الخميس، 26 مايو، 2011

الجمعه 27/5/2011

كل المدونات  بتتكلم عشان توعى الناس تنزل ليه  يوم الجمعه  27/5/2011   وكلهم ابدعوا  وكلامهم كلام جميل وعشان كده مش هكلم فى ليه ننزل  يوم الجمعه  لكن فى نقطه احب اقولها اننا لازم واحنا بنتكلم ونوعى الناس انها تنزل لازم نوعيهم انهم زى ما ينزلوا ثائريين  ينزلوا حامين حارسيين  للبلد   تبقى عينهم عليها  نرجع اللى كان بيحصل فى الايام الاولى للثوره الاولى  ونتلافى اخطائها    مش عايزين يحدث مالا نريده  وكمان عاييزن نطمئن الناس علشان اللى مش هينزل بكره ينزل فى المرات القادمه اذا احتاجنا  لمرات قادمه
الناس واصحاب الشركات والمحلات متخوفين من يوم  الجمعه  وحاسين انه هيكون يوم خطير هيندس  البلطجيه والمخربين فيه ودا شى  توقعوه من نتائج ماحدث فى الثوره الاولى  يعنى احنا النهارده  الاداره بعته ايميل لكل فروع السوبر ماركت  اللى انا شغال فيه  بتوجهنا امنيا  كيف نتعامل  لو حدث هجوم من البلطجيه  واكيد فى شركات ومحلات تانيه عملت نفس الشئ ودا شئ طبيعى من اثار ماحدث فى الفتره الماضيه ولذلك عايزين واحنا ثائرين  نحاول نحافظ على البلد ونمنع اى بلطجى من التخريب زى ماكنا بنعمل فى الايام الاولى من الثوره الاولى لما كنا بنقولها سلميه سلميه  ونمنع اى احد يخرب   او يكسر   مش عاييزن نوقف عاجزيين واحنا بنحارب فساد الكبار  عن  محاربه  فساد البلطجيه اللى بيستغلوا  الثوره وبيخربوا    لان البلطجيه ايضا بيسرقوا مننا الثوره  وبعض الناس الغير واعيه ايضا  بتسرق مننا الثوره  فى كثير من افعالها
انا هحكى موقفى من الثوره الاولى  يمكن تفهمى قصدى اكثر
مع بدايه الاعلان عنها عندما اتفقوا  الثوار على يوم 25 يناير  كنت بقول انهم ساذجين وان اليوم هيكون  زى يوم 6 ابريل اللى كانوا متفقين عليه قبل كده وماجبش نتيجه    ولما عرفت ان الناس نزلت بجد يوم 25  اتشجعت ونزلت يوم 26 يناير ونزلت يوم جمعه الغضب فى مظاهرات شبرا اللى كانت رايحه التحرير    لكن لما شوفت المخرج خالد يوسف  واقف بيستغيث عشان حد يحمى المتحف المصرى من المخربيين  ومشهد الناس الللى كانت بتسرق علنى ديه زعلت   وبالرغم ان الناس كانت بتحاول تحمى على قد ماتقدر حسيت اننا وقفنا عاجزيين  واحنا بنحاول نحافظ على البلد من الفاسدين الكبار عن حمايتها من الفاسدين الصغار  وعاتبت الثوره   وكمان واحنا واقفين لجان شعبيه وكان معانا  كام واحد كده من المنطقه اول مره اعرفهم  وحسيت انهم شويه فلول   عاتبت الثوره  بالرغم من ان كان فى ناس محترمه بردوا  ودائما كان فى بعض تصرفات  من الناس تجعلنى ازعل من الثوره لانها جائت وهما موجودين  وكنت متذبذبا بين ايمانى بان ماحدث كان ضروريا   وحق لازم يحدث  وبين افعال بعض  الناس التى تجعلنى  اشك واسئل اللى بنعمله دا صح ولا خطاء
وعشان كده   لازم نكون واعين يوم الجمعه  ان احنا نازلين ومافيش شرطه  او بمعنى اصح  مافيش حاجه البلطجيه تخاف منها  فعلينا  يوم الجمعه اننا نكون ثوار وفى نفس الوقت حراس لهذه البلد وممتلكاتها وممتلكات اهلها   عايزين اللى يلاقى حد بيخرب وبيستغل الثوره الثانيه  يتسلم تسليم اهالى   مش عايزيين نكره الناس فى الثوار  مما يحدث لهم على ايدى البلطجيه نتيجه الانفلات الامنى 
كونوا ثوار وحراس
ربنا يستر  ويحقق املنا فى بلد افضل  مما كانت عليه 
اتمنى ان اكون قدرت اوصل الللى انا عايز اقوله    واعتذرلكم عن عدم ترتيب الافكار وانى بكتب كده  من غير ترتيب  لو المواضيع دخلت فى بعض وماطلعتوش بحاجه من كلامى

الأحد، 15 مايو، 2011

الانسان مخير ولا مسير

حياتى  مش حر فيها
ولا انا حر فيها
سؤال ياما اتسئل و ياما حير
الانسان مسير ولا  مخير
 الانسان باراده اختار سكته  ورسم  ملامح  حياته ودنيته
لكن ساعات يواجه عقبات ما اخترهاش  فى حياته ودنيته
يمكن تغير حياته وسكته
بس ياترى العقبات هى اللى غيرت سكته
ولا باراده هو اللى غير سكته
يدارى اسبابه  بعد ما فكر فى  البدائل  ويقول ماكنش بايدى الاختيار
طب مين اللى كان صاحب القرار
في ناس تقول ماخترناش اسمنا ولا  ميعاد ميلادنا ولا اهلنا
 بس  ما احنا  اللى  اختارنا  لقبنا بين الناس واصحابنا ولا ايه ياعمنا
 الا نسان مخير ازاى يتعامل مع الاشياء اللى ماخترهاش
حاجات كتير ماخترنهاش
بس اختارنا  طريقه التعامل معها 
تبقى حياتنا احرار فيها
ولا  حياتنا مش احرار فيها  
سؤالنا  النهارده  الانساان مخير ولا مسير  من وجهه نظرك
قول رايك   مع ذكر الاسباب التى بسببها كان اختيارك  

كفايه لعب فى الدماغ


وانا راجع من الشغل امبارح  كان فى ورق بيتوزع فى المترو  بيوزعه واحد ملتحى   الورق مكتوب فيه
ماذا لو اخترنا الاسلام
الحمد لله والصلاه والسلام على رسول الله وعلى اله وصحبه ومن والاه 
وبعد
لقد حاول الغرب واذنابهم من المنافيقين تخويف الناس من الاسلام  حيث يظنون ان اختيار الناس للاسلام  ونشر مايسمى  عندهم  بالاسلاموفوبيا  لابعاد الناس عن هذا الدين العظيم  ومن ثم فقد تشرب الكثير من الناس الخوف من الاسلام حيث يظنون ان اختيار الناس للاسلام و تطبيق شرع الله تعالى هو تقطيع للايادى وكبت للحريات  واجملوا الشريعه فى الحدودالضيقه  فظنوا ان اختيار الاسلام هو رجم للمسلمين  والرجوع الى القرون الوسطى  المظلمه  وملئوا قلوب كثير من الناس رعبا وقالوا  لوطبق الاسلام ستمنع السياحه وتغلق الملاعب وتجبر النساء على الحجاب  الخ  وهذا  كله ظلم للاسلام فاردت فى هذه الكلمات ان ابين للناس ماهو الاسلام    
وباقى الكلام بيقول فيه ان الاهداف اللى قامت الثوره  من اجلها اللى هى المساواه والعدل والاصلاح  الى اخره كلها مبادى الاسلام  وكلام جميل  
  بس السؤال هو الراجل دا بيكلم مين   ياعمى احنا بردوا مسلمين وعارفين الاسلام دين عظيم ويدعونا للتراحم والاخلاق  والعدل والمساواه  والقيم والاخلاق وكل دا    ولا احنا كنا  مش مسلمين واحنا مش واخدين بالنا  والناس عمرها ماخافت من الاسلام  ولكن الناس لو كانت خايفه   يبقى خايفه ممن يدعى انه مسلم  ويريد الحكم بالاسلام  عمرنا مانخاف من دين سماوى انزله الله  لانه يدعوا الى الخير  والحب والقيم والاخلاق سواء كان  هذا الدين الاسلام  او المسيحيه او اليهوديه  ولكن نخاف من الفاسديين  الذين يدعون انهم مسلمون  ومسيحيون ويهود   نخاف اذا خفنا يعنى من الذين يدعون انهم مسلمين ويحرضون على الفته والخراب  امثال  موقع المجاهدين العرب مثلا  ونخاف ممن يدعون انهم مسيحيون  ويحرضون على الفتنه  امثال موقع المسيحى الحر  مثلا  ونخاف من الصهاينه الذين يدعون انهم يهود  ولا نخاف من الاسلام او الانجيل  او التوراه   نخاف ممن  يدعون انهم اصحاب دين  وهم ليسوا كذلك  المشكله ليست فى الاسلام  او فى اى دين  ولكن  المشكله فى من يحكم  الدوله بهذا الدين  هل يوجد  هذا الانسان الصالح القادر على ان  يحكم بالدين هل موجود  هذا الانسان الذى بيلعب سياسه  وقادر يحارب فساد نفسه اولا  ليكون حاكم صالح    و كمان سيحكم باى مذهب من المذاهب الفقهيه  الاربعه  وماذا سيكون تصرفه مع اصحاب المذاهب الاخرى الى اخر الاسئله  نخاف  لو كنا بنخاف يعنى بمن يلعب بالكلام  الجميل بتاعك دا  عشان يضحك على الناس  ويوجههم اتجاه معين  وكانهم لم يكونوا مسلمين  والاسلام جاى عليهم جديد  مثل ماتفعل ومثل مافعل الشيخ الجميل بتاع غزوه الصناديق  الناس  خايفه بس  الناس خايف مش من الاسلام   الناس خايفه  على الاسلام من الذين يدعون انهم مسلمون وكفايه بقى  لعب فى الدماغ
  
لاننا  هنتفرج  فى الايام الجايه الى انتهاء  الانتخابات القادمه  كتير من  اللعب  فى الدماغ    من الشكل دا  واشكال اخرى كثيره
وربنا يستر

الثلاثاء، 10 مايو، 2011

بن لادن تانى مره اكشن


لا اعلم لماذا ؟ هل ممكن ان تكون صدفه ان يقتل بن لادن بعد عشر سنين  وفى هذا الوقت
يمكن ولكن ظهور  بن لادن من جديد  اصبح يداعب سيناريو   غريب  فى خاطرى منذ معرفه مقتله   لان كانت بدايه معرفتنا بيه فى سنه 2001  بحادث البرجيين  والتى تم اتهامه بيها وكانت بدايه قويه لاتهام العرب والمسلميين بالارهاب   والتى على اثرها دمرت افغانستان والعراق على يد الامريكان وكان فى نيه الامريكان الدخول على سوريا وتكمل مسيرتها  ولكن توقفت  والان  لا اعرف لماذا ينتابنى شعور بانها ستبداء من جديد  فى محاوله لاحتلال الدول العربيه من جديد  حيث ان بعد فتره من الوقت ومع سقوط الانظمه العربيه الفاسده  واحده تلو الاخرى ومرور الدول العربيه بفتره انتقاليه للاسف اعتقد انها ستكون غير مستقره  مثلما  يحدث عندنا فى مصر  من فتن ومنافسه على من يصل الى الحكم  والانفلات الامنى الحادث الان ستاتى امريكا بعد حادث كبير مثل حادث 11 سبتمبر 2001  وتقول ان الذى فعل ذلك هم من اتباع  اسامه بن لادن ويبداءون فى البحث عنهم وبما ان الاوضاع فى الدول العربيه ستكون غير مستقر فقد تتهمنا امريكا باننا دول تحمى الارهاب او ان الارهاب يستغل فرصه عدم الاستقرار ويستخبى عندنا  وتبداء هى الطريق لتحريرنا من الارهاب   وتستكمل رحله الاحتلال التى بدائتها من افغانستان والعراق وتوقفت حتى تجد الفرصه المناسبه  لا اعرف قد اكون انا خيالى واسع  ولكن مقتل بن لادن بعد عشر سنين  من الاحداث وخصوصا بعد بدايه سقوط الانظمه العربيه قد تجعلنى دبوسا يشك  وخصوصا ان الدرس السابق التى اخذناه كعرب ومسلمين لم يمر عليه سنين كثيره وكان درسا مؤلما   اتمنى ان يكون خيالى واسع وان اكون مجرد دبوسا شك وخلاص 
يارب  احمنا من هذا الهاجس  وخيب ظنى وتوقعى عن المؤامره الجديده
وربنا يستر

الاثنين، 9 مايو، 2011

عجبى


عجبى لما الرجال
 يبقوا فى ساعه الجد عيال
يتخانقوا زى الاطفال
وكانهم مش دارينين بالحال
بلد  بتتحول من نظام لنظام
وفيها بعض الفوضى ولسه متظبطلهاش نظام
ومساجين  بتفر من سجنها  وبتعمل فوضى وبتخترق النظام
ودول شويه عيال رايحين يتخانقوا ولا فى بالهم اى نظام
عجبى
هى ديه بلدهم ولا بلد غيرهم
زمان لما كانوا بيستعبطوا كانوا يقولوا الاستعباط  سببه النظام
ودلوقتى بيستعبطوا  ويقولوا الاستعباط سببه  فلول النظام
عجبى
امتى هيفوقوا  ويبداوا يصلحوا
ولا خلاص مافيش امل فيهم خلاص  فسدوا  
عجبى
 مش هنقعد نعيد ونزيد ونتكلم عن الوحده الوطنيه تانى
حفظنا ومش فاهمين ايه فايده الكلام تانى
ياترى هيجى اليوم نفهم ونعقل ولا هنفضل مساطيل
نقول كلام فى الصبح يطير  ونفتكر اننا كنا مساطيل
شريط بيسف ويرجع تانى
حدوته بتنتهى وترجع تانى
عجبى
يامصر يامحروسه
عيالك شكلهم مش عايزينك تكونى محروسه
عجبى
اشتروا الحريه ونسيوا الكتالوج
وقاعدين يلعبوا فى الريموت ونسيوا ان الحريه لها كتالوج
عجبى
طالبوا الحريه وسبوها  للبلطجه وبقيت فوضى
من امتى كانت الحريه فوضى
عجبى
ربنا يحرسك يامصر ياحره يامحروسه
من عيالك ويوقف رجالتك ضد عيالك  لاجل يحافظوا عليكى محروسه يامحروسه
وعجبى

Follow by Email

Tetris