الثلاثاء، 14 ديسمبر، 2010

تطور واختلاف الاذواق عبر العصور( مجرد تهييس)

وانا  على الفراش فى اخر ايامى  اتحدث  عن اختلاف وتطور  الاذواق على مر العصور
 كنت وانا شابا مثل كل الشباب نحب ان نسمع اغانى   الفنان  عبده الحامولى  وسلامه حجازى  وصالح عبد الحى وبديعه مصابنى و السلطانه منيره المهديه رحمهم الله   وكانوا فى نظرى اجمل واحلى الاصوات  وكلامهم جميل وله معنى وقيمه   وكنت اشغل اسطونه فى  الجرامافون للسلطانه منيره المهديه رحمها الله  واقول الله عليكى يا سلطانه   عندما تقول ارخى الستاره اللى فى ريحنا لاحسن جيرانا تيجى تجرنا   يامبسوطين يا يا فرحانين يا   كلمات لها معنى جميل وكلمات توعى الناس   انهم لازم يرخوا الستاره علشان الجيران ماتجرحهمش   تحس فى كلامها بقيمه  ومعنى  ولما كبرت كنت استغرب  من جيل الشباب اللى كان بيسمع اغانى الشباب وقتها بتاعت  فريد الاطرش وام كلثوم واسمهان وعبد الحليم رحمهم  الله  بصراحه كانت فى نظرى   اغانيهم لاتسمع  وكنت بقول عليهم بانهم سبب ضياع اللغه العربيه وانحدار الذوق العام  فمثلا ام كلثوم  رحمها الله عندما  غنت لابى فراس الحمدانى رحمه الله  شعره  الذى يقول فيه
  اراك عصى الدمعى شيمتك الصبر اما  للهوى نهى عليك ولا امر
 بلى  انا مشتاق وعندى لوعه  ولكن مثلى لا يذاع له سرا
وكانت تغنى وتقول  فى البيت  الثانى نعم  انا مشتاق وليس بل  
اتهمتها بانها ضيعت اللغه العربيه  فهل السوال المنفى يرد عليه بنعم للرفض
ازاى  يعنى  يكون المعنى  ايوه ليس للهوى  نهى عليا ولا مر و عندى لوعه ولكن مثلى لايذاع له سرا
ايه الكلام دا بوظت المعنى  قلبت لخناقه
ولكن بعد فتره من الوقت اكتشفت اننى   كنت اسمعها من الفنان صالح عبد الحى رحمه الله  بنفس الكلام نعم ولكننى تعودت على صالح عبد الحى  بنفس الخطاء يمكن تكون الحان عبده الحامولى رحمه الله   كانت شدانى ومخليانى  لا ادرك ما اسمع    و بعد فتره تغير ذوقى وبداءت اسمع  كوكب الشرق ام كلثوم  ياسلام عليكى يا ست   وامير الغناء فريد الاطرش والعندليب  عبد الحليم وموسيقار الاجيال عبد الوهاب  رحمهم الله   وكانوا فى نظرى سبب علو الذوق العام وتقدم البلد والتراث الجميل  واعترضت على الاغانى القديمه  اعترضت على بديعه مصابنى رحمها الله  حين اسمعها تقول بس بس نو يا بس بس نو  كل مدى عمال تحلو يا بس بس نو   واعترضت على السلطانه منيره المهديه  عندما تغنى خدنى بيته خلانى حبيته  وحط ايده على جنبى ياليله بمبى واقول ماهذه الخلاعه  والكلام الخارج  دا كلام  وبعد فتره  سمعنا شخصا يدعى عدويه يغنى الكبكشندى ذبح كبشه  يابخت مرقه لحم كبشه  وست دبابيس استدبسناهم من عند المسدبيسين ياترى يامدبس  يامستدبس تقدر تدبس لنا سبع دبابيس  زى اللى دبسناهم من عند المستدبسين
وكان الشباب الجديد بيسمع لهذا الكلام  ويسمع اغانى كتير بشكل ده  وقولنا ازاى الكلام ده يتغنى وما قيمته  واتهمناه بانه  سبب انحدار الذوق العام  وبيبوظ اللغه العربيه  فكيف نعرب هذا الكلام المغنى دا كلام  حد يعرف يعربه ولكنى بعد فتره  تغير ذوقى وبداءت اسمع  الفنان عدويه حين قال زحمه يادنيا زحمه   زحمه وتاهوا  الحبايب  لانه بصراحه كان بيناقش مشاكل البلد وحسيت ان كلامه  له معنى وذات قيمه  عندما تكلم عن الزحمه التى نعيشها  كلمات تعيش  لسنين قدام   وبعد فتره  بداء بعض الشباب يسمع لشباب جديد ظهر  كانوا الفنان محمد فواد و الفنان عمرو دياب والفنان هانى شاكر وعالم كتير وفى الاول ايضا استغربنا كلامهم  فكان محمد فواد مثلا يغنى  فى سكه فى سكه فى سكه   بموسيقى سريعه وغريبه   وعمرو دياب بيغنى هلا هلا  واغانى غريبه كده حتى فى مغنى لم اتذكر اسمه غالبا على حميد باين معلش السن  بقى    غنى لولاكى لولا  لولا  ولكن بعد فتره تغير ذوقى  وبداءت اسمعهم لانهم بردوا كانوا بيغنوا بعض الاغانى ذات معنى  وبعد فتره بداء الشباب يسمع او بمعنى اخر يشاهد  واحيانا يرقص مع اغانى لروبى ونانسى عجرم وهيفا  واليسا وتامر حسنى  وعالم كتير وقلنا عليهم ايضا تقريبا نفس الكلام فى الاول ولكن تغيرت اذوقنا وبدانا نسمع اغانيهم لان بعضها له معنى  وان كان على اللغه فكل مغنى بيغنى بلغه عصره  ولا يعرف شئ عن اللغه العربيه  و احيانا يغنى بدون مايعرف ايه معنى اللى بيغنيه المهم الحاله اللى بيغنيها ايه  يعنى الفنانه شيرين  مثلا فى بدايتها عندما غنت من النهارده مافيش احزان مافيش الوان  عندما سئلوها يعنى ايه مافيش الوان اجابت  اجابه غريبه قالت انها كانت تقصد الاحمر والاخضر والوان   بقى  بالرغم ان من البديهى ان الكاتب كان يقصد مافيش افراح  لان الافراح نعرفها بالاوان والاحزان بالاسود كما تعودنا   ولكن كان ردها يبين انها لم تعرف ما المقصود بيها ولكن هى كانت تغنى حاله معينه بعيدا عن اللغه ومشاكلها   والكنايه والاستعاره  وحاجات الادب ديه  مثل اى مغنى لايهمه الكلمات  اكثر مايهمه الحاله اللى بيغنيها  زى محمد فواد لما غنى كامننا  حد عارف كامننا ديه تطلع ايه  ولا مصنوعه من ايه  لكن هو بيغنى حاله  معينه  وهشام عباس لما بيغنى انتخوا  عادى لفظ متداول
الخلاصه
ان لكل زمن اغانيه الجميله واغانيه الرديئه  بل المطرب الواحد له اغانى جميله واغانى رديئه  وهذه سنه الحياه ولكن السوال لماذا  اصبحنا نقدس المغنين  ونجعلهم ناس لاتمس فعندما يعترض احد على مغنى له شعبيه كانه كفر ماذا حدث كلها اختلاف اذواق  فى ايه مش عارف  بالرغم ان فى ناس اهم من المغنيين المفروض نحترمهم  اكتر  ولكن اصبحنا نقدس المغنيين  لا اعلم لماذا   بالرغم انها اذواق   تختلف عبر العصور ومن واحد الى اخر وليس عقائد  ثابته
والان وانا على فراش الموت  اسمع اغانى العصر لن اقول لكم اننى اسمع ابو الليف لا انا الان اسمع اغنيه
انا شارب سجاره بنى حاسس انى دماغى بتاكلنى قاعد فى  القاعده بسقط  لان ذوقى تغير ورائيت اننا اصبحنا  كمجتمع انتشر فيه المخدرات  اصبح اغنيه سجاره بنى واغنيه حجرين على الشيشه  اغانى قيمه ولها معنى وتعبر عن واقع سخيف اصبحنا فيه  وفكرتنى كلمات الاغنيه باغنيه الفنان القدير سيد درويش رحمه الله حين غنى اغنيه التحفجيه  وقال  ورينا اجدع بيه ولا باشا يقدر يعايب على الحشاشه   ولكن طبعا مع اختلاف الزمن  للاسف هذا العصر ما فيهوش بركه   احنا  كنا بنشترى اسطوانات الجرامافون  ب3 مليم  وكانت الاسطوانه اسطونه  مش دلوقتى شريط   قد كف الايد  او اسطوانه كمبيوتر الصغيره  ديه  اللى بتدفع فيها  مبلغ وقدره  مش اقل  من 10 جنيه كل شئ قل بركته   ما علينا  والان احمد ربنا باننى اتنفس  انفاسى الاخيره  قبل ماذوقى ينحدر اكتر من  كده و اسمع اغنيه  واخد حقنتين  ماكس  لان حالنا كل شويه فى الهبوط  واتمنى ان المجتمع فيما بعد يتحسن حتى نحسن اغانينا
امضاء
مورخ   الاغانى  التى دائما  تعكس  مدى حضاره  كل عصر    
                                                               

هناك 4 تعليقات:

خواطري مع الحياة يقول...

السلام عليكم
الله على اجمل مقال
ناقشت موضوع بداء بنحدر للاسواء
ليس بداء قد انحدر للاسواء
الله لما تسمع ام كلثوم بجد تحس ان الكلام ياخذك لدنيا ثانيه
ولا لما تسمع لفيرز في الصبح بصراحة بحس بحلاوة الصبح وترجع لي ايام الطفولة لما كانت امي تتسمع لفيروز وام كلثوم وعبد الحيلم دائما
فيها طعم جميل
اشكرك على اجمل واروع موضوع
تقبل مروري
سلامي ليك اخي.

حلم يقول...

السلام عليكم
مقال رائع فعلا هو اختلاف عصر واختلاف ذوق ولقد اعجبني تشبيهك للاغنية الحالية انها تشبه السجارة
بارك الله فيك اخي عمرو

موجة يقول...

بصراحة انا كنت حاسة بمتعة وانا بقرء البوست الجميل ده
حسيت بتسلسل زمنى مرتب ومقنع جدا
بجد سلمت الانامل

عمرو يسرى يقول...

رشا
حلم
موجه
شكرا لكم
نورتونى

Follow by Email

Tetris