الاثنين، 24 يناير، 2011

الاعتراف سيد الادله


الاعتراف سيد الادله  جمله تعنى ان  اذا اعترف احد على نفسه فهذا سيد الادله ضده
ولكن هنا فى مصر تعودنا دائما ان اذا اعترف احد على نفسه فهذا دليل على برائته  وهذا لاسباب كثيره
اولا سوء سمعه الشرطه ورجالها   بسبب ماينتشر عن التعذيب فى اقسام البوليس مرورا بحوادث  عماد الكبير وخالد سعيد وسيد بلال  الى اخره
ثانيا  بعض القضايا التى عندما نفتكرها نعقد  نضحك مع بعض لانها قضايا فى حد ذاتها نكته
 يعنى تعالوا نفتكر قضيه الفنانه حبيبه  التى حكم عليها بجريمه قتل زوجها    وكانت معترفه  بالجريمه  وبعد  نصف الفتره خرجت ليست حسن سير وسلوك  بل  براءه  عشان ظهرت  ادله اخرى  وظهر متهمين جدد  طب ياعم والاعتراف ده  دا سيد الادله ولكن طبعا الاعتراف ليس سيد ادله الادانه  فى مصر  ولكنه سيد الادله لبراءه المتهم   فالمعترف برئ الى انت تثبت  ادانته
قضيه تانيه بردوا اكلموا عليها فتره وهو ان واحد اعترف انه  قتل بنته  ومثل الجريمه   وكل حاجه تمام  وفجاه  تظهر المرحومه يثبت ان المرحومه لسه عايشه  سبحانه وتعالى  ويحيى العظام وهى رميم
 والان نحن امام قضيه جديده لانعرف كيف ستسير احداثها  
وهل الاعتراف سيد الادله  ولا سيده
الداخليه تعلن انها كشفت ابعاد العمليه الارهابيه بتاعت كنيسه القدسيين
والمجرم ماشاء الله عليه طلع واحد محترم وجهوه  بالادله  فبكل اخلاق وادب  اعترف المذكور أحمد لطفى إبراهيم محمد بالجريمه
يعجبنى انا المجرم اللى عنده اخلاق اول مايتمسك يعترف  علطول   ياااه  لسه الاجرام بخير   ياولاد الحمد لله ان المجرمين لسه  بيعترفوا بجريمتهم  الحمد لله   سبحانه شوف المجرم رغم انه مجرم انما بيعترف بكل ادب واخلاق
لا كمان مصر لسه بخير  لانه طلع اللى ورطوه  تنظيم الجيش الاسلامى بغزه  يعنى  الحادث من جهات خارجيه  مش من مصر  عمار يامصر الله اكبر    ماشاء الله
لا والحمد لله انه  اتمسك واعترف  قبل مايجى يوم 25 يناير  اللى كل شويه على الفيس بوك يتطلع ناس تقولك هنعمل مظاهره  هنعمل ثوره  هنعمل معرفش ايه كانهم هيعملوا رحله  ولا حاجه  انا عن نفسى يوم 25 يناير  هعمل  كوبايه ليمون  او ممكن اشترى حاجه ساقعه هههههههه  
اه الحمد لله انه اتمسك قبل 25 يناير  منعا للقيل والقال
بزمتكم مش حاجه تدعوا للسخريه   توقيت القبض عليه  يمكن صدفه  طب  وحكايه انه اعترف ديه
فى مجرم بيعترف على جريمته  انا اعرف ان المجرم يحوم حوالين مكان الجريمه انما يعترف  ديه جديده
وادينا هنتفرج و هنشوف مين تانى هيعترف   ويقول   بس  مهما كترت الاعترافات
ياترى هيرجع الاعتراف سيد ادله الادانه  ولا هيفضل سيد ادله البراءه
ادينا بنتفرج وهنشوف ايه اخرتها 
يارب يصدق الاعتراف المره ديه  
يارب تنجح يا تتح

هناك 9 تعليقات:

الــحــــنـــــــــــــــــــين يقول...

خليك ورا الكداب لحد عقب الباب بس غريبه انهم من غزة يعنى مقفلنها على حماس واهل غزة ودول جم ازاى سبحان الله ويارب تنجح ياتتح على رايك

مها البنا يقول...

ربنا يرحم مصر والمصريين

فعلا الواحد مش بقى عارف يقول ايه

انتشر الفساد فى كل حته والناس أصبحوا متخبطين مش عارفين الحقيقه فين

مين صح ومين غلط
مين قاتل ومين مقتول
مين مذنب ومين برئ

معنديش غير كلمة صديقه عزيزه عليا


لنا الله

أخى الفاضل

لك نظره ثاقبه .. وصدقنى .. أدعو الله من قلبى أن تكون تلك النظره غير صائبه وأن تكون تشاؤميه .. ولكن هيهاااات

خواطر شابة يقول...

تعرف امس ونحن نشاهدالاخبار ظللنا نضحك لان شر البلية مايضحك اتهام جيش الاسلام الفلسطيني لا يمكن ان يقال عنه الا نكتة صراحة وابعاد المؤامرة واضحة فيه حتى للاعمى ففيه ضرب لحماس وحزب الله وسوريا وايران وفيه شرعنة للحصار المفروض على غزة وفيه تحويل للرأي العام الى عدو خارجي وامام كل هذا لانملك الا ان نقول لاحول ولاقوة الا بالله العلي العظيم

سندباد يقول...

نظام افلس من بدري اوي
ونهايته وشيكة انشالله

AHMED SAMIR يقول...

المتهم عندما احس ان 25 يناير قد اقترب و هو عيد الشرطة المقدس
ضميره صحي
وقرر ان يسلم نفسه علشان الشرطة ما تعيدش و هم زعلانين
منهى الوطنية

شمس النهار يقول...

هو سيد الادله ده

غير
سيد قراره التاني

؟؟؟؟


:)))))

مغلبين سيد ده معانا اوي في البلد دي

:))

richardCatheart يقول...

ههههههههههههههههههههههههههههههه
ماهو دا اكبر دليل على ان مافيش اعتراف ومافيش ادله وان سيد راح يقف فى طاااااااااابور العيش

خواطري مع الحياة يقول...

ههههههههههههههههه
تصدق احسن ماعملت انك تشتري حاجة ساقعة وتتفرج على المظاهرات يمكن يكون فيلم اكشن ويحصل فيه ضرب وكله
ربنا كريم
تقبل مروري
سلامي ليك اخي.

mrmr يقول...

بالذمه اعملى كوبايه ليمون معاك
وسندوتشين كده على ما قسم

يا ابنى لازم يكون فى كبش فدا
امال اذى يهدوا الحال
لسه مش عارفين السياسه ماشيه اذاى

Follow by Email

Tetris