الجمعة، 23 يوليو، 2010

كنت عايز اقدم بلاغ ولكن

عادت اختى الى البيت بعد  يوم كانت تقضيه  مع صحباتها فى ملاهى دريم بارك وقد سرقت شنطتها هناك وكانت لا تريد ان تبلغ فى القسم واستكفت بابلاغ اداره الملاهى ولكن اقنعناها ان تبلغ  فى القسم لان الشنطه كانت فيها بطاقتها الشخصية واوراق مهمه خاصة بيها ممكن يساء استعمالها وذهبت معها القسم  وكان الوقت متاخر ولكن كنا فاكرين ان الاقسام ما بتقفلش  ولكن  المهم  ذهبنا الى قسم الساحل لانه اقرب قسم لينا وطبعا كنا على خطا وهتعرفه ليه لو لسه ماعرفتوش واكتشفت وقتها انها كانت على حق لما كانت غير مقتنعه بتقديم بلاغ فى القسم بدايه من باب القسم اقتنعت انها كانت صح حيث قبلنا صرصار متخفى فى زى عسكرى حاول يعيش فى الدور ويستخف دم اهله وحب يعمل بنى ادم   فاكر نفسه بنى ادم يعنى او ممكن مكانش  عايز يقول ان القسم قفل بشكل  صريح  فقال يغلس  فسئلناه عن العميد فلان الفلانى كان اى اسم خطر لنا على البال فاكتشف  الصرصار  انه صرصار ورجع لاصله صرصار ودخلنا فطلبوا مننا ترك الموبيلات اللى بالكاميره مما جعلنى اسئل هل يوجد اسرار مهمه فى قسم الشرطه يخافون على تصويرها ممكن وممكن نعرف ايه هى الاسرار التى تمنع دخول الموبيلات اللى بالكاميره فى قسم الشرطه لان قرار عدم دخول الموبيلات فى القسم لم يصدر الا بعد قضيه عماد الكبير و فديوهات التعذيب المهم طلعنا نقدم البلاغ ليسئلنا الراجل اللى بياخد البلاغ السرقه تمت فين قولنا فى دريم بارك فقال اعمله البلاغ فى مدينه 6 اكتوبر بالرغم انها لم تكن محافظة لوحدها وقتها طب عايزين نثبت ان الاوراق والبطاقه الشخصية اتسرقت علشان لو حد  اساء استعملها   فقال اعمله غيرها طب ما احنا كنا هنعمل غيرها ماشاء الله الحمد لله انها جت على قد كده كويس انه ما طلبش صوره الحرامى وبصماته  الحمد لله فغادرنا القسم بدون بلاغ  اننا اتسرقنا طبعا لاننا المفروض نرجع ل 6 اكتوبر  نبلغ فى قسم 6 اكتوبر    وبعد استغراب من الذى حدث قلنا ممكن يكون عنده حق ازاى نتسرق فى منطقه ونبلغ فى منطقة لان كل قسم لايخدم الا منطقته فقط وكل منطقه فى بلد تانية شكلها كده وطبعا عرفنا اننا غلطنين مع انى كنت فاكر اللى احنا اتقدمنا و ممكن نبلغ فى اى قسم وهما يبلغوا القسم المناسب يالا  اللى حصل  بلاوكسة ولكنى افتكرت شئ ما افتكرت عندما قال لى صاحبى احمد ابو بكر انه كان مع اهله فى منطقة العتبة وحدث موقف مش فاكره دلوقتى وكان عايز يعمل بلاغ وراح القسم اللى موجود فى المنطقة مالهمش حجة الراجل عمل اللى عليه شاف الموقف تبع قسم ايه وراح بلغ فيه يعنى عداه العيب وقزح انه يعرف يقدم البلاغ ابدا وقعد لحد ما زهق ومشى ولم نعرف قبل كده ان تقديم بلاغ صعب لدرجه ديه لان كتير من الناس بيقدموا بلاغات عادى ماعرفش فى ايه حد عارف اللى عارف يقولى   يالا اللى حصل




اغلقوا اقسام الشرطه ملهاش لزمه
صدعوا دماغنا بالحكومه الالكترونية بلاوكسه
كنا عايزين نعمل بلاغ وفشلنا
فى القسم اللى تبع البلاغ و فى غيره بردوا فشلنا
اغلقوا الاقسام ملهاش لزمه 

على الابواب  صراصير متغفيه فى عساكر
وكله علينا داير
اغلقوها مالهاش لزمه
يالا بلاوكسه




هناك 22 تعليقًا:

mrmr يقول...

الصراصير دى للتجميل بس
ذى ما بتجمل كده التورته بشويه نمل

تورته ايه بلاوكسه حتى التورته مطلعتش تورته طلعت ماكيت خشب

فى يافطه على القسم بتقول
الشرطه فى خدمه الشعب دى خلاص عمرها الافتراضى انتهى
دلوقتى
الشعب اللى فى خدمه الشرطه
وبعدين انت غلطان لازم تسمع كلام الحريم
لما تقولك بلاش يا عباس تقول سمعا وطاعه من سكااااااات

مين عباس ده مش عارفه اهوووووو اه عباس وخلاص

مها البنا يقول...

مش عارفه اللى هقوله ده من باب كلنا فى الهوا سوا ولا من باب (مش مصر بس اللى كده؟)

المهم انى برضه مره كنت فى مدينه معروفه جدا فى دوله أوروبيه

ورغم معرفتى بلغة اهل المدينه دى بس كنت متوتره شويه ومش مركزه

المهم فجأه وأنا واقفه بقطع تذكرة القطر لقيت شنطتى مفتوحه ومسروق محفظتى وموبايلى

الحمد لله انا مش بحط ورقى مع فلوسى ابدا عشان لو الباسبور او بطاقتى ضاعت بره مصر يبقى انا ضعت وراهم بغض النظر عن موضوع ان فيه سفاره وكده

المهم زى اى حد يعنى رحت اقرب قسم شرطه وكلمت بررررررضه العسكرى على الباب

فقالى اى خدمه؟ قلتله جايه اقدم بلاغ سرقه

فقالى اتسرق منك ايه؟؟

فقلتله موبايلى ومبلغ كذا يورو

فقالى بس؟؟؟؟

فانا تنحت فعلا

وقلتله يعنى ايه وبس؟؟ مش انا ليا حق؟؟

قالى اه .. وممكن تاخديه .. بس شكلك مش من هنا

قلتله فعلا .. انا ساكنه فى مدينه تانيه وكنت هرجع دوقتى بالقطر

فقالى يبقى الحقى القطر عشان هنا هتاخدى وقت فى البلاغ

وبلغى هناك فى المدينه التانيه

طبعا مشيت وانا بقول يا نهااار ابيض

لما هنا وبيعملوا كده .. داحنا فى مصر بقى عدانا العيب

فعلا .. هم يبكى .. وهم برضه يبكى

أسفه على الإطاله

بس الموقف فعلا مستفز

Noha Saleh يقول...

مش عارفة اقول ايه والله ماعندى حاجة اقولها
حاجة مستفزة جدالدرجة ان ماعنديش تعليق ممكن اكتبه
معلش بقى عوضكم على الله ومحدش بيتعلم ببلاش
يعنى ناخد بالنا من حاجتنا علشان لو راحت مش هترجع تانى

عمرو يسرى يقول...

مرمر
المدونه نورت بيكى
مش عارف اقول ايه بعد كلامك فعلا
كانت يافطه جميله بس يا خساره ديكور
لا فايده ولا معنى يادوب ديكور
المهم اناعايز اعرف مين عباس هل هو زى محسن وفوزى ولا جدع محتاس
مين محسن وفوزى اكيد اثنين من الناس
بس ياترى عاملين زى عباس
انا عايز اعرف مين عباس
مستنيكى تنورينى تانى

عمرو يسرى يقول...

مها البنا
المدونه نورت بيكى
والله كلامك اكدلى انى كنت على حق لما قلت اغلقوا اقسام الشرطه ملهاش لزمه صحيح عالم مستفزه ملهمش لزمه

مستنيكى تنورينى تانى

عمرو يسرى يقول...

نهى صالح
المدونه نورت بيكى
الله يخليكى وتنورينى دايما

العيسوى الصغير يقول...

والبلاغ مش ببلاش لانك بتشترى استمارة

عمرو يسرى يقول...

العيسوى الصغير
المدونه نورت بيك
كمان يعنى واخدنها استثمار
ربنا يصبرنا
شكرا على الزياره وارجوا انك تنورنى دائما

Rosie يقول...

بتسم انت فى مصر..كل حاجة صعبة..لازم تبقى عارف بدام دخلت حتة حكومية..يبقى هتشوف اللى عمرك ما شفته.. مفيش حاجة بتتعمل بالساهل..ربنا يهدى..

emadiab يقول...

مدخلتش اقسام كتير عشان اقولك هى كانت تجربة واحدة لما اتسرق موبايلى و رحت من قسم للتانى عشان اقدم بلاغ و اتنين ظباط شباب فرافير عاشوا شوية عليا و كان ناقص انهم يعاملونى كمتهم و فى الآخر معرفتش اعمل محضر و لما حبيت اعمله عملته فى قسم تانى و اضطريت ادى بيانات مخالفة للواقعةعشان يبقى فى بلاغ اتعمل و خلاص

Alaa Salim - علاء سالم يقول...

السلام عليكم

للأسف بعد ما كان الشرطه في خدمة الشعب أصبح الشعار الآن الشعب والوطن في خدمة الشرطه
وبدين هما دلوقتي مش مشغولين باللي إتسرق واللي إنقتل
هما بيجهزوا الآن اتظبيط الإنتخابات
يعني عندهم دلوقتي مهام أكبر بكتير من الشعب والناس

ايه رايك يقول...

بص انا بعترض من اولها علي كلمة صرصار ديه
ممكن نقول انه ملوش لزمه لكن صرصار ديه بجد ضايقتني لاننا كلنا بشر
وعلي فكره
في مثل بيقول من عاشر القوم اربعين يوم صار منهم
والاخ ده شوف عاشرهم كام يوم
عموما مش معقوله كل ردي هيبقي علي الصرصار اللي انت اتكلمت عنه
ههههههههههههههههه


انت فكرتني بموقف كنت راجعه من الجامعه ومعايا في الميكروباص ناس معرفهمش معظمهم بنات
حصل ان واحد بعربيه ملاكي رمي علي المكروباص
السواق معجبوش وقرر يخلي الملاكي يبلس في الرصيف
وفضل يلعب بالعربيه يمين وشمال وناقص ينط لفوق

وطبعا كلنا صرخناااااااا وعياطنا وابتدينا نفتح الشبابيك ونادي علي العربيات التانيه
ولك انت تتخيل 7 بنات بيسرخوا وبينادوا في الشارع علي العربيات اللي جنبهم
الرجل سواق الميكروباص خاف ونزلنا علشان يكمل كورس الرخامه علي الملاكي
نزلنا في وسط الطريق ومش في المكان اللي هو اخر الميكروباص


وروحنا للقسم التابع للمنطقه
ولما روحنا حبينا نعمل كل واحده محضر
قال لا هو محضر او اتنين
طيب محضر واحد بس نمضي عليه كلنا
برده لا كل محضر واحده هتمضي عليه
طيب اعمل لكل واحده محضر برده لا محضرين هما اللي هيتعملوا

مع اننا كنا معانا رقم العربيه وانا عرفت اسم السواق لاني راكبه من الموقف والسواقين بتنادي علي بعض فعرفت اسمه من زمايله
ووصفنا شكله
وكل يومين واحده مننا تروح تسئل
تفتكر حد عمل حاجه
ابدا


الخلاص انا معاك في اخر كلمتين
انهم يقفلوها ملهاش لزمه


وحكاية الموبيل ديه علشان متدخلش تصور التسيب اللي جوه ولا الانتهاكات اللي جوه
ولا القرف اللي جوه يعني لمصلحتهم وياريته نافع
برده بيتصوروا واتفضحوا ولسه هيتفضحوا كمان وكمان

مدونه لذيذه
واديك خلتني افضفض من اول زياره

اسيره الاحزان يقول...

هم يضحك وهم يبكى ...هما لازم يقرفونا فى عيشتنا فى كل حاجه عشان محدش يفكر انه يبلغ عن اى حاجه ويقول انا مالى ... عايزينا نبقى خرس.. فلازم يقرفونا

واحد من العمال يقول...

السلام عليكم

معلش ياعمرو أصل مصر عيانه أى والله عيانه وربنا يشفى قول أأأأمين

ودمت بخير حال

طلباوي يقول...

صراحة مش عارف أقول ايه معنديش حاجة أقولها

حاجة بيخة خالص

بس معلش

عمرو يسرى يقول...

rosie
المدونه نورت بيكى
عندك حق فعلا مافيش حاجه بتتعمل بالساهل
اتمنى تنورينى دايما

عمرو يسرى يقول...

emadiab
المدونه نورت بيكى
والله مش عارف اقسام الشرطه معموله ليه ربنا يكون فى عونا
اتمنى تنورنى دايما

عمرو يسرى يقول...

علاء سالم
المدونه نورت بيك
والله عندك حق
بس اعتقد حكايه انهم منشغلين بتظبيط الانتخابات ديه لا بردوا لان تظبيط الانتخابات خلاص اتحفظ وبقيت تتظبط بشكل روتينى وشويه شويه هيبقى التظبيط الكترونى ههههههه
اتمنى تنورنى دايما

عمرو يسرى يقول...

ايه رايك
المدونه نورت بيكى
اعتراضك مقبول واحترمه
اسعدنى ان المدونه عجبتك
واتمنى تنورينى دايما وتفضفضى معايا

عمرو يسرى يقول...

اسيره الاحزان
المدونه نورت بيكى
ربنا معانا
واتمنى تنورينى دايما

عمرو يسرى يقول...

واحد من العمال
المدونه نورت بيك
امين يارب
اتمنى تنورنى دايما

عمرو يسرى يقول...

طلباوى
المدونه نورت بيك
اتمنى تنورنى دايما

Follow by Email

Tetris