السبت، 2 أبريل، 2011

دوله اسلاميه بشعبها ولا بحكامها

ناس كتير قالوا نعم عشان  الماده الثانيه  فى الدستور  وشيخ يسمى  الاستفتتاء  غزوه الصناديق  وناس تطلع تقول عايزنها اسلاميه اسلاميه   ماشى كلام زى الفل
طيب

سؤال بيلعب فى دماغى كتير   كانت الماده الثانيه  موجوده فى السنوات الماضيه  وكان  اللى بيحكم  مسلم  سمعنا عن  قضيه عبده الشيطان  وسمعنا عن البهائيه وسمعنا عن قضايا  اذراء الاديان   واضح ان الماده الثانيه كانت عامله شغل عالى   وبردوه كون اللى  بيحكم مسلم كان عامل شغل عالى
فى السنوات الاخيره ايضا عندما كنا نختلف فى الراى مع  المفتى  نظرا لعاده تعود البعض عليها وليكن الختان مثلا   كان  البعض يقول  بان  المفتى  يفتى  بامر من الحكومه   وانه قبل مايكون مفتى كان له راى اخر  ويتم التشكيك فى فتوته  ومادام الشيخ فلان الفلانى اللى  بيسمعه فلان قال حاجه تبقى قران ولو المفتى قال راى اخر يبقى  مفتى موسيس  وملعوب فى دماغه  
وكمان فى شهر رمضان  كنا بنشوف بعض الناس  تبداء الصوم مع السعوديه وتنهى الصوم مع السعوديه حتى  وان لم يكن بداء عندنا او انتهى   لانه لم يثق  فى قرارات  حكومه الدوله واستطلاعاتها
اكيد طبعا كلنا فاكرين الكلام دا 
طيب نيجى للسؤال
عندما تكون دولتنا اسلاميه  ويحكمها واحد يدعى بانه يحكم بالاسلام وعادل والكلام دا كله واختلفنا معه فى راى فقهى  ماذا سيحدث 
هل سنشتكى فيما بعد من فتنه  اسلاميه  يكون ابطالها  اصحاب التيارات  والمذاهب المختلفه  ؟
يعنى بدل ماكنا بنخاف من ان تحدث فتنه بين المسلمين والمسيحين  بعد اى حادث اجتماعى بين شخصيين يؤمنون  بعقيده مختلفه  يصبح خوفنا من فتنه من اى حادث اجتماعى بين اى شخصين   يؤمنون بعقيده مختلفه او يؤمنون بعقيده واحده  خلاص  هيبقى كله يضرب فى كله
 كان بيظهر ناس بيكفروا اللى على مازجهم وكل واحد قراء او سمع فتوه وعجبته كان بيحكم بيها    ياترى لما هيمسكنا واحد عايش فى دور الشيخ    هنصبح عاملين ازاى    ممكن واحد يظهر ويقول طب ما ايام الرسول والخلفاء     والناس الافاضل ديه   ياسيدى هاتلى  رسول او حد خارج من تحت ايده  يحكم ومش هقولك لا  بس فى عصرنا هذا مش هتلاقى 
كمان  ايه فائده ان يكون اللى يحكمنا مسلم  ويحكمنا بالاسلام ونحن تصرفتنا مش تصرفات مسلمين  اصل الاسلام  مش احكام  وعبادات الاسلام سلوك  وتصرفات   وماتقليش هو هيفرضها الاسلام مش بالاكراه 
هى الدوله  تكون اسلاميه  لما شعبها يتعامل بسلوكيات الاسلام  ولا لما يكون اللى بيحكمها مسلم وبيحكم بالاسلام
اتذكر قول الامام محمدعبده  رحمه الله  عندما سافر فى الغرب  قال رايت اسلام  ولم اجد مسلمين وعننا رايت مسلمين ولم اجد اسلام    ولا اعرف لماذا الان وفى وسط الجدل القائم عن الماده الثانيه وعن الناس اللى عايزينها اسلاميه   والاخوان وعائله الزمر  وغزوه الصناديق   نفسى  اسئل الامام محمد عبده رحمه الله  انهى دوله هى الدوله الاسلاميه  اللى بيها اسلام ولا اللى بيها مسلمين  حكم اسلامى  ولا شعب اسلامى  بجد بتصرفاته باخلاقه   مش بالبطاقه 
اتمنى من كل واحد يرد بعقل حكم اسلامى  ولا شعب اسلامى بجد 
واتمنى ان اى حد مهما كان  كبير صغير  عايز يوصل للحكم يبعد عن الدين انت لست رسولا  ياسيدى  وان كنت خائف على الاسلام علم الناس الاسلام وابعد عن شهوه السلطه 
اعتذر عن التطويل و ان الكلام بدون تنسيق او ترتيب بس هما كام كلمه كنت عايز اقولهم  وخلاص  يعنى مجرد فضفضه وكام سؤال

هناك 9 تعليقات:

سندباد يقول...

انا متفق معاك تماما وبصفتي اني اعمل بالقانون فان 90% من نصوص ومواد القوانين سواء كانت عقوبات او مدني او حتي في الاحوال الشخصية مخالفة للمادة التانية القصة مش قصة مادة مكتوبة القصة قصة تنفيذ فابدا بنفسك سنجد اننا دولة مسلمة بشعبها كما قلت
تحياتي

جايدا العزيزي يقول...

احلى فضفضه عمرو

والاجمل ان شايفه ان الكلام متناسق

اى كلمه نكتبها بتعبر عن اللى جوانا يعنى مش كلام وخلاص

يسلم احساسك

تحياتى

Casper يقول...

اتفق مع صديقي سندباد ان الدين لازم يكون جوانا في المقام الاول

________

خالص تحياتي

شمس النهار يقول...

ساعات بحس ان المصريين صحيوا لاقوا نفسهم فجأة انهم مسلمين
مش فهماهم
بقينا اسلام بالكلام مش بالفعل
ربنا يستر

موجة يقول...

ممكن يكون كلامك عقلانى
بس عندى تعليق على الكلام اللى حضرتك سمعتة من الامام محمد عبده بيقول راى الاسلام فى دولة ما فيهاش مسلمين
شوف يا عزيزى ربنا بيقول فى كتابة الحكيم
ايه معناها
ومن بيتغى غير الاسلام دينا فلن يقبل منه

بمعنى ان الافعال الحسنة اللى بيعملها البنى ادم لازم عشان تتقبل منه لازم يكون على دين الاسلام
والله اعلم

بس دولتنا اسلاميه بشعبها وانشاء الله بحكمها
الاشياء البغيضة اللى بتظهر على قليل المسلمين يقدروا يتخلصو منها لو رجعو لدينهم
واحنا المسمين قلوبنا بتخاف من ربنا يعنى تلاقى اللى بيعصى ربنا بيقعد يؤنب نفسة ويتوب الى الله
الاسلام مترسخ فى قلوبنا لانه الدين الحق
والله اعلى واعلم

sony2000 يقول...

عندك حق
وياريت نبعد الدين عن السياسد
ياريييييت

خواطري مع الحياة يقول...

هذه هي المشكلة في الحكام
يجعلوا الاسلام في سياستهم لكن لايعملوا به
وقت مايشوفا ان الاسلام بيكون في مصلحتهم بيلجئوا اليه
ربنا يهدي الكل ولا يجعلوهم يعبثون بالاسلام ويشوهوا صورته امام الغرب
تسلم على الموضوع الجميل
تقبل مروري ^_^
سلامي ليك اخي عمرو.

عمرو يسرى يقول...

موجه
لم نختلف كثيرا اعرف الايه الكريمه التى تخدثتى عنها التى تقول فيما معناها ومن بيتغى غير الاسلام دينا فلن يقبل منه
وان لازم تكون على دين الاسلام عشان تدخل الجنه بس ماهو دين الاسلام
دين المعامله الرسول عندما جاء قال انه اتى ليتمم مكارم الاخلاق ماقلش انه جاى عشان يحكم بالاسلام وهو دا دين الاسلام دين الاعمال انما باقى العبادات فربنا يهدى من يشاء فى اى وقت
والاعمال الحسنه مش عشان تتقبل لازم يكون على دين الاسلام دا كلام خطاء لان الاعمال الحسنه بتتقبل منك سواء مسلم او غير ذلك وبتحصل على ثوابها ان لم يكن فى الاخره بيكون فى الدنيا
وحكايه ان احنا قلوبنا بتخاف من ربنا اعتقد مش الاغلبيه فى ناس كتير مبقاش عندها قلوب تخاف
والله اعلم
شكرا ليكى نورتينى

mrmr يقول...

كلامك منطقى جدا

ربنا يستر

Follow by Email

Tetris