الثلاثاء، 15 نوفمبر، 2011

هل سينجح مجلس الغايه تبرر الوسيله فى تحقيق اهداف الثوره ؟


وانا بتجول فى شارع شبرا  وقد امتلاء باللافتات الانتخابيه وانا ماليش فى السياسه اصلا والكل عارف كده ادهشنى بعض اللافتات لما رميت بعينى كده اشوف قائمه الاخوان او الشكل الجديد بتاعها حزب العداله والحريه  الاقى على القائمه الاستاذ امين اسكندر على  قائمه الاخوان هو فيه ايه انا على حد معرفتى ان اسم اسكندر دا اسم مسيحى  يمكن علشان ماليش فى السياسه ممكن يكون اسم اسكندر يكون مسلم عادى بس لما رجعت ابحث عنه على النت الاقيه مسيحى طب هو اسلم ولا الاخوان اللى  تنصروا   لا ديه وحده وطنيه  قولت عادى مصر كلها ايد واحده  عادى بس ارجع اشوف اللافتات الاقى ان الاستاذ امين اسكندر مكتوب فى بعض اللافتات رئيس حزب الكرامه ولافتات  موسس له  طيب موجود على قائمه الاخوان ليه  افوت الموضوع دا  و اكمل ماشى فى الشارع  اتذكر ندوه  فى مصر القديمه حضرتها من فتره  اسمها اعرف حزبك كان مستضيف  الحزب المصرى  الديمقراطى للصدفه البحته كل الناس اللى كانت هتيجى الندوه وعلى رئسهم رئيس الحزب اعتذروا لظروف خاصه بهم افيه جامد كلهم تعبوا فجاه يعنى عادى ان واحد يحصله ظروف او اثنين لكن دا كلهم ياريس حصلتلهم ظروف اصل العدد كان قليل مش كتير فحصلتلهم ظروف ماشى   هنعديها  خرج علينا واحد من الحزب قطع طبعا فى النظام السابق كعاده اى واحد ولما بداء يتكلم عن الحزب بتاعه كل سؤال حد يسئله يرد عليه منتظريين راى الكتله حتى ماكنش عارف هو يدخل الانتخابات ولا هيقاطع عشان منتظرين راى الكتله  ويقول الكتله عشان الانتخابات  بس طب اقول كلمه ابيحه ولا ايه لا و دايما فى الفتره ديه فى كلام اننا المفروض ننتخب احزاب   احزاب مين بلاوكسه هو فيه احزاب اصلا  كده هننتخب كتلهلان مافيش احزاب
اللى غريب كمان  ان حزب الوفد كان بردوه  كان هيبقى مع الاخوان بس لما الناس اندهشت قام دخل لواحده  يعنى بردوا حزب كان خايف  فراح يشارك الناس اللى بتلعب بالدين ولما قالوله عيب اختشى سابهم   
حزب النور بقى دا كان حكايه سلفى هبلى عبطى اى حاجه مرشحين انثى وباين عليها شكلها كويس وجميله جمال صارخ  فتقريبا خافوا لا الشعب يعاكسها ولا حاجه  وطبعا  هو كحزب سلفى خايفين من الفتنه فبدل صورتها واضعوا  صوره ورده  ولما خدوا كلمتين حطوا صوره جوزها وكتبوا حرم السيد فلان  غالبا هتروح المجلس مع محرم  ولما سمعوا كلمتين حطوا صورتها بالنقاب وشالوا العينين  لو يسمعوا كلمتين  كمان هيحطوا مكانها صور خليعه حاجه غريبه لو انتم مش مقتنعين ترشحوا ست بترشحوها ليه  مسخره  عشان كراسى فى مجلس شعب هى الثوره ثوره شعب ولا ثوره كراسى هى الثوره قامت عشان نمشى الطقم القديم ونحشى الاماكن بطقم جديد  وخلاص ولا عشان نحط الاصلح  انما كله بيلعب على كله وكل مرشح او حزب على الاستعداد ان يتحالف مع الشيطان عشان يحصل على كرسى بلا قرف
ينفع يحقق مطالب ثوره مبادئ  مجلس شعب  الغايه تبرر الوسيله  وعلى كل لون ياكابتن  عجبنى كلام المدون استاذ ابراهيم رزق لما قال انك هتختار بين حرامى وفلول ومستغل  فعلا مافيش حد عدل او بمعنى اصح مش ظاهر حد عدل  وكلهم ولاد تييت  ديه مش انتخابات مجلس شعب ديه انتخابات مجلس هلس

هناك 7 تعليقات:

Mohamed Amer يقول...

السلام عليكم
علي فكرة ياعمرو قائمه الاخوان تضم عده احزاب (كتله علي بعض تسمي بالقائمه النسبيه ) ده غير ان حزب الاخوان فيه مؤسسين مسيحيين , اما بالنسبه للمراة فا كل قائمه لازم تحتوي علي امراة والسلفيين اصلا مش عايزين بس القانون بقي , وكمان قائمه حزب النور تضم احزاب اخري وممكن المراة دي تكون مش تبعهم اصلا تبع حزب تاني بس علي قائمه حزب النور
ده اللي انا اعرفه علي الانتخابات والقوائم والله اعلم
بس في الاخر لازم نشارك علشان نطلع من اللي احنا فيه , فحاول تعرف اكتر عن الناس اللي مرشحه نفسها عندك علشان ربنا يوفقك وتختار الاحسن فيهم

عمرو يسرى يقول...

Mohamed Amer
اكيد هشارك بس المشكله ان موضوع الكتله اساسا ماينفعش السلطه ماينفعش انه ادخل مع كتله تفكيرها مختلف عنى عشان كراسى ماينفعش وحزب النور انى اتخلى عن افكارى ومبادى عشان كراسى ماينفعش انى الاقى كله بيتحالف مع كله عشان كراسى ماينفعش ياريت يتحالفوا على حاجه عدله نظام الانتخابات بالشكل ده ماتنفعش

Mohamed Amer يقول...

القوائم النسبيه تعتمد علي الاساس
يعني لو اديت صوتك لقائمه الاخوان مش كل القائمه اللي حتنجح , يعني القائمه لو فيها 8 ممكن ينجح فيها 4 علي حسب الاصوات للقائمه دي , وعادتناً بتبقي اول ناس في القائمه من الاخوان او الحزب اللي مسيطر علي القائمه , يعني كمان حزب النور كدا هو اللي ميسطر علي اول اسامي في القائمه , يعني في الاخر انت بتدي صوتك للحزب المسيطر سواء كان اخوان او النور السلفي وكدا
وانا بكملك وانا مش فاهم اوي في الموضوع لان الموضوع متلخبط معايا شويه بس في الاخر حنعمل ايه اهو ده اللي موجود

عمرو يسرى يقول...

Mohamed Amer
هوانا من اللى فهمتوا من كلام حضرتك ان العمليه كلها عك فى عك يمكن اكون انا فهمت غلط بس من الواضح انها عك فى عك
معذره منى ليا استفسار صغير عن تعليق حضرتك الاولانى حضرتك بتقول ان حزب الاخوان فيه مؤسيسين مسيحيين مين ميسحى يساعد فى عمل حزب لجماعه بتقولك الاسلام هو الحل الميسيحى دا قلب ولا الاخوان اللى غيروا
اسف انا مجرد واحد عايز يفهم مش اكثر

Mohamed Amer يقول...

انا اللي ارعفه ساعه مع الاخوان قدموا ورق الحزب قالوا انه فيه مسيحيين ونساء في المؤسسين علشان يفهموا الناس انه مش حزب الاخوان وبس
وعددهم اتقال بالارقام

غير معرف يقول...

gday 7akawy-amr.blogspot.com blogger found your site via search engine but it was hard to find and I see you could have more visitors because there are not so many comments yet. I have found site which offer to dramatically increase traffic to your site http://xrumerservice.org they claim they managed to get close to 1000 visitors/day using their services you could also get lot more targeted traffic from search engines as you have now. I used their services and got significantly more visitors to my site. Hope this helps :) They offer pr checker link building seo backlinks permanent backlinks Take care. John

غير معرف يقول...

7akawy-amr.blogspot.com visit this web-site حسابداری و حسابداری مهم هستند که شما در حفظ و سوابق معاملات همراه با اطلاعات مالی از کسب و کار خود را به عنوان و به عنوان پیشرفت

Follow by Email

Tetris