الجمعة، 27 أغسطس، 2010

الله يرحمك يا اديسون

الله يرحمك يا اديسون
لو تعرف انهم هيعيشونا فى ضلمة
ما كنت اخترعت الكهرباء وكنت اشعلت شمعة
وتعيش فى جو رومانسى على ضوء الشموع
ما فلوسنا خلاص هتخلص على شراء الشموع
انت اخترعت المصباح
وهما بيعيشونا فى ضلمه والنور خلاص راح
الله يرحمك يا اديسون
 انا كنت مسافر وعلى الطريق كان النور قاطع
قالوا تخفيض احمال قال يعنى زمان كان ساطع
وقال يعنى القرى  اللى على الطريق
هما اللى بيستخدموا كهربا كتير
وعندهم كذا تكيف
والناس الكبار غلابه عايشين فى الحر بلا تكيف
ولا يعرفوا يعنى ايه تكيف
اغلق يا سياده الوزير التكيف
اه معلش اسف دا انت من الغلابه متعرفش يعنى ايه تكيف
يا سياده الوزير النور عندك  قاطع
ولا هو دايما عندك ساطع

اهلا بكلام التهييس
والنور خلاص بقى ما فيش
ايه ده فى حته منوره على الطريق
هاهاهاها ديه منطقه دفع الرسوم
مالهاش تاثير على الاحمال
عمر النور ما يقطع فيها ونقول تخفيض احمال
هاهاهاهاهاهاهاها
الله يرحمك يا اديسون
لوكنت تعرف انهم هيعيشونا فى ضلمه
ما كنت اخترعت الكهرباء وكنت اشعلت شمعه
معيشينا فى جو رومانسى على ضوء الشموع

وهما يعيشوا فى النور وبيبعولنا احنا الشموع
الله يرحمك يا اديسون
نورت لغيرك
مش زى غيرك






الاثنين، 23 أغسطس، 2010

ائتلاف شعبى لدعم جمال مبارك بلاوكسة

كنت بشيت مع كريم صاحبى فقال لى مازحا انا زعلان منك ومن الشعب استغربت فقلت له ليه قال لى تعملوا ائتلاف من غير ما تقول لى لدعم جمال مبارك قلت له ايه قال لى انت ماتعرفش قولته ايه الكلام ده قال لى منشوره فى كل الجرائد فدخلت على احدى الجرائد المعروفه فقرات الخبر وقرات فى الخبر ان الحزب الوطنى يعلن عدم مسئوليته عن الحادث وان هذا الائتلاف من الشعب وطبعا لازم يعمل كده وكان لازم ازعل من كريم ومنكم يا مدونين ازاى تعملوا ائتلاف لدعم جمال مبارك من غير ما تقولولى هو انا مش من الشعب زيكم ولا ايه مش تقولولى الغريب اننا نعرف ان الائتلاف مش من الشعب المصرى ولكن ممكن يكون الائتلاف من شعب اخر ممكن تكون الحكومه ادخلت نظام احتراف الشعوب فى الانتخابات والائتلافات حتى تعطى لنفسها المصداقيه وتعرف تجيب اصوات من بره الغريبه ان قبلها بيومين كانت محاكمه قاتلى خالد سعيد وعرفت من برنامج العاشره مساء عندما كنت اشاهده ان امام المحكمه كان بعض الناس يرفعون شعارات مناصره للظباط المتهمون وكانوا من الشعب ايضا مثل الذين يناصرون الضحيه خالد سعيد وعندما تابعوا كيف انفض الموقف كان انصار الظباط يركبون عربيات الامن المركزى يعنى حكومه متخفيه وسط الناس والكوميديا ان الذين عملوا  الائتلاف الشعبى  ليدعمون جمال مبارك مش عايزين حسنى مبارك استهبال عشان يعطى مصداقيه على اساس ان جمال مبارك حاجه وحسنى مبارك حاجه تانيه تقريبا الحكومه لسه مش عارفه تستعبط بزمه او مش عارفه ان حسنى ابو جمال او فاكره ان الشعب اهبل ولا ايه بس شكلهم هما اللى هبل اكتر حاجه فهمتها من الائتلاف الشعبى لدعم جمال مبارك ليه الحكومه بتاعتنا بقيت الكترونيه طبعا عشان يعرفوا يعملوا ائتلاف شعبى على الفيس بوك مسخره الغريب بعدها بداء الحزب الوطنى يدعم جمال مبارك هو كمان بعدما قال مالناش دعوه بالائتلاف ده كان شعبى وطبعا الحزب الوطنى الوديع لازم يمشى مع الشعب ويدعم جمال مبارك ياعينى على الاستهبال



كان نفسى اقول للحكومة مبروك عليكى الاشتغالة
طب عايزه تشتغلينا اشتغلينا بس حبكى الاشتغالة
يعنى ينفع يكون فى ائتلاف
مش عايز الاب وعايز الابن هو يعنى فى اختلاف
يالا خلينا نرجع لايام زمان
نقول مبارك الاول ومبارك الثانى زى ماكنا بنقول على الملوك  ايام زمان

ملحوظه ساخره
اى تشابه فى الاسماء او الاحداث او الاماكن او الصور  الموضوعة  فهو على سبيل الصدفه
و اى شخصيه تدعى ان اسمها ذكر فى البوست غير كريم صاحبى  سواء رئاسية حاليه او رئاسيه قادمه او غير ذلك فهى كاذبه هههههههههههههه
سامحنى يارب ديه الحكومة


الاثنين، 16 أغسطس، 2010

حياه بلا معنى

من انا لا اعرف من اكون
من انا فى ظل هذا الكون
بحثت عن نفسى عبر السنين الماضيه لن اجد غير اسم بلامعنى وبلا هاويه
بحثت عن حكايتى لم اجد قصه وجدتها عباره عن مشاهد بلا معنى
طب هي ايه القصه ما فيش قصه ديه مشاهد متفرقه
طب هسمى ايه حكايتى مش مشكله اسميها باسمى
كان يا ما كان يا ساده يا كرام كان فى واحد اسمه على اسمى
مش هقول انها حكايتى وكفاية انى هحكيها بنفسى
كان فى واحد عايش لحد ما يموت
طبعا ما النهايه الطبيعيه لاى حياه الموت
كان يمر عبر العمر عليه مواقف
وكان هو دايما واقف بلا مواقف
كان فى ناس حواليه يحلوله اى موقف
اما بحل او من غير حل يتحل الموقف
يمكن يكون فى مواقف منها اتعقد
بس اغلب عقده هو اللى عقدها وبسببها اتعقد
مين قاله يعقد يتفرج
لما لسان غيره اتكلم بلسانه وهو اقعد يتفرج
ليه اتكتم وزرع جوه نفسه الم
والالم مع مرور العمر صرخ من الالم
واديه انعزل وعمر الانعزال ما كان حل
واديه رجع طفل ما طول عمره طفل
ماهو مين بيكبر غير خوض المواقف بدون تكبر
اهى الحكايه يمكن تكون ديه حكايتى
ويمكن تكون كلمات ليها معنى فى نفسى
او كلمات من وحى خيالى 



الثلاثاء، 10 أغسطس، 2010

رمضان السنادى سنه كام ؟


كل سنه وانتم طيبين  و رمضان كريم


اللى عارف يجاوب قبل ما يقرا الموضوع رمضان السنادى سنه كام ؟
هههههههههههههههه
 الموضوع انى كنت مع صاحبى محمد ممدوح فى مره و سالته هو رمضان السنادى سنه كام فرد وقالى
 2011 فقلت له السنادى قال لى 2010 فضحكت
 وقولتله احنا كام هجرى ففكر شويه
 وقال لى الف ربعميه  حاجه وثلاثين فقلته 1431
قالى اه صح 
 الغريب معرفش ليه سالت نفسى احنا ليه ما بنفتكرش احنا سنه كام هجرى وطبعا كان  ردى  هو لاننا ماشيين على التقويم الميلادى وبنربط  كل حاجه بيه ولكن احنا بردوه بنحتفل برمضان وعيد الفطر وعيد الاضحى والمولد النبوى والهجره وعاشوره و.......... و............. و مناسبات كتيره مرتبطه بالتقويم الهجرى يعنى احنا مش مالناش علاقه بالتقويم الهجرى فلماذا النسيان بهذا الشكل يقولولى ده احنا بننسى احنا فى يوم ايه وفى شهر ايه ميلادى مش عايزنا ننسى احنا فى سنه كام هجرى اقول بننسى احنا فى يوم ايه وفى شهر ايه فى الميلادى وتنسى فى الهجرى ماشى لكن مادمنا بنفتكر احنا فى سنه كام ميلادى نفتكرها هجرى كمان عادى يعنى مافيش مشكله يعنى عشان ما ندخلش الاثنين فى بعض ماهو ما ينفعش نقول يناير 1431 هتقولوا مين القديم ده طب نقول رمضان 2010 ازاى جايين من عصر متقدم شويا صح هههههههههه يا مين يعيش طب ما فيهاش حاجه لما نظبط توريخنا ايه المشكله معرفش ايه اللى خلانى اكتب البوست  ده  ما اهنيكم  برمضان    بكل سنه  وانتم طيبين عادى لازم اللفة  ديه     يمكن لانى انا نفسى ماكنتش فاكر احنا فى كام هجرى الا لما سئلنى  احد الاصدقاء نفس السؤال  وقالى  انه شاف برنامج المذيعه بتسئل الناس احنا كام هجرى ونادر لما حد يعرف  مع ان الموضوع مش صعب اوى كده  ولا ايه 

وكل سنه وانتم طيبين 
يا احلى ناس يا اللى عليا غاليين  
وربنا يعيده عليكم وعلينا بالخير والبركات 
شهر رمضان شهر الخيرات 
رمضان كريم
الله اكرم



Follow by Email

Tetris