الأربعاء، 10 نوفمبر، 2010

يوم الخميس 4 نوفمبر 2010 فى جامعه عين شمس (تدبير غير متقن ) ازمه مفتعله

كان شريف  احد اصدقائى  اخبرنا من فتره  ان فى هذا  اليوم  حفل للمغنى تامر حسنى  فى الجامعه  وده كان خبر معروف  لناس كتير  حيث ان الطلاب  دائما تنشر بينهم  مواعيد  اى حفل  وقالى شريف تعالى نروح الحفله  ووافقت  وفى هذا اليوم سبقنى شريف وانا تقابلت مع محمد ابراهيم وذهبنا فى اتجاه  الجامعه  وعندما وصلنا رائينا شئ  غريب لا يوجد  حفله ولكن يوجد مظاهرتين  امام قصر الزعفران فى شكل  تهييسى  اخر مليون حاجه مظاهره عايزه تتكلم وتقول حاجه لكن صوتها ضعيف مش ظاهر  لان مظاهره اخرى  تخطى عليها مظاهره عن  نادى الاهلى بتقول اهلى اهلى  وبعدها تقلب الى قاعدين ليه ماتقوموا تروحوا كان منظر يدعوا للسخريه وخصوصا ان  الحرس الجامعى  موجود  وقاعد يتفرج   وكنت عايز اصور  فديوه لكن موبيلى تصويره سيئ  قلت اخذ من اى حد بيصور فديوه عن طريق البلوتوث  فذهبت لاحد الشخصيات اخذ منه تصويره  وسئلته  ماذا يحدث  فقال  كان فى  مظاهره  ضد الحرس  الجامعى دخلت فيها خناقه لتشوشر  عليها وان الموضوع اصلا بادى بخناقه  ناس عايز الحرس  الجامعى وناس  لا ومن كلامه عرفت انه شايف ان الحرس الجامعى لما يكون من الداخليه افضل من ان يكون من شركه امن لان ممكن اى حد يفرد نفسه  على اى واحد من بتوع شركات الامن ولكن مش هيقدر يفرد  نفسه على  ظابط  اخذت منه الفديوهات  وقمنا ماشين نقعد على قهوتنا  واتصلنا بشريف عشان يجيلنا  شريف لما  وصلنا  قال انه شاف خناقه   وناس بترهب الطلاب بالمطاوى  والحرس  قاعد ولا كانه موجود  وبيقول كمان شريف انه سمع ناس خارجه من الجامعه بتقول كفايه كده الفلوس ديه تكفينا  يعنى كان فى كلام ان  فى ناس ماجوره من  حرس الجامعه  عشان تعمل  فوضى وبلطجه  وتثبت ان وجود الحرس الجامعى   ضرورى  بالرغم من ان هذا  الحدث فى وجود  الحرس الجامعى  يثبت ان وجود الحرس الجامعى زى عدمه  وقال كمان شريف  ان الحفله اتلغت من يومين ثلاثه وماحدش قال  
انتهى  اليوم  ليظهر الحديث عن هذا اليوم  فى  التلفزيونات بعد ذلك  لنستوعب بيه الجزء الذى شوفناه  وسمعناه   خلال اليوم   
الحدث المذاع
ان الدكتور عبد الجليل من جامعه القاهره اتى الجامعه  ليوزع على الطلاب الحكم الصادر   بالغاء حرس الجامعه  وان بعض الطلاب هاجموه وبداء الموضوع كله والازمه

الاشياء التى تجعلنى اعتقد واتاكد من ان الموضوع تدبير  الجامعه

 ان فى حلقه مصر النهارده اذاعوا جزء من شريط بعته وزير  التعليم العالى  وقال الوزير ان الدكتور متصور من بدايه  دخوله   ويدعى الوزير  ان الفديوه تصوير من الطلاب  واقول يدعى لسبب ان الطلاب  لو هيصوروا  بيصوره الحاجه الغريبه يعنى احداث البلطجه  او المظاهرات المسخره انما انهم يصوروا  دكتور دخل الجامعه  من بدايه دخوله من غير مشاكل  الى المشكله لا اقول له  الا تيييييييييييييييييت  كلمه اعتراضيه   الدكتورمش  نجما  معروفا  عشان الناس  تصوره من لحظه دخوله
 ايضا ان الوزير ادعى ايضا  انه لم يكن موجود حد بسلاح  بالرغم من ان الاستاذ محمود سعد جابله صوره من الفديوه بتاعه وصوره تانيه فيها نفس الشباب وفيها سلاح ولكن غالبا كان الوزير ضعيف النظر والبصيره فراى ان الشاب الذى  فى الصوره الاولى مش هو اللى موجود فى الثانيه  يمكن الوزير كان عنده عمى الوان وقتها الله اعلم  
كمان طريقه دخولى انا ومحمد ابراهيم غريبه   منذ دراستى فى هذه الجامعه دائما الحرس اللى على باب الحرم الجامعى يغلس مع طلاب كليه تجاره  لان كليتهم  منفصله عن الحرم الجامعى  واتذكر عندما جعلوا النتيجه من على الانترنت بكارت من الجامعه بخمسه  جنيه ايام  مصاص  جيوب الناس  البتاعه  ده اللى اسمه   احمد ذكى بدر اللى بقى وزير تعليم  كانوا بيغلسوا علينا ومكناش بندخل بسهوله عشان نجيب الكارت  فى هذا اليوم 4/11/2010 كنا ندخل بسهوله حتى صاحبى محمد ابراهيم دخل بالبطاقه من امتى التسامح ده
كمان اختيار اليوم يوم اللى  كان معروف ان هيبقى فى حفله  
يعنى اختيار اليوم اللى  معروف ان فى زحمه  او بمعنى اخر   انه من الممكن ان يكون  انتشار خبر  الحفله   وان يتم الغاءها مقصود    لانهم عارفين ان الدكتور ده جاى الجامعه  اليوم ده  وهيعمل ايه
وتصوير الدكتور من اول دخوله  مما يدل ان الاداره كانت عارفه ان الدكتور  جاى  وناوى يعمل ايه لان الدكتور ليس شخصيه معروفه لكى يصورها الطلاب قبل ان تحدث ازمه  
فالكلام الذى يقول ان الطلاب صوروا  الدكتور من بدايه دخوله  دا كلام جماعه مساطيل وناس هبله   غير قادرين  ان يدبروا شئ لاخره     ناس موكوسه ومفضوحه  
وسهوله دخولنا الحرم الجامعى  غريبه
وانكار الوزير للحقيقه الواضحه
كلها تدين الجامعه ووزيرالتعليم العالى وتقول  ان الموضوع مدبر من الجامعه  ومن سياده الوزير

انا لا اتهم احد ولكن اقول ملاحظاتى فقط  التى تدين الوزير و اداره الجامعه   وتثبت ان الحرس الجامعى ليس له لازمه حيث حدثت هذه المسخره فى وجوده
انتهى  اليوم
واسف للاطاله

هناك 8 تعليقات:

سندباد يقول...

وهو من امتي بتكون حاجة في مصر من غير تدبير
ياصديقي احنا تحت احتلال مش حكومة يهمها مصلحة الشعب والبلد
لكن اتمني وادعو الله ان يرحمنا
تحياتي

خواطري مع الحياة يقول...

السلام عليكم
الله يعينكم
ويرحمكم من هذا العذاب
بجد معنديش كلام اقولة
عمري ماشفت شي مثل هذا عندنا بالجامعات
ربنا يصبركم
تقبل مروري
سلامي ليك اخي.

re7ab.sale7 يقول...

الحقيقة مش عارفة اقول اية ..؟ سواء عن حرس الجامعة والا المظاهرات والا الدكتور ده , والا الطلبة والا تامر حسني والحفلة ...بقيت مش مستغربة اي حاجة بتحصل في جامعاتنا المصرية , من فترة كبيرة وانا عايزة اكتب ف مدونتي عن عدة موقف شاهدتها في الجامعة لكن يمكن مترددة ويمكن مش عايزة ويمكن عشان بقرأ كتير ف المدونات فحاسة انه مالوش لازمة اللي هكتبه ...بجد حاجة تخنق

Lady E يقول...

اخيرا عرفت ايه سبب اللي حصل في الجامعة شوفت جزء من حوار محمود سعد والوزير ولأول مرة بحترم محمود سعد وبحترم جرأته ومناقشته والوزير مكنش عارف يتكلم اساسا

المرجح في موضوع التصوير ان ممكن يكون الطلاب كانوا بيصوروا على اساس ان في حفلة يمكن !

عمرو يسرى يقول...

سندباد
ياستاذى انا مش ضد التدبير بس تكون محبوكه يعنى يبقوا فاشلين حتى فى الحبكه
هههههه
نورتنى

عمرو يسرى يقول...

رشا
شكرا ليكى
نورتينى

عمرو يسرى يقول...

رحاب صالح
اكتبى كل شئ فتجربتك بالتاكيد مفيده لنا وجديده وستضيف لنا معلومه

نورتينى

عمرو يسرى يقول...

Lady E
ههههه
الوزير كلامه غير منطقى اساسا
ولو التصوير على اساس ان فى حفله ايه علاقه الدكتور بيه
هى نظريه
نورتينى

Follow by Email

Tetris