الجمعة، 29 أبريل، 2011


عندما ينقطع النور وترى العيون الظلام 
اترى القلوب النور بالبصيره  ام انها تغرق هى الاخرى فى الظلام
النظر للكون بيدركك الايمان بالله  حتى لو تلاعب  بك  عقلك  ووصلك عقلك للالحاد
الاديان اجزاء كتيره منها غيبيات  قد يتلاعب بها الفكر الفاسد ويوصل الانسان للالحاد
ارزقنى يارب الفكر والقلب   الصالح
  واحمنى من فساد الفكر و القلب فهما بدايه الطريق الطالح
واحمنى من هوى النفس التى قد يتلاعب  ويفسد الفكر والقلب
ف بفساد القلب  يفسد الفكر  وبفساد الفكر يفسد القلب   
يارب  اجعل  صلاح قلبى  حارس لصلاح فكرى 
واجعل صلاح فكرى حارس لصلاح قلبى
واحمنى من شر نفسى ومن شر الاخرين

الثلاثاء، 19 أبريل، 2011

الى صديقى العزيز

صديقى
ماذا حدث لك ولماذا
كنا اصدقاء ومازلنا
ولكنى اخاف ان يكون اتى وقت الفراق فلقد اختلافنا
اصبحت لى صديق سوء
وماكنت زمان صديق  سوء
ماذا حدث اخبرنى
وماذا تغير من الظروف عرفنى
اصبحت اخاف منك لتفسدنى  
واخاف ابعد عنك تسوء اكتر
واكون قد تركت وانت تحتاجنى
وما معنى الصداقه اذا لم يصلح الصديق من صديقه
ماذا افعل  معك لترجع عن ما انت فيه
اضربك ليس ليا الحق فى  ان اضربك
وانت لست صغيرا لكى اضربك
ابعد الكبر ننحدر ونخيب  ونحن لم نخب صغارا
ارجع لصوابك فلم  نعد صغارا
صديقى
ارجع كماعرفتك فى الماضى ياعزيزى

الاثنين، 18 أبريل، 2011

ياطير مالك فين جناحيك
اتقصص ريشك ولا بيقيت عاجز عن الطير
دنيا زمان كان  بيتشتكى من شده  الهوى
دلوقتى جاى يطير فهوى
دنيا وقلابه والاحوال بتغير
من طير بيطير  لكتكوت متحير
يهوى الطير لكن مايعرف  يطير
سبحانه ساعات يرغب الناس فى شئ
وتكون مصالحهم فى شى
ويتحيروا بين الشئ والشئ
يمكن اللى عايزينه مايكنش لسه اتى ميعاده
وكل حاحه ليها ميعاد ومعموله بحساب
ويرزقنا الرازق الرزق  بميعاد وبحساب
بنتولد بميعاد وبحساب وبنترزق بميعاد وحساب
وبنموت بميعاد وحساب 
حتى بعد الموت بنتحاسب بميعاد وبحساب     
سبحانه لكل شئ  ميعاد وحساب

القوات المسلحه تلعب اى دور انا مش فاهم حاجه

من بدايه  ما القوات المسلحه مسكت البلد   بدات الاسئله تتكاثر عن الاحداث الجاريه
عندما  عملوا  تعديلات الدستور واستفتوا عليها كثر الجدل نعم ولا لا والاستفتاء حسمها  بنعم وقلنا راى الاغلبيه ونحترمه  ولكن نتفاجى بان بعد ما استفتونا على 9 مواد  اعلنوا اعلان دستورى ب 62 ماده   طب الاستفتاء دا كان لزمته ايه  ماداموا  هيعملوا اعلان دستورى  بعد الموافقه عليه بمواد اخرى غير مستفتى عليها  ولما يمسك الرئيس الجديد هيعمل دستور طب ماكان من الاول اما ان يستفتى على دستور كامل او كان يستفتى على الاعلان الدستورى بكامل مواده  ولكن واضح انهم كانوا بيعملو لينا ااختبار انتخابى عشان يعرفوا الناس هتشارك ولا لا   و مش عارف كان لزمته ايه الاستفتاء  المهم قولنا عليهم عادى معلش محدثين سياسه   قال يعنى احنا مخضرميين سياسه   و قبل كده محاكمه بعض الاسماء البارزه اللى كان الشعب واخد باله من فسادهم  وباقى الكبار  ولا تسمع عنهم حاجه   ولم يتم محاسبتهم الا باحد الجمع المطالبه بمحاسبتهم  وباقى الفاسدين  نائمون على راحتهم لان الشعب لم يطالب بمحاسبتهم  بالرغم من  انهم فاسدين  فلا يحاكم احد الا بعد يوم جمعه يا اهلا بالجمع  طيب سؤال دايما يراودنى الفديوهات اللى بتتنشر عن احمد عز وعزمى والمغربى وكل الاسماء البارزه التى ظهرت فديوهات لها  من الذى صورها  البعض يقول صورها زمايلهم فى السجن والبعض يقول احد الاشخاص صورهم اثناء الترحيلات  معلش اصل الشخص دا متخصص ترحيلات ياسلاااااااام هو الوحيد اللى عرف يصورهم وباقى التلفزيونات  مثلا الجزيره والعربيه  او اى قناه او اى برنامج توك شو معرفش يروح يصورهم خالص  ماعرفش يصورهم غير الشخص اللى فى السجن او المتخصص ترحيلات دا والناس بتشتمهم  يعنى يعجبنى انه مارحش يصورهم لوحده   بردوا البركه فى الجماعه   هو يصور والناس وراء يشتموا  هو دا تقسيم العمل والمتخصص دا معرفش يجيب العادلى او سروراو شريف  او ابناء الرئيس  بردوا هو مش فاضى لهم
بس عندى احساس يارب يكون خطاء ان هذه الفديوهات تتسرب عمدا او تصور  ارضاء للشعب وفقط  مثلها مثل قرارات الحبس 15 يوم  كله ارضاء للشعب وفقط وزيها زى التعديلات التى كانت عباره انهم شافوا ايه اللى مزعل الناس وعدلوه  ارضاء للشعب وفقط  طب انت عايز ايه ياعمرو  عايز احس انهم بيحاسبوا الناس ديه لفسادهم وليس ارضاء الشعب لانى بصراحه حاسس انهم بيرضوا الشعب ومافيش حد هيتحاسب فيما بعد  غير الشعب
مع  بدايه عصر مابعد مبارك حدث مثلما يحدث فى كل العصورفى بدايه اى عهد   تم الافراج عن المسجونين السياسيين  السابقين  وبعض المجرميين امثال الزمر   وتم حبس بعض الاراء المخالفه للقوات المسلحه مثل المدون مايكل نبيل   قد اختلف مع مايكل فى الراى فيما نشره ليثبت ان الجيش والشعب عمرهم ماكانوا يد واحده  واتهام القوات المسلحه بمساعده الشرطه  فى ضرب المتظاهريين فى احد ايام الغضب   وممكن ارى انه متجنى عليهم كمان   واختلف معه ايضا فى رفضه التجنيد الاجبارى   ولكنى اتسائل سؤال  هل هذا سيكون مصير كل ماينتقد القوات المسلحه  ام مايكل حاله استثنائيه مثلا  هل القوات المسلحه تصنع لنا خط احمر  جديد  فلايصح ان نتكلم عن فاسيدنها اذا وجدوا  اصل كل جهاز مهما كان اهميته ونقاء من فيه يوجد فيه بعض الفاسدين  هل سنعرف  نكشف الفاسدين فيهم  ونطالب بالتحقيق معهم ام انهم سيكونوا خطوط حمراء لا نتعداها ونعود لنقطه الصفر    ولذلك اتسائل هل القوات المسلحه مع الثوره  فعلا  وماحدث ام ان مايفعلونه ارضاء للشعب وخلاص لتدبير شيئا ما   
انا مش فاهم حاجه

الاثنين، 11 أبريل، 2011

الانتماء فى عصر مبارك ومابعد عصره

الانتماء دائما كنا نشتكى من الناس  ونقول الناس مبقاش عندها انتماء  تشوف كل واحد يمشى فى الشارع يقول بلد بنت تييييييييييييت ويسب ويشتم فيها   ولكن بعد ثوره25 يناير  شوفنا اشياء غريبه على  ابناء وطنا العزيز  شوفنا على الفيس بوك جمل مثل  مصرى  وافتخر  وكنا لم نرى مثل هذه الجمل قبل ذلك  يعنى مثلا الواحد كان يدخل على الفيس يلاقى اهلاوى وافتخر  مثلا  زملكاوى حتى النصر عادى  بترول اسيوط حتى نفاذ الكميه مافيش مشكله لكن  مصرى وافتخر او مصريه وافتخر ديه جديده ياترى ليه
يمكن لما الشعب كان مقتنع ان مصر هى مبارك  وكان  كارهه  كره مصر بسببه وراينا من اصدر كتاب مصر ليست امى ديه مرات ابويا  وقصيده الشاعر هشام الجخ  جحا اللى بيقول فيها كفايه بقى دلعك باخ  ولما قلتلك كرهتك كان نفاق     واغانى كتير  ومرار  والم  وجرح من وطن
وفجاه  لما الشعب اسقط النظام او لما اسقط معادله مصر = مبارك  وبالرغم بان حال البلاد لم يتغير ولن يتغير الا بعد فتره من الوقت   اصبح المصرييون يحبون  بلدهم وينتمون اليه   ويحاولوا الحفاظ عليها  هل كانت لحظه تنحى الرئيس لحظه عوده الروح للجسد وعوده مصر لشعبها   وان كانت هل ستكون لحظه تنسى فيما بعد ام انها لحظه سيتغير  الشعب بيها اما ان الشعب سيعود وينسى ويرجع لما كان عليه هل الروح التى عشق بها الشعب بلده ونزل  ينظف الشوارع بيها هل ستستمر اما انهم سيرجعون يلقون الزباله فى الاماكن التى نظفوها  ويتهمون فلول النظام القديم بيها ان كل حدث او كارثه تحدث الان يتهم فيها فلول النظام السابق وبالرغم انى مصدق ان فلول النظام يحاولون هدم الثوره  ولكن  من ينفذ خطط الفلول  مصريون لم تنظفهم  هذه الروح الجديده والانتماء  للوطن   وهؤلاء اخطر من الفلول انفسهم  لان لولاهم لما نجح الفلول فى اثارت المشاكل وبوجودهم  سنرجع لعصر النظام وماقبله  وليس العيب فى الفلول ولكن العيب فى من ينقذ   خططهم  حتى ولو لم يكونوا خططوا لها  فلول النظام   والعيب الان فينا جميعا ان لم نشعر او نفهم  الناس  اللى بتنقذ خطط الفلول  ان  هذه هى بلدهم ومايفعلوه ضد بلدهم    فعلينا كلنا ان نساعد بعض لكى نشعر بجد اننا فى بلدنا التى يجب علينا ان حافظ عليها   خلاص قد سقطت المعادله القديمه واصبحت مصر# مبارك 
 ووجب علينا كلنا ان نبنى معادله مصر =  المصريين

الاثنين، 4 أبريل، 2011

مجنون

باعترف انا مجنون
وارفض اكون عاقل فى زمن المجانين
بقولها من صغرى  متخرج من اكثر من مستشفى للمجانين
مجنون  زى الكون لما يثور    زلال براكين
يمكن يكون بيهد نفسه بس فى الاخر علشان يكون
يتتغير من حاله الى حاله  ليستعد يكون فى احسن حاله
 يتحول من قاع بحر الى مقطم
و يموت جواه  سمك وسمك يتلطم
ودا سر الحياه   طول عمرنا  جوانا حاجات بتعيش وحاجات بتموت 
زيها زينا بنعيش ونموت
شغل  جولوجيا    او حاله فوبيا
انا مجنون  مبسوط بجنانى
 حتى لو من جنانى بعانى
انا مجنون

السبت، 2 أبريل، 2011

دوله اسلاميه بشعبها ولا بحكامها

ناس كتير قالوا نعم عشان  الماده الثانيه  فى الدستور  وشيخ يسمى  الاستفتتاء  غزوه الصناديق  وناس تطلع تقول عايزنها اسلاميه اسلاميه   ماشى كلام زى الفل
طيب

سؤال بيلعب فى دماغى كتير   كانت الماده الثانيه  موجوده فى السنوات الماضيه  وكان  اللى بيحكم  مسلم  سمعنا عن  قضيه عبده الشيطان  وسمعنا عن البهائيه وسمعنا عن قضايا  اذراء الاديان   واضح ان الماده الثانيه كانت عامله شغل عالى   وبردوه كون اللى  بيحكم مسلم كان عامل شغل عالى
فى السنوات الاخيره ايضا عندما كنا نختلف فى الراى مع  المفتى  نظرا لعاده تعود البعض عليها وليكن الختان مثلا   كان  البعض يقول  بان  المفتى  يفتى  بامر من الحكومه   وانه قبل مايكون مفتى كان له راى اخر  ويتم التشكيك فى فتوته  ومادام الشيخ فلان الفلانى اللى  بيسمعه فلان قال حاجه تبقى قران ولو المفتى قال راى اخر يبقى  مفتى موسيس  وملعوب فى دماغه  
وكمان فى شهر رمضان  كنا بنشوف بعض الناس  تبداء الصوم مع السعوديه وتنهى الصوم مع السعوديه حتى  وان لم يكن بداء عندنا او انتهى   لانه لم يثق  فى قرارات  حكومه الدوله واستطلاعاتها
اكيد طبعا كلنا فاكرين الكلام دا 
طيب نيجى للسؤال
عندما تكون دولتنا اسلاميه  ويحكمها واحد يدعى بانه يحكم بالاسلام وعادل والكلام دا كله واختلفنا معه فى راى فقهى  ماذا سيحدث 
هل سنشتكى فيما بعد من فتنه  اسلاميه  يكون ابطالها  اصحاب التيارات  والمذاهب المختلفه  ؟
يعنى بدل ماكنا بنخاف من ان تحدث فتنه بين المسلمين والمسيحين  بعد اى حادث اجتماعى بين شخصيين يؤمنون  بعقيده مختلفه  يصبح خوفنا من فتنه من اى حادث اجتماعى بين اى شخصين   يؤمنون بعقيده مختلفه او يؤمنون بعقيده واحده  خلاص  هيبقى كله يضرب فى كله
 كان بيظهر ناس بيكفروا اللى على مازجهم وكل واحد قراء او سمع فتوه وعجبته كان بيحكم بيها    ياترى لما هيمسكنا واحد عايش فى دور الشيخ    هنصبح عاملين ازاى    ممكن واحد يظهر ويقول طب ما ايام الرسول والخلفاء     والناس الافاضل ديه   ياسيدى هاتلى  رسول او حد خارج من تحت ايده  يحكم ومش هقولك لا  بس فى عصرنا هذا مش هتلاقى 
كمان  ايه فائده ان يكون اللى يحكمنا مسلم  ويحكمنا بالاسلام ونحن تصرفتنا مش تصرفات مسلمين  اصل الاسلام  مش احكام  وعبادات الاسلام سلوك  وتصرفات   وماتقليش هو هيفرضها الاسلام مش بالاكراه 
هى الدوله  تكون اسلاميه  لما شعبها يتعامل بسلوكيات الاسلام  ولا لما يكون اللى بيحكمها مسلم وبيحكم بالاسلام
اتذكر قول الامام محمدعبده  رحمه الله  عندما سافر فى الغرب  قال رايت اسلام  ولم اجد مسلمين وعننا رايت مسلمين ولم اجد اسلام    ولا اعرف لماذا الان وفى وسط الجدل القائم عن الماده الثانيه وعن الناس اللى عايزينها اسلاميه   والاخوان وعائله الزمر  وغزوه الصناديق   نفسى  اسئل الامام محمد عبده رحمه الله  انهى دوله هى الدوله الاسلاميه  اللى بيها اسلام ولا اللى بيها مسلمين  حكم اسلامى  ولا شعب اسلامى  بجد بتصرفاته باخلاقه   مش بالبطاقه 
اتمنى من كل واحد يرد بعقل حكم اسلامى  ولا شعب اسلامى بجد 
واتمنى ان اى حد مهما كان  كبير صغير  عايز يوصل للحكم يبعد عن الدين انت لست رسولا  ياسيدى  وان كنت خائف على الاسلام علم الناس الاسلام وابعد عن شهوه السلطه 
اعتذر عن التطويل و ان الكلام بدون تنسيق او ترتيب بس هما كام كلمه كنت عايز اقولهم  وخلاص  يعنى مجرد فضفضه وكام سؤال

Follow by Email

Tetris