الثلاثاء، 20 ديسمبر، 2011

مش فاهم حاجه


احنا مين
احنا المصريين مين
ناس تقولك المصريين دول ازبل ناس شويه رعاع  اغبيه  حشاشيين
وناس تقول المصريين دول اجدع ناس واذكى ناس  مطلعيين نجيب محفوظ  وزويل  والبردعى ودكاتره كبار وعلماء
ترد ناس تانيه  تقول نجيب محفوظ دا ملحد واخد نوبل عشان قصه اولاد حارتنا  اللى بيطاول فيها على الله سبحانه وتعالى  وزويل  خاين بقى خلاص امريكانى  والبردعى  بردوا خاين ومعملش حاجه لمصر وموضوع العراق فاكرينه  وكل اللى بينجح  يتقال عليه فاسد او  ملحد   طب يعنى احنا ايه حتى اللى بنفتخر بيهم  يجى مصريين زينا ويسبوهم
وناس تقول المصريين دول فراعنه  مابيعجهمش حد
طب احنا اللى بنشتم ولا اللى بنتشتم  ولو احنا  اللى بنتشتم  هل نستحق الشتيمه ولو احنا اللى بنشتم بنشتم مين
احنا اللى انتخبنا الفستان البمبى فى رمضان  ولا احنا اللى انتخبنا السلفيين والاخوان 
احنا مين  المصريين مين
فى الاحداث الاخيره  
  احنا اللى انضربنا واتمسح بينا الارض واتعرينا  ولا احنا العساكر اللى ضربت  وعرت وبعد مااستسلموا المضروبين غطوهم تانى وبعد مايخلصوا  جيش احتمال  تيجى تتظاهر معانا احنا مين  احنا اللى ضربنا ولا اللى بنضرب  ولا احنا اللى حرقنا المبانى وعملنا علامه النصر  وكأننا فجرنا مبنى اسرائيلى 



احنا مين  
حد فاهم حاجه بصرف النصر باننى فقد الثقه فى كل شئ  المجلس العسكرى  والثوار والفلول والقوى السياسيه  والبلطجيه ايضا  والمصريين عموما   باى شكل وباى لون
الاحداث الاخيره فى حد ذاتها غريبه
فى الاول  وجبه من امراه مجهوله  تسببت فى تسمم الثوار  غريبه الناس كانت بتتعرف على بعض فى الميدان وهذه السيده المجهوله مافيش حد وهو بياخد منها الاكل اتعرف عليها عرف عنها بيانات حتى  لو كانت بيانات  غير صحيحه اسمها مثلا مافيش  عادى الموضوع عدى  امراءه مندسه من المجلس العسكرى ماشى هنبلعها
بعد كده بيلعبوا كوره  والكوره طارت دخلت المجلس  وهو دايما الكوره بتجيب مشاكل  وغالبا الكوره ديه كانت مندسه من المجلس العسكرى  اصله فشل فى تسميمهم  فقال يلاعبهم كوره عادى  وتبداء المباراه  على راى شوبير فى التعليقات الكرويه مباراه  خارج التوقعات خارج التكهنات  اقصد المعركه وبداء الشوط الاول فديوهات  استخدام الجيش  العنف  ضد المتظاهريين وضرب وتعريه سيده  جريمه لايختلف عنها اثنين واعترف الجيش بيها  ماشى  ثم   مباراه الملتوف  جيش بيضرب بيها ومواطنون  نسئل المواطنون ليه بتضربوا الملتوف يقولوا الرد المعروف بننضرب يعنى هنعمل ايه  ناخد  الكلام نعكسه الجيش  بينضرب هيعمل ايه يكون الرد  ولو مايكونش التعامل كده صباح التهييس  الثوار من حقهم الدفاع عن نفسهم باى وسيله والجيش لا مايكونش التعامل كده ماشى هنعديها وهنبلعها  مافيش مشكله الجيش يعلن ان فيه جنود اتصابت وماتت  نكدب  ونقول دا كلام فارغ بالرغم من ان اى خناقه الطبيعى ان الاثنين يتصابه حتى ولوكان واحد منهم اللى مرتبها  بس هنبلعها ونكدبهم  ماشى طب الجيش مرتبها ماشى  لازم يكون له فايده لنفسه عشان يرتبها  ايه الفايده اللى عايده عليه مافيش  البلد هايجه  عليه وعلى حكومه الجنزوى طيب يعنى اساسا مصلحته سؤاء عايز يمسك الحكم او لا  ان البلد تستقر لان لو عرف يعمل فيها استقرا ممكن الشعب ينضحك عليه ويقوله كمل واحنا اساسا شعب عاطفى  طيب مين له المصلحه فى اثارت الشعب  ناس تقولك دول بلطجيه وفلول  بس اللى بيموت لاهما بلطجيه ولا هما فلول الشيخ عماد لابلطجى ولا فلول  طبعا لانك بتهيج الناس فالناس بتنزل وهى اللى بتموت والقوى السياسيه هى اللى بتكسب فى الاخر  طيب النتيجه ايه
فى ناس  تقولك يتنحى المجلس ويمسك مجلس مدنى
ترد ناس مين يعنى اللى هيمسك
يندهش الثوار ويسئل ايه الغباء دا مصر ولاده وفيها ناس كتير
بس الغريب ان السؤال مش مين يصلح السؤال مين اللى المجتمع يتحد عليه ويوافق عليه وميطلع عليه مظاهره فى التحرير عشان تشيله 
لما قاله البرادعى وحسام عيسى  وابو الفتوح  طلع فلى التحرير اللى قالك البرادعى لا وابو الفتوح لا ومين  هو حسام عيسى  والائتلافات كل ائتلاف بيتكلم ويقول الائتلاف التانى لا يمثلنى  وواحد احمق قال هى كده حلوه   كلام اهبل 
ايوه حلو الاختلاف بس مع الاختلاف فى الراى لازم نكون متفقيين على حد يدير ومتفقيين على سياسه يمشى عليها   لان مش حلو  اننا نختلف  وناكل فى بعض وميبقاش فى حد يحتكم مابنا
انا مش فاهم حاجه وعايز حد يفهمنى يكون فاهم
المجلس العسكرى بيعمل اخطاء ووحش  والقوى السياسيه مش كلها كويسه وفى منها بيلعب سياسه قذره والفلول اللى مش هيسبوها  والمواطنون اللى فى بيوتهم سواء حزب كنبه  او ثوار كانوا فى بيتهم قبل الاحداث الاخير ماتولع وصوره السيده  المضروبه  المتعريه تعطيهم الحماس اللى يخليهم ينزلوا مع المعتصميين والبلطجيه   والجهات الخارجيه اللى اكيد مش هتعدى حاله زى اللى احنا فيها من غير ماتلعب لعب لمصالحها  كلهم وانا وانتم اكيد كلنا عايزين نفهم ايه اللى بيحصل وهنوصل الى فين  لان ماحدش فاهم حاجه  لاانا ولا الثوار ولا البلطجيه ولا الفلول  ولا الخونه ولا المجلس العسكرى ولا القوى السياسيه فاهمين حاجه  كل واحد بس فاهم الجزء بتاعه و مش فاهم الباقى ياريت اللى فاهم حاجه يفهمنى  
حد يقولى احنا هنوصل الى فين  واحنامين  احنا توهنا عن نفسنا ولا احنا لسه يادوب فى الطريق احنا فى الطريق الصح ولا ضلينا الطريق  احنا فين

هناك 4 تعليقات:

هبة فاروق يقول...

احلفلك بايه انا كمان ما فاهمه حاجه
تحياتى

شمس النهار يقول...

المشكلة
ان كل تيار او قوة سياسية
عايزة تفرض نفسها علي المجتمع والمشهد

اما ليه احنا بنشتم او نمدح
في نفسنا
عشان المصريين كده
وطول عمرهم كده
بينكتوا علي نفسهم
وينقدوا نفسهم
ويمجدوا في نفسهم
ومش معني كلامي اني فاهمة حاجة
انا زيك وزي هبة وزي كتيييييييير زينا
مش فاهمين حاجة

اسعار العملات يقول...

ياااااااااااااارب
احمى مصر واهلها من كل سوء

غير معرف يقول...

greetings 7akawy-amr.blogspot.com blogger discovered your blog via Google but it was hard to find and I see you could have more visitors because there are not so many comments yet. I have found website which offer to dramatically increase traffic to your blog http://xrumerservice.org they claim they managed to get close to 1000 visitors/day using their services you could also get lot more targeted traffic from search engines as you have now. I used their services and got significantly more visitors to my site. Hope this helps :) They offer best backlink service Take care. Jason

Follow by Email

Tetris