الثلاثاء، 20 سبتمبر، 2011

كتاب الثوره



 اى كاتب بيعمل كتاب معروف او من البديهى انه لما بيفكر يعمل كتاب بياخد وقت فى تجميع الافكار وترتيبها  وتنسيقها  سواء بيكتب قصه من خياله  عقبال مايعمل الحبكه الدراميه بتاعتها  بياخد وقت او بيكتب احداث سياسيه بياخد وقت عقبال  مايرتب افكاره وينسقها  ويتاكد من الاحداث لكى يكون كتابه بيسجل تاريخ والقارئ يشعر باهميه الكتاب او يشعر ان  الكتاب هيضيف له معلومات  وهيفيده  انما  الان  وانت بتمشى فى الشارع تتفرج عند بياعين الكتب اللى على الرصيف  او لما تروح مكتبه تشوف الكتب الجديده مثلا  تلاحظ بعض الكتب التى لا تشجعك ان تقرائها  لانك تشعر ان الكتاب  لو فكرت انك تشتريه تحس انك هتشترى كتاب هتقراء فيه  بعض من الاشاعات  على شويه افلام مفركه  وتشعر بعدم مصداقيه الكتاب بالظبط كما كنت تشعر عندما تقراء فى الجرائد الساقطه  والمواقع الساقطه ايضا  اللى كانت بتنشر ايام الثوره  خناقه بين جمال مبارك وعلاء  علاء قاله معرفش ايه وجمال رد عليه قاله معرفش ايه وبعد كده جمال مبارك هيطلق مراته  مراته طالبه الطلاق  اللى شويه شويه كانوا هينشرو يا اخونا انقذوا عائله مبارك  الثوره فرقتها احفاد مبارك هيتشرده بعد طلاق نجليه يالهوتى ياخرابى  وكلام جلسات المزاج والحشاشين دا  ونفسى اعرف ايه الناس اللى كانت سايبه الثوره وقاعده فى القصر بتراقب العائله اللى كانت حاكمه ديه  نفس الكلام حصل فى الكتب  مجموعه من الكتب عن الثوره وعن مبارك والعائله اللى كانت حاكمه   ممكن اكون انا ظالم الكتب ديه واصحابها  يمكن لانهم كتاب سياسين من زمان سرعتهم اسرع مما انا متصور  وخصوصا انى  لسه يدوب بحاول افهم السياسه   لكنى كل ما بحاول افهم  بشعر بان كل  المجتمع بتعلم لسه سياسه زيى حتى السياسين المخضرمين اللى كانوا عاملين احزاب وكل فين وفين لما نسمع عنهم  لان اللى كانوا بيمارسوه فى عهد النظام السابق مش سياسه  يمكن انا عشان لسه بتعلم سياسه بشعر  بمشاعر مش مظبوطه بس يجى السؤال هل يصح اننا نتكلم عن الثوره دلوقتى او حتى نحكم عليها    سواء كنا مؤيدين للثوره او منافقين ليها  _ اسف انى بقول منافقين ليها  لان ساعه الثوره نادرا  ما تلاقى معارضين  كله بيبقى مع الثوره وكله  كان فى ميدان التحرير حتى هيجى يوم  شهداء الثوره اللى كانوا فى السويس واسكندريه وباقى المحافظات  هيتقال انهم استشهدوا فى التحرير مش عارف الثوره فجاه بقيت تحرير وبس  مع انها كانت مشتعله  فى السويس واسكندريه ومحافظات تانيه   _  ينفع احكم على الثوره والبلد كلها فى حاله تخبط  حتى اللى عاملين الثوره فى حاله تخبط  حتى اللى هيحكم  فيما بعد هيكون فى حاله تخبط وهو بيفكر  لحلول لمشاكل  لها جذور من 60  سنه  وحلول لمشاكل يمكن يكون حلها فى تغير فكر مجتمع  كامل ولا المفروض نتكلم عليها او نحكم عليها قدام بعد كام سنه  بعد ما الوضع مايستقر  ونشوف وصلنا الى ايه امور الحياه شغلت الناس ورجعوا  زى ماكانوا ونسيوا وتركوا النظام الجديد  هو كمان ينسى الثوره ويتحرك فى اتجاه الفساد ونعود زى ماكنا فى النظام السابق ولا زى ما غيروا النظام هما كمان اتغيروا  لما نكون فى نقطه فاصله بين مرحلتين  ينفع احكم عليها او اتكلم عنها وانا لسه واقف عندها  ولا لما امشى  واشوف المرحله اللى بعدها
الشئ المستفز بقى  بعض البرامج اللى  ظهرت اللى تقعد تكلم ويقولك كل رجال الرئيس  ويقعدوا يكلموا عنهم كانه واحد من اهليهم وعارف عنهم كل حاجه  ولا الممثله اللى دخلت الفن عشان بتعرف تتمرقع فجاء بقيت سياسيه وعامله برنامج نشره اخبار تتريق فيه على  كلام سوزان مبارك  لما كانت بتكلم ازاى اتجوزت مبارك  المشكله اننا بنعرف نشتم ونتريق ونستخف بالناس ونعمل حواديت واستنتاجات  ولا نعرف ننتقد وهذه كارثه
والكارثه الاكبر  باننى وانا قاعد بنتقد الكتاب اللى كتبوا عن الثوره  او عن مبارك واسرته سواء مؤيدين او معارضين او منافقين  ارتكب نفس خطائهم وقاعد بنتقد بعض الاحداث الجاريه فى الثوره والافعال واستنتج افعال ويمكن اكون صدرت احكام  كمان سواء دلوقتى او زمان ايام النظام  وبالتالى عايز اقول للى بيقراء  البوست وهو بيقراء نقدى للكتاب اللى كتبوا  عن الثوره وعائله مبارك ياخدنى مثال للى بنتقدهم  مع انى مش كاتب اوى  بس نعمل ايه غاوى فضفضه عن افكارى والفضفضه الكتير توقع فى اخطاء 
واخيرا عايز اقولك انى لازم اعتذر لك عن كارثه  غالبا حدثت لك  وانت بتقراء البوست  انك توهت منى

لان البوست اساسا عايز يتنسق اصلا   
وشكرا مع الاعتذار   واهى كانت فضفضه 
تصدق انا كمان توهت   ههههههههههههههه

هناك 11 تعليقًا:

نور القمر يقول...

مساء الخير ..
شكرال ك على الموضوع ..
بالتوفيق لك ..
مع تحياتى
نور ..

شهر زاد يقول...

السلام عليكم ورحمة الله
المهم في البوست وهو الفكرة
والكتابة عموما خي حديث الروح
فبالعكس موضوعك يبرو مدى تأثرك بما رأيت وشاهدت وتعبيرا لما أحسست به من ضيق اتجاه هذه المسألة وهذا تقريبا ما حاولت ان أعبر عهغ في بوست قديم بعنوان الدلفري الفكري
للاسف الشديد اصبحت الساحة الفكرية مرتعا للصالح والناطح لهذا وجب علينا الحذر في الانتقاء وكذا في تشرب ماجاء في الكتب
فليس كل طعام شهي وسهل في الهضم
دمت متميزة بمواضيعك
تحياتي

mrmr يقول...

موضوع جميل ومميز
تحياتى

ليس فقيرا من يحب يقول...

ههههههههه اسلوبك حلو قوى ياعمرو

وخفيف ومفرداتك حلوة واضحكتنى جدا

يابنى هى اصلا زايطه ومحدش عاد فاهم اى حاجه فى حاجه

وادينا عمالين نخبط شمال ويمين سيب الناس تسترزق وتخبط هى كمان دا موسم يا معلمى مبيحصلش كتير

ازيك عامل ايه يارب تكون بالف خير

محمد الجرايحى يقول...

أحييك ....
وشرفت بتواجدى هنا.
تقبل تقديرى واحترامى
بارك الله فيك وأعزك

re7ab.sale7 يقول...

هههههههههه
صح معاك حق
الاغلبية وقعوا ف نفس الغلط ده
وكتير ادباء وصحفين وفنانين
المفروض ميتكلمش ولا يستضيفوا ف برامج غير الناس المؤهلة للكلام ده
سياسة واقتصاد وشئون خارجية وداخلية
يتكلموا ف الوضع الراهن من جميع جوانبه
مش كل فنان علي روائي يدخل يدلو بدلوه واهي هيصة بق وكدة يعني وشهرة برضه ليهم
ومن ضمنهم برضه مرشحي الرئاسة
بجد بيسستهبلوا جداااااااااا
حلو البوسط يا عمرو
تحياتي

مدونة رحلة حياه يقول...

السلام عليكم
زمان كتبت بوست اسمه نداء قلت فيه ياريت كل واحد يتكلم فى اللى يعرفه حرام عليكم توهتم الناس ومبقاش حد فاهم حاجة
اى ثورة فى التاريخ مينفعش يتحكم عليها الا بعد سنين منها عشان نتائجها بتبدا تظهر فلما تشوف المحصول تقدر تقول نجحت ولا وكل شئ دلوقتى كلام عشان يملوا بيه صحف وبرامج واهى فلوس رايحة جاية والشعب الغلبان بيضيع وعقله يتوه فى الرجلين
اعجبنى طرحك وفكرك رغم اتفاقى معاك فى اقترافك ما اعترضت عليه
دومت بخير

eng_semsem يقول...

عارف يا عمرو عجبني في الاخر انك قولت ان كل ده مجرد فضفضه وهو ده برده اللي ماشي في الشارع كل واحد بيفضفض شويه ويقول حبة تكهنات عن المستقبل وحبة توقعات للي حصل زمان وبعدين ناس تجمع اللي بتسمعه اللي هو مش حقيقي ومجرد توقعات وتعرضها على انها حقايق
فعلا احنا كلنا في حالة فضفضه مع بعض المشكله ان في ناس واخده الكلام بشكل جدي ومعتبراه مبدا ممكن يحل مشاكلنا وينجح الثوره
متهيالي قدامنا دورة مجلس شعب ودورة رئاسه لما تنتهي هنعرف احنا اتحسنا ولا ومجرد اسماء اتغيرت وخلاص
تحياتي

زينة زيدان يقول...

سعيدة بمروري هنا
ويشرفني التعرف لمدونتك

تحيتي

ابراهيم رزق يقول...

السلام عليكم

اشكرك يا اخى على تفهمك الموضوع و قول كلمة الحق ضد جمود الفكر

و اعتذر لك ان كان حدث منى تجاوز
و نتقابل فى التحرير بأذن الله

تحياتى و تقديرى و اعتزازى

فشكووووووول يقول...

السلام عليكم
تحياتى
التاريخ حـ يقول على الثوره دى انها اعظم ثوره فى العالم بس يا دوب كان ناقصها حاجه صغيره خالص وتبقى اعظم ثوره كانت وتكون لو ان البنتين اتطلقوا من جمال وعلاء .. يا سلام .. كانت تبقى ثوره للركب
رحم الله شهداء الثوره وعلى فكره كانت الثوره فى كل مصر وكانت اكبر شراره من السويس بمجرد استشهاد اول شهيد فيها كان ايذانا بألا تعود الثوره الا بعد نجاحها
تحياتى

Follow by Email

Tetris