الاثنين، 31 أكتوبر، 2011

قيمه الانسان هو مايضيفه للحياه بين ميلاده ووفاته (مصطفى محمود)



الذكرى الثانيه لصاحب العلم والايمان مصطفى محمود 


من منا لا يتذكر برنامج العلم والايمان الذى تربينا عليه بموسيقه الناى تتر مقدمه  البرنامج  وافتتاحية د/ مصطفى محمود أهلا بيكم
 




تعرض لأزمات فكرية كثيرة كان أولها عندما قدم للمحاكمة بسبب كتابه (الله والإنسان) وطلب عبد الناصر بنفسه تقديمه للمحاكمة بناء على طلب الأزهر باعتبارها قضية كفر!..إلا أن المحكمة اكتفت بمصادرة الكتاب, بعد ذلك أبلغه الرئيس السادات أنه معجب بالكتاب وقرر طبعه مرة أخرى!.

ازمة كتاب الشفاعة
الأزمة الشهيرة أزمة كتاب الشفاعة (أي شفاعة الرسول محمد صلى الله عليه وسلم في إخراج العصاة من المسلمين من النار وإدخالهم الجنة) عندما قال إن الشفاعة الحقيقية غير التي يروج لها علماء الحديث وأن الشفاعة بمفهومها المعروف أشبه بنوع من الواسطة والاتكالية على شفاعة النبى عليه الصلاة والسلام وعدم العمل والاجتهاد أو أنها تعنى تغيير لحكم الله في هؤلاء المذنبون وأن الله الأرحم بعبيده والأعلم بما يستحقونه وقتها هوجم الرجل بألسنة حادة وصدر 14 كتابا للرد عليه على رأسها كتاب الدكتور محمد فؤاد شاكر أستاذ الشريعة الإسلامية.. كان رداً قاسيا للغاية دون أي مبرر.. واتهموه بأنه مجرد طبيب لا علاقة له بالعلم الدينى  رحلة مصطفى محمود من الشك إلى الإيمان.. بدأت باتهامه بـ«الإلحاد» وانتهت بهجوم «الشيوعيين» عليه
وفي لحظة حولوه إلى مارق خارج عن القطيع، حاول أن ينتصر لفكره ويصمد أمام التيار الذي يريد رأسه، إلا أن كبر سنه وضعفه هزماه في النهاية. تقريبا لم يتعامل مع الموضوع بحيادية إلا فضيلة الدكتور نصر فريد واصل عندما قال:
"الدكتور مصطفى محمود رجل علم وفضل ومشهود له بالفصاحة والفهم وسعة الإطلاع والغيرة على الإسلام فما أكثر المواقف التي أشهر قلمه فيها للدفاع عن الإسلام والمسلمين والذود عن حياض الدين وكم عمل على تنقية الشريعة الإسلاميّة من الشوائب التي علقت بها وشهدت له المحافل التي صال فيها وجال دفاعا عن الدين".
المثير للأسف أن الرجل لم ينكر الشفاعة أصلا    رأيه يتلخص في أن الشفاعة مقيدة أو غيبية إلى أقصى حد وأن الاعتماد على الشفاعة لن يؤدى إلا إلى التكاسل عن نصرة الدين والتحلى بالعزيمة والإرادة في الفوز بدخول الجنة والاتكال على الشفاعة وهو ما يجب الحذر منه.. والأكثر إثارة للدهشة أنه اعتمد على آراء علماء كبار على رأسهم الإمام محمد عبده لكنهم حمّلوه الخطيئة وحده 
كان صديقا شخصيا للرئيس السادات ولم يحزن على أحد مثلما حزن على مصرعه يقول في ذلك "كيف لمسلمين أن يقتلوا رجلا رد مظالم كثيرة وأتى بالنصر وساعد الجماعات الإسلامية ومع ذلك قتلوه بأيديهم.. وعندما عرض السادات الوزارة عليه رفض قائلا: "أنا‏ ‏فشلت‏ ‏في‏ ‏إدارة‏ ‏أصغر‏ ‏مؤسسة‏ ‏وهي‏ الأسرة.. فأنا مطلق لمرتين.. فكيف بي أدير وزارة كاملة فرفض مصطفى محمود الوزارة كما سيفعل بعد ذلك  جمال حمدان  مفضلا التفرغ للبحث العلمي

 ألف 89 كتابا منها الكتب العلمية والدينية والفلسفية والاجتماعية والسياسية إضافة إلى الحكايات والمسرحيات وقصص الرحلات، ويتميز أسلوبه بالجاذبية مع العمق والبساطة.
قدم الدكتور مصطفى محمود 400 حلقة من برنامجه التلفزيوني الشهير العلم والإيمان وأنشأ عام 1979 مسجده في القاهرة المعروف بـ مسجد مصطفى محمود ويتبع له ثلاثة ‏مراكز‏ ‏طبية‏ تهتم بعلاج ذوي الدخل المحدود ويقصدها الكثير من أبناء مصر نظرا لسمعتها الطبية، ‏وشكل‏ ‏قوافل‏ ‏للرحمة‏ ‏من‏ ستة عشر ‏طبيبًا‏، ‏ويضم المركز‏ أربعة ‏مراصد‏ ‏فلكية‏، ‏ومتحفا ‏للجيولوجيا‏، يقوم عليه أساتذة متخصصون. ‏ويضم‏ ‏المتحف‏ ‏مجموعة‏ ‏من‏ ‏الصخور‏ ‏الجرانيتية،‏ ‏والفراشات‏ ‏المحنطة‏ ‏بأشكالها‏ ‏المتنوعة‏ ‏وبعض ‏الكائنات‏ ‏البحرية‏، والاسم الصحيح للمسجد هو "محمود" وقد سماه باسم والده.
.

مصطفى محمود ولد 27 ديسمبر1921  وتوفى 31 أكتوبر2009
  الله يرحمه

السبت، 29 أكتوبر، 2011

اين الحل

اين الحل 
مظاهرات امام ماسبيروا يوم الاربعاء الماضى تنادى بالوقوف  مع الجيش  والمجلس العسكرى والمشير ويهتفون ضد التحرير ردا على مظاهرات  يوم الجمعه   ينظمها جروب  ابناء الجيش ومعه جروبات اخرى  ومنهم من كان ابناء مبارك  بالطبع قد تقولوا عليهم فلول او اى لفظ اخر لكن المشكله مش فى دول المشكله ان ناس كتير خلاص زهقت وملت  وبداءت تشعر ان اللى بيعمل المظاهرات ناس مش فاهمه حاجه وناويين يضيعوا البلد او بيضيعوا البلد من غير  مايعرفوا الكل او غالبيه الناس بدات تتكلم وتتسائل هل من يقوم بالمظاهرات ناس غبيه لاتفهم الم يروا المشاكل التى تحدث من المظاهرات وكم الضحايا التى يحصد  فى كل مظاهره يرد اصحاب المظاهرات ويقول اللى بيحدث دا من بلطجيه من الشرطه والنظام بيرسلهم يعملوا فوضى  معاهم بس انا لو عارف ان المظاهرات اللى انا بعملها ضد النظام  النظام بيستخدمها لصالحه وانه بيزرع لى فيها بلطجيه تثير المشاكل واصدقائى تموت وافشل فى تامينهم ابقى غبى  غبى انى ماشفتش وسيله ضغط جديد تجيب نتيجه افضل  وتامن الناس وبعيدا عن الفلول او ابناء مبارك وابناء الجيش المتظاهرون فى التحرير اغلبهم ضد من يهتفون بسقوط المشير ليس حبا فى المشير ولا حبا فى المجلس العسكرى ولكن حبا فى مصر نعم النظام كان فاشل فاسدا  وبوحود المجلس العسكرى لم يسقط النظام  معاك لكن نحن اسقطنا مبارك لان نظامه  فاسد  وبعض الناس تريد اسقاط المشير  لان نظامه نفس النظام ولكن هل يصح ان نسقط نظاما حتى وان كان فاشلا او فاسدا دون ان اقترح النظام الجديد فتصبح فوضى بفرض اسقطنا المشير من يدير الفتره الانتقاليه بالطبع هياتى شخصا ويتهمنى بالفلوليه ويقول عندما اردنا اسقاط مبارك سئلتم من غيره  والان ونحن نريد اسقاط المشير  تسئلون من غيره مصر ولاده وفيها كتير معاكم فيها كتير  لكن لم نسقط نظام او رئيس لازم نكون محددين من الكتير دول واحد يدير الفتره الانتقاليه ومحددين نظام حتى لاتحدث فوضى فعندما نطالب باسقاط نظام  يجب ان نعلم اننا نريد اسقاط النظام  السياسى كاملا ولكن ليس اسقاط النظام عموما فالشعب لم يريد اسقاط النظام لكن يريد احلال نظام مكان نظام اخر  كثير يقول نريد مجلس رئاسئ وليس المجلس العسكرى معاك لكن مين اللى هيكون فى المجلس الرئاسئ ومين اللى هيختاره  الثوره ليها تجربه اختياريه سابقه عندما اختارت الدكتور عصام شرف رئيس الحكومه الحاليه وحلف القسم فى ميدان التحرير  ثم بعد فتره انقلبت عليه وكان راى الثوار ان الدكتور عصام مابيعملش حاجه  وطالبوا باستقالته  طيب احنا بقى عايزين مجلس رئاسى  هنختلف عليه فى تكوينه ونختلف عليه بعده فتره ونطالب باستقالته ايضا ومن اين ياتى الاستقرار بهذا الشكل وكيف تسلم السلطه بهذا الشكل الفوضوى الاسئله كتيره والمواضيع كبيره لكن فين الحل ازاى نعدى بمصر الى بر الامان وازاى نسلم السلطه بطريقه سلميه ونعدى المرحله الانتقاليه بطريقه امنه  كيف ومتى  هيسائل الكثير لماذا من يتظاهرون مع المشير لم يحدث لهم شيئا مثلما حدث فى المظاهرات السابقه اقول لكم لانهم عشرات تعد على الصوابع   عدد محدود يتم السيطره عليه  هتقولى دا كلام فلول دول عشان بتوع نظام ماحدش بيقرب لهم  معاكم  بس ايه الحل بعد ما المظاهرات اصبحت لم تاتى بثمارها وبتدئت تكون  لعبه قديمه  يتم السيطر عليها او عمل لها فخ تقع فيه اين الحل   


صورمن المظاهره















فديو من المظاهره


الثلاثاء، 25 أكتوبر، 2011

اللعب فى الدماغ




مع  سقوط كل حاكم من حكامنا العرب  نكتشف ان وسطنا مجموعه من المجانين او السفهاء يرون ان هذا الوقت وقتهم ويحاولون اثبات هبلهم  بعد سقوط الرئيس السابق  مبارك سمعنا اللى بيحلل ويقول اعلان كوكولا 125 مين قدك تحريض  على الثوره وتحديد موعدها 25/1  وكلام هبل كتير قولنا  احنا عليهم فلول  او متخلفون  وبعد مقتل   معمر  القذافى  ظهر فديوه  مش عارف اصف صاحبه بايه الفديوه بيقولك وجه  الشبه بين الشهيدين  صدام حسين  و معمر القذافى   وواخد بعض الشبه مثل سن كل واحد عند مقتله  والطريقه المستفذه لمقتلهم  وبعد كده يخرف باى كلام يطلع صدام والقذافى ملائكه  ومطلع  القذافى شهيد واللى عامليين الثوره يهود ليبيا العائدين من اسرائيل ياسلام كلام زى الفل طب هو فاكر ان فى حد هيصدق كلامه طب هى ناقصه تسميم للعقول يعنى والخرافات ديه اسيبكم مع الفديوه المسخره

الأحد، 23 أكتوبر، 2011

انسان

يمكن يكون انسان
عاش حياته سرحان
فى ملكوت الله كان بيفكر
والفكر يحدفه يمين وشمال ولامره واحده رسى  على بر
وتعدى الايام وتمر
ولا مره فى حياته استقر
ساعات بيشوف نفسه  طفل وساعات عجوز
ساعات يكون بعقل طفل واحساس عجوز
وساعات يكون باحساس طفل وعقل عجوز
يهرب من زمنه  الى زمن غريب
وساعات يحب يعيش فى زمنه يلاقى زمنه غريب 
عجبى 

الأربعاء، 19 أكتوبر، 2011

قانون الخناقه وثقافه الزحمه والاعلام ايضا يخفون اى حقيقه ويكثرون الاستنتاجات وعلامات الاستفهام

دايما اتعودنا  لو  وصلنا  بعد اى  خناقه  مابنعرفش  مين اللى بدائها  مهما كانت الحكايات  ودا اللى بيخلينا مش  متاكدين   مين اللى بداء  الضرب فى الخناقه  وهذا ماحدث فى الاحداث الاخيره  احداث ماسبيرو مهما تظهر  فديوهات  بتبقى الحقيقه  عندها  كلها مجرد استنتاجات   ايوه  فديوهات  دهس الجيش للمواطنين  وضربهم و فديوهات  ضرب افراد  الجيش  وتضيع الحقيقه لان ماحدش عارف من الفديوهات  مين الفاعل  ومين اللى كان بيرد الفعل   الجيش ضرب الاول ولا المواطنين  ودا قانون الخناقه   مادمت ماكنتش شاهد عيان  من اول الاحداث   يبقى مش هتعرف مين فاعل ومين بيرد الفعل  ايوه بس مهما فعل المواطنين  لايحق للجيش دهسهم   اكيد طبعا معاك  بس  ساعات لما حد بيضرب اوى  بيوصل لحاله بيلطش فيها لاى حد زى المجنون  وبيبان  انه هو الفاعل بالرغم من انه هو اللى بيرد الفعل   بس دا مايمنع ان وهوبيرد الفعل بيكون فاعل  لانه بيلطش فى الكل يعنى لو فرضنا ان الجيش كان بيرد الفعل بدهس المواطنين بحركه هيستيريه للدفاع عن نفسه  اوكد ان كل اللى اتهرس  ماضربش  الجيش اساسا  و مات بالغلط
 وساعه الدفاع  عن ماحدث كله بيدافع ويقول وانا هضرب ليه لو ماكنتش مضروب  وهى نظريه  بس بردوا  لو كل  واحد  ماكنش هيضرب لو ما انضربش طب يبقى الخناقه قامت ازاى  طبعا هيعلن مجهولين مسئوليتهم عن الخناقه 
بس بتبقى  تصريحات عجيبه فى النص  مثل مش عايزين  نقول الضحايا فى الجيش عشان  زمايلهم ميتأثروش  على اساس زمايلهم مايعرفوش  يمكن 
طب لو كنت شاهد عيان  للاسف  ثقافه الزحمه  تشكك فى شهادتك   لان من ايام الثوره  والجمع اللى بعدها  علمتنا ان الزحمه  بتخلق مشاكل من  ايام الثوره لو نفتكر  المظاهرات السلميه  كان بيبقى بينا ناس كانت هتحدف طوب  وتكسر بس الكل كان بيمنعها  ويقولهم  عايزنها سلميه سلميه فاكرين   طب فاكرين لما كنا بنروح الجمع  وبنلاقى الناس بتتخانق مع نفسها  وقولنا ديه ثقافه الزحمه  يعنى انت عايز تقول ايه
  يعنى لو كنت  فى الاحداث  وكنت من المتظاهريين هتقول اننا كنا بنتظاهر عادى والمظاهره سليمه  وديه حقيقه وهيكون كلامك صح  وحقيقى  لكن فى نفس الوقت قد يكون  حد اندس فى الزحمه  وعمل المشكله وانت ماشفتوش 
ولو كنت من الجيش  هتقول اننا كنا بنحمى المتظاهرين ولم نتعدى  عليهم فى الاول  قبل ما  يتعدوا علينا  وقد تكون اجابتك حقيقه وصحيحه  لكن بردوا قد يكون احد زملائك  تعدى وانت مش واخد بالك فى الاول   وهذا هو قانون الزحمه   ان فى ظل الزحمه  كل  واحد  لا يعرف الا ما يفعله هو  ولكن الكارثه تعم على الكل
             وطبعا  لو انت فى البيت  مش هتقول حاجه
اما بقى الاعلام  
لوانت فاتح التليفزيون المحلى     هتلاقى الجيش بينضرب  ومتصاب   واخبار ان فى قتلى فى الجيش وحاجات كده
ولوانت  فاتح الفضائيات   هتلاقى الشعب بينضرب  ومتصاب واخبار عن ضحايا الشعب   وحاجات كده
ومابين كده وكده  مش هتفهم حاجه
وطبعا لو انت  مش فاتح التلفزيون  اصلا  مش هتشوف حاجه
طب ايه  الحل    نقول  تسامح  وخلاص وترجع ريمه لعادتها القديمه طبعا لا
يبقى نشوف  مشاكل الاقباط ايه ونحلها 
و المتظاهريين  يبحثوا عن طريقه ضغط اخرى اقوى من المظاهرات  تلافى  لاى حدث ممكن يحدث
  واخيرا  قبل ما امشى  انقل شهاده  شاهد عيان قالها لى
قال  ان  الاقباط كانوا بيتظاهرا سلميين ولم يكن معهم سلاح  وماكنش فى اى مشاكل  بينهم وبين الجيش  الى ان وصل مجموعه  من البلطجيه  من الكوبرى   ضربوا الجيش  فى الاول وكان معاهم سلاح   فبداء الجيش الضرب فى الاقباط   فانضم  البلطجيه للجيش
 ومن مبنى الاذعه كان فى ناس بتحدف  عليهم  لما البلطجيه ضربوا الجيش  وبداءت المعركه   بين الجيش  والاقباط   والجيش كان ساعات بيرجع للخلف  وتطلع البلطجيه  للامام 
ديه كانت مجمل الشهاده  اللى قالها
وطبعا هتختلف الاستنتاجات  عليها وكل واحد  هيستنتجها على حسب الهوا  حتى اللى شافها  هيستنتجها على  مزاجه
فى ناس هتقول ان لما  الجيش انضرب افتكر ان اللى بيضربوا دول مع الاقباط فضرب الاقباط   ولما البلطجيه انضموا ليه  مش هيضرب ناس عاملين انهم  معاه  وخصوصا ان وقت الزحمه انت مش عارف الضربه جايه منين
 و فى ناس هتقول  ان  البلطجيه كانوا مع الجيش و كلها الالعيب من الجيش والمجلس العسكرى   وان ساعه الصفر يوم 9  من كل شهر والدليل عندهم
أحداث 9 مارس: مهاجمة البلطجبة للمعتصمين بميدان التحرير
أحداث 9 أبريل: مهاجمة قوات الأمن المركزي للمعتصمين بميدان التحرير
أحداث 9 مايو: حرق الكنائس و إشعال الفتنة بإمبابة

أحداث 9 يوليو: كلمة شرف الباهتة نيابة عن المجلس العسكري التي زادت من الاضطرابات

أحداث 9 سبتمبر: اقتحام سفارة الصهاينة ومهاجمة مديرية أمن الجيزة

أحداث 9 أكتوبر: مظاهرة للأقباط أمام ماسبيرو تتحول إلى مواجهة عنيفة مع الشرطة العسكرية
وكلها استنتاجات      والحقيقه غائبه
لان فى الالعيب اتلعبت   ماكنتش  يوم 9  يمكن  عشان كده   ماعملتش ازمه  اوى يعنى  طب موقعه الجمل ماكنتش يوم 9    لا ما ديه ماكنش الرئيس السابق اتخلع  بس ماهو كان على وشك  ببردوا    
تكثر الاستناجات ويكثر الكلام والحقيقه غائبه  
وتبقى الاسئله
س 1 من الذى يرسل البلطجيه فى الاحداث
1-  بتيجى لله وللوطن من نفسها
2-   بيرسلها فلول النظام
3-   بيرسلها  المجلس العسكرى
4-      جهات اخرى  لها مصالح  فى وجود ازمه  فى مصر
5-  كل ماسبق
   س 2 هل صدفه ان الازمات  تكون يوم 9  من كل شهر   
1 – نعم
2- لا
س 3  هل صدفه ان الازمه الاخيره تحدث بعد  لما البورصه بدات تكسب
 1 - نعم
2 -  لا
وكثير من الاسئله  قد نكتشف اجابتها فى  يوم من الايام   وقد  تظل الاسئله  بلا اجابات

الثلاثاء، 11 أكتوبر، 2011

(انترنت بلا فتنه) فاكرينها

 فى هذه الظروف التى تمر بها البلاد   اعتقد اننا محتاجين جدا لعوده حمله انترنت بلا فتنه 
فاكرينها 
 ياريت كل واحد  قبل ما يشير خبر على الفيس او على تويتر  يتاكد منه ولو الخبر فيه ضرر  ياجله  بلاش منه دلوقتى 
وياريت نبعد عن النكت اللى ممكن تعمل ازمه  سواء  ازمه بين المسلمين والمسحيين  او زياده الازمه بين الشعب والجيش 
ايوه بنعترض على سياسه المجلس العسكرى  وانا ساعات بتهمه بانه بيعمل الاعيب كتيره  بس  ماينفعش تزيد الازمه بين الجيش والشعب  مهما فعل الجيش  قبل انتقال السلطه الى رئيس جمهوريه  جديد .
  اللى نزل جمعه استرداد الثوره  وشاف ازاى منصتين فى الميدان بيتخانقه على قياده الميدان هيعرف  او يستنتج اهميه دور المجلس فى الفتره الانتقاليه و ايه المشاكل اللى هتحصل فى الانتخابات  القادمه  فاتمنى اننا نوفر مجهودنا للى هيحصل فى الانتخابات وبعدها وبعد انتقال السلطه نبداء نحاسب المجلس  على مافعله من اخطاء فى الفتره الانتقاليه  لكن دلوقتى مانذودش الازمه بين الشعب والجيش ونحاول الا نقع فى فتنه سواء فتنه بين مسلمين ومسحيين او بين الشعب وجيشه  نعم  قد يكون حدث خطاء من الجيش فى الاحداث بل بالتاكيد حدث خطاء  منه  او خطاء من احد المتظاهرين بل بالتاكيد حدث خطاء من  احد المتظاهريين  ايضا  لان الزحام بيصدر منه اخطاء لانك لايمكن تتحكم فى كل هذا العدد  لكن علينا الان نطالب بالتحقيق فيما حدث  وفى نفس الوقت بضبط  النفس  لان ارواح المصريين مسلمين ومسيحين  ليست رخيصه فيجب محاسبه المخطئ  وايضا فى نفس الوقت  لاداعى لزياده  الدماء 
 رحم الله شهداء البلاد  







الأحد، 9 أكتوبر، 2011

عينى عليك ياوطن

عينى عليك ياوطن 
مكتوب عليك الحزن والشجن  
الحرب قامت ولا ايه
حد يقولى الحكايه ايه  
طب هو احنا بنحارب مين 
ومين بيضرب فى مين  
مصابين وقتلى فى جيشنا 
هو احنا مين بيحاربنا
معقول شعبنا بيضرب فى جيشنا 
وجيشنا بيضرب فى شعبنا 
  ماكنش  الدم من مطالبنا
هنقول فلول وهنقول بلطجيه
وزمان كنا بنقول  نظام وتكبر جوه النفوس القضيه
ياحسره عليك ياوطن
مكتوب عليك تعيش فى  حاله حزن و شجن
اهلك قاموا بثوره
وعدت الايام وبقى كل كلب بيبحث عن عضمه
فى جمعه استرداد الثوره منصتين  
متجاورتين على نصيتين
وكل منصه بتبحث عن قياده الميدان
والناس وسطهم تايهه فى الميدان
بتصرخ نسمع مين فيكم ياغجر
بلاش تبقوا زى البقر
صحيح احنا اتخلقنا باذنين
لكن مستحيل نقدر فى وقت واحد نسمع اثنين
منصه بيتقال انها بتاعت ائتلاف
وعلى الميكرفون  بينهم خلاف
واللى انتصر ومسك الميكرفون قال للناس مش عايزين حد يزرع بينا خلاف
 ومنصه  بيقولوا سلفيه   معموله لحمله انتخابيه 
يوصل الشيخ المترشح يهتفوا  اسلاميه
ياعم الشيخ  لسه  اوقات الانتخابات جايه
مش وقت حمله انتخابيه
وتمر الايام وحرائق تولع
مسيحين بيتظاهروا والكل بيولع
اتوبيسات تضرب بالطوب وعربيات بتولع
دا حريق القاهره القديم ولا القاهره اتعودت على التوليع
تاريخك ياوطن بيقول انك مهد الاديان
بس للاسف اهلك بيلعبوا بالاديان
ايه الحكايه  حد يقولى الحكايه ايه
الحرب قامت ولا ايه
مصابين وقتلى فى جيشنا
معقول شعبنا بيضرب فى جيشنا 
وجيشنا بيضرب فى شعبنا 
افرحى يا امريكا  وارقصى يا اسرائيل
من غير ما نتعبكم  ونعمل فى جيشكم  خساير
بنقتل  في انفسنا   وفى جيشنا  بجد انا دمى فاير 
حزين عليك ياوطن 
وفى قلبى  حزن وشجن 
قمنا  بثوره على حكامنا  الفاسدين 
بس ازاى هنصلح ولسه احنا للاسف فاسدين 
عينى عليك ياوطن 
وفى قلبى حزن وشحن
خايف عليك ياوطن من اهلك 
اللى بيسفكوا دمك 
وبتمنى يكونوا مش اهلك 
بس سؤالى اللى بسئله  دايما لو   هما مش اهلك 
طب راحوا فين اهلك 
عينى عليك ياوطن 
مكتوب عليك  الحزن والشجن 
عينى عليك ياوطن 



ربنا يرحم  ضحايا الاحداث 



الاثنين، 3 أكتوبر، 2011

انتهى


انتهى كل شئ مابينا يامن كنت اتوهم انك صديقى  
يا من نشرت على جنبات الطرق اسرارى
انتهى
يامن ناديتك فى جرحى فلم تسمعنى
يامن خداعك فى يوم  جرحنى
انتهى
لاتندهش حين تاتى عينك فى عينى ولا اراك
لاتندهش حين تنادينى فلا اسمعك
فكل حواسى ستفقد وظائفها فى وجودك
فعينى لن تراك حتى ولو كنت امامها
واذنى لن تسمعك حتى لو صرخت بداخلها
فسيكون صراخ كالهامس على بعد امتار
وستبكى على فراقى ليلا ونهار
لاتعاتبنى فانت الغدار
اسئل جنبات الطرق من فتش الاسرار
 اتريد منى  ان اصاحب من لم يصاحبنى؟!
اتريد منى ان اصاحب من كان يزيد من جرحى؟!
لا اظن انك لو كنت مكانى  تفعلها
ولااظن اننى  فى يوما  معاك سافعلها 
انتهى 

Follow by Email

Tetris