مرتشى عنده مبداء و اخلاق  مرتشى متدين بطبع

وفينا الحرامى اللى بيسرق عشان ياكل  ويصعب على الناس والناس المتدينه  بطبعها تصرخ وتقول  بتحاسبوا الحرامى الصغير وسايبين الحرامى الكبير  طب دا الحرامى الصغير حرامى مثالى  حرامى  متدين بطبعه
فينا المتحرش المثالى  اللى بيتحرش بالمنحلين بس اللى هما بردوه منحلين متديين بطبعهم زى ماهو متحرش متدين بطبعه
وفينا المتدينين بطبعهم  فى المترو يستغربوا ويندهشوا من  السيدات  اللى راكبين العربيه العاديه وسايبين عربيه السيدات   ومابيستغربوش من الرجاله اللى راكبين فى عربيات السيدات   وكله متدين بطبعه
فينا المتدين بطبعه اللى بيستنكر من   سيده مش عاجبها ان راجل كبير عايز يركب فى عربيه السيدات  ويقعد يقول دا راجل كبير لازم يكون فيه  استثناء   مع ان الراجل الكبير  الحيوان هو اللى غلطان بس احنا مجتمع متدين بطبعه بيحترم الصيع لما يكبروا فى السن لانهم كصيع متدينين بطبعهم
وفينا  اللى يحلل كل قذر لانه بردوه متدين بطبعه
وعشان احنا متدينين بطبعنا بقى كتير من قنوات اللى بيقولوا عليها دينيه بتكلم فى السياسه وهيكلموا ليه فى الدين ان كنا مجتمع متدين بطبعه
احنا مجتمع متدين بطبعه بيحب يسمع الشيوخ اللى بتشتم وتسب فى الفنانين او غيرهم  امثال  وجدى غنيم  وعبدالله بدر   يعنى لو اعتبرنا ان دول شيوخ   لان واضح ان الشتيمه بطبعها متدينه
احنا مجتمع متدين بطبعه  ندخل على المواقع الابيحه نتفرج ونستمتع وبعدين نستنكر ونشجب ونشتم ابطالها   واللى رافعين محتوها وبعدين  نذكر اللى رافعين محتوها بالنار وجهنم لان واضح ان المواقع الابيحه متدينه بطبعها
بصراحه احنا شعب بنستعبط بطبعنا  
احنا مجتمع عاملين عبط بطبعنا 

الأحد، 2 سبتمبر، 2012

زمن التحرش الجميل



دايما بتحصل مقارنه بين الازمان  فكنا بنسمع ابائنا واجدادنا  يتكلموا عن زمان  ويقولولك عن زمنهم الزمن  الجميل   وسمعنا عن زمن الفن الجميل والطرب من خلال المقارنات ديه  اللى بنسمعها كتير و لما وصلت المقارنات  عن  الفرق بين معاكسات  الفتيات زمان  التى كانت عباره عن مغازلات  عفيفيه  والتحرشات  بيهم دلوقتى  التى اصبحت بالالفاظ البذيئه  واللمس  ضرب  بخيالى اسم البوست دا زمن التحرش الجميل وتخيلت لما الواحد يكبركده ويكلم اولاده عن المعاكسات او التحرشات او الاسم الذى سيستحدش بعد ذلك واقوله فى نصح وارشاد  ايه اللى بتعملوا دا انتم مزودنها اوى فين ايام زمن التحرش الجميل كل شئ كان بقواعد حتى المنحرفين  كانوا منحرفين منضبطتين منحرفيين عندهم اخلاق وقيم مش زى منحرفيين اليومين دول لا قيم ولا اخلاق  دا احنا هنبقى اباء مسخره
متستغربوش الحكايه انى  كنت  بكلم مع  واحد وفى وسط كلامه قالى  مافيش واحده ماشيه محترمه هيحصلها حاجه  سرحت فى الجمله وتخليت المجتمع القادم اللى هيربيه مجتمع عنده فكر  ان المتحرش بيها  هى اللى غلطانه  ياترى هيكون ايه ولو الجيل اللى بيفكر كده طلع منه كتاب وشيوخ وعلماء هيكون شكلهم ايه  هل ممكن فى يوم نسمع عن كتاب اسمه مثلا  اخلاقيات متحرش  بيكلمنا ازاى ان المتحرش  الصح لا يتحرش بفتاه محترمه وما هى مواصفه المحترمه المقصوده  ولا مثلا يطلع كتاب مواصفات الفتاه اللى ممكن تتحرش بيها مثلا   ولا حتى  زمن التحرش الجميل  يكلمنا ازاى ان المتحرشون والمراهقين كانوا محترمين لا يتحرشوا  الا ببنات  معينه  ولا مثلا  حد يطلع علينا بكتاب  المتحرش المثالى  زى ما سمعت شيخ جامع عندنا بيقول ان البنات هما اللى بيتحرشوا بالولاد بلبسهم ومافيش ولا كلمه  قالها فى الخطبه بتاعته للشباب ان فعلهم غلط  شئ عجيب لما تقلب الموازين وتجعل صاحب الفعل البذئ  صاحب فضيله مسخره

اه يازمن العجب
كل شئ فيك اتقلب
يتهموا الصبيه
والمتحرش بقى صاحب فضيله وقضيه
مش ناقص  غير اننا نقول  على اللى سرق هو اللى اتسرق
واللى قتل هو اللى اتقتل
ماهو يعنى زى مافيش متحرش هيتحرش بدون سبب 
مافيش حد هيتقتل  حتى ولو عشان يتسرق من غير سبب
 المجنى عليه بقى هو المتهم
قتل  فى الجانى الانسانيه وحوله لمتهم
اه يازمن العجب
كل شئ فيك اتقلب
 المجرمين بقى هما الابرياء
واتهم بالاجرام الابرياء
اه يازمن العجب
كل شئ فيك اتقلب

الخميس، 30 أغسطس، 2012

بدون عنوان

لو اتشاجرنا  مع بعض  يجروا علينا مايسئلوناش  بنتشاجر ليه

يحاولو يبعدونا عن بعض  ويقولولنا حصل خير
ولو حبينا بعض  يجلسوا  مع بعض من وراء ضهرنا يفكروا بنحب بعض ليه وليه وليه وليه  
يقولوا علينا عاشقين بعض  فى الضلمه
اصل قلوبهم فى الاصل ضلمه
لما يلاقونا   بنتشاجر مع بعض   يقولوا  حكمتهم المعروفه
 شيل دا عن دا  يرتاح دا من دا
ولما يلاقونا  بنحب بعض   يحاولوا  ينفذوا  حكمه قلوبهم السوده  
  شيل دا من دا  يستريح دا من كلام دا
ولما يبعد دا عن دا  يقولوا   راح فين الحب
هاهاهاهاها بيسئلوا عن الحب
بعد ماضربوا كرسى فى الكلوب
هاهاهاها  اه يا اولاد ال  ولا بلاش
ديه عالم ماتسواش

الخميس، 23 أغسطس، 2012

يمكن اكون عجزت


 اتصل بصديقه  واتفقا ان يقضون  اجازه العيد مع بعض  خرجوا  فى اول ايام العيد يتجولون فى انحاء البلاد ومن الزحمه   يشعرون بانهم يزحفون  وبين كل دقيقه  يقفون يشاهدون  مشاجره  بين اثنين  او اكثر  كانت اغلب المشجارات متشابهه مابين شخصا يستظرف  واخرون يتمرقعون   بالموتسيكل او الدرجات   واخر يتحرش بفتاه او اثنين  الى اخره  كان يدور بينه وبين صديقه حوار اغلب حديثهم  لم يسمعوه فكانوا بالرغم من انهم يمشون نع بعض فى  نفس الشارع  متجاورون لا تفصلهم عن بعض الا سنتيمترات  لكن كانوا يسمعون بعض بصعوبه حيث كانت اصوات الصواريخ والبمب والصافرات اللعبه تعلوا على اصواتهم  مرت ساعات وانصرف كل واحد الى بيته فى اليوم الثانى اتصل بيه صديق ليتفقوا على الخروج مع بعض فرفض استغرب صديقه من الرفض  وقال له هل ستقضى العيد فى البيت
فرد عليه وقال عيد ايه بلاقرف
اندهش صديقه من رد فعله  وقوله وقال له اتقول على العيد بلاقرف
-          ما الذى يعجبك فى العيد هل صداع  العاب البمب والصواريخ ام المشاجرات او الصيع الذين يملئون الشارع  يتحرشون ويستظرفون ويتمرقعون بالدراجات والمتوسكلات تمشى فى الشارع  تشاه مشاجارات وتكون انت مستعد لاى مشاجره تعرف اننى بالامس كنت قد اوشكت ان اتشاجر مع  اكثر  من عشره اشخاص ولا اعلم من الذى منعنى اصبع التنزه فى الطرقات فى العيد محرقه للدم  
-          عجيبه ما كنا بتلعب زمان بالبمب والصواريخ  و بالدرجات  ما كل الشباب كده ولا انت كبرت فجاه 
-          تصدق اننى لم اشتهى يوما اللعب بالبمب والصواريخ  ابدا  حتى وانا صغير بالرغم انى قد اكون لعبت بيهم تفريحى كده  عندما كان اهلى يحضروهم لى ولاخواتى  
-          لا كده انت اللى مش طبيعى  عيش سنك انت لسه لم تتجاوز الثلاثين واخلع النظاره السوده ديه معاك ان المجتمع اصبح اكثر سوء  لكن هو من زمان سيئ بس بدرجات   اخلع النظاره السوداء ديه وحاول تشوف  جمال العيد فى لمه العيله مع بعض  
-          وحياتك  حتى ديه مابقتش فى عينى حلوه لان زمان كنا بنتجمع مع العائله واحنا اطفال بنلعب دلوقتى التجمعات ديه بقيت بحس انها بتخرج من بيت تقعد فى بيت  لان حتى مابقاش ينفع نخرج للمتنزهات مع بعض او  فى الشارع لانه امتلاء بالصيع
-          واضح انك مش لابس نظاره سواد انت مركب عدسات
       -           او يمكن اكون عجزت
  ثم شرد ذهنه  و ترك التليفون ونظر فى المراءه التى امامه ليسئل نفسه ياترى انا لابس نظاره سوده صحيح مخليانى اشوف كل شئ سئ ولا انا عجزت ومبقتش  مستحمل لعب الاطفال والشباب زى ما كان جدى وجدتى مش بيستحملوا لعبى  وانا صغير ولا فعلا المجتمع اصبح سئ لدرجه انه اصبح لا يطاق 
 

الجمعة، 17 أغسطس، 2012

من غير عنوان

 تعدى السنين وتفوت
ومافيش حد زى  ما اتولد بيموت
ساعات بدخول   شخص  فى حياتنا  بنتغير 
وساعات بخروج شخص من حياتنا  بنتغير
واللى يحير اننا بسبب او من غير سبب  بنتغير 
وعجبى

الأربعاء، 15 أغسطس، 2012

المصحف



 فى رمضان

انا الذى اجمع بداخلى ايات القران   القران الذى انزله الله  تعالى فى رمضان   على نبيه  محمد صلى الله عليه وسلم  وجمعه بداخلى لاكون  كتاب موحد عثمان  ابن عفان  بلهجه واحده  كعادتى  كل سنه على مدار الشهر الكريم يداولونى الناس   ويقرائوا ما احتوى من ايات الله   خلال الشهر الكريم  شهر رمضان  منهم من يتباهى مع اصدقائه بما انجز من قرائتى   ويتفاخرون  من انهى جزء منى قبل الاخر منهم من انهى جزئين ومنهم  ثلاث اجزاء ومنهم من يعاتب من لا يقرائنى  فى هذا الشهر الكريم  ويتباهى    بانهم ختمونى   مره او اثنين    ويصحبونى فى المواصلات وفى اماكن  عملهم  ويقرائونى  فى المواصلات او فى اماكن عملهم  منهم من يهرول فى قرائتى وكأنى حمل ثقيل عليه يريد التخلص منى  ومنهم من يتدبرنى ويتأنى وكأنه يريد ان يفهمنى  ويناقشنى  وتمر الايام  وينتهى شهر رمضان   فاعود الى مكانى  بين الكتب لمن يحب القراءه  ويمتلك  لديه  فى بيته مكتبه او  على البوفيه   او على ما يسمونه الكمودينه  ويعود التراب يغمرنى واشعر باننى اعيش فى بيت مهجور  استعجب  منهم اليس انا  المصحف الذى بداخلى القران  انا الذى كانوا يقرائونى على مدار الشهر  ويتباهوا  انهم  انجزوا جزئا  او اثنين منى  فى اليوم    عجبا  ماذا حدث هل اغضبتهم فى شئ   قد يكونوا  قرائونى  ولم يعرفونى او يفهمونى  قد يكون حدث سوء تفاهم بيننا  لا افهمهم   انا مازلت انا   ام اننى    ليس لى مكان  بينهم غير شهر رمضان وباقى الشهور يحلفون بيا وخلاص  اعلم ان القران الذى احتويه  انزله الله تعالى فى رمضان ولكن ليس ليقرائه الناس فى رمضان وفقط وباقى السنه يحلفون بى كذبا او صدقا   بل ليكون لهم منهج فى الحياه   ولو كان الامر قراءه لشهر واحد وفقط   اعتنوا بيا امسحوا عنى التراب حتى ان جاء رمضان القادم اكون لكم جاهزا  لا انسى هذا الرجل الطيب الذى كان لا يتركنى لشهر رمضان ليقرائنى فيه وفقط   اتذكر انه كان بيقرائنى  فى العشر الاوائل من ذو الحجه   راس السنه الهجريه  وساعات فى الجمع نصف شعبان وساعات فى رجب  كانت ايام  الله  يرحمه   ياريت اولاده  يفتكروتى  على الاقل زيه وياسلام لو سلموا  عليا كل يوم ولو حتى بعد العشاء
زرونى ولو كل شهر مره   بلاش تسبونى للتراب  ديه حاجه مره     افتكرونى فى العيد  كل سنه وانتم طيبن
عيد سعيد عليكم
كالعاده بعد رمضان  للاسف 

الجمعة، 3 أغسطس، 2012

ابو الريش

اليوم الخير السنوى    ابو الريش 
التجمع يوم السبت 11 اغسطس  الساعه اربعه قصاد ابو الريش اليابانى
 وللناس الجديده اللى اول مره تروح  
العنوان 

مستشفى ابو الريش اليابانى رقم 1 شارع الدكتور على ابراهيم باشا - السيده زينب - بجوار محطة المترو  
ملحوظه  مش مهمه اوى  لكن هامه  بجوار محطه المترو   يوجد مستشفتين  باسم ابو الريش   واحده ابو الريش اليابانى   والتانيه  ابو الريش المنيره
تجمعنا امام ابو الريش اليابانى    
 اى حد جديد يتاكد من انه واقف امام ابو الريش اليابانى للاطفال ومش  المستشفى الثانيه 

لمزيد من المعلومات 
 والتفاصيل  عند قوس قزح 
  وكمان
فاتيما  

الاثنين، 30 يوليو، 2012

الحلم قصه قصيره


 تجربه لكتابه قصه قصيره 
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
الحلم 
استيقظ عبد الله  من نومه على رن هاتفه كان صديقه على رد عليه  الو ازيك عامل ايه
  -الحمد لله تمام
 –وانت اخبارك ايه
الحمد لله  
-ايه الاخبار جهزت ورقك ولا لسه  
- الورق خلص  لكن  و توقف عن الكلام
-  لكن ايه
-مش عارف  بقالى فتره بحلم بحلم غريب شويه مخلينى متردد فى السفر
- حلم ايه
 - بحلم انى ذهبت للمستقبل انبهرت بكل مافيه من تكنولوجيا ورحلات فضاء الى اخره  واتعرفت على واحد من الناس من  اللى فى المستقبل  بقيت ماشى معاه زى ظله لغيت  عقلى وبقى كل اللى بيقوله فى نظرى صح ما انا جاى من زمن لسه ماوصلش للعلم  اللى هما وصلوله  رحت معاه كنا بنسهر  ونشرب خمر ونعمل  كل ما يجى على بالنا من اى فعل  مهما كان يعنى من الاخر عملنا كل شئ غلط تنازلت عن اخلاقى ومبادئ وفجاه لقيت نفسى يائس محبط مش عارف اعمل ايه فاشل  وقررت اتخلص  من حياتى   وفجاه   ظهر لى واحد يمنعنى سئلته انت مين قالى انا اللى  جبتك فى الزمن دا قولته وعايز منى ايه  قالى  عايزك  تعيش انت ليه عايز تتخلص من حياتك   قولته  وايه الفايده فى حياتى وانا ماليش قيمه  انا فى زمن سابقنى بزمن ازاى هقدر اعيش واتعلم فيه من اخطائى  ازاى وهو سابقنى بكتير انت ليه جبتنى هنا رد عليا هو مش انت كنت رافض زمنك وبلدك غيرتلك زمنك وبلدك عايز ايه تانى قولتله واضح ان مافيش فايده قالى مافيش حاجه اسمها مستحيل  فى امل تحدى تعلم  قلتله بس دا مش زمنى وكمان اتعلم ايه تانى ما اتعلمنا كتير خلاص كبرنا  عن التعليم  رد ماكنت رافض زمنك وكمان مافيش حاجه اسمها اتعلمنا كتير الانسان لحد مايموت بيتعلم  قولت  بس مش فى بلدنا   قالى حتى بعد كل التطور دا بتقول مش فى بلدنا  طب  ايه رايك ارجعك  قبل زمنك وتجرب تانى  واديك هتكون انت اللى سابق الزمن مش هو اللى سابقك   وهتكون مع ناس انت متقدم عنهم  ورينا هتعمل ايه  بقى قلت ماشى اجرب مش هخسر حاجه  معرفش عمل ايه  وفجاه بقيت فى  زمن الملك احمس
- الملك احمس مره واحده اتغطى وانت نايم وانت هتوصل لعالمنا تانى وضحك على
- ماشى يا خفه
-طب كمل باقى الحلم
-  لا بقى خلاص هتغطى وانا نايم خلاص
على ضاحكا  كمل يا رغم واضح انه كان حلم خيال علمى على تاريخى 
عبد الله ضاحكا  ماشى  ياعم الظريف هكملك  اول ماظهرت ليهم تم القبض عليا كانوا فاكريينى من الهكسوس  و اثناء المحاكمه حاولت اقنعهم باننى من زمن اخر واحمل لهم علما كثير
 على ضاحكا طول عمرك شكلك سوابق  وطبعا قتلوك ماهما مش هيصدقوا ولا هيقتنعوا بالف ليله وليله ديه الموضوع دا اتعمل فى اكتر من فيلم عربى  قبل كده
- لا يا خويا    اقتنعوا بيا لما شافونى عارف معلومات عنهم  و علمتهم كيف يصنعون كمبيوتر  وانترنت و ربنا ستر  عرفت اعلمهم ازاى بردوا الله اعلم  المعرفه مفيده احيانا بردوا   فرحت بنفسى اوى بانى انجزت وعلمتهم تكنولوجيا
   -  طب ماانت  حلو  اهو وليك لازمه  امال ايه المشكله اه ماكنش فيه المواد اللى تصنعلهم بيها الكمبيوتر
-لا ما انا قولتلهم المعلومات و ازاى   الكمبيوتر والانترنت  اتعملوا وهما بعلمائهم اتصرفوا  وكان الملك احمس معجب بيا  جدا انى  علمته شيئا وخصوصا عندما بحث على الانترنت عن العجلات الحربيه واللى حارب بيها الهكسوس  اتعلم من خلال بعض المواقع صنعها  ونجح فى التغلب عليهم
- اخيرا عرفنا احمس عمل العجلات الحربيه ازاى  واخيرا انت عملت حاجه عدله  بس يا خساره فى الاحلام بس
ياريتها كملت كمان لكنى جائت عليا لحظه شعرت باننى يجب ان اكون انا الملك نفسه  حاولت عمل مؤامره عليه ولكنى فشلت  وتم القبض عليا  وحكم عليا وسجنت
- طول عمرك فاشل يابنى حتى فى الحلم كاسفنا   وطبعا صحيت قبل ما يذبحوك  

- لا ماهو زارنى الملك احمس فى السجن  كان عايز  يستفهم منى لماذا فعلت ذلك صارحته باننى كنت اريد ان اكون ملكا مكانه وتحدثت معه بصراحه باننى لم اجد فيه الشخصيه التى تصلح ان تكون ملك فهو ليس  اكثر منى علما اندهش عندما سمع كلامى وضحك وقال لى انا فعلا لا اصلح ان اكون ملك  فعلا فانت اكثر علما منى ولذلك هزمتك واوقعتك فى السجن
- اه دا كده بيهزك وش بس اول مره اعرف ان احمس بيسخر من الناس عادى المفروض ماكنتش تعديهاله ديه 
عبد الله ضاحكا لا ما انا قلت الطيب احسن   وعملت عبيط و قلت له لا اعلم لماذا الفشل يحاوطنى فى كل زمن وفى كل مكان  فقال لى وهذا هو عقابك الذى ساعاقبك بيه  فقلت له قولى انا فاشل ولا العيب فين بالظبط العيب فيا ولا فى مين  و اقتلنى بعدها فضحك وقال اتتمنى الموت  فقلت له  وما فائده الحياه وانا اسير الفشل فقال لى اخبرنى بقصتك لكى  اشرحلك سر فشلك فحكيت له القصه  وازاى روحت الى المستقبل  وفشلت لحد مارجعت للماضى عنده وسجنى  وسئلته هو انا فاشل ولا الناس ولا الزمن ولا ايه   قالى انت مش فاشل لكن مش عارف تنجح انت لما روحت للمستقبل وانبهرت
مفكرتش انك تتعلم قلت تقلد سلوكهم وخلاص  وعشان فكرت انك تقلد مش تتعلم قلدت اسواء نموذج فى تصرفاته  ففشلت لانك استكبرت انك تتعلم وتقول انك مش عارف وبعت كل اخلاقك ومبادئك  وعلى فكره انت لو كنت فكرت تتعلم كنت هتقلد بردوا بس هتكون فهمت اى نموذج تقلده عشان تنجح  ولما وجتلنا هنا  جيت متكبر على الناس  عايز تحكمهم عشان انت عارف معلومتين زياده لكن عشان تكبرت على الناس ماعرفتش تفهمهم هما اتعلموا العلم اللى عندك وغلبوك بيه ففشلت لان مافيش حد هينجح لو تكبر على العلم او على الناس   تفتكر ديه رؤيه ياعلى رساله ليها معنى معين لها علاقه بسفرنا وتركنا بلدنا واحنا مش عارفين رايحين هنعمل ايه ولا ايه
-                                                - مش عارف يمكن رساله تحذير من انبهارنا الزائد بالغرب اللى ممكن يخلينا نقلد الغرب فى اى شئ حتى ولو كان سئ زى بالظبط ما بنعمل واحنا على ارضنا هنا منبهريين بالغرب وبنقلد اسوء ما عنده لاننا متكبيرين على علمه بدعوه اننا اصحاب حضاره سبع  تلاف سنه مش واخدين بالنا ان حضاره الماضى لا تصنع حضاره لبكره لكن العلم هو من يصنع الحضارات  بس بص اتغطى كويس وانت تبطل تحلم
-                                                - كده اموت على راي محمد منير لو بطلنا نحلم نموت
-                                                  - ايوه بس حلم عن حلم يفرق  والمهم ان الحلم مايستسلمش قدام الصعاب ويا سيدى  ابقى اتغطى كويس وانت نايم عشان ماتحلمش احلام غريبه وركز فى حلمك حلم السفر 
                                             -  الحلم   لو مش لغايه  محدده  يكون كابوس ياخوفى ليكون حلمنا  كابوس   وعلت ضحكاتهم
    


السبت، 28 يوليو، 2012

عيد ميلادى

ومضى قطار العمر   ياولدى 


فضفضه تهنئ  صاحبها بعيد ميلاده السادس والعشرون  اطال الله عمره  وتدعو الله ان يديم  عليه الصحه  
وتحتفل مع   زوارها  بهذا العيد العظيم 
نيهههههههههههاهها 
 البوفيه


الاثنين، 23 يوليو، 2012

السحور بين الماضى والحاضر


من اول ما طلعوا علينا فى برامج الاكل يقولولنا ان وجبه الفطار اهم وجبه  ولها فوائد  و ان  وجبه العشاء مضره عشان بناكل و بنام علطول والواحد كان بيسئل نفسه  طب ازاى فرض علينا الصيام وازاى بيقال صوموا تصحوا  لنرجع و نعرف ان الرسول عليه الصلاه والسلام  كان بيقولنا اخروا السحور  وعجلوا بالفطور  ومع شويه مقارنه  بين الماضى واليوم بنشوف انهم زمان لما كانوا  يناموا بعد العشاء ويصحوا قبل الفجر   لما ياخروا السحور يعنى يصحوا قبل الفجر  يتسحروا   وبعدها ياذن الفجر ويصلوا   ويبداءوا يومهم فبيكون وجبه السحور فى محل وجبه  الفطار  اللى بيقول خبراء التغذيه انها اهم  الوجبات  انما نحن  الان بنتسحر وبعد كده بنام سواء اتسحرنا قبل الفجر ولا بعد العشاء   فبتكون وجبه السحور فى محل وجبه العشاء اللى هى عند خبراء التغذيه مكروهه لاننا بناكل وبنام    ودا طبعا لان نظامنا احنا  هو اللى غلط  
انتهى

الخميس، 19 يوليو، 2012

كل سنه وانتم طيبين

كل سنه وانتم طيبين 
فضفضه  تشكركم على متابعتكم خلال  حمله التدوين اليوم من 20 يونيو الى 20 يوليو  وتعتذر لكم لتقصيرها معكم  اسعدنى المشاركه  معكم والاستفاده منكم   والتعرف على مدوناتكم  شكرا لكم   جميعا واتمنى ان تكون بوستاتى نالت اعجابكم

  شكرا خاص  للدكتوره  شرين سامى  صاحبه الدعوه  
كنتم مع فضفضه   مع حمله التدوين اليومى
كتبها  عمرو يسرى
معليقين الحمله   مع حفظ الالقاب
1-      مصطفى سيف  الدين
2-      احمد احمد صالح
3-      رحاب صالح
4-      ريماس
5-      الازهرى
6-      نور القمر
7-       محمد الجرايحى
8-       قلب القطه
9-      شبكه الاصاله العربيه
10-  Haytham Kilany
11-   وجع البنفسج
12-  MEROOooOOoo
13-  beautiful mind
14-  شمس النهار
15-  كارولين فاروق
16-   هبه فاروق
17-   بنت من الزمن دا
18-   هبه الله
19-   ليلى الصباحى
20-   كريمه سندى
21-  جايده العزيزى
22-   زينه زيدان
23-   الاحلام
24-  Alzhraa_Mustafa
25-  MaNoOoSh
26-  eng_semsem
27-  wessam
28-   ايمى
29-   ضياء عزت
30-   فاتيما
31-   شرين سامى
32-   ايه محمد
33-   اميره
34-  Tasneem Adel
35-    اميره احمد
36-   رؤى عليوه
37-  سواح فى ملك الله
38-   بسمه الورد
39-   عاشقه القمر
40-   منه
41-   كارمن
42-  Dodo , the honey
43-  Haytham Alsayes
44-  nonaelsha3nona
45-   مها البناء
46-   اسماء على
47-  Casper
48-   ايمان حسين
 شكرا لكم
وشكر خاص   لحبيب قلبى الغير معرف  
وشكر خاص لجميع القراء  

اتمنى ان تكون  بوستات اللى اتنشرت  ان تكون  نالت اعجابكم  والى اللقاء فى حملات اخرى
 كل سنه وانتم طيببن  ورمضان كريم
 كان معكم عمرو يسرى من  مدونه فضفضه 
برعايه بلوجر  للتدوين 






Follow by Email

Tetris