الأحد، 9 أكتوبر، 2011

عينى عليك ياوطن

عينى عليك ياوطن 
مكتوب عليك الحزن والشجن  
الحرب قامت ولا ايه
حد يقولى الحكايه ايه  
طب هو احنا بنحارب مين 
ومين بيضرب فى مين  
مصابين وقتلى فى جيشنا 
هو احنا مين بيحاربنا
معقول شعبنا بيضرب فى جيشنا 
وجيشنا بيضرب فى شعبنا 
  ماكنش  الدم من مطالبنا
هنقول فلول وهنقول بلطجيه
وزمان كنا بنقول  نظام وتكبر جوه النفوس القضيه
ياحسره عليك ياوطن
مكتوب عليك تعيش فى  حاله حزن و شجن
اهلك قاموا بثوره
وعدت الايام وبقى كل كلب بيبحث عن عضمه
فى جمعه استرداد الثوره منصتين  
متجاورتين على نصيتين
وكل منصه بتبحث عن قياده الميدان
والناس وسطهم تايهه فى الميدان
بتصرخ نسمع مين فيكم ياغجر
بلاش تبقوا زى البقر
صحيح احنا اتخلقنا باذنين
لكن مستحيل نقدر فى وقت واحد نسمع اثنين
منصه بيتقال انها بتاعت ائتلاف
وعلى الميكرفون  بينهم خلاف
واللى انتصر ومسك الميكرفون قال للناس مش عايزين حد يزرع بينا خلاف
 ومنصه  بيقولوا سلفيه   معموله لحمله انتخابيه 
يوصل الشيخ المترشح يهتفوا  اسلاميه
ياعم الشيخ  لسه  اوقات الانتخابات جايه
مش وقت حمله انتخابيه
وتمر الايام وحرائق تولع
مسيحين بيتظاهروا والكل بيولع
اتوبيسات تضرب بالطوب وعربيات بتولع
دا حريق القاهره القديم ولا القاهره اتعودت على التوليع
تاريخك ياوطن بيقول انك مهد الاديان
بس للاسف اهلك بيلعبوا بالاديان
ايه الحكايه  حد يقولى الحكايه ايه
الحرب قامت ولا ايه
مصابين وقتلى فى جيشنا
معقول شعبنا بيضرب فى جيشنا 
وجيشنا بيضرب فى شعبنا 
افرحى يا امريكا  وارقصى يا اسرائيل
من غير ما نتعبكم  ونعمل فى جيشكم  خساير
بنقتل  في انفسنا   وفى جيشنا  بجد انا دمى فاير 
حزين عليك ياوطن 
وفى قلبى  حزن وشجن 
قمنا  بثوره على حكامنا  الفاسدين 
بس ازاى هنصلح ولسه احنا للاسف فاسدين 
عينى عليك ياوطن 
وفى قلبى حزن وشحن
خايف عليك ياوطن من اهلك 
اللى بيسفكوا دمك 
وبتمنى يكونوا مش اهلك 
بس سؤالى اللى بسئله  دايما لو   هما مش اهلك 
طب راحوا فين اهلك 
عينى عليك ياوطن 
مكتوب عليك  الحزن والشجن 
عينى عليك ياوطن 



ربنا يرحم  ضحايا الاحداث 



هناك 7 تعليقات:

mena يقول...

اللهم امين

الشاعر الفنان أحمد فتحى فؤاد يقول...

كل اللى نقدر نقوله بجد

ربنا يسترها عليكى يا بلدنا
تحياتى

ريــــمــــاس يقول...

مساء الغاردينيا عمرو
حفظ الله مصر من شر الحاقدين
وحماها وشعبها "
؛؛
؛
لروحك عبق الغاردينيا
كانت هنا
reemaas

مدونة رحلة حياه يقول...

السلام عليكم
مش عارف يا عمرو اقول ايه
لا تعليق
ربنا يستر

haneen nidal يقول...

قمنا بثوره على حكامنا الفاسدين
بس ازاى هنصلح ولسه احنا للاسف فاسدين
عينى عليك ياوطن
وفى قلبى حزن وشحن
خايف عليك ياوطن من اهلك
اللى بيسفكوا دمك
وبتمنى يكونوا مش اهلك
بس سؤالى اللى بسئله دايما لو هما مش اهلك
طب راحوا فين اهلك


______

ربنا يستر !

د.ريان يقول...

يارب ترجع مصر بخير

ويطمنا عليها وعلى شعبها

( حياتى ) يقول...

مساء الخير

وكل سنة وانت طيب

وان شاء الله مصر حتبقى بخير

دمت بكل خير وود

زهرة

Follow by Email

Tetris