الاثنين، 18 أبريل، 2011

القوات المسلحه تلعب اى دور انا مش فاهم حاجه

من بدايه  ما القوات المسلحه مسكت البلد   بدات الاسئله تتكاثر عن الاحداث الجاريه
عندما  عملوا  تعديلات الدستور واستفتوا عليها كثر الجدل نعم ولا لا والاستفتاء حسمها  بنعم وقلنا راى الاغلبيه ونحترمه  ولكن نتفاجى بان بعد ما استفتونا على 9 مواد  اعلنوا اعلان دستورى ب 62 ماده   طب الاستفتاء دا كان لزمته ايه  ماداموا  هيعملوا اعلان دستورى  بعد الموافقه عليه بمواد اخرى غير مستفتى عليها  ولما يمسك الرئيس الجديد هيعمل دستور طب ماكان من الاول اما ان يستفتى على دستور كامل او كان يستفتى على الاعلان الدستورى بكامل مواده  ولكن واضح انهم كانوا بيعملو لينا ااختبار انتخابى عشان يعرفوا الناس هتشارك ولا لا   و مش عارف كان لزمته ايه الاستفتاء  المهم قولنا عليهم عادى معلش محدثين سياسه   قال يعنى احنا مخضرميين سياسه   و قبل كده محاكمه بعض الاسماء البارزه اللى كان الشعب واخد باله من فسادهم  وباقى الكبار  ولا تسمع عنهم حاجه   ولم يتم محاسبتهم الا باحد الجمع المطالبه بمحاسبتهم  وباقى الفاسدين  نائمون على راحتهم لان الشعب لم يطالب بمحاسبتهم  بالرغم من  انهم فاسدين  فلا يحاكم احد الا بعد يوم جمعه يا اهلا بالجمع  طيب سؤال دايما يراودنى الفديوهات اللى بتتنشر عن احمد عز وعزمى والمغربى وكل الاسماء البارزه التى ظهرت فديوهات لها  من الذى صورها  البعض يقول صورها زمايلهم فى السجن والبعض يقول احد الاشخاص صورهم اثناء الترحيلات  معلش اصل الشخص دا متخصص ترحيلات ياسلاااااااام هو الوحيد اللى عرف يصورهم وباقى التلفزيونات  مثلا الجزيره والعربيه  او اى قناه او اى برنامج توك شو معرفش يروح يصورهم خالص  ماعرفش يصورهم غير الشخص اللى فى السجن او المتخصص ترحيلات دا والناس بتشتمهم  يعنى يعجبنى انه مارحش يصورهم لوحده   بردوا البركه فى الجماعه   هو يصور والناس وراء يشتموا  هو دا تقسيم العمل والمتخصص دا معرفش يجيب العادلى او سروراو شريف  او ابناء الرئيس  بردوا هو مش فاضى لهم
بس عندى احساس يارب يكون خطاء ان هذه الفديوهات تتسرب عمدا او تصور  ارضاء للشعب وفقط  مثلها مثل قرارات الحبس 15 يوم  كله ارضاء للشعب وفقط وزيها زى التعديلات التى كانت عباره انهم شافوا ايه اللى مزعل الناس وعدلوه  ارضاء للشعب وفقط  طب انت عايز ايه ياعمرو  عايز احس انهم بيحاسبوا الناس ديه لفسادهم وليس ارضاء الشعب لانى بصراحه حاسس انهم بيرضوا الشعب ومافيش حد هيتحاسب فيما بعد  غير الشعب
مع  بدايه عصر مابعد مبارك حدث مثلما يحدث فى كل العصورفى بدايه اى عهد   تم الافراج عن المسجونين السياسيين  السابقين  وبعض المجرميين امثال الزمر   وتم حبس بعض الاراء المخالفه للقوات المسلحه مثل المدون مايكل نبيل   قد اختلف مع مايكل فى الراى فيما نشره ليثبت ان الجيش والشعب عمرهم ماكانوا يد واحده  واتهام القوات المسلحه بمساعده الشرطه  فى ضرب المتظاهريين فى احد ايام الغضب   وممكن ارى انه متجنى عليهم كمان   واختلف معه ايضا فى رفضه التجنيد الاجبارى   ولكنى اتسائل سؤال  هل هذا سيكون مصير كل ماينتقد القوات المسلحه  ام مايكل حاله استثنائيه مثلا  هل القوات المسلحه تصنع لنا خط احمر  جديد  فلايصح ان نتكلم عن فاسيدنها اذا وجدوا  اصل كل جهاز مهما كان اهميته ونقاء من فيه يوجد فيه بعض الفاسدين  هل سنعرف  نكشف الفاسدين فيهم  ونطالب بالتحقيق معهم ام انهم سيكونوا خطوط حمراء لا نتعداها ونعود لنقطه الصفر    ولذلك اتسائل هل القوات المسلحه مع الثوره  فعلا  وماحدث ام ان مايفعلونه ارضاء للشعب وخلاص لتدبير شيئا ما   
انا مش فاهم حاجه

هناك 6 تعليقات:

Casper يقول...

طب نجيب مين يا عمرو يدير البلد

البرادعي متفقناش عليه
مبارك متفقناش عليه
الجيش متفقناش عليه
السلفيين متفقناش عليهم
الاخوان متفقناش عليهم
شباب التحرير مفتقناش عليهم

صدقني يا عمرو لو احضروا مجلس رئاسي من الملائكة مش هيعجب الشعب المصري برضه ...

_______

خالص تقديري لفكرك وقلمك
تقبل مروري

الازهرى يقول...

المجلس الاعلى بيلعب دور اكبر بكتيييييييير من تخيل كل ائتلافات الثورة
بس الحمد لله ان الدور ده لصالح مصر


وربنا يستر بكره

♥نبع الغرام♥♪≈ يقول...

كلامك عجبنى اووووووى

بس يعنى عاوزاك تتفائل خير ياقمر

بس يعنى هو الشعب المصرى بعد الثورة معتش بيعجبه حاجه
^_^

المهم منتظراك تنور مدونتى زى زماااااان

ايناس

غريب يقول...

جواب ذاك في بطن الايام

فالعلم عند الله

مشكلة الناس العجلة
و مشكلة المتحكم القيادة
فمع عجلة الناس واستعجالهم وترهل المتحكم قيادياً تبرز هوة ما بين الطرفين لنبقى ندور في دهاليزس السابق واللاحق.

و لكن يبقى للتفاؤل والأمل حيز كبير
لنستبشر بالخير فمصر أرض خيروصلاح
أظنها تمضي نحو غد مشرق بإذن الله

نحبكم في الله

غير معرف يقول...

ثقافة الهزيمة .. العتبة الخضراء‏

و تقول الحكومة المصرية التعيسة أنها تسعى لبناء أربع محطات نووية بحلول عام 2025، على أن يبدأ تشغيل أولاها في 2019 ، وأن يضيف البرنامج النووي الجديد ما يصل إلى 4000 ميجاوات !!! علما بأن تكاليف بناء 4 مفاعلات نووية حوالى 20 مليار دولار. و نشرت جريدة المصرى اليوم فى 20 سبتمبر 2010 تصريح د.حسن يونس وزير الكهرباء و الطاقة جاء فيه سيتم إيفاد 67 مهندساً مصريا إلى كل من الولايات المتحدة، وروسيا، وفرنسا، وكوريا الجنوبية، للتدريب على التكنولوجيا النووية. وبالفعل هذا مفيد لأرسال الأصدقاء و المعارف فى رحلة مدفوعة الأجر على حساب الشعب المصرى الفقير.

..تكلفة مفاعل نووى جديد يبلغ 5.52 مليار إيرو ، و 300 من مراوح توليد طاقة الرياح تنتج ما يعادل مفاعل نووى و تتكلف 900 مليون إيرو فقط!!!

باقى المقال ضمن مقالات ثقافة الهزيمة بالرابط التالى www.ouregypt.us

model يقول...

تاثرت جدا بتعليق كاسبر
شوية مصدقاه
مرة واحدة كله بقه بيفت بعد لما قعدنا 30 سنة ما حد بيفتح تمه
سبحان الله

Follow by Email

Tetris